Presidente Republika esklarecidu ona konaba OJE2011, hein atu promulga

Dili. Forum Haksesuk (FH). Iha sexta- feira (04/02/2011), Prezidente Republika, José Ramos Horta, bolu Governu, parlamentares sira, hodi husu explikasaun konaba rezultadu husi debate ba OJE2011, osan ne’ebe foti husi Fundu Petroleum excede ba 3%. Tuir Lei Fundu Minaria ka Fundo Petroleum (FP) iha ninia artigo 9 bele foti liu ka excede 3% wainhira iha justifikasaun. Husi proposta OJE2011 la ultrapassa 3%.

Tuir explikasaun husi Primeiru-Ministru (PM), hafoin surumutuk ho Prezidente Republika, katak, ”excede tamba proposta barak husi Parlamentu Nasional (PN) maka pasa ka aprovadu tamba iha justifikasaun, hodi foti tan osan ba selu retroativu ba Veteranus sira, sosa jeradoures foun ho marka Warsila husi Finlandia hamutuk 15”. Hatutan PM, ”Prezidente mos husu konaba kriasaun Ajencia Desenvolvimentu Nasional (ADN), explika witoan konaba objektivu konaba harii ADN ne’e, hodi defini kustus, halo kalkulus ne’ebe koresponde ho obras, defini Boq ho desenho, orientasaun ba profisionalismo ho orientasaun ba espertises iha areas ida-idak, tamba ne’ e maka harii ADN”, argumentu PM.

Iha surumutuk ho Prezidente Republika mos koalia konaba "iha OJE2011 osan bot duni, maibe hatun barak iha despesas rekorentes hanesan Bens e Servisus, Kapital Menor, Salario e Vencimento e transferencia publika”.

Iha OJE2011, hasa'e kapital desenvolvimentu (KD) nebe'e konsentra iha Fundus Infra-Estruturas (FE) no no formasaun ba rekursus humanus tau iha Fundu do Desenvolvimento Capital Humano (FDCH).

Depois hasoru malu ho PM, Prezidente mos hala'o surumutuk ho Parlamentares, representa husi Prezidente Parlamento Nasional no lideres bankadas sira. Tuir informasaun ne’ebe maka FH hetan husi parte parlamentares sira ne’ebe hola parte katak, ”Prezidente explikasaun husi parte Parlamento Nasional, ne’ebe kontribui hanesan balansu ba informasaun ba Prezidente hola dezisaun”.

Depois Lei OJE2011 apresenta iha Parlamento Nasional, tuir Konstituisaun RDTL, Prezidente promluga hafoin publika iha Jornal da Republica (JR) no depois exekuta OJE2011!