PM Xanana: Ema ne'ebe maka fahe dokumentus falsu konaba UNTAS laran ladun mos

Dili. Forum Haksesuk (FH). PM Kay Rala Xanana Gusmao, "ema ne'ebe maka fahe ka distribui lista naran UNTAS, hatudu katak ema ne'e laran ladun mos", kasu lia hirak ne'e ba jornalista sira hafoin surumutuk ho Prezidente Republika iha Palacio Aitarak Laran, Dili, Quarta-Feira (16/03/2011). Hatutan PM Kay Rala Xanana Gusmao, "relaciona ho kasu UNTAS, balun hahu soe ona isu katak CNRT atu loke dalan ba populasaun sira iha kampu refujiadu fila mai iha 2012 vota ba CNRT, maibe atu dehan deit katak CNRT iha votus suficiente". Konaba tendencia votasaun iha 2012, "husik ba povo maka avalia, se Governu Ukun diak sira vota nafatin, se ukun ladiak sira sei vota ba seluk. hanesan mos iha governasaun anterior, ukun ladiak povu julga iha eleisaun 2007", haktuir PM Xanana.

Tuir informasaun ne'ebe maka fo sai iha media, konaba falsifikasaun ba dokumentus UNTAS husi grupo balun hodi hatama naran membrus Governus no personalidades sira balun iha Timor-Leste. Jornal Nacional Diario (JND) iha ninia edisaun Quarta-Feira (16/03/2011) hatun versaun orijinal konaba Lista estruturas UNTAS rezultadu kongressu fulan Dezembru 2010. Hakerek JND, "Dokumentus UNTAS probaganda politika grupo ida nian (JND, 16/03/2011, paj. 1 no 15)".

Tuir Deputado Duarte Nunes, husi CNRT, Presidente Komisaun B, asuntu Seguransa no Defesa, "Wainhira ható ninia komentariu konaba dokumentus ne’e falsifikadu hodi sai hanesan material probaganda, katak ”nudar presidente ba Komisaun B ne’ebe kaer ba asuntu Defesa no Seguransa, preokupa duni ho isu konaba UNTAS liu husi dokumentus ne’ebe publiku sei duvida konaba ninia orijinalidade”. Tenik tan Duarte Nunes, Presidente Komisaun B Parlamentu Nasional, ”falsifikasaun dokumentus ho ninia objektivu maka kria instabilidade, nudar responsavel ba komisaun B preokupa ba kasu ne’e rasik”.

Husi parte Conselho Senado Estudantil-UNTL, hato sira ninia exijencia atu autoridades kompotentes sira tau matan ba kasu UNTAS ne'ebe maka oras ne'e infiltra ona iha teritoriu Timor-Leste. Petisaun ne'e asinatura husi estudantes hamutuk 22. Petisaun ne'e hato ba: Prezidente Republika, Prezidente Parlamentu Nasional, Primeiru-Ministru, Tribunal Rekursus, Prokurador Jeral Republika no CEMFA Maijor Jeneral Taur Matan Ruak.

Hatan ba estudante sira ninia petisaun, Prezidente Republika hato ba media sira katak, "nudar Prezidente Republika, preokupa liu ho estudante sira ninia aprveitamentu eskolares ba materias hanesan fisika, kimika, biolojia no ciencia sira seluk. Konaba kestaun politika husi ba politiku sira", haktuir Prezidente Ramos Horta.

Parte seluk sira nebe maka sai vitimas ba probaganda ne'e sei move precesu judicial kontra se maka defama sira nia naran, falsifikasaun ba dokumentus no intensaun ba harii instabilidade nasional. Tuir Pedro ne'ebe membru ba defesa haktuir katak, "sira iha tempo badak sei lori procesu ba Prokurador Jeral Republika hodi inicia ba investigasaun".

Tuir Naran sira ne'ebe maka mosu iha dokumentus falsu, mosu ho ninia versaun keta-ketak, iha fulan ida liu ba, ema sira be konsidere nudar membru UNTAS iha Timor-Leste, hakerek naran ho kargus kompletu. Versaun ida fali ne'ebe maka Conselho Senado Estudantil-UNTL nian hato, oin seluk fali ona, tau maka naran maibe sem kargu ka okupa kargus ruma!