VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

sexta-feira, 3 de fevereiro de 2012

Introduz Lian Materna: Hanoin Diak Ida, Maibe Presiza Komitmentu, Preparasaun no Rekursu

João Noronha

UNESCO nee iha kolaborasaun ho SIL (Summer Institute of Linguistics) hodi hare kona-ba asuntu lian no kultura iha paiz sira. SIL nee mos uluk iha sira nia misaun iha Indonezia (sentru ida iha UNHAS Makassar) no sira foku ba iha peskiza lian lokal no kultura, no hodi tulun halo tradusaun mensajen Maromak nian (biblia) ba lian lokal sira.

Iha Hamutuk ho UNESCO sira mos halo peskiza barak no hodi fo hanoin ba UNESCO katak iha buat barak mak bainhira hato iha lia ida-idak nian, ne efetivu liu. Izemplu, alfabetizasaun mos presiza halo iha lian lokal no tuir kontekstu lokal atu fasil ba ema aprende. Tuir lolos nee mos buat ida diak/la sala. Talvez ke ba paiz ida-idak atu implementa hanoin ida nee mak tenke hare mos ba iha kondisaun rai ida-idak nian ou tenke sukat mos ba aspeitu sira nebe mak atu bele apoiu nia implementasaun.

Aspeitu importante nee ida mak sosiedade sivil, nebe sai nudar parseiru governu nia iha implementasaun. Tuir lolos ne relasaun entre komponente estadu/governu nian no sosiedade sivil ne tenke diak atu hodi bele tulun implementasaun ba to baze nee ho didiak.

Agora ita rona tan katak governu atu loke tan eskola infantil sira iha kada bairu, nee sei presiza orsamentu no rekursu atu apoiu ba hanoin diak ida ne. Ba hau, governu iha ona politika nee, governu mos tenke iha komitmentu atu halao buat nee. Tenke konsistensia ho politika nebe kria ona. Izemplu, se edukasaun sai prioridade, orsamentu ba edukasaun mos tenke tau a’as. Tamba edukasaun ne kobre buat bar-barak. Problema mak ita hare katak, ho buat oi-oin nebe mosu, halo Minieteriu Edukasaun nee sai hanesan iha bahasa Indonezia dehan, "besar pasak daripada tiang" ou "nafsu besar, tenaga kurang". Nee katak ho rekurusu ida limitadu, maibe hakarak halo buat hotu. Prioridade lolos mak ida nebe? Hotu-hotu mosu mai hanesan prioridade. Politika ho programa sira balun implementa no sei iha dizafiu bar-barak mosu, no seidauk hadiak, ita hamosu tan fali ona buat foun seluk. Governasaun ida nia periudu ukun lolos ne tinan hira? Ita la bele iha ambisaun bot hakarak halo buat hotu-hotu iha tinan itoan deit nia laran. Merenda eskolar lao oin sa? Dezenvolvimentu lian Tetun to iha nebe? Kurikulum oin sa ona? Formasaun profesor sira nia problema los ona? Eskola bazika tinan 9 nusa ona? mosu tan eskola referensia, agora mosu tan lian materna.

Kestaun mak ne, katak buat sira ne hotu diak, maibe rekursu atu apoiu implementasaun sira ne mos nanaton ka lae? Izemplu, loke tan eskola referensia, maibe nusa mak la kria insentivu diak ba profesor sira, hanesan aumenta sira nia kapasidade no hasae sira nia vensementu 100% mos la iha buat ida, naran katak sira bele ho esperitu makaz no ho laran duni hakarak konrtibui ho diak ba eduka ita nia oan sira. Se profesor ida manan $120 fulan ida, nia salariu hasae 100% mos nia foin manan deit $240 kada fulan. Maibe ne atu ba eduka ema barak. Iha ne ita bele hare valor osan. Kompara to’ok ho advisor Timor oan ida, kaer pasaporte rai liur no manan liu $10,000 kada fulan, ho tan fasilidade oi-oin, maibe dala barak 50% husi sira nia tempu iha hela facebook nia oin deit hodi trata malu. Ida nebe mak valor liu? Tuir lolos ou diak liu advisor sira ne nia osan bele hamenus hodi selu aumenta ba profesor nain hira nia osan para atu hodi bele eduka ho diak ba ita labarik sira.

Ema UNESCO sira iha hanoin diak, maibe dalaruma sira la bele hatene paiz ida-idak nia kondisaun no kapasidade atu implementa hanoin diak nee. Paiz ida-idak nia ema sira nebe iha kompetente nee mak tenke tuir lolos sukat sira nia kbi’it. Simu tan hanoin foun ida nee diak, maibe ita prontu atu implementa ka lae? Lao tuir pasu no sukat ho ita nia kbi’tt atu hala’o, nee mak hau hanoin diak liu ona karik.

Abracos...

Sem comentários:

Enviar um comentário

Nota: só um membro deste blogue pode publicar um comentário.