OJE2011 final global dilema ba FRETILIN vota kontra ka favor

Editorial Forum Haksesuk

Iha haksesuk konaba Orçamento Jeral Estado (OJE) 2011, kompara ho OJE iha tinan hirak liu ba, hahu Transitório (OT) 2007, OJE2008 no Orçamento Retificativo (OR) 2008 ne´ebe estabelece Fundos Estabelização Económica (FEE) hodi hasoru krisi financeira mundial no da'et ba krise aihan, ne´ebe OMP (Oposição Maioria Parlamentares) lori ba Tribunal hodi detekta konaba iregularidade. Iha OJE2009 mos OMP hatudu ninia posisaun ne´ebe duro hodi fomenta nafatin diskursus konaba Inkonstitucionalidade ba IV Governu Konstitucional, hodi dehan Governu no Primeiro-Ministro de Facto. Mos iha OJE2010, hanesan maibe, iha OJE2011, hatudu iha mudansas(ças) iha diskursus husi OMP, la iha Primeiru-Ministro de facto, Governu de facto. Nota mos mudanças iha intervensaun, moderasaun iha diskursus, kolabora iha votasaun. No fim, OJE2011, ninia qualidade sa'e no maturidade politika, maske foin ukun rasik an iha tinan sanulu laran maibe hatudu katak konsolidasaun demokratika no harii Estado-Nasaun maske la'o neneik, maibe bebeik. Hanesan rekonece husi parte Governu, ”Timor-Leste adopta um processo orçamental mais bem coordenado e mais transparente, enquanto o Primeiro-Ministro conduz debates televisivos para informar os cidadãos (Comunicado Oficial, loron 21/01/2011)”. Mos hanesan realsa husi editorial Forum Haksesuk, konaba posisaun OMP no AMP nian iha haksesuk malu iha OJE2011, ”Ida ne’e maka dinamika iha debates OJE2011, mos reflekte duni procesu demokratizasaun no konsolidasaun estadu Timor-Leste nian, maske foin tinan 10 deit, maibe hatudu katak iha duni maturidade politika ne’ebe hatudu liu husi debates ne’ebe konstrutivus! (FH,18/01/2011)”.

Iha mudanças OJE2011, OMP ninia propostas barak maka hetan aprovsaun husi AMP, hanesan propostas ba hasa'e tan osan ba veteranus sira, proposta husi deputado Mandati, FRETILIN. Husi Antonino Bianco, FRETILIN, ninia proposta balun mak hetan aprovasuan tamba votus husi OMP.

Maibe faktor seluk maka sai hanesan citasaun ba análisa maka, deklarasaun votu husi Deputado Mateus de Jesus, Ex-PUN, iha votasaun ba OJE2011 jeneralidade, katak “se vota kontra, signifika hamate povo nia moris (deklarasaun votu, TVTL, loron 14/01/2011)”.

Ho Mateus de Jesus nini deklarasaun, mensajen hato'o ba OMP/FRETILIN, tamba sira vota kontra iha votasaun final ba OJE2011 jeneralidade, karik tendencia ida ne´e maka akontese iha votasaun final global ba OJE2011. OMP/FRETILIN la iha ona manobra hodi klaim katak sira ninia propostas sira ne´ebe hetan aprovasaun husi AMP ba sira nia eleitoradus katak ami maka ba defende hodi hatama ba iha OJE2011.

Preokupasaun bot liu ba Nasaun maka ne´e, se OJE2011 aprovado ho deit votus favores husi AMP + PUN, PPT no Abstensaun husi KOTA, maske OMP vota kontra, OJE2011 aprovadu ho maioria nafatin. Mas imajen politika ne´ebe sei hatudu ba publiku maka:

Ida (1); OMP/FRETILIN kontra OJE2011. Se haknauk ba Deputado Mateus de Jesus ninia lia fuan, ”kontra, signifika hamate povu nia moris (Dekl. votu jeneralidade OJE2011, in TVTL, 14/01/2011)”.

Rua (2); Se OJE2011, iha ninia novidades maka hetan aprovasaun husi bankada PUN. Tuir deputada Fernanda Borges, Presidente PUN, iha deklarasaun votus ba votasaun final ba OJE2011 jeneralidade katak “vota favor tamba hakarak diak ba futuru Timor-Leste nian (idem)”. Kontraria husi ida ne´e hatudu katak lakohi diak ba futuru Timor-Leste nian.

