VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

segunda-feira, 1 de agosto de 2011

DADA-LIA ho estudante partisipante timoroan sira iha primeira Olimpiadas de Matematica da Lusofona



Aluno timor-oan na’in hat (4) mai husi Escola Portuguesa no Escola Externato de São José Dili, partisipa iha Campeonato de Matemática de Lusofona promovida husi Departamentu Matematika Universidade Coimbra (UC) no Sociedade Portuguesa Matematika Universidade Coimbra. Partisipa iha Campeonato ne’e alunos ruanulu resin hat (24) husi nasaun CPLP (Comunidade dos Países da Língua Portuguesa: Portugal, Angola, Moçambique, Cabo-verde, S. Tomé e Príncipe, Guine Bissau, Timor-Leste).

Tuir mai ami (Korespondente Forum Haksesuk iha Coimbra) nia DADA-LIA (husu no hatan) ho estudantes na’in 4 (Maria Jose Sarmento, tinan 11, husi Escola Portuguesa de Dili, Felisbela Caldas, tinan 17, husi Escola Portuguesa de Dili, Joraida Guterrres Perreira, tinan 17, husi Escola S. Jose, Victor Viegas, tinan 13, husi Escola S. José), nebe ho orgulho representa Timor-Leste iha Campeonato Matemática de Lusófona tinan ne’e (2011).

FORUM HAKSESUK (FH): Oinsa imi nain 4 sente reprezenta Timor-Leste iha Olimpíadas de Matemática da Lusófona nebe promove husi Departamento de Matemática e husi Sociedade Portuguesa de Matemática da UC?

Maria José Sarmento: Hau sente hau iha sorte bo’ot no kontente tebes, tamba ne’e primeira vez hau bele mai representa Timor iha Campeonato Matemática de lusófona.

Felisbela Caldas: Hau sente kontente loos no hau tauk uituan tamba ne’e la’os hodi de’it hau nia naran maibe hodi Nasaun nia naran, ne’e hanesan responsável bo’ot ida e hau kontente los bele hodi Nação nia naran mai tuir kampeonatu ne’e.

Joraida Guterres Perreira: Hanesan kolega sira dehan tiha ona, ida ne’e mai ami orgulho teb-tebes tamba primeira vez partisipa iha Olimpiadas Matemática Lusófona nebe partisipa husi nasaun walu (8) i hanesan hau nia kolega na’in rua dehan tiha ona; ne’e orgulho ida ba ami reprezenta Timor iha kampeonatu ne’e maske ami sente todan maibe ami tenke halo buat ruma nebe diak ba ami nia rain.

Victor Viegas: Hau mos sente kontente tamba bele mai Portugal i bele kompete ho nasaun sira seluk i halo kolega ho sira, i depois bele tuir kursu iha ne’e, kursu nebe iha hau nia escola iha matéria que ami nunca hetan.

FH: Actividades sa’ida deit mak imi hetan ka hala’o durante Campenato ida ne’e?

Felisbela Caldas: Durante Campeonato ne’e ami tuir curso ka aulas, resolução de problemas sobre matemática, i depois tuir prova no ami mos halo visita de estudo ba iha Porto.

Joraida Guterres Perreira: Iha curso matematica ne’e ami aprende buat barak nebe ami seidauk hetan iha Timor i ho aulas nebe ami hetan iha ne’e ami bele aprende e aumenta ami nia kapacidade hodi tuir prova matemática durante Campeonato ne’e nia laran.

FH: Imi Sente dificuldades durante tuir Campeonato ne’e?

Maria Jose Sarmento: Balu, ami sente dificuldade uituan, tamba exercício balu ami seidauk simu iha ami nia escola, mas ami consegue ultrapassa depois tuir ka hetan Curso durante Campeonato nia laran!

Felisbela Caldas: Hetan dificuldade uituan tamba matéria nebe sira fo matéria nebe que klaran tiha ona i ami la consegue kapta maibe professor mos ajuda fo fali matéria husi inicio, i ho ida ne’e ami foin bele akompanha.

