Timor-Leste husi Prespektiva ASEAN (Association of Southeast Asian Nations)

Husi: Cesar Dias Quintas (Lere-Malae)

Master of Arts in Southeast Asian Studies Minor in Political Science

Wainhira Timor-Leste hakarak duni tama iha organizasaun ASEAN, persiza iha boa vontade politika husi lider sira par bele buka mekanismu ida atu sai membru permanente tamba hare’e husi aspeitu geografika, kultura, istoria, politika no ekonomia Timor-Leste merese duni tama ba organizasaun regional nee. See governu Timor-Leste hakarak hare’e ASEAN husi aspeitu politika internal deit sei susar ituan atu hetan apoiu husi membrus organizasaun nee ho kanar rai bo’ot (extraregional powers) seluk iha reziaun nee, henesan Amerika, Xina (China) ho Japaun inkui rai seluk iha influenza politika no ekonomia ituan hanesan India, Korea de Soul, Australia-New Zealand. Nasaun sira nee la iha poder atu deside maibe sira iha ifluensa makas iha prosesu Timor-Leste atu sai memberu groupu rezional nee ho organizasaun seluk-seluk tan. Timor-Leste persiza maneza nia interse nasional no interese regional wainhira hakarak tama ASEAN tamba organizasaun nee iha nia prinsipu “ASEAN Way” nebe membru sira tenki halo tuir, hanesan ida dominante liu mak hanesan labele iha intervensaun ba rai seluk (principle of non-intervention). Timor-Leste persiza hatene katak ASEAN nee groupu regional ida que hetan suksu tebes iha mundo idepois de Uniao Eropeia (UE).

Agora depende ba Timor-Leste atu utiliza kanal bilaterais no multi-laterais husi aspeitu hotu-hotu atu husu apoiu no hadia a’an par bele tama ba kriteriu sai membru ASEAN. Prosesu nee ita hare’e fasil maibe tuir lolos iha obstaklu barak mak Timor-Leste tenki ultrapaza. Diplomatikamente, Indonesia ho membru ASEAN tomak apoiu Timor-Leste tama lalais groupo regional nee maibe iha realidade membru sira, liu-liu hanesan Indonesia sei iha duvidades ho Timor-Leste nia situasaun iha rai laran hanesan orientasaun politika, linha fronteiras, stabilidade politika no ekonomia, sistema imigrasaun, defeza ho buat seluk tan nebe direita no indireita konsidera sei efeta stabilidade regional. Politikamente, Indonesia hanesan rai bo’ot ida iha ASEAN nebe membru sira seluk respeitu nia i iha influenza makas liu kompara ba rai seluk (membru seluk). Indonesia nia ideas no prinsipiu politika balun mak adopta iha prinsipiu ASEAN ninia hanesan atu resolve problema iha nivel regional persiza iha Musyawarah (consensus). Purtantu logikamente katak wainhira Indonesia mak hakarak duni Timor-Leste sai membru organizasaun nee, tuir lolos la iha difikuldade bo’ot i labele lori tempu to’o tinan sanulu-liu tan (10-…). Nee duni Timor-Leste mos persiza hare’e didiak boa vontade no interese membru ASEAN sira nia, liu-liu Indonesia, saida los mak Timor-Leste persiza hatene no halo par konvisi membru sira tamba apoiu diplomasia bele iha sintidu barak (bele diak husi oin maibe la konkorda husi kotuk).

Tuir regulamentu ASEAN katak Indonesia atu sai Chafe de Meja (Chair) ba ASEAN efektivamente bele dehan tinan oin mai. Timor-Leste fiar katak ida nee sai oportunidade ida atu sai membru lalais, tamba Indonesia bele iha liu poder atu kolia no konvinsi membru seluk-seluk. Maibe Pontu seluk mos persiza konsidera katak Timor-Leste iha pasadu ida que ladun diak ho Indonesia nebe sidauk resolve totalmente enter rai rua nee iha nivel bilateral. Razaun nee mos bele sai argumentu ba membru sira informalmente dehan ba Indonesia katak Timor-Leste persiza resolve assuntu hirak nee antes tama ba ASEAN. Lian fuan seluk mak hanesan Timor-Leste persiza resolve nia problema iha nivel bilateral idepois ba iha multi-lateral tamba ASEAN nee konsidera ona hanesan nivel multi-lateral. Problema hirak mak hanesan status refusiadus barak mak sidauk los iha Timor osidental: enter atu sai sidadaun Indonesia ou Timor-Leste, problema fronteira (foin dadauk hanesan despuita konaba Nakota) no justisa atu lori general Indonesia sira ba Tribunal relasiona ho kazu 1999 (Kazu hirak nee Timor-Leste hanoin hotu ona maibe iha divel internasional, liu-liu ONU sei kosidera nafatin general sira hanesan krime kontra humanidade “crime against humanity”) nebe kualker tempu bele mosu iha forum internasional. Timor-Leste parese hatene katak general Indonesia barak mak involve iha partidu politiku hanesan Virantro ho Prabowo nebe ikus mai iha posibilidade bo’ot atu kaer poder atu halo desizaun. Problema hirak nee mos sai hanesan duvidades bo’ot ba Indonesia tamba Timor-Leste sidauk totalmente resolve iha nivel bilaterais, liu-liu iha forum internasional (ONU) ba kazu nee.

