Mau JUDAS

Anacleto da Costa Ribeiro*

Figura kontroversial ida iha tempu Quaresma tuir Testamentu Foun nian maka Judas Iscariotes, dixiplu ida neebe halo traisaun ba Nai Jesus. Ita mos hahu hamanas tenda ona molok festa demokrasia 2012 ho problema UNTAS neebe halo universitariu sira hakilar no ita nia PM dehan katak sira neebe sukit asuntu nee hanesan “ema sira neebe laran metan ba nasaun.” La’os nee deit, ita mos sukit malu, sura malu no kesar malu ho asuntu sira seluk. Se lo’os mak ‘Judas’ iha Timor-Leste?

Tempu Kuaresma hanesan biban diak ida ba sarani sira atu halo reflesaun. Ba lider politiku Timoroan sira neebe notabene sarani diak tempu Kuaresma nee mos hanesan biban ida diak atu halo reflesaun ba sira nia a’an rasik. Hakribi sala hotu hodi bele hadia a’an ka transfigura hahalok, muda mentalidade hosi karakter Judas ba karakter lider politiku ida diak, hosi figura triste ba figura ida diak liu.

Traisaun ba nasaun TL mosu bainhira Timoroan ida iha intensaun ho konsiensia tomak atu hamonu nasaun TL liu hosi dalan oin-oin hanesan kria instabilidade no halakon ema seluk nia direitu atu moris hakmatek. Nia halo traisaun tanba nia rasik kontra valores no prinsipius ukun rasik a’an neebe nasaun ida nee hahii no hauelok. Nia han tiha iha ita nia bikan laran nia fila te’e fali iha ita nia bikan laran. Ida nee mak hahalok Judas Timor-Leste.

Ita hahuu hamanas tenda ho sukit malu konaba isu UNTAS neebe halo estudante sira hakilar no hatudu liman ba membru governu balu neebe nia naran iha lista estrutura UNTAS nian nudar traidor ba nasaun. Evidensias tuir mai hatudu katak estudante sira nee inosente tanba sira hakilar molok buka hatene ka halo analiza klean uluk ba lista nee lo’os no orizinal duni ka lae. Asaun ida nee hatudu UNTL sai ona hanesan fatin ba halo politika praktis. Deskonfia iha Mau Judas balu uza kampus atu halo politika praktis liu hosi estudante balu iha UNTL.

Hare situasaun hahuu manas ona no ema ezizi dirijente UNTL tenke hola responsabilidade selae ema lori sira ba tribunal maka teki-teki Magnifiku Reitor UNTL deklara katak UNTL laiha koinesimentu ba asaun ida nee alias fase liman. Astagfirullah…! Hein katak hahalok ida nee mos banati tuir hahalok Pilatus neebe fase liman ba Jesus nia kazu hafoin ema hedi Nia ba kruz. Ita iha ona Judas maibe seidauk too, agora ita iha tan Pilatos!

Maibe, Alhamdulilah..! Ita mos sei hare ezemplu diak neebe lider politika balu hatudu, hanesan Prezidente PN Lasama neebe husu deskulpa tanba ema seluk nia hahalok. Nia husu deskulpa ba media TVTL tanba membru CSP PNTL ida ameasa atu baku rahun TVTL nia kamera iha Uma Fukun. Nee mak lideransa ida diak. Lasama mos lakohi sai hanesan Pilatus neebe gosta fase liman bainhira ema husu nia responsabilidade atu hedi Nai Jesus ba kruz. Hau fiar katak Lasama mos hakarak manaan lalehan. Nudar lider politiku (Partido PD) nia fiar katak manan rai deit sei la too.

Ezemplu diak husu deskulpa nee hada’et lalais deit. Liu deit loron ida Komandante Jeral PNTL mos husu deskulpa ba nia elementu nia hahalok. Hahalok husu deskulpa nee diak tebes neebe lider Timoroan sira tenke banati tuir. Maibe husu deskulpa nee deit sei la too sekarik la hatudu kedas ho arependimentu no hakarak muda hahalok.

