LAE BA SENTRU PROSESAMENTU REFUJIADU IHA TIMOR-LESTE

LAE BA SENTRU PROSESAMENTU REFUJIADU IHA TIMOR-LESTE

Kasilo Bere-Meta*

Semana hirak ikus media nasional sira Timor nian ko’alia barak kona-ba proposta Austrália nian atu harii Sentru Prosesamentu ba Refujiadu sira iha ita nia rain. Mosu ona hanoin pró ho kontra, tantu hosi sidadaun baibain, hosi sosiedade sivil to’o orgaun soberano sira. PR José Ramos Horta, bele dehan, defensor forte ba proposta Australia nian. Nia halo presaun ba Governu, liliu ba PM Xanana Gusmão atu nahouk ho hanoin ne’e ho resan “moral” no “umanitaria”. Enkuantu membru PN sira, reprezenta hosi partidu hothotu ne’ebé iha asentu parlamentar, iha ninia sesaun 12/02/2010, hothotu lia-ida dehan lae ba proposta PM Australia, Julia Gillard nian. Membru PN sira la simu proposta ne’e ho razaun katak refujiadu sira be hetan iha pasifiku la’os tanba problema umanitaria ka politika maibe problema ekonomika. Karik problema umanitaria ka politika Timor-Leste bele simu, katak membru PN sira.

Prezidente José Ramos Horta reforsa nia nahouk ba proposta Austrália nian ho resan katak: “Timo-Leste iha obrigasaun atu tulun dezlokadus azilu politika sira, ne’ebe kiak, halai hosi violensia no funu laran... Timoroan sira mos uluk halai ba ema nia rain hodi buka moris, ema simu ho liman rua” (JND, 26/07/2010). Prezidente hein hosi PM Xanana Gusmão atu loke odamatan ba Australia hodi harii sentru prosesamentu ka detensaun ba refujiadu sira. Prezidente Horta dehan: Hau koalia ona ho Primeiru Ministru [Xanana Gusmão], nia mos fuan osan mean hanesan hau, nia konkorda, maibe kondisaun barak atu fo duni luz verde, ne’e Australia tenki fo resposta ba pontus barak tebes” (JDN, 28/02/2010)

Loos duni haree hosi kestaun moral no umanitaria ita presiza tetu hodi tulun ema ki’ak ho ki’ik sira halai hosi funu. Tanba ema sira ne’e inosente no vitima hosi politika ho funu. Buat ne’ebé sai lia maka ita la hatuur didi’ak ninia resan. Karik haree ba ema rai seluk uluk simu Timoroan ho liman rua maka ita mós tenki simu, resan ida nia abut la metin. Uluk Timoroan sira halai hosi nia rain la’os tanba ki’ak maibe tanba funu ho persegisaun politika. Karik tanba ki’ak, tuir loloos sira hela nafatin iha rai seluk ne’ebé moris di’ak liu. Iha realidade Timoroan barak ohin loron fila mai nia rain, maski TL sei ki’ak nafatin.

Presiza haree hikas ba kotuk, rai hira maka uluk simu Timoroan sira no simu ho liman rua duni ka lae. Timoroan sira hosik hela nia rain hodi rame-rame ba Portugal depois balu liu ba Australia ho Afrika nu’udar refujiadu ka repatriadu?

Wainhira nakfera funu sivil entre Fretilin ho UDT iha 1975 no loke dalan ba sukun tama Indonezia iha Timor-Leste, halo Timoroan mate barak no obriga Timoroan barak hosik hela nia rain. Família Timor barak sai ba Portugal liu hosi Kruz Vermelha Internasional. Sira ne’e la ba hanesan imigrantes ilegais no la ba mós hanesan refujiadus, maibe ba hanesan repatriadus (fila ba nia rain rasik) tanba Timoroan sira nu’udar sidadaun Portugal nian no ONU rekoñese Portugal nu’udar potensia administrante Timor nian iha tempu ne’eba. Ita la nega Timoroan balu halai ba Australia, la sa’e roo rai seluk nian maibe sa’e rasik roo Australia nian. Timoroan barak tama Australia legalmente, la’os hanesan refujiadu, maibe halo parte programa reunifikasaun ba família sira ne’ebé fahe malu. Lei Australia nian admite ida ne’e. Ita mós la nega Timoroan balu tama iha Australia lori vistu nu’udar turista ou ba vizita família depois la fila mai Timor tanba sente persegidu hosi militar Indonezia sira. Sira ne’e balu hela ilegalmente iha Australia. Ita mós la nega katak iha ita nia istoria, rejista boat people dala ida ne’ebé tama ilegalmente ba Australia. Boat people ne’e xefia rasik hosi matebian Alfredo Reinado Alves. Sira ne’e mós Governu Australia la simu ho liman rua, maibe to’o ikus simu sira tanba hetan presaun makaas hosi sosiedade sivil Australia sira nian. Grupu ne’e halai ho roo la’os tanba ki’ak maibe tanba hetan persegisaun politika hosi militar Indonezia sira.