Tolu (3); Mensajem ne´ebe maka OMP/FRETILIN tenta evita passa ba publiku maka katak kontra OJE2011 hanesan kontra desenvolvimentu. Imajina deit OJE2011 la passa ka «Chumbado» husi Paralmento Nasional (PN), ninia implikasaun ba Nasaun Timor-Leste, provoka krisi politika institucional, procesu desenvolvimentu nasional la lao.

Hat (4); importante ba OJE2011, sai hanesan embriaun ba implementasaun PEDN (2011-2030). Tuir deputado Antonino Bianco, preponente ba proposta ne´ebe hakarak elimina verba ne´eba maka hatama iha Gabinete Primeiro-Ministro (GPM) hodi estabelece ADN (Agência de Desenvolvimento Nacional). Maibe wainhira hetan explikasaun husi PM, deputado Antonino Bianco, dehan katak, ”retira proposta tamba interesse nasional (FH, 15/01/2011)”.

Lima (5); Proposta subvensaun publika, iha proposta no. 84, iniciativa husi FRETILIN hodi aumenta tan osan. “Proposta subvensaun publika hatama ba meja Parlamentu Nasional (PN) iha dotasaun OJE2011 aloka osan ba CNE (Comissao Nacional Eliecao), iha proposta no. 84, hatama osan iha kodiku OJE (05-722), ho dotasaun inicial (US$1,000,000.00) ho aditamentu (US$5,500,000.00) no dotasaun final (US$6,500,000.00). Tuir nota justifikasaun husi preponentes sira katak, ”proposta aditamentu ho montante US$5,500,000.00, ho objektivu atu aloka ba partidu politiku hodi haforsa partidu no haburas demokrasia multipartidarismu ne’ebe qualidade”. Tuir Lei partidus politikus no.3/2004 no Lei no.6/2008, hakerek konaba rejime juridika ba finansiamentu partidus politikus. Ho dotasaun inicial US$1,000,000.00, Partidu FRETILIN hetan subvensaun publika hamutuk montante iha semester ida hetan $161,538.46 (2x $161,538.46) no partidu CNRT hetan subvensaun publika hamutuk montante semester ida hetan US$138,461.54 (2x US$138,461.54). Ho proposta aditamentu ida ne’e maka pasa, FRETILIN ho CNRT hetan 5x (550 %), hatudu katak partidus FRETILIN ho CNRT, FRETILIN hetan total hetan US$2,100,000.00 no CNRT hetan US$1,800,000.00 (in FH,18/01/2011)”.

Problema no dilema ba FRETILIN maka ne´e, se vota kontra OJE2011, mensajem ne´ebe maka sei pasa ba publiku maka: FRETILIN kontra desenvolvimentu no hamate povu nia moris. Se vota favor OJE2011, mos problema, tamba fó lejitimidade ba politika no legalidade konstitucional ba Governo AMP ne´ebe ke iha tinan tolu kotuk konsidere nudar Governo no Primeiro Ministro ne´ebe de facto.

Opsaun seluk, maka vota ba Abstensaun, simu OJE2011 maibe nudar OMP kontra rumo politika ne´ebe Governu AMP nian.

Opsaun ikus liu maka, CCF fó liberdade ba Deputados sira vota ho «Consciência», favor, kontra ka abstein deit. Iha ne´e hatudu katak iha ona mudansa politika iha Fretilin tamba saida? Hanoin ona ba eleisaun 2012, sorin ida. Sorin seluk, maka OJE2011 fahe ba vertentes rua (2), ekonomikas no social. Vertente ekonomika serve hanesan embriaun ba implementasaun PEDN ba 2011-2030. Mos desenvolvimentu descentralizadus, liu husi programas hanesan PDL, PDD1 no MDG sukus, ne´ebe sei beneficiu diak liu ba populasaun iha baze. Husi vertentes social, kontinuasaun kompromisu IV Governu Konstitucional ba politikas sociais, hanesan pensaun ba antigos kombatente libertasaun nasional (ANKLN), pensaun ba Katuas Ferik (KF) no Pensaun ba Emar Kbiit Laek sira (EKL). Ne´e preokupasaun social husi estado ne´ebe solidario traduz husi ispiritu Konstituisaun RDTL nian.

Ho buat sira ne´e hotu sai nudar dilema (desafio crescente) ba partidu FRETILIN iha debate OJE2011: VOTA KONTRA ka FAVOR!

Dili, 24.01.2011!