Ita hamanas tenda nafatin. Ita mos hare Timoroan sira hahuu sura kolen mos. Sekretariu Jeral Fretilin dehan sira mak halo uluk pensaun ba ferik katuas sira, maibe Vise Prezidente PSD nega hodi dehan katak sira mak halo uluk. Liu tiha loron ida, Bankada Fretilin hatan kedas hodi dehan katak sira mak maioria iha Asembleia Konstituante no vota ba aprova Lei Inan, needuni sira maka bele reklama buat ida nee. Ita sei run karau uat too bainhira?

Ikus fali ita rona fali isu UNTAS nonok tiha deit. Ida nee mak hanesan asu hosu. Seidauk hatene problema nia hun no dikin, hakfodak fali ita haksoit fali ba iha asuntu seluk. Ita hanesan asu kutun. Teki-teki, agora ita hotu-hotu rame-rame keroyok fali Vice PM, Jose Luis Guterres hodi lori nia hedi iha kruz no lori nia ba hatan iha tribunal tanba alegasaun halo abuzu poder. Kazu ida nee mos sei rame liu tan tanba sira neebe halo akuzasaun mos agora hetan akuzasaun hotu. Ministerio Publiku neebe lori Vice PM ba tribunal, agora ema du’un nia mos tenke ba hatan hotu.

Judas hatudu liman ba Judas no Pilatus sei fase liman. Ita sei bobar malu too iha neebe? Ita atu lori malu too iha neebe?

Maibe ho Vice PM ba hatan iha tribunal nee nia hatudu mos ezemplu diak katak laiha ema ida bele ses aan hosi justisa ka tribunal basa ema hotu-hotu hanesan iha lei nia oin. Nia Judas ka la’os Judas nee tribunal mak sei hakotu. Nunee mos Vice PM mos lakohi sai hanesan Pilatus tanba nia lakohi fase liman ba asuntu ida nee tanba nia nudar lider politiku ida nia hola responsabilidade ba asuntu ida nee. Hein katak lider politiku sira seluk mos lakohi sai hanesan Pilatos.

Maske laiha hun no dikin maibe ezizensia estudantes sira atu klarifika asuntu UNTAS nee iha buat ida diak, tanba ho ida nee bele fanu Estadu ita atu buka hatene lolos see los maka Judas ho Pilatus iha nee. Ita labele husik deit selae sai toman aat, ikus mai sei bele mosu tan lista foun ida neebe bele hatama membru Governu AMP hotu-hotu iha lista. Bele mos, sira neebe ohin loron hakilar mos nia naran bele tama hotu. Sira neebe ohin Santo aban bele sai fali Judas. Maibe ita presiza hanoin katak lista ida iha rai nee bele muda tuun sa’e ka bele falsu, maibe lista ida neebe iha Sao Pedro nia liman sei la muda tun sa’e. Lista Sao Pedro nian maka lista neebe orizinal no lo’os liu hotu.

Hau fiar katak sira neebe traidor duni ba nasaun TL sira sei ba hatan iha lalehan, liu hosi purgatorio. Se sira hakarak duni fa’an nasaun ida nee, entaun hau fiar katak bainhira sira mate sira sei ba hasoru Sao Pedro no sei dehan hanesan nee ba sira: “Halo favor ida lori ahi klak iha inferno nee lori ba halo o nia inferno ketak. Imi faan tiha ona Timor, imi keta mai fali iha nee, orsida mai faan tan fali inferno ida nee, hau rugi boot! (Keta hola ba lia, ita koalia halimar deit!).

Iha tempu ukun ida nee, ema barak mak hetan moras ida naran sura kolen. “Ami mak uluk luta, ami mak terus, ami mak halo ide nee, halo ida neeba, needuni agora ami tenke hetan ida nee, hetan ida neeba, etc.” Nee mak liafuan neebe ohin loron ita rona bainhira ema sura sira nia kolen. Se ita husu: “se mak uluk halo funu? Se mak veteranu? Ita sei hare katak difisil tebes atu hetan ema ida atu foti liman hodi dehan katak uluk nia la halo funu no nia la’os veternaru. Maibe ita mos iha sorte tanba sei iha lider balu hanesan Xanana neebe too ohin loron, se la sala, ita seidauk rona nia sura nia kolen ba nia luta ba nasaun ida nee. Tanba sira la sura nia kolen needuni mak bainhira rezolve problema nasaun nian, sira la sadere tuun sa’e. Sira kaer metin prinsipiu luta ba ukun rasik aan nia maske iha tentasaun barak mai hosi Judas sira iha nia sorin karuk no los.