Iha fatin seluk, Timor-Leste persiza hatene katak Timor-Leste nia luta ba Independensia membru ASEAN hotu la fo apoiu iha forum internasional, wainhira to’o independensia mak membru balun foin involve iha INTERFET (Peacekeeping Force) hanesan Malaysia, Singapura, Filipina no Tailandia. Husi prosesu ida nee mos Indonesia fo’o ona sinal diak (Green light), see lae sira mos labele tama tamba Indonesia bele dehan ida nee violasaun ba prinsipiu ASEAN nia (Non-Intervention). Justisa ba autor krime sira ba iha tribunal inklui jeneral Indonesia; kazu nee sidauk totalmente resolve iha nivel internasional nebe kulker tempu bele efeta ba relasaun rai rua (2) ikus bele halai ba nivel regional. See problema pasadu mak sidauk resolve didiak, membru ASEAN sira sei fo tempu tan ba Timor-Leste ho Indonesia par bele hakas a’an atu hadia no fo garantia katak problema hirak nee sei la efeta politika ASEAN nia.

Tuir istoria katak Indonesia hanesan membru ASEAN mak kleur liu halo ukupasaun ilegalmente ba rai ida iha reziaun ida nee (Timor-Leste) idepois Vietnam invade Cambodia, hanesan iha konteksu relasaun internasional sira bolu terseiru gera (funu) Indonochina idepois de segundu gera mundial (Second World War). Maibe rai rua nee ikus mai tama lalais sai membru ASEAN. Purtantu Timor-Leste husi aspeitu istoria bele tama lalais iha forum regional nee. Husi istoria, ita bele hare katak rai hanesan, Brunei, Vietnam, Cambodia no Laos tama organiszasaun ASEAN iha tinan hira nia laran deit idepois sira hetan independensia (balun semana hirak deit). Timor-oan sira bele iha pergunta katak tambasa Timor-Leste agora lori tempu to’o tinan kuaze sanulu resin ida (11) ona maibe sidauk konsege hetan oportunidade sai membru ASEAN. Politikamente, tempu nee lolos to’o ona hanesan rai Timor-Leste atu sai membru permanente ASEAN. Teknikamente, ema bele dehan katak Timor-oan sira durante tinan rua nulu resin hat (24) okupasaun Indonesia sai ona direitamente hanesan parte komudidade ASEAN tambasa idepois ukun rasik a’an Timor-oan sira tenki sai fali husi abiente ida nee (sai fali hanesan ema seluk ba komunidade ASEAN). See hare’e husi aspeitu ida nee Indonesia iha argumentu makas atu apoiu lalais Timor-Leste sai membru ASEAN. Iha fiar ida katak membru ASEAN seluk sira mos sei fo apoiu tomak tamba argumentu ida nee bele sai hanesan metro ida Timor-Leste atu sai membru organizasaun nee.

Wainhira ita hare’e katak Brunei Darussalam (Brunei) semana hirak tama ona membru ASEAN idepois independensia iha 1984. Cambodia hetan nia independensia fila fali iha 1993 idepois hatama porposta sai membru ASEAN iha tinan 1999. Tuir mai rai sosialsita Vietnam wainhira funu Indochina hotu entre 1978-1991 idepois halo rekonsiliasaun kominista entre ho rai ASEAN sira, iha 1995 Vietnam admiti sai memberu ASEAN. Ita bele hare’e katak rai sira nee hetan prosesu lalais liu sai membru ASEAN nebe apoiu husi membru ASEAN sira. Maibe pontu seluk ita mos labele hakfodak ho prosesu nee tamba diak liu Timor-Leste persiza neneik no hadia a’an didiak antes tama ba gropu regional ne’e. Wainhira ita hare’e husi perspektiva politika no ekonomia, laos deit Timor-Leste mak persiza organizasaun ASEAN no nia membru sira maibe sira mos persiza Timor-Leste husi aspeitu rua (2) nee. Purtantu nee depende ba Timor-Leste atu hare’e no analiza didiak vantazen ho desvantazen atu sai membru ASEAN.

