VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE
Bloku Unidade Popular Associação Popular Monarquia Timorense Kmanek Haburas Unidade Nasional Timor Oan Partido Esperança da Pátria Partido Socialista de Timor Partido Desenvolvimento Popular Congresso Nacional para a Reconstrução de Timor-Leste Partido Republicano União Democrática Timorense Partido Democrata Cristão Partidu Movimento Libertasaun Povu Maubere Partidu Libertasaun Popular Partido Democratico União Nacional Democrática de Resistência Timorense Partido Unidade Desenvolvimento Democrático Partido Timorense Democratico Frenti-Mudança Partido Social Democrata Centro Ação Social Democrata Timorense Partido do Desenvolvimento Nacional Frente Revolucionaria de Timor-Leste Independente
“O povo de Timor-Leste está reconstruindo com o seu próprio suor, com o seu próprio sangue uma pátria revolucionaria democrática, uma terra livre para gente livre”.

7 Dezembru 1975
Invazaun Militar Indonesia nian ba Timor-Leste
TIMOR-LESTE


Interview with
Fernando Lasama de Araujo: On the road to democracy, where the streets have no name

 
 
   

segunda-feira, 20 de setembro de 2010

Negosiasaun Greater Sunrise Husi Perspektiva Relasoens Internasionais*

Centru Peskiza Parlamentar/ Parliamentary Research Center (PRC)
Publika iha Jornal Parlamentar


Durante fulan rua tutuir malu, asuntu Greater Sunrise nebe hola parte iha zona Joint Petroleum Development Area (JPDA) sai hikas konsumo publiku liu husi publikasaun imprensa. Polemika mosu tanba kompania Woodside ho nia konsorsium tenta ho sira nia proposta atu dezenvolve projecto Floating LNG hanesan dalan klaran ou win-win solution, hodi troka opsaun kona ba dada kadoras ba Australia ou mai Timor-Leste.

Proposta kompania nee, hetan reasaun maka’as husi lideransa estadu Timor-Leste nian. Primeiru Ministru, Xanana Gusmao rasik rezeita proposta kompania nee. Aliansa Maioria Parlamentar (AMP) mos hatudu reasaun nebe hanesan, katak hakarak ka lakohi, uniku opsaun mak dada kadoras Greater Sunrise mai Timor-Leste.

Pozisaun governu Timor-Leste nian klaru no firme, ho sentidu katak laiha opsaun seluk relasiona ho kadoras Greater Sunrise. Tanba tuir governu AMP nia hanoin, kadoras Greater Sunrise sei fo benefisiu ba dezenvolvimentu sosio-ekonomiku pais ida nee nian. Problema mak nee; oinsa kapasidade estadu (governu) nian atu manan negosiasaun hodi realiza kadoras mai Timor-Leste?

Analiza

Negosiasaun ba kualker asuntu interese nasional, la-sees husi influensia poder. Relasaun poder (power relations)1 entre entidade rua iha meja negosiasaun dalabarak sai faktor determinante ba ninia rezultadu ikus. Negosiasaun Greater Sunrise hodi hakotu opsaun Floating LNG, kadoras ba Australia ou mai Timor–Leste la sees mos husi relasaun poder husi estadu ida-idak nian.

Imajem power relations bele haree uitoan atravez de konseitu interdependensia ho dependensia nebe bai-bain akademiku relasoens internasionais sira utiliza hodi aproxima fenomena relasaun entre paiz sira2. Konseitu interdependensia refere ba relasaun dependensia mutualizmu, nebe signifika katak, laiha estadu ida superior ka inferior liu estadu seluk. Ida nee kontrariu ho konseitu dependensia nebe deskreve relasaun asimetria husi estadu sira. Konseitu dependensia hatuur nasaun ida nia pozisaun boot liu ka kiik liu nasaun seluk, ho tendensia katak nasaun boot sempre obriga sira nia hakarak ba nasaun kiik, ka nasaun kiik submete no halo tuir deit saida mak nasaun boot sira hateten.

Ho konseitu rua nee, Australia dalaruma haree Timor-Leste ho perspetiva dependensia. Perspetiva nee mosu tanba Australia sente-an forte teb-tebes. Nasaun nee iha poder real (real power) nebe boot, atu instrumentaliza no movimenta ninia kapasidade negosiasaun. Perspektiva nee mos mosu tanba Australia sente halo ona buat barak ba Timor-Leste, no hanesan pais foun nebe sei kiak no fraku, Timor-Leste ninia dependensia ba Australia boot teb-tebes, liu-liu iha aspeitu seguransa no defeza. Ezemplu mak intervensaun komando Interfet post Referendum 1999 to’o prezensa International Security Force iha krizi 2006. Bazeia ba realidade nee, Australia bele iha hanoin ida katak Timor-Leste fasil atu hakruuk ba ninia dominasaun, no hateten “seja feita a vossa vontade” ba propaganda proposta Woodside.

