VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

quarta-feira, 29 de fevereiro de 2012

Hanorin ‘Língua materna’: Benção ka Maldição (II)

II Parte

Aplikasaun Lian-inan iha Ensino básico

1 - Iha assunto Lian-Inan, sá-ida ita bele haré, iha ita nia sosiedade laran, maka, ema balun buka jera konfuzaun iha ema barak nia ulun. Problema fundamental maka: hanorin lian-inan ka hanorin ho lian-inan.

(Ha’u afirma katak ema balun buka jera/hamosu/kria konfuzaun iha ema seluk nia ulun, tamba sira hatene hela kona ba assunto ida né; maibé, atu hatudu sira nia matenek, sira buka dalan nebé, sira hanoin, foti sira nia naran bá ás liu no foti sira nia futar oin ba nabilan nebé hakta’uk ema hotu, iha público... hodi hakilar, hodi buka impede de forma violenta debate democrático ida! Tuir psicologia, ema ida nia comportamento iha público, bele hatudu ninia carácter no mós bele hatudu ninia comportamento loro-loron iha uma-laran! Liu-liu hatudu, ninia estado mental - saudável ka moras, konfuzu no fechado ka klaro no aberto!)

Ema barak mós komesa hanoin katak sei hanorin Lian-inan, husi pré-escolar to’o Universidade (!?!?!). Hanoin ida ke subjectivo liu!!! Tan né, balun husu: ‘prioridade iha nebé? Prioridade atu hanorin lian português ka atu hanorin fali Lian-Inan’?

Ema sira nebé husu hanesan né, sira hanoin katak mestres sei sira hanorin Lian-inan hotu-hotu, nebé ita iha, iha eskolas tomak iha ita nia Rai Doben laran! Hanoin ida, ita bele temi, melodramático oitoan!

2 - Balun fali, temi oportunidade igual, conceito ida nebé furak no ita hotu gosta atu aplika. Sira defende ‘oportunidade igual’ ba ema hotu-hotu, katak se iha fatin balun hahú hanorin ho tetum, hotu-hotu tenki hanorin ho tetum, katak mós se iha klasse ida, balun hahú ona português, hotu-hotu tenki hahú ho português.

Maibé, ita buka took hanoin hamutuk kona ba sentido ba liafuan ‘oportunidade igual’ ba labarik/estudantes sira! Iha tinan kotu-kotuk, ha’u rasik mós hanoin katak, labarik sira la bá escola, labarik sira desiste/la kontinua escola, tamba ‘problemas económicos’ família nian – inan-aman sira la iha kbit atu haruka oan sira bá escola (desigualdade de oportunidades)! Maibé, depois de hasai tiha política gratuitidade ba labarik hotu-hotu atu, obrigatoriamente, ba escola durante tinan 9, sei akontese nafatin: iha desistência barak nafatin, liu tiha tinan 4/5 labarik barak seidauk bele lê ho diak, no bele hakerek, seidauk bele konta ho diak, no bele halo konta.

Bain-hira ema temi kona ba violência doméstica, hotu-hotu ka’et ba ‘mentalidade’, ‘tradisaun’... no hasai discursos mesak kapaz kona ba ‘barlake’, hodi dehan katak, tradisionalmente, feto la iha folin. Maibé, kona ba fenómeno nebé relasiona ho labarik sira, ita haluha tiha katak, iha fatin barak, inan-aman sira (agricultor/camponês) bain-hira sira haré katak sira haruka oan sira ba escola, maibé se la aproveita buat ida.... diak liu, sira hela iha uma atu ajuda – mane-oan sira, iha to’os ka natar ka hein karau ka bibi, labarik feto sira hodi ajuda inan, te’in, hili ai, kuru bé, dasa uma laran.

Tan né, ita tenki haré ona ba aspektu importante ida né: oportunidade nebé hanesan atu alunus sira bele RONA-KOMPRIENDE-ASSIMILA-ABSORVE matérias ka assuntos nebé professores/mestres sira FÓ-HANORIN-KO’ALIA ka HATETEN- TRANSMITE... ba kosok-oan sira! Sé iha fatin balun, alunus sira bele komesa lê, iha tinan rua nia laran, ita labele permite katak, iha fatin seluk, alunus sira seidauk hatene lê iha tinan hat nia laran. Iha né, mak ita temi ho propriedade (= ho sentido nebé lós) ‘tenki fó oportunidade nebé igual ba alunos sira hotu’... iha Literasia: atu hatene lê, atu hatene hakerek, no iha Numerasia: atu hatene konta no halo konta... iha tempo no kondisoens hanesan. ‘Kondisoens hanesan’, né relasionadu ba kosok-oan sira, oin-sá sira mós bele aprende ho diak.