FH: Oinsa ho imi nia hare ba participasaun estudantes sira husi rai seluk CPLP nian, nebe participa ho imi iha Campeonato Matemática Lusófona ne’e?

Joraida Guterres Perreira: Tuir hau nia hare, Brasil ho Portugal ne’e participa bebeik ona iha Campenato seluk ne’ebe sira iha ona experiensia barak relasaun ho kampeonatu, enquanto ba ami ne’e foin primeira vez participa iha kampeonatu hanesan ne’e. Ami sente difícil, maibe kolega sira husi rai seluk, hanesan Brasil ho Portugal ladun sente dificuldade hanesan ami sente, mas ho kampeonatu ida ne’e ami hamutuk halo amizade nebe diak i dala ruma mos ami ajuda malu iha relasaun ho matéria nebe ami hetan. Por exemplo, quando ami iha dúvida sira ajuda fo explikasaun.

FH: Dala barak ita rona katak iha Estudante ou alunos balu mak dehan katak Matematica ne’e disciplina ida que difícil tebes i sira la dun gosta ba disciplina ida ne. Oinsa imi hare kona ba ida ne’e, imi concorda ho sira ka lae?

Victor Viegas: Sim, hau mos concorda ho sira tamba matemática ne’e difícil dunik, maibe ba hau matemática ne’e ita tem que comprende liu.

Joraida Guterres Perreira: Matematica ne’e matéria ida que difícil dunik, maibe ba ema nebe mak iha gosto ba matemática ne’e, masque difícil, nia sei halo esforço para matéria ne’e bele sai fácil ba nia. Ne’e depende fali ba ita ida-idak, se ita gosta matemática ita bele ou sei hakarak liu tan aprende matéria ne’e, precisa deit ita nia vontade iha, para bele ultrapassa dificuldade ne’e.

Felisbela Caldas: Hau la concorda tamba Matematica ne’e hau sente la difícil ida, só que sira mak falta treina iha uma durante sira nia estudo, depois tuir hau nia hanoin ne’e durante iha sala laran ita tenki toma atenção tamba dala ruma iha alunos balu mak falta atenção, distraída i conversa barak liu iha sala e balu dehan tan Professor sira mak la hanorin diak. Hodi ida ne mak sira dehan katak matemática ne difícil mas sira rasik mak lakohi aprende i falta atenção durante iha aulas laran, falta treino. Tamba ne’e hau la concorda ida.

Maria Jose Sarmento: Hau mos la concorda ho opinião ne’e, tamba Matematica ne’e importante mak ita nia compreensão, ita tenki iha concentração iha sala laran, ita tenki rona saída mak Professor sira fo durante aula nia laran. Tamba matemática ne difícil mas se ita hola atenção ba matéria nebe Professor hanorin ita sente matemática ne’e fasil.

FH: Tamba imi hotu reprezenta ita nia Nasaun iha Campeonato ne’e, mensagem sa’ida mak imi hakarak transmiti ka hato’o ba imi nia kolega sira no mos ba ema hotu nebe mak horas ne’e acompanha no assiste maske do’ok ka besik assite imi nia participação?

Felisbela Caldas: Muito obrigada tamba hili ona hau ho kolega na’in 3 ne’e hodi reprezenta ita nia rain Timor iha Campeonato ne’e. Obrigada mos ba apoio nebe ami hetan husi Governo, família no mos colega sira hotu, i ami husu deskulpa se ho resultado la halo imi kontente mas atu dehan deit katak, ami halo tuir ami nia bele, tuir ami nia kapasidade nebe iha, hodi tenta máximo possível.

joraida Guterres Perreira: hanesan hau nia colega dehan tiha ona, primeira vez ami participa iha campeonato ne’e, ami husu desculpa mos se labele satisfaz imi hotu ho resultado campeonato nian ne’e, mas pelo menos ami inicia ou começa tiha, espero que tuir fali mai ou próximo campeonato colega sira seluk bele participa e bele avança liu tan hodi bele halo diak liu tan ami, e ba colega sira seluk nebe la dun gosta matematika hare koko hodi estuda e tenta gosta matemática. Obrigada mos apoio husi colega sira hotu to’o ohin loron ami bele too ona Portugal, ami halo ho máximo possível e obrigada dala ida tan ba apoio.

FH: Ho campeonato ida ne, sa’ida mak imi hakarak lori ba Timor?

Felisbela Caldas: Experiencia nebe ami hetan, matéria foun nebe ami hetan durante campeonato ne’e hodi bele aplika iha Timor, amizade nebe ami hetan husi kolega sira seluk husi rai seluk.

FH: Ne’e hanesan ba dala uluk Departamento de Matematica da UC halao campenato entre Paises da CPLP, imi hanoin campeonato hanesan ne’e persija halo mais vezes? e imi hanoin campenato ne persija mos halo iha área seluk hanesan por exemplo, iha área ciência, Quimica ou Lingua Portuguesa hanesan ita hotu hatene katak Lingua portuguesa ne ita nia língua oficial hotu?

Felisbela Caldas: Hau sente ne’e ideia ida que furak tebes tamba alem de ita tuir curso, alem de ita hetan experiencia foun, hala’o amizade ho colega sira husi nasaun sira seluk nebe sira nia língua oficial hanesan mos ita nian, hau sente tem que promove tan programa hanesan ne’e e hala’o tan mais vezes, laos deit iha Matemática maibe hala’o mos iha área seluk hanesan campeonato língua portuguesa, ciência e etc.

FH: Ho pergunta nebe hau foin husu dadauk ne’e, imi iha mensagem nebe hakarak hato’o ba ita nia Governo Timor-Leste, liuliu Ministério da Educação para iha Timor mos hala’o campenato hanesan ne’e por exemplo campeoanto matemática, lingua portuguesa, Ciência no sst.?

Joraida Guterres Perreira: Hau husu ba Governo Timor liuliu ba Ministério da Educação se bele karik tinan ida dala ida, por exemplo, bele hala’o mos olimpíada matemática entre escolas hotu hotu iha Timor para bele aumenta experiência estudantes sira nian para quando mai participa iha nivel internacional karik bele prepara diak liu tan, mas campeonato ne laos deit iha área matemática mas se bele hala’o mos campeonato iha área seluk, hanesan língua portuguesa, ciência, física, para estudantes timor-oan mos bele halo buat diak ruma ba ita nia rain, sira bele prepara ho diak hodi loron ida bele participa iha campenato nível internacional hanesan amai tuir dadauk ne’e.

Victor Viegas: Hau mos hakarak Governo atraves husi Ministério da Educação haruka nafatin timor-oan participa iha olimpíadas hanesan ne’e, ne’e para bele hetan experiência e hein katak olimpíada ne’e sei halo iha Timor.

Maria Jose Sarmento: Husu ba Governo para bele apoio tan estudantes Timor hodi bele mai tan, tamba hau sente ida ne’e seidauk diak, tem que halo tan mais vezes pelo menos bele halo iha Timor entre Escolas hotu hotu iha Timor Laran. .

Felisbela Caldas: Para prepara diak liut tan estudantes timorenses, hau hakarak los Governo Timor hala’o Projecto ida nebe prepara timor-oan diak liu tan hodi tuir olimpiade hanesan ne’e.

Entrevista: Sandra de Jesus (A correspondente do Forum Haksesuk em Coimbra) e Arlindo Fa Fernandes (Co-editor, Programador i Designer Grafiku Forum Haksesuk). Edição e Fotografia: Forum Haksesuk. Data: 28/7/2011.

Sem comentários:

Enviar um comentário

Nota: só um membro deste blogue pode publicar um comentário.