Iha dekada 90 nia laran, Governu John Howard nian rekuza legaliza estatutu Timoroan sira halai hosi funu ne’ebé hela ilegalmente iha Australia no ameasa atu haruka fila mai TL. Sorte ho presaun makaas hosi povu Australia, ne’ebé sente deve hela Timoroan sira tanba, iha Funu Mundial da-II, Timoroan sira subar no tulun komandu Australianu sira hodi halo funu hasoru forsa Japaun sira, maka Governu John Howard nian la entrega Timoroan sira ba Indonezia.

Istoria jovem sira husu azilu politika iha Jakarta mós ladun morin. La iha embaixada ruma maka hakarak simu jovem ho estudante sira ne’ebé husu azilu politika iha Jakarta, inklui Australia rasik. Timoroan sira kuaze tama hotu kedas iha embaixada sira rai Europa nian iha Jakarta hodi husu azilu politika, inklui Australia nian. Australia nian, Timoroan sira tama liu dala ida. Ida ikus liu iha 1996, estudante hamutuk na’in sia, feto ho mane, husu azilu politika iha embaixada ne’e. Sira tuba fulan ida resin iha embaixada laran, maibe Governu Australia lakohi simu sira. Estudante sira ne’e hodibi’it hosik hela embaixada ne’e no fila ba sidade sira ne’ebé sira estuda ba. Balu depoisde sai hosi embaixada Austrália nian halai liu ba Portugal. Sira seluk Indonezia la kaer tanba Jakarta halo tuir Camberra nia husu no Jakarta hakarak ka lakohi tenki tuir, tanba Australia iha tempu ne’eba, nu’udar rai ida de’it iha mundu rai klaran maka rekoñese juridikamente Timor nu’udar Provinsia Indonezia ba da-XXVII.

Jovem ho estudante universitariu sira Timoroan na’in 29, ne’ebé okupa embaixada Amerika iha Jakarta iha 1994 mós hatene di’ak tebes oin-sa embaixada ne’e halo tratamentus ida aat tebes ba sira durante loron 10 resin iha embaixada ne’e. Televizaun mundu tomak nia hatudu oin-sa jovem ho estudante sira ne’e sai krekas dekor no hatais ropa foer de’it iha embaixada Amerika nia laran.

Haree hosi istoria sira ne’e hotu, ita labele dehan rai seluk simu ita ho liman rua. La iha embaixada ruma iha Jakarta, iha tempu ne’eba, maka hakarak simu Timoroan sira hodi haruka ba sira nia rain. Portugal mesak maka simu Timoroan sira tanba Timoroan sira nu’udar sidadaun Portugal nian. Rai sira seluk, inklui Austrália, la iha ida maka hakarak simu Timoroan sira iha sira nia rain.

Haree ba realidade sira ne’e hotu no tratamentus aat ne’ebé Timoroan sira hasoru, susar tebes ita dehan rai seluk simu ita ho liman rua. Maibe la’os mós tanba ema rai seluk la simu ita ho di’ak hodi sai baze atu Timoroan sira trata aat ka rekuza simu refujiadu sira hosi rai seluk. Importante maka tenki hatuur problema iha nia fatin loloos no uza argumentu ne’ebé forte hodi justifika simu refujiadu sira. Labele falun ho buat falsu katak rai seluk simu ita di’ak tebes hodi ita mós tenki simu refujiadu sira seluk tanba ida ne’e la akontese ba Timoroan sira hotu. Insultu boot ba Timoroan sira wainhira dehan ema rai seluk simu Timoroan sira ho liman rua, tanba barak maka terus tebes. Timoroan sira ne’ebé ba Portugal iha 1975, hothotu sei sente oin-sa sira moris iha tahu laran sira iha Balteiro, maski sira nu’udar ema Portuges.