Hau husu ita boot sira halo reflesaun konaba sura kolen nee liu hosi istoria badak ida hanesan tuir mai nee. Iha tempu neeba, iha 12 Novembru 1991 bainhira militar Indonesia oho joven barak, iha joven balu konsege halai subar. Iha momentu neeba militar sira duni hele joven ida neebe halai no nia subar hela iha ponte okos. Momentu nia haksoit ba subar iha pontes okos, Tio ai-leba faan modo ida hare hela nia subar fatin. Lakleur deit militar sira neebe buka joven nee mai husu ba Tio nee: “Tadi ada orang lari kesini, lihat nggak?” Tio hatan hodi dehan ba militar sira:” Saya tidak lihat Pak! Ho nunee militar sira mos fila no joven nee bele salva nia vida. Hau hakarak husu deit ba sira neebe gosta sura kolen: Tio Ai-leba nee mos luta ka lae? Tio nee mos bele sura nia kolen ka lae?

Buat sira nee hotu mosu tanba deit ita hotu nakdedar hela atu hasoru Festa demokrasia neebe besik ona. Nudar Timoroan ita gosta hamanas tenda. Nee hanesan toman ida naran katak keta hemu tua barak no lanu hafoin bele sobu ita festa demokrasia neebe ita hotu sei ba hamutuk halo rame. Ida nee hanesan teste ida ba lider politiku sira nia maturidade politika no konsiensia no vizaun ida ba nasaun Timor-Leste iha futuru.

Buat sira nee sei la akontese se ita hotu iha vizaun ida deit konaba ita nia nasaun TL. Ita hotu tenke hanoin katak ita hotu hela hotu iha uma ida naran TL nia laran. Ita hotu maka harii uma ida nee ho ita nia kosar be’en. Se ita hakarak sobu uma nee mak uma nee sei naksobu. Sei uma nee rahun maka ita hotu sei rahun.

Iha tempu liu ba, ita nia ukun nain balu hatan ba sira husu konaba partisipasaun partidu opozisaun iha nia governasaun nia hatan hodi dehan: “Ami sei la konvida ema seluk atu mai tuur hamutuk ho ami atu han iha meza nee”. Maibe buat ida neebe governante nee presiza hanoin katak maske ita la tuur han hamutuk iha meza ida maibe ita hela hamutuk iha uma ida deit. Ita mos tein iha dapur ida deit. Maske ami la ba tur han hamutuk iha meza ida ho ita boot sira maibe ami mak tein iha dapur ka serve aihan. Needuni, se ami sira iha dapur nee hakarak halo hanesan Judas, hodi tau netik ai-kulit ruma ba iha aihan, maka ita boot sira neebe tur iha meza sei tata rai hotu.

Nee atu hateten katak ita bele kedok malu tun sae maibe keta estraga interese boot liu nasaun nian. Ita bele tolok malu maibe bainhira ita haree katak ita nia hahalok sira nee atu bele estraga ita nia estabilidade nasional, maka diak liu ita tuur hamutuk hodi resolve ita nia problema ho ulun malirin.

Timor–Leste nia lider politika sira hatudu ona hahalok sira nia kbiit ida nee bainhira rezolve krize politika sira liu ba liu hosi hetan konsensu nasional. Kultura Biti Boot no Haraik Aan mak sai nudar abut ba moris politika no demokrasia Timoroan sira nian. Lalika tolan tomak deit valor no demokrasia neebe mai hosi tasi balu, maibe ita presiza tais didiak tanba malae sira barak mos sei hanesan bibi malae hela.

Lider politika sarani sira tenke aproveita tempu Kuaresma nee atu ba konfesa no halo reflesaun ba nia hahalok ba nasaun. Amo lulik dehan konfesa la’os hanesan bikan neebe lori hodi han, foer tiha depois fase mos fila fali hodi han fali. Dala barak ita ba konfesa tiha maibe ikus mai halo fali sala nafatin, nee ita la halo transfigurasaun ba ita nia hahalok. Hakribi ita nia hahalok Judas no hahalok Pilatos no nakfilak aan sai nudar lider politika ida diak ba nasaun TL. Hau beik sala, beik sala, ladiak liu! Amen.

*Vila-Verde