Tanba nee mak Sekretariu Estadu Rekursus Naturais Timor-Leste nian, Alfredo Pires rasik hateten katak kompania Australianu (Woodside) arogante liu hodi tenta “obriga” sira nia proposta ba estadu soberano RDTL3. Arogante tanba lo-loos desizaun dada kadoras la’os kompetensia kompania nian. So estado RDTL ho Australia mak bele tuur iha meja negosiasaun hodi determina asuntu nee. Australia hanesan estadu soberano, “terkesan cuek” ka fase liman hodi husik kompania Woodside mai halo tentativa ho estadu Timor-Leste. Primeiru Ministru (reformado) Australia, Kevin Ruud ho ninia Ministro dos Negoçios Estrangeiros rasik lakohi “fera ulun” ba kestaun fatin explorasaun Greater Sunrise, no fo tomak kompetensia ba Kompania Woodside ho Estadu RDTL atu desidi hamutuk liu husi negosiasaun4. Ida nee hatudu inkonsistensia estadu Australia nian, tanba bazeia ba konkordansia iha primeiro governu konstitusional Timor-Leste nian nebe xefia husi Dr. Mari Alkatiri, fahe ona katak produsaun Posu Bayu Undan ninian dada ba DLNG (Australia) no Greater Sunrise sei dada mai Timor.

Iha kontekstu diplomasia, negosiasaun so bele hala’o entre entidade nebe nivel hanesan bazeia ba asuntu nebe atu diskute. Kompania ida halo negosiasaun ho kompania seluk, estadu ida halo negosiasaun ho estadu seluk, governu ida halo negosiasaun ho governu seluk. Atetude kompania Woodside halo tentativa negosiasaun ho estadu Timor-Leste, hatudu mo-mos Australia nia arogansia no hatuun dignidade Timor-Leste hanesan pais soberano.

Iha parte seluk, Timor-Leste rasik haree Australia ho perspetiva interdependensia. La’os deit Timor-Leste mak depende ba Australia, maibe paiz rua nee iha relasaun dependensia mutualizmu. Por ezemplu, kestaun fronteira maritima ho tratamentu rekursus naturais iha tasi laran, Australia labele foti desizaun unilateralmente. Australia presiza trata asuntu ida nee ho Timor-Leste.

Pozisaun jeografika Timor-Leste nian hanesan zona kruzamentu Azia-Pasifiku mos presiza hetan konsiderasaun husi Australia. Maske ida nee seidauk sai poder real (real power)5, maibe bele konsidera nudar poder potensial (potential power)6 Timor-Leste nian iha futuru. Kleur ka lalais, Australia sei konsiente importansia Timor-Leste nian atu servisu hamutuk hodi trata trafiku nebe movimenta iha maritima entre pais rua nee, hodi prevene actos illegais ruma nebe mosu iha zona neba. Haree hikas ba istoria, povu Timor-Leste mos kontribui ona buat ruma ba Australia, liu-liu iha Segunda Guerra Mundial7. Tanba nee, la’os Australia deit mak bele reklama sira nia-an hanesan salvador ou anjo da guarda.

Kaer ba realidade hirak nee, Timor-Leste lakohi hatuur-an nudar pais dependente nebe halo tuir deit pais boot hanesan Australia nia hakarak. Bele kiak, kiik no frajile iha aspeitu seguransa no defeza, maibe Timor-Leste dignifika nafatin ninia soberania hodi tau-an iha relasaun interdependensia ho Australia maske ho poder real nebe kiik.

Solusaun Alternativa

Bazeia ba relasaun poder entre Australia ho Timor-Leste nebe deskrita ona, Timor-Leste bele prefere solusaun alternativas hirak tuir mai nee hodi hasa’e kapasidade negosiasaun, nunee bele realiza mehi atu dada kadoras mai Timor-Leste. Ida, hapara negosiasaun asuntu explorasaun Greater Sunrise hodi husik hela ba jerasaun aban bainrua, wainhira opsaun kadoras mai Timor-Leste la realiza8. Impaktu husi alternativa ida nee mak Timor-Leste sei lakon oportunidade ida atu hetan rendimentu minimu husi asuntu ida nee. Impaktu seluk mak presu mina nian sempre fluktuativa, labele siik ninia folin tuun ka sa’e ka bele mos valor iha ka lae iha tempu futuro, quanto mais teknolojia kona ba enerjia alternativa seluk komesa dezenvolve ona iha nasaun barak.

Rua, hakotu relasaun kooperativa ho Woodside, hodi buka fali kompania seluk nebe iha disponibilidade dada kadoras mai Timor-Leste, tanba Greater Sunrise pertense ba Timor-Leste nia zona maritima tuir prinsipiu median line iha UNCLOS (United Nations Convension on the Law of the Sea). Ninia konsekwensia mak Australia bele sensitivu hodi reklama no retira fali ajudos sira nebe durante nia fo ba Timor-Leste. Ida nee bele hamosu relasaun diplomatika nebe laduun diak entre pais rua nee. Se Timor-Leste prontu simu konsekuensia nee, entaun tenke hakbesik-an hodi buka apoiu maximu husi nasaun Sudeste Aziatiku sira. Maibe ida nee depende mos ba benevolensia nasaun sira nee, tanba Indonesia nebe influensia maka’as iha Sudeste Aziatiku sei iha problema passado balun nebe seidauk rezolvidu ho Timor-Leste.

