VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE
Bloku Unidade Popular Associação Popular Monarquia Timorense Kmanek Haburas Unidade Nasional Timor Oan Partido Esperança da Pátria Partido Socialista de Timor Partido Desenvolvimento Popular Congresso Nacional para a Reconstrução de Timor-Leste Partido Republicano União Democrática Timorense Partido Democrata Cristão Partidu Movimento Libertasaun Povu Maubere Partidu Libertasaun Popular Partido Democratico União Nacional Democrática de Resistência Timorense Partido Unidade Desenvolvimento Democrático Partido Timorense Democratico Frenti-Mudança Partido Social Democrata Centro Ação Social Democrata Timorense Partido do Desenvolvimento Nacional Frente Revolucionaria de Timor-Leste Independente
“O povo de Timor-Leste está reconstruindo com o seu próprio suor, com o seu próprio sangue uma pátria revolucionaria democrática, uma terra livre para gente livre”.

I N T E R F E T
15 Setembro 1999
O Conselho de Segurança da ONU aprova a Resolução n° 1264,
que autoriza a criação de uma força internacional para Timor-Leste (INTERFET)
TIMOR-LESTE



Interview with Fernando Lasama de Araujo: On the road to democracy, where the streets have no name
Dezenvolvimentu Nasional presija iha Programa nebeé Programátiku
Reasun Oposisaun ba Programa VII gov
Primeiro-ministro timorense não entende críticas a programas..
Oposição exige explicações ao Gov sobre justiça e reforma adm..
Xanana Gusmão quer "ganhar experiência" como oposição..
Governo quer duplicar receitas domésticas com IVA e impostos tabaco...
Masuk Indonesia Tanpa Paspor, 2 Warga Timor Leste Diamankan Polisi
Opozisaun Rejeita, Programa VII Governu, Alkatiri: “Hau Prontu...”
Timor "satisfeito" novo acordo que regula fronteira com Austrália
Comissão confirma acordo entre Timor-Leste e Austrália

 
 
   

sexta-feira, 1 de outubro de 2010

TIMOR OAN I LIAN TETUM

(Resposta ida ba Maluk hotu nebé dehan katak "Tetum ne'e kiak")

Opiniaun público nebé namkari iha ita nia realidade lor-loron kona ba ita nia lian Tetum mak "Ita Nia lian Tetum, lian nebé kiak iha aspecto hotu-hotu, iha vocabulário no nia regras sira (Uma Língua pobre, pobre em todos os aspectos)". Espresaun "Lian Tetum ne kiak" dala wain ona mak ita rona hosi ema sira nebé ema hatene katak matenek no lider ou bele dehan matenek nain timor oan sira. Ora, hosi ne'e ha'u lori belun sira ba hanoin lolo'os expresaun ohin ne'e atu ita bele loke matan i loke tilun ba ita nia an rasik, hanesan ema dehan "halo auto-avaliação" ou introspeksaun ida iha ita nia a'an kona-ba problema ida ne'e. Hosi ne'e ha'u hamosu hipótese ida katak;

"Lian Tetum lian nebe furak, riku no identidade povo timor nian. Lian ne dehan katak kiak tanba deit matenek nain sira mak kiak ou inkapaz atu desenvolve nia identidade rasik".

Hori hun kedan, lian (Tetum) ka Bahasa (Lian Indonesia) langguage (lian Inglês), língua (Lian Português) Glóssa (lian grego) sai hanesan instrumentu ida nebé ema uza atu komunika iha relasaun entre ema ida ho ema seluk iha komunidade ida nia laran. Lian ne'e mos sai hanesan património kultural i identidade povo ida nian. Tanba ne'e lian nia papel importante tebes ba ema nia moris. Iha história hatudu katak lian nunka mosu mai kompleto kedan ho nia a'an ka perfeito kedan, maibé ho kapasidade no intelektual ema nian, bele hariku liu tan lian ida ba ema nia interesse. Exemplo ita bele hare hosi Lian indonesia. Lian indonesia ne'e mai hosi lian sansekerta, malayu, lian grega. Hanesan "saya", mai hosi sahaya katak hamba (linguagem nebé humilde ka hatudu ema nia hakraik-an iha ema seluk nia oin, iha Tetum karik ita bele dehan ata-oan).

Iha história lian português mos hanesan. Ema dehan lian Português riku tanba português sira uza sira nia matenek hodi hariku sira nia lian iha aspecto oi-oin deit, iha nia regras, vocabulários no nia tempo sira. Hanesan hateten iha nia história, historiador balun dehan katak lian português ne lian nebé kiak (Uma língua mal falada na peninsula Ibérica, sobretudo, na Gália porque a língua portuguesa surgiu e desenvolveu no galaico, mas foi influenciada pela língua romana, neste caso língua Latina, na altura império Romano alargou o seu império para Península Ibérica), nebé la kompletu i koalia iha peninsula iberika liu-liu iha Gália.
.
Ita hare lia-fuan barak liu mak sira adopta hosi lian Latina, Grega no Árabe. Exemplo hosi lian Latina mak hanesan labora katak servisu (exepmlo estudante pós-laboral) nia orijen ne mai hosi Latin verbo Laborare katak servisu. Discípulo katak aluno mai hosi latin katak Discipulus-discipuli katak aluno. Orar katak harohan ka reza, ne'e mai hosi Latina verbo Orare katak reza ka harohan. Abóbora - mai hosi Latim apoperes; Ida nebé mai hosi Árabe mak hanesan algodão (Árabe katak Alkutun) tanba tuir lolós ne Portuges sira la konhese algodaun maibé tanba Árabe sira lori algodaun tama ba peninsula ibérika entaun sira konhese no hatene objecto algodaun ne'e ho nia naran nebé árabe sira lori tama mai liu hosi Maroko. Lia-fuan seluk mak hanesan: Açúcar (Árabe = assukar mai hosi Sânscrito çarkara, katak grãos de areia ka ita dehan raihenek musan), Laranja (laranja mai hosi Persa naräng), Prisão (prasioner). Lian portugues barak mos adopta hosi lian Grega, exemplo Logica, anemia, amnesia, ánimo, alfabeto, algebra, academia, terapia, hermenêutica, etc.

Lian nebé antigo ka kleur liu iha mundo, tuir história ema nian (História da humanidade) mak lian Grega, Só lian ne deit, tuir historiador sira grego nian (Sira mak fo sai uluk sira nia matenek ba mundo) no historiador iha mundo tomak dehan katak so ema gregos sira mak hahu inventa uluk sira nia sinal no lia-fuan ka vokabulario (tinan 1000 molok kristo) nebé seidauk existe iha sira nia lian antiga nebé bolu naran "língua helénica" no kada sinal ou letra ida-idak iha nia son. Maibé, hosi ne'e hatuduk katak lian grega nebé antiga, hosi nia fó sai ba mundo matenek no hanoin barak, liu-liu filosofia, politika, siencia exacta sira. Ne'e mos la mosu mai perfeita kedan, maibé dala ida tan, tanba ho ema nia kapasidade no matenek ema desenvolve no hariku liu tan ema nia lian ne'e. Hosi ne'e, tuir perspektiva antropolózika, ita hateten katak lian ne'e mosu hosi ema ba ema nia interesse no desenvolve atu sai diak liu tan ba necessidade nebé ema iha.

Lingua Chinesa; Lingua Chinesa hakerek ho nia alfabeto nebé diferente dok liu ho alfabeto latina nebe oras ne'e ita uza. Ita bele dehan katak lian ida ne'e susar atu hetan influencia hosi lingua seluk, maibé iha realidade akadémika nia maneira hakerak no lê mak la hanesan maibé nia konseitu ka linguajen akdemika sempre hetan influencia hosi lian barak hanesan lian Latina no Grega. Logika ne hanesan ne'e; Maioria matenek nain sira sai hosi Gregos, Latinos, árabes, ingleses, judeus no seluk-seluk tan, ho ida ne'e hatudu katak lingua Chinesa mos hetan influencia barak hosi liangua seluk. Maibé kona-ba sinal e son, China mos matenek para halo sira nia son no sinal rasik hanesan mos ema grego, Árabe no Aramaiko sira.

Iha prossesu ida ne'e hatudu katak ema nia matenek no kapasidade bele muda buat ruma nebé la dun diak sai ba diak i hatudu ba komunidade seluk katak ema ne'e matenek duni. No ho nia matenek nia desenvolve nia patrimonia kultural no identidade rasik sai diak liu tan iha mundo internasional.

Agora, hosi realidade sira nebé ita haré ona iha leten ne'e, oinsa ho ita nia lian Tetum? Será ke ita sei dehan no defende nafatin katak ita nia lian Tetum ne kiak iha aspectos hotu-hotu? Ka oinsa?

Iha realidade Timor nian, ita iha dialectos barak além de Tetum Prasa no Tetum Terik. Iha sorin seluk ita mos hetan influensia barak hosi lain estranjeiro mak hanesan lian Indonésia, Inglesa, Latina, Grega, no Português. Lian sira ne ita bele foti nia vocabulário barak para atu hariku ita nia Tetum. Iha parte ida, ba linguajen vulgar ka lian lor-loron nian, ita hanoin se diak liutan, vokabulário nebé ita laiha ita bele halo transplantasaun ka adopsaun hosi ita nia dialectus sira nebé mak iha para halo kompletu liu tan. Por exemplo foti balun hosi lian Mambae ka Fataluku no seluk-seluk tan para atu hariku no halo kompletu liu tan ita nia Tetum. Iha parte seluk, ba linguajen akademika ita hanoin katak diak liu "tetunaliza" (halo sai tetum) konseitos sira nebe hosi Português, Latina no Grega ne'e ba Tetum ho regras Tetum nian nebé ríjidas, ou, ita dehan halo transplantasaun ka adopsaun ba Tetum ka ho linguajen nebé ita inventa katak "tetunaliza" ba ita nia lian. Maske dalawain iha vida prátika buat hanesan ne'e halo ita konfusaun.

Maibé ita presiza atu fó passo ida ba oin, ou, hahú netik ho "ponto de partida ruma" ka hahú netik hosi rohan ruma. Tanba lian ka bahasa ou lingua ne buat essencial tebes ba ema nia vida. Hosi nia ema bele traduz no transmite ema nia hakarak ka intensaun, hosi nia ema bele esplika lolos konseitus ou objectos sira seluk. Hanesan tuir Martin Heidegger dehan katak " a linguagem é a casa do ser". Katak liu hosi lian mak ema bele hatete ka komunika buat ida, seja ke buat ne hatoba a'an iha kontexto negativo ou positivo nian. Maibé ho lian mak ema bele transmite buat ida. Iha Verdade Óntika "ser" ka buat-ida (Ita dehan ho lian Tetum) nia iha nia verdade ka lo'os iha nia an rasik. Nia mak ne ona, mak ida nebé ita hare. Por exemplo fatuk. Nia lo'os (Verdade) mak fatuk ne ona, maibé wainhira laiha linguagem ka (Lian) maka verdade k lo'os ne maten hela deit ka estátika. La desenvolve la haluan, no la transmite ba realidade ema nian. Maibé ho Lian mak ema bele hanaran no bele esplika buat ida nebé lo'os.

Iha realidade, ita iha timor matenek barak maske nia quantidade seidauk bele dehan ho logika matematika katak barak liu (Ribuan). Maibé, ita bele halo buat ruma. La'ós ita tur to toba dukur deit, depois hader ka hakfodak mai ita hetan lian seluk ba ita estuda, hatene, no koalia i ita fila dehan deit katak Tetum ne kiak, laiha vokabulário. Sim, estuda no hatene lian estangeiro ne'e diak i iha vantajen nebé bot liu hanesan; bele konhese ema nia lian, hatene ema nia kultura. Maibé, tuir lo-lo'os ne'e estuda no hatene para ita bele hariku liu tan ita nia lian. Laós estuda no hatene hotu pois buat nebé ita hatene ita la usa para hariku ita nian maibé hosik buat ne sofre moras ida nebé ema bele dehan tetraplégiko ka hosik nia maten iha fatin nem sofre movimento ida. Katak matenek nebé ita hetan estátika liu iha ita nia a'an la sofre mudansa significaiva ida i nem sofre evolusaun construtiva ida.

Hosi ne, ita bele dada konklusaun ida katak lian Tetum la'ós kiak maibé ita nia matenek nain sira no ita tomak mak kiak. Katak, maske iha matenek barak ona hanesan ohin temi iha leten, maibé seidauk matan nakloke, sei bilan hela iha fatin. Estuda sai matenek hotu tia fila dehan fali nia Tetum mak kiak. Iya... Kiak tanba ita mak kiak, ita mak beik (Beik ne liafuan la diak ou kasar maibé diak liu ita uza ne'e para ita hatene a'an). Sim, lojikamente ema beik mak buka eskola para matenek la'ós matenek mak buka eskola fali. Tanba beik ne'e, ema buka estuda ba sai matenek hosi nia experiênsia rasik (Hanesan John Lock dehan; Estuda hosi experiência ou aprende hosi buat nebé nia hare rasik ho nia matan). Se ita matenek karik, ita sei la dehan ita nia Tetum ne kiak maibé ita sei iha konsiensia atu desenvolve ita nia lian ne sai diak liu tan. Maibé iha realidade hatudu katak ita nia konsciensia delek tia, hanoin lakon tia konaba atu desenvolve ita nia lian Tetum.

Ita hare deit katak Instituto Linguistika timor nian sei fraku, maibé desenvolve ona lian Tetum, ho nune'e ita presiza enkoraza sira, fo suporta ba sira atu promove no desenvolve ita nia Lian doben ida ne'e. Ita hare deit katak, ema seluk sei bele iha hanoin para mai desenvolve lian Tetum nebé la'os ni-nian rasik, exemplo Sr Geofry Hull (Desculpa karik ha'u hakarek naran ne'e sala). Oinsa mak ita ema timor oan rasik, ran timor rasik laiha sentimento patriotismo no nasionalismo atu promove nia lian. Tetum ne'e ita nian rasik, hola parte iha ita nia kultura ou património kultural. Tanba ne'e nia desenvolvimentu ne'e responsabilidade ema timor tomak atu toma konsiensia hodi fo kontribuisaun ba promove lian ne'e. iha Ita nia konstituição timor nian artigo 59.º número 5 dehan momos katak ema hotu iha direito atu goza no harii kultura hanesan nia obrigasaun atu haburas, defende no mo'os fó valor ba património kulturál. Tanba, wainhira ita dehan katak ita nia lian ne kiak, otomátikamente ita viola valor no dignidade ita nia lian rasik ou ita bele dehan katak sai traidor ba ita nia an rasik. Iha Lian indonesia karik ema dehan "kacang lupa kulit". Tanba ne'e, diak liu ita fó kontribuisaun, maske la barak liu, para atu desenvolve ita nia lian Tetum liu hosi hanorin iha eskola, koalia tuir nia regra nebé iha ona no aplika vokabulário nebé iha ona. Além de ne'e, hosi parte governo mos maio ou menos buka mekanismo ka medida diak ida para atu bele valoriza i promove diak liu tan ita nia Lian Tetum atu sai diak liu tan. Maske ohin loron ita hatene ona katak Lian Tetum hahú hanorin ona iha eskola sira. Maibé, sei iha falta barak, porexemplo, falta livros Tetum, Dicionário nebe ohin loron iha (hosi Sr. Geofry Hull no Luis Costa nian) iha pontuário no regras i gramátikas ona maibé seidauk suficiente atu promove lian Tetum.

Maibé ita presiza aplausa mós ba exforso hira ne'e, tanba komesa hahú ona passo ida ba oin. Lalikan rona ema sira nebé gosta tur, toba no mehi a'at pois hader mai dehan Tetum ne'e kiak lós, tanba sa mak la uza lian seluk. Sujeitos sira nebé hasai esteitmentu kona ba Tetum kiak ne'e, ita bele dehan katak ema nebé laiha espiritu patriotismo i ema oportunista. Rasaun tanba, ita moris iha Timor, Tetum mak liga ita nia komunikasaun wainhira ita hasoru belun sira hosi dialektu seluk. Iha ne'e Tetum sai ona ou hanesan iha Lian Indonesia katak "sudah berdarah daging" ho ita. Ho nune'e, wainhira ita dehan Tetum kiak katak indireitamente ita mak hateten an katak "ita ida nebé mak hasai lia-fuan ne'e mak kiak duni, fa'ak duni, beik ten, konsiensia maten, la iha sensibilidade atu desenvolve netik nia lian nebé hanesan nia riku ka identidade iha povo ka nasaun seluk nia matan.

Referência:
Artigo ne'e, ha'u hakerek para atu fó resposta deit ba maluk sira nebé gosta dehan Tetum Kiak.

Hakerek nain eskola iha Braga-Portugal.
Braga, 1 de Outubro de 2010

Paulo S. Martins (Paresma D’aquinho)

Sem comentários:

Enviar um comentário

Nota: só um membro deste blogue pode publicar um comentário.