3 - Nuné, hodi kompriende katak Lia-Inan sai deit nudar meio ka veíkulu/instrumentu atu hanorin, (ho liafuan seluk : Hanorin ho Lian-inan), ita passa ba kestoens nebé ka’et ba ponto ida né:

- hanorin sé

- hanorin sá-ida

- tamba sá

- iha nebé

- sé maka hanorin

- hanorin oin-sá

a) Warik-oan sira tama eskola ho tinan 5, tinan 6! Iha fatin barak, sira la hatene tétum. Loro-loron, ema hotu-hotu ko’alia deit mak sira nia Lian rasik. Sira hatene ona sasán barak nebé hale’u sira, tamba inan-aman sira temi, tamba sira haré, sira kaer... LABARIK SIRA NÉ FOIN ATU HAHÚ ... aprende!

Hanorin sé? Hanorin labarik sira nebé foin tama escola!

b) Hanorin sá-ida? Tamba foin mak labarik sira tama eskola, sira hasoru buat foun: hahú fonética, hodi lori sira ba hatene lê, no neineik buka hakerek letra ida-idak no liafuan simples no badak ruma. Iha faze ida né, labarik sira assimila diak liu, kuando lian nebé sira rona bele liga ho buat nebé sira hatene... ho sira nia lian rasik. Nuné mós, iha numerasia, sira hahú konta no, neineik aprende halo konta. Labarik sira bele assimila lalais liu, bain-hira sira simu buat foun sira né, ho sira nia lian rasik.

c) Tamba sá, maka tenki hanorin ho lian-inan? Né la ós perde tempo? Bain-hira ita temi ‘perde tempo’, sé maka lakon tempo né?

Se la uza lian-inan, professores sira perde tempo tomak, hodi traduz sá-ida mak sira lê ba alunos sira, husi TETUM ba LIAN-INAN. Tamba sá? Iha razaun rua: ida, se professor la traduz, alunus sira tur rona deit, sai passivo liu, sira nia kakutak la la’o; kuandu professor traduz ona, alunus sira fó atensaun ba aula, akompanha ho diak sá-ida mak sira rona, tamba kompriende.

Se ita obriga professores sira atu ko’alia no hanorin deit ho tetum, alunos sira mak sei lakon tempu naruk (tinan 4 ka 5 tan) atu bele lê no hakerek ho diak.

d) Hanorin iha nebé? Iha fatin sira nebé, kosok-oan sira uza deit sira nia Lian-inan, iha sira nia moris loro-loron. Ita bele dehan: maibé, iha fatin balun, labarik sira ko’alia mós tétum. Pois, ba labarik sira né, uza ona tétum!

Iha né, ita hasoru dilema kona ba: oportunidade igual! Ou hanorin hotu ho tetum ou hanorin hotu ho lian-inan. Se hanorin hotu ho tétum, sira nebé uza deit lian-inan hetan: desigualdade boot iha oportunidades! Sira sei la aprende ho diak, sei atrasa kompara ho sira seluk, sei passivo iha aulas no sei desiste. Ida né mak ita hakarak? Ka, ita hakarak fó ‘oportunidades nebé hanesan’ atu labarik sira aprende, bain-hira sira hahú eskola?

Objectivo Estado nian maka sa-ida? Iha médio prazo, labarik hotu-hotu, iha Timor-Leste laran tomak, tenki hetan 9 anos de escolaridade!!!

e) Sé mak hanorin? Claro, professores sira! Professores balun dehan katak “se ami, ‘makasae’, transfere ba Laklúbar, ami tenki aprende fali ‘idaté’, atu hanorin ho ‘idaté’?” Hanoin nuné, hanoin la lós; sé maka hanoin nuné, nia iha kedas ona ‘asumpsi’ katak, iha Laklúbar mestre la iha kedas, iha Laklúbar ‘buta uruf’ hotu ona! Ou, sira tau problema hanesan né: “ami, ‘makasae’, hatene hotu tetum, transfere ba Laklúbar, ami nia oan sira tenki aprende ho ‘idaté’?” Iha né mós, ita hetan ‘asumpsi’ ida seluk: iha Laklúbar, la iha kedas ona ema no labarik sira nebé hatene ‘tetum’!!!