Se ita iha fuan osan mean duni, hakarak tulun ema tanba kestaun moral no umanitaria, la presiza haree ba se uluk ema seluk simu ita ho liman rua ka lae. Se ita nia konsiensia ho sensibilidade nu’udar umanu maka dudu ita hakarak tulun ema seluk, entaun la presiza haree ba tusan uluk ema simu di’ak ka la simu di’ak ita. Buat ne’ebé importante atu haree maka ema sira halai ne’e tanba refujiadu duni kae lae, tanba persegidu politikamente duni ka lae ka tanba ki’ak no hakarak buka hadi’a nia moris iha rai Australia. Nune’e mós tenki haree katak ita nia rain iha kondisaun atu simu refujiadu sira ou lae.

Agora daudaun, ema sira halai ho roo ba Australia, barak liu hosi Afganistaun ho Srilangka no balu hosi Pakistaun. Uluk liu boat people barak hosi Kamboja ho Vietname. Ita rekoñese uluk iha funu iha rai sira ne’e no rai balu ohin loron sei iha funu laran. Rai sira ne’e halo fronteira terrestre barak ho rai seluk. Porzemplu Afganistaun ho Pakistaun halo fronteira terrestre ka besik liu ba Iraun, Turkeministaun, Tajikistaun, Índia, Xina, Oman ho Árabe-Saudita no Srilangka besik liu ba Índia, Myanmar, Tailândia, Malásia, Singapura ho Indonezia. Lia husuk ne’ebé ita hatuur maka ida ne’e: Se tanba persegisaun politika, nusa maka sira la husu azilu politika ka la halai ba rai sira halo fronteira terrestre ka besik liu ba sira? Nusa maka la husu azilu politika iha embaixada rai-li’ur sira iha sira nia rain ka besik sira nia rain? Nusa maka tenki halai ba Australia? Haree ba realidade sira ne’e, susar tebes atu dehan sira halai ba Australia tanba hetan persegisaun politika. Motivu ne’ebé lori sira hakarak halai ba Australia, kuaze 80 ka 90% tanba hakarak hetan moris di’ak, basaa Australia nia moris di’ak liu dok duke rai sira ne’ebé ninia ema halai ho roo ne’e ka rai sira besik sira nia rain. Ita la nega refujiadu sira la halai ba rai sira halo fronteira ho sira tanba rai sira ne’e, ida rua sei moris hela iha funu laran, maibe, barak liu moris iha dame laran, balu nia ekonomia di’ak no balu nia ekonomia aat. Iha rai sira hanesan Iran, Oman, Turkeministaun,Tajikistaun, Índia, Xina, Tailândia, Malazia, Singapura ho Indonezia la iha funu, maibe refujiadu sira prefere halai ba Australia tanba iha rai ne’e kondisaun moris di’ak liu.

Haree ba kondisaun real Timor nian, susar tebes atu simu refujiadu sira ho numeru boot. Sentru prosesamentu ida la’os harii hodi simu ema rua nulu ka limanulu, maibe to’o rihun. Harii sentru prosesamentu ida tanba prevê ona katak TL sei simu refujiadu sira rihun ba leten. Se atu simu de’it ema na’in sanulu ka ruanulu, la presiza sentru prosesamentu, tanba ita iha Serbisu Imigrasaun bele trata asuntu imigrantes ilegais sira nian.

Ita foin ukun-an, ita nia rain ki’ik, ema kiak sei barak tebes, instituisaun estadu ho sistema politika, ekonomika ho sosial sei frajil tebes. Ita foin harii instituisaun Estadu nian no sei dezenvolve hela balu. Lei barak sei falta, liliu lei oan sira, normas, organizasaun ho prosedimentus barak mós seidauk iha. