Komentariu Reis ba artigu "Alarico Ferenandes Vizita: Se Utiliza Se?"

Ba Sr. Filipe Rodriguês Pereira, Observador Politika no Sosial, Membro Komite 12 de Novembro ne’ebé maka hau respeita:

Ita boot nia komentário ka observasaun ka ponto-de-vista kona ba Sr. Alarico Fernandes nia aan ne’e iha parte barak hau la konkorda.

Nudar ema Timor-Leste nia oan, quadro médio hosi resistênsia nia laran, hau hakarak atu fo-hatene deit katak ita boot nia observasaun sira ne’e balun loos, no balun la-dun loos.

Hau komenta uluk kona ba sira ne’ebé sala:

1. Alarico Fernandes - Ministro da Informação ho Comunicação.

2. Rogério Tiago Lobato – Comandante Militar

3. Ministro da Defesa – Hermenegildo Alves

Alarico Fernandes la’os dadur ka TNI maka kaer, nudar informasaun hau rona hosi Bie Ki Sahe katak nia desvia hosi resistência tan ba nia oho ema nain rua ne’ebé servisu hamutuk ho nia (Alexandre Lemos ho Rui Vaz) tan ba deskobre katak nia (Alarico Fernandes) iha contacto ho TNI, hodi troka lian dehan fali katak ema nain rua ne’ebé nia oho ne’e maka iha komunikasaun ho TNI.

Kona ba nia kaptura hosi TNI ida ne’e só nia na’in (Alarico Fernandes) deit maka bele hateten oin sá maka TNI kaer nia.

Ba Xavier do Amaral, membro CC Fretilin ho Conselho Superior da Luta, wainhira iha sorumutu iha We-Hali (Lacluta)[1], sira hakotu katak Xavier do Amaral ten-ke dadur, tan ba nia la fo importânsia boot ba funu (nia nudar Comandante em Chefe das FALINTIL nia orientasaun importante tebes ba iha luta, mai-bé nia confia deit hosi desizaun Conselho Superior da Luta ho membro CC FRETILIN nia kbiit.

Kona fali ba Alarico Fernandes nia partisipasaun iha luta:

Uluk, wainhira ami hasoru malun iha José Ramos Horta nia apartamento iha Tropical ba reunião balun, Alarico Fernandes mosu dala ruma iha neba, no hau hatene katak nia sai nudar responsável ba Komunicação ho Informasaun ba Partido Fretilin, hodi tuir fali, hau koñese rasik nia, tan ba entrevista ida ne’ebé rádio Australia mai halo ba nia iha momentu ida ami halo manifestação boot ida ne’ebé hotu iha actual Palácio do Governo nia oin. Iha momento ida ne’ebá maka hau koñese nia hosi saudosos adjuntos Kakuk, Botemau, Lere ho Mausiri.

Ikus mai hau hetan livro Konstituisaun TL nian ida hosi nia, tan ba ami presiza presisa halo estatuto UNETIM nian.

Hau mos sei iha informasaun barak atu hato’o, maibé hau nia fraco maka iha data sira.

Ba senhor Observador Politika no Sosial, Membro Komite 12 de Novembro.

_____

[1] Sorumutu iha We-Hali ami maka hetan konfiansa atu organiza, hosi Camarada Nicolau Lobato, ne’ebé fo ordem ba Comissário Político Nacional Bie Ki Sahe atu kontakta ho responsável sira hosi Zona 20 de Agosto atu prepara fatin ba Conferência We-Hali ne’ebé mosu Membro CC Fretilin nian besik ka liu 50.