Tolu, introduz diplomasia total. Solusaun ida nee bele favorabel ba Timor-Leste nebe ninia real power (kbiit real) kiik liu Australia nian. Diplomasia total refere ba envolvementu entidades hotu-hotu iha estadu nia laran hodi halo asaun hasoru presaun estadu seluk nia interese. Total diplomasia bele hetan susesu wainhira Timor-Leste konsidera pontus importante hirak nee;

a) Konsolidasaun Internal9. Signifika katak entidades hotu-hotu iha vizaun ida deit, tanto prezidente republika, governu (primeiru ministru), parlamentu nasional no organizasaun naun govermentais, hotu-hotu iha prinsipiu ida deit, laiha diferensa ideias atu dada kadoras Greater Sunrise mai Timor-Leste.

b) Negosiasaun Trans-parente ou Nakloke10. Saida deit mak akontese iha meja negosiasaun tenke publika hodi movimenta simpatia domestika, nunee bele fo presaun ba Australia nia pozisaun. Pontu ida nee importante, tanba durante nee informasaun sobre negosiasaun asuntu minarai laduun hetan asesu husi publiku.

c) Movimenta Propaganda iha Australia rasik, em termos de kria relasaun diak no amizade ho entidades ou povu Australianu nebe la konkorda ho pozisaun sira nia governu rasik. Uluk iha governu anterior Australia nebe iha tempo neba lidera husi John Howard, asuntu Tasi Timor sempre hetan reasaun kontraditoria husi ninia povu rasik. Povu no sosiedade sivil Australianu, ejizi Governu Australianu atu respeita direitu no soberania Timor-Leste nian.11 Nee duni envolvementu sosiedade sivil no povu husi nasaun rua nee presiza rekonhese nudar parte integradu husi luta atu hetan benefisiu Greater Sunrise nian. Partisipasaun entidade sira nee fo ona presaun balun ba Australia, ezemplu mak persentajem fahe reseitas Greater Sunrise nebe hetan mudansa maka’as husi 18% ba 50%.12

d) Movimenta Propaganda iha Nivel Diplomasia Internasional. Presiza foti kazu nee iha forum ou dialogu internasional sira hanesan ONU, ASEAN + 3, Asian Regional Forum (ARF), CPLP no forum sira seluk, nunee bele hetan simpatia internasional ba asuntu nee. Simpatia internasional husi pais nebe boot no forte sei fo presaun psikolojika nebe signifikante ba pozisaun Australia nian.

e) Movimenta Balanço de Poder (balance of power)13. Timor-Leste presiza konvense nasaun Asia sira seluk atu bele tama ba membru ASEAN. Wainhira tama ona ba komunidade ASEAN, sei fo impaktu ba kapasidade bargaining of power Timor-Leste nian ho Australia iha negosiasaun ba asuntu disputa ruma. Perspetiva Australia sei muda-an husi konseitu relasaun dependensia ba relasaun interdependensia ho Timor-Leste.
  1. Ginanjar Bagyo, “HUBUNGAN INTERNASIONAL (HI)” http://anjar. student.umm.ac.id/, 06 Junho 2010
  2. Ibid
  3. Tempo Semanal, “Timor-Leste Proven It’s Suspicious of Australian Woodside Company”, http://temposemanaltimor.blogspot.com/2009/06/tempo-semanal-edisaun-143-addendum.html, 24 Junho 2010
  4. Timor Post, edisaun 29 de Junho de 2010, pág. 1
  5. Ramlan Subakti “Memahami Ilmu Politik”, PT Gramedia Widiasarana Indonesia, Jakarta, 1992, hal.60
  6. Ibid
  7. John G.Taylor, “Perang Tersembunyi, Sejarah Timor-Timur Yang Terlupakan”, Fortilos, Jakarta, hal.25
  8. Pasific.Scoop, “Timor-Leste Dismisses Woodsides Sunrise Concept“, http://pacific.scoop.co.nz/2010/04/timor-leste-dismisses-wood-side%E2%80%99s-sunrise-concept/, Dili, 18 Junho 2010.
  9. Walter Jones, “Logika Hubungan Internasional “, PT Gramedia Pustaka/Utama, Jakarta, 1993, hal.199
  10. Roger Dawson, Secret of Power Negotiating, PT Gramedia Pustaka Utama, Jakarta, 2004, pág. 408 & 418.
  11. Ibid
  12. Walter Jones, op.cit, hal.35
* Centru Peskiza Parlamentar/ Parliamentary Research Center (PRC)Publika iha Jornal Parlamentar no publika iha Jornal Parlamentar,edisaun tinan II/no.3/Julho-Setembro 2010,pajs.6,7 no 30!

Sem comentários:

Enviar um comentário

Nota: só um membro deste blogue pode publicar um comentário.