Ohin Autor temi ona iha leten katak iha kanar rai seluk (Major players) nebe iha influennsia politika ho ekonomia makas iha reziaun nee. Rai sira nee mak hanesan Amerika, China no Japan hamutuk ho rai balun hanesan Australia-Nova Zelandia, India, Korea de Soul. Rai sira nee balun direitamente ifluensia politika no ekonomia rai balun iha mundu inklui iha reziaun nee. Ita bele dehan katak Vietnam ho Laos nusa mak sira iha prosesu bele tama lalais ba ASEAN wainhira ita hare’e rai rua nee geografikamente no ideologia politika nebe diferente tebes ho membru ASEAN sira. Tamba wainhira hare’e husi perspektiva politika, fundadores ASEAN ho interese rai bot (Amerika ho EU) lakohi Cambodia, Laos ho Vietnam monu ba politika Republika Popular de Xina, entau sira dada lalais rai sira nee membru ASEAN. Tamba Xina bele influensia rai sira nee ho nia politika kominista i neneik bele influensa membru ASEAN seluk-seluk par hamenus kanar Amerika ho nia bloku aliansa iha reziaun nee. Rai tolu nee iha liu oportunidade tama ba ASEAN tambe iha interese bo’ot ba involve iha prosesu sira nia. Nee duni Timor-Leste mos see bele halo politika strategia par rai seluk bele konsidera no reseiu katak Timor-Leste iha dignidade politika iha nivel internasional.

Wainhira ita le’e livru no artikel academia balun, autor barak mak teknikamente inklui ona Timor-Leste sai parte ASEAN nebe agora iha membru sanulu (10) hanesan Indonesia, Malaysia, Filipina, Tailandia, Singapura, Brunei, Vietnam, Myanmar, Cambodia no Laos. Sira dehan katak entidades ASEAN nee hamutuk sanulu resin ida (11) inklui Timor-Leste maibe sira nunka inkliu Papua Nova Gini (PNG). Wainhira ita hare’e husi istoria PNG mak uluk sai obsevador special ba ASEAN maibe too agora nia sidauk sai membru. Ida nee signifika katak Timor-Leste iha duni direitu atu hetan aksesu ba forum regional nee maibe Timor-Leste persiza hadia’a nia a’an par mais ou menus bele hetan apoiu no tama ba kriteriu ASEAN ninia. Pontu ida mak Timor-Leste labele depende liu ba asistensia internasional (Donor countries) tamba nee sigifika Timor-Leste sidauk bele hamarik mesak i pais fo ajuda sira nee mos bele influensa Timor-Leste nia politika hanesan lia fuan seluk sai boneka ba donor sira (western puppet). Problema ida nee mos fundador rua (2) ASEAN hanesan Indonesia no Malaysia sei tau hanesan problema ida tamba sira la kohi internasional nia intervensaun (external intervention or influence) ba iha politika ASEAN nia.

Atu taka artikel ida nee, hau harak ato’o katak see Timor-Leste hakarak duni sai membru ASEAN, nia persiza hare’e husi kontekstu nasional ba regional to’o global. Iha dalan barak atu konvinsi membru ASEAN katak Timor-Leste iha duni boa vontade atu sai membru. Buat hirak nee bele halo politika ida, hanesan Timor-Leste bele konvida ASEAN no membru sira aktivitamente sai observador ba deselvolvimentu rai laran, liu-liu ba eleisaun geral no lokal. Politika nee bele hatudu katak Timor-Leste harak duni atu sai parte ba komunidade ASEAN. Hanesan Autor temi iha leten katak fator ida importante liu mak relasaun ho Indonesia tenki hare’e didiak husi kultura diplomasia Indonesia nia tamba Timor-Leste rona dala barak ona husi Indonesia katak sei azuda sai membru ASEAN maibe iha realidade hatudu to’o ona tinan sanulu-resin ona sidauk bele sai membru. Purtantu Timor-Leste persiza utiliza nia matenek diplomasia rasik atu nune bele rai seluk konsidera nia hanesan rai ida ho dignidade diplomasia. Indonesia sei save (key decision) ba Timor-Leste atu sai membru organizasun ASEAN tamba membru selu-seluk ladun iha kunhesementu kona ba Timor-Leste entau iha posibilidade bot sira intrega ba Indonesia mak atu observa no halo desizaun ba Timor-Leste.