FH, Coimbra, 4 Fevereiru 2011
Explorasaun petroliu iha Timor permite katak atu "halo ponte, loke estrada no hari'i eskola, maibe ne'e sei lori tempu barak atu ema bele hetan moris ida digna", katak Dom Ximenes Belo iha sorumutu ho alunus no inan-aman sira iha Coimbra (Portugal).
Amu Belo rekonhese katak "lori tempu atu hari'i nasaun ida", no fo exemplu hanesan "Portugal halo tinan 800 ona i la'os buat hotu furak hanesan ai-funan rosa".
Amu hakatak lia-fuan hirak ne'e hatan ba pergunta alunu sira husi 1º siklu Eskola de Almas de Feire, iha pavilaun desportiva Escola Básica Inês Castro, iha Coimbra, kinta lokraik (3/2).
"Que pergunta tão difícil!", exklama Amu Belo kuandu aluna Sofia kestiona kona ba faktu existi "petroliu iha Timor", maibe "ema sei nafatin ki'ak".
Hatan ba pergunta ne'e, Ximenes Belo ho razaun dehan "petroliu explora dadauk ona", maibe "ami (timoroan) laiha teknikus i rai seluk sira mak ke'e". Amu haktuir hikas katak iha "osan balu tama dadauk, ne'ebe aproveita para halo ponte, loke estrada no hari'i eskola".
Hare ba oin Amu ho kbi'it dehan, ne'e hotu, "sei lori tempu barak atu ema bele iha moris ida digna" iha Timor Leste".
Kona ba relasaun entre relijiaun sira, Bispo defende, "ita tenki moris ho ema hotu iha mundu ne'e", atu, "musulmanu, budista, protestante, katoliku" ka " sira nebe laiha relijiaun" ou "la fiar ba Maromak".
Belo mos defende dialogo, uniaun ho paz entre emar rai hotu, hare ba "relijiaun, ba kultura, ba kor, hotu-hotu ema" i "tenki iha respeitu no hadomi sira", no iha tempu hanesan Amu apelu atu iha "estudo ba relijiaun no kultura", para bele "hatene ka conhece povu seluk" i, nune'e, bele posibilita ba "dialogu no encontro ho povu no ho ema hotu".
Sorumutu ne'e han tempu besik oras ida nia laran no Amu hatan hotu kedas lia-litik lubuk ida ho kestaun oi-oin. La hein, Amu Belo hetan surpreza husi alunus sira, aman-inan sira, profesor no funsionariu husi Escola de Almas de Freire, ho hananu "parabens" i oferese bolu aniversariu ba Amu Carlos Filipe Ximenes Belo mak komemora otas nen-nulu resin-tolu (63) iha kinta, loron 3, fulan Fevereiru, tinan 2011.
Ho biban ida ne'e, ami, editores FORUM HAKSESUK, hakarak hato'o mos parabens ba Amu Ximenes Belo nia aniversariu (nudar timoroan, Amu Bispo no colaborador FH), ho ne'e, hein katak buat hotu la'o diak, liuliu iha saude, iha misaun no iha profisaun.)*
)* Editores FH
Sem comentários:
Enviar um comentário
Nota: só um membro deste blogue pode publicar um comentário.