Pasu positivu ba Timor-Leste iha ninia kompania Mina Mesak

Dili. Tuir Deputadu Arao Noe, husi bankada CNRT, pasu positivu ba Timor-Leste iha ninia kompania mina rasik, hakerek Jornal Nacional Diário (JND) iha nia edisaun ohin (30/05/2011). ”Ne’e pasu positive ida ba Governu AMP halo, konaba hari’i tan kompania nasional Timor Gap”. Haktuir tan Arao Noe, ”Se ita hare ba ita nia Nasaun, hanesan buat nebe ita nia Primeiro-Ministro apresenta husi Planu Estrajekiu Desenvolvimentu Nasional (PEDN), ne’e katak, Timor laos ona Nasaun argikultura, maibe nasaun produtor mina, tanba husi estudus barak hatudu, ita iha mina barak,ita tenki iha kompania mina rasik, hanesan Malaysia, Petronas, Indonesia, Pertamina no nasaun sira seluk mos hanesan, sira iha posu mina no sira iha kompania atu bele explora rasik sira nia mina”, haktuir deputado Arao Noe.

Tenik tan Deputado Arao Noe, ba JND, ”Timor agora labele ona hanesan, han ruin no ema seluk maka han isin, ne’ebe labele ona, ne’eduni Timor oan tenki esplora rasik nia riku no soin”.

“Ita hanesan nasaun ne’ebe foin harii no kompania ne’e mos foun, esperensia sei fraku, importante ita bele halo joint, maibe ita maka tenki kaer jestaun, katak, ita tenki iha harga tawar, tanba ita hamrik hanesan kompania ida. Hau mos husu atu aumenta nafatin kapasitasaun ba rekursus umanus iha area mina nian, nuene’e sira bele kaer kompania ne’e diak ba oin”, haktuir Arao Noe deputadu husi bloku AMP.

Fonte: Jornal Nacional Diário (JND),
edisaun Segunda-Feira (30), pajs. 1 e 15!