OJE2011 Tribunal Rekursus fo razaun ba Xanana-Lasama no derrota ba Horta-Mari

Fretelinho Maubere Junior*

Orçamento Jeral Estado (OJE) 2011 nudar torneira ba desenvolvimentu rai ida ne´e nian, hahu husi ninia tinan fiskal 1 Janeiru- 31 Dezembru. Se OJE2011 la promulga, projektus bo-bot ba Nasaun ida ne´e labele exekuta, la iha osan ba despesa rekorentes (Salariu Vencimentu, Bens no Servisu, Capital Menor, Transferencia publika).

Maibe hare husi procesu ne´e rasik konaba ninia inkonstitucionalidade, hahu haksesuk malu iha uma fukun Parlamentu Nasional (PN), hahu husi loron 3 jeneralidade no loron 10 iha especialidade, isus central ne´ebe maka partidu Fretilin liu husi ninia lider Mari Alkatiri fó orientasaun ba ninia bankada hodi kestiona konaba legalidade ba fundus rua no Ajencia ba Desenvolvimentu Nasional (ADN). Maibe husi parte AMP (Aliança Maioria Parlamentares) argumenta katak harii fundus tuir Lei jestaun Financeira (LJF) iha ninia artigu 32º maka loke dalan.

Tema ne´ebe maka dupla koligasaun Horta-Mari foti maka inkonstitucionalidade OJE2011 no hodi dada tempo, ikus mai fo marjen ba AMP hodi denuncia intensaun husi lideres nain rua (2) ne´ebe hakarak influencia instituisaun ne´ebe maka sira kaer, ida nudar PR no seluk nudar lider Partidu Fretilin. Ho ida-idak ninia ajenda, ida rekandidatura ba PR no seluk oinsa maka bele fila ba kaer knar ka poder iha Governu.

Maibe Xanana nudar xefi Exekutivu no Lasama nudar Presidente Parlamentu (PN), esforsus makas hodi konvence ba PR no mos OMP liu husi haksesuk malu iha uma Fukun PN, esplikasaun detailadu konaba razaun, tamba saida maka harii Fundus rua ne´e, harii ADN no excede OJE2011 liu 3% ne´ebe prevista iha Lei Fundu Petroleum.

Maibe informasaun ne´ebe fornece no argumentu husi Governu no PN, la konvence PR, tamba sira fiar liu ba Assessores Juridiku husi liur no rona liu loby OMP iha GPR (Gabinete PR). Maibe la fiar ba konecimentu no matenek Xanana-Lasama nian. Tamba Horta-Mari konsidere no subestima lideransa sira hanesan Xanana-Lasama, sira (Horta-Mari) mesak maka matenek deit, Timor oan sira seluk, mesak maufehuk, supermi, Maubeik, sst.

Horta-Mari ninia hakarak oinsa maka trava procesu desenvolvimentu iha tinan 2011, tamba ba sira (Horta-Mari), sucesu Governu AMP lidera husi Xanana no Lasama nudar lideransa PN, sei difikulta ba sira ninia estratejia politika. Horta hakarak re-kandidatura ba segundu mandatu Prezidencial no Mari mehi ba kaer knar nudar PM iha V Governu Konstitucional (2012-2017) ka Ministru ba trata asuntu ba Mina, nudar ambisaun Mari Alkatiri nian. Ba kaer Mina no hola parte ba negociasaun Tasi Timor maka ambisaun no target bot husi Mari Alkatiri nian, ne´ebe ikus-ikus Horta hahu koalia hodi dehan Mari Alkatiri maka negociador ne´ebe konsegue halao negociasaun ho Australia konaba Bayu Undan ho Australia. Track Records ida ne´e, maka dada kadoras Bayu Undan ba Australia, hodi ajuda desenvolve ekonomikamente Darwin, ne´ebe molok ne´e konsidere nudar zona periferia Australia nian.

Tuir Jornal STL hakerek iha ninia edisaun segunda-feira (07/02/2011), katak “Tuir dadus ne´ebe maka Jornal ne´e hetan iha ANP (Autoridade Nacional Petroleo), katak, iha I Governu faila maka troka dada Pipe Line Bayu Undan ba Darwin, Australia, ho folin 8,000,000.00 Dolares Australianos ba tinan ida. Sem halo kalkula ida ba impaktu husi inflasaun husi tinan ba tinan muda, husi tinan 2006 to´o agora nafatin. Mos osan ne´ebe maka Australia selu mai Timor-Leste liu husi Ausiad fali, ne´e maka sucesu governu anterior nian ninia kapacidade negociasaun (STL, 07/02/2011, pajs. 1 no 15)”.

Asaun duplo Horta-Mari, liu husi, Horta dada promulga Lei OJE2011 no Mari tun ba halao kampane konaba “Inkonstitucionalidade OJE2011”. Horta-Mari, aposta iha failansu ba implementasaun Obras no atrasu ba exekusaun OJE2011. Husu tulun ba Ana Pessoa liu husi Prokurador Jeral ba Republika (PJR) halo parecer hodi favoravel tese inkonstitucionalidade ba Lei OJE2011. Konstituisaun RDTL loke dalan ba PJR ka Ministeriu Publiku halao parecer ba orgaun soberania hanesan Tribunal Rekursus? Ka interverencia ba knar orgaun soberania seluk nian?

Xanana-Lasama esforsu no exerciciu makas hodi hatan ba TR, ikus mai dileberasaun husi TR katak “Lei OJE2011 Konstitucional no la viola Lei ida”. Ho decisaun ida ne´e, hatudu katak vitoria no razaun ba sira ne´ebe halao politika ho honestidade hodi koloka interesse nasional iha leten interesse pessoal no grupos. Derrota ba sira ne´ebe halo politika ho arogancia intelektual no deshonestidade humana, halao politika ba interesse grupos no ba politika ba beneficiu mesak.

OJE2011 Tribunal Rekursus fó razaun ba Xanana-Lasama no derrota ba Horta-Mari!

*Aileba, hela iha Taibesi!