Atu hanorin ho Lian-inan, ita lalika importa professores husi rai seluk!

f) Hanorin oin-sá? Tamba ita hakarak ita nia sistema ensino/sistema hanorin centralizado ba aluno, katak alunu mak sai nudar ita nia fokus, nudar centro ba ita nia actividades hanorin, alunus nia kbit atu assimila/absorve mak muda ita nia metodologia pedagógica.

Iha tinan dahuluk, transmissão fonética ho contagem, husi professores, tenki ho lian nebé alunus/warik-oan sira simu kedas/fasilmente – iha Literasia no Numerasia.

Iha tinan daruak, alunus sira iha ona kbiit boot atu hakerek no lê liafuan sira, ligado ho sá-ida mak sira haré loro-loron, ko’alia loro-loron. Nuné mós, sira komesa ona operasoens matemáticas ho soma, ho subtracção... Iha né, bele mós ona hahú ho lian tetum balun...

Iha tinan datoluk, tetum sai intensivo liu tan, nudar passagem ona husi lian-inan, iha literasia no numeracia. Sira iha kbiit boot liu ona atu lê frases... ho tetum.

Iha tinan dahat, tétum deit ona; iha tinan dalima, hahú daudauk ho português!

Ho explicação ida né, ha’u sinti, maluk balun sei dehan: Lakon tempo! Ha’u husu fila: Professores mak lakon sira nia tempo? Estado selu hela sira atu hanorin! Alunus mak lakon tempo? Ita tenki HUSIK tiha método halo Estatística kona ba ‘alunos hira mak tama eskola’, ‘alunos hira mak passa’! Ita TENKI comesa haré ba método foun ida nebé fó atenção ba ‘alunos sira kompleta tinan 9 eskola, ho diak ka lae’!

4 - Maluk balun bele dehan katak, iha Rai barak, ukun-an kleur ona, foin mak sira hahú, né duni, diak liu ita husik ba tinan sanulu ka tinan ruanulu tan, mak bele hanoin ida né! Pelo contrário - Iha tinan 2010, Governo hala’o ona Censos! Iha ona 2011, Governo fahe ba sukos hotu-hotu, resultado censos ba Nação tomak no suku ida-idak nian! Kona ba população Timor-Leste nia uza ka ko’alia Lian sá-ida, iha Censos hatudu momós ida né!

Censos mós valida tebe-tebes programa ‘hanorin ho Lian-inan’ – projecto né moris iha 2010, tamba ita tenki tau matan ba aspectos hotu-hotu, nebé relacionados ho Educação. Programa ida né haré ba educação ba labarik sira, nebé foin atu tama escola. Agora, mak tempo nebé oportuno atu hahú programa ida né. To’o bain-hira? Tempo mak sei fó sai, katak bain-hira, povo tomak ho sira oan sira tomak koalia ona tetum (nebé lós), programa kala sei pára! AGORA mak TEMPO LÓS atu HAHÙ!

5 – Kona bia Lian-inan hotu-hotu, Estado mós tenki tau matan, hodi labele lakon deit, hanesan iha rai selu-seluk. Ha’u halo apelo ba ema hotu-hotu nebé iha vontade no tempo, atu hakerek Timor nia lisan, nia lendas, nia histórias, ho ita nia Lian-Inan ida-idak, hodi hariku no hametin ita nia IDENTIDADE CULTURAL! Lae, ita nia idantidade kultural mak ‘Tebe’, ‘Dahur’ – no buat rua né mós komesa atu lakon ona! Lae mósi, ita nia identidade mak hatudu deit katak ‘Tais husi Suai’ la hanesan ho ‘Tais husi Oekusi?’, ‘Tais husi Manatuto’ la hanesan ho ‘Tais husi Los Pala’.

Dia 21 de Fevereiro – Loron Internacional ba Lian-Inan! Ha’u la husu ‘workshop’ ka ‘konferensia’ ka cerimónia ruma – ha’u husu deit ba Timoroan ida-idak, iha loron ida né, tamba ema hotu-hotu ohin loron ‘sibuk’ tebes, fó netik segundo/detik oan ida atu hanoin, ho nia Lian-Inan rasik, no ko’alia ba Matebian no Bei-Ala sira hodi tulun ita:

- hametin tolerância no domi

- hametin estabilidade no dame

Iha TINAN 2012, nebé sei nakonu ho actividades oi-oin!

Kay Rala

Sem comentários:

Enviar um comentário

Nota: só um membro deste blogue pode publicar um comentário.