Fundus ninia intensaun diak hodi implementa PEDN maibe kestiona legalidade, dehan Deputada Cipriana Pereira

Dili. Forum Haksesuk (FH). «Fundus ninia intensaun diak, hodi implementa PEDN», deklara deputada Cipriana Pereira, husi bankada FRETILIN iha Parlamentu Nasional iha debate konaba OJE2011.

Deklara tan Deputada Cipriana Pereira dehan, "pereokupa ba seguransa juridika konaba fundus rua ne'e rasik". Haktuir tan Deputada FRETILIN ne'e katak, "tauk maka wainhira aprova OJE2011 i lori ba tribunal mak deklara inkonstitucional, ne'e ninia impaktu ladiak ba nasaun", defende Cipriana Pereira.

Cipriana husu "atu lori PEDN mai PN hodi aprecia husi bankada hotu-hotu, fiar katak PN sei aprova PEDN ne'e". Cipriana Pereira husi banka FRETILIN argumenta no "sujere atu Fundus fila fali ba ministerius ida-idak, Fundus Infra-estrutrua ba Ministeriu Infra-Estrutura no Fundus Desenvolvimentu Kapital Humanu (FDKH) fila ba Ministeriu Edukasaun".

Iha editorial Forum Haksesuk (13/01/2011) koalia konaba ”Harii Fundus rua ne'e, nebe konsidera legal no konstitucional”. Argumenta editorial FH katak, ”Lei ne'e rasik aprova husi Parlamento Nasional (PN), promulga husi Presidente da República (PR), publika iha Jornal da República (JR) no tama ona iha vigor desde Outobro 2009. Iha tinan ida ho resin ona maka Tribunal la detekta inkonstitucionalidade konaba ba Lei Jestaun Financeira ne´e rasik. Oinsa maka deputadus sira bele kontra fali Lei ne´ebe sira rasik maka aprova. Governo halao deit buat ne´ebe maka Lei haruka hodi loke dalan ba harii Fundus rua ne´e. Governu kumpri ninia knar ne´ebe tuir sistema ne´ebe vigora iha RDTL, Parlamento maka lejisla, Governu nudar exekutivu exekuta."

Editorial kestiona entaun, "Ninia ilegalidade ne´e iha ne´ebe? Karik deputadus sira husi OMP (Oposisaun Maioria Parlamentares) keta iha ona parecer juridikus ruma husi Profesores Direitu Konstitucional ruma nian, ne´ebe detekta ona inkonstitucionalidade konaba Lei Jestaun Financeira karik." Ba ne'e, FH fo hanoin hikas katak "Tribunal iha tinan ida ho resin la detekta tamba la iha kontraria ho Lei Inan RDTL nian".

Iha rubrika editorial FH mos observa katak "

Iha debate ne´e, hatudu deit katak deputadus sira hakarak aproveita tempo antena, transmisaun direkta debates OJE2011 liu husi TVTL ho RTL hodi halao kampanye no marka pontus. Maibe sira haluha tiha katak substansia husi harii fundus ne'e maka oinsa estado ninia dever konstitucional hodi halao objektivu final maka moris diak ba povo, desenvolvimentu no progresso ba nasaun tuir ispiritu Lei Inan RDTL nian. Tamba ne´e, Governu hanoin diak hodi harii Fundus rua (2) ne'e, Fundus Infra-Estrutura (FE) no Fundos Desenvolvimento Capital Humano (FDCH), nebe de faktu Legal no Konstitucional hela!"