Debate OJE2011, Deputado Mateus louva PM Kay Rala Xanana Gusmao

Dili. Forum Haksesuk (FH). Deputado Mateus, "louva PM Kay Rala Xanana Gusmao ninia esforsu no sakrificiu hodi lori mudansa ba rai Timor-Leste", haktuir lia hirak ne'e iha uma Fukun Parlamentu Nasional (PN), wainhira halao debate konaba OJE2011.

Haktuir Deputado Mateus, ex-Deputado PUN no oras ne’e independente, ”PEDN ne’ebe maka PM Kay Rala Xanana Gusmao halao ona sosializasaun, sei implementa lori desenvolvimento no progresso ba Timor-Leste”.

Konaba fundus rua ne’ebe maka Governu apresenta, tuir Mateus, ”sai hanesan pasu ida no embriaun ba desenvolvimentu ba PEDN nebe maka iha tinan 2011 hanesan pasu ida importante hodi desenvolve nasaun Timor-Leste, neduni fiar ba PM Kay Rala Xanana Gusmao”, defende ex-deputadu husi bankada PUN.

Konaba Fundus rua ne’ebe maka hatama iha OJE2011, Oposisaun Maioria Parlamentar (OMP) ameasa sei lori ba Tribunal hodi detekta inkonstitucionalidade.

Argumentu Governu liu husi PM Kay Rala Xanana Gusmao katak ”harii fundus rua ne’e ho baze ba Lei Jestaun Financeira ne’ebe loke dalan ba ida ne’e”.

Iha editorial Forum Haksesuk (13/01/2011) koalia konaba ”Harii Fundus rua ne'e, nebe konsidera legal no konstitucional”. Argumenta editorial FH katak, ”Lei ne'e rasik aprova husi Parlamento Nasional (PN), promulga husi Presidente da República (PR), publika iha Jornal da República (JR) no tama ona iha vigor desde Outobro 2009. Iha tinan ida ho resin ona maka Tribunal la detekta inkonstitucionalidade konaba ba Lei Jestaun Financeira ne´e rasik. Oinsa maka deputadus sira bele kontra fali Lei ne´ebe sira rasik maka aprova. Governo halao deit buat ne´ebe maka Lei haruka hodi loke dalan ba harii Fundus rua ne´e. Governu kumpri ninia knar ne´ebe tuir sistema ne´ebe vigora iha RDTL, Parlamento maka lejisla, Governu nudar exekutivu exekuta."

Editorial kestiona entaun, "Ninia ilegalidade ne´e iha ne´ebe? Karik deputadus sira husi OMP (Oposisaun Maioria Parlamentares) keta iha ona parecer juridikus ruma husi Profesores Direitu Konstitucional ruma nian, ne´ebe detekta ona inkonstitucionalidade konaba Lei Jestaun Financeira karik." Ba ne'e, FH fo hanoin hikas katak "Tribunal iha tinan ida ho resin la detekta tamba la iha kontraria ho Lei Inan RDTL nian".

Iha rubrika editorial FH mos observa katak "

Iha debate ne´e, hatudu deit katak deputadus sira hakarak aproveita tempo antena, transmisaun direkta debates OJE2011 liu husi TVTL ho RTL hodi halao kampanye no marka pontus. Maibe sira haluha tiha katak substansia husi harii fundus ne'e maka oinsa estado ninia dever konstitucional hodi halao objektivu final maka moris diak ba povo, desenvolvimentu no progresso ba nasaun tuir ispiritu Lei Inan RDTL nian. Tamba ne´e, Governu hanoin diak hodi harii Fundus rua (2) ne'e, Fundus Infra-Estrutura (FE) no Fundos Desenvolvimento Capital Humano (FDCH), nebe de faktu Legal no Konstitucional hela!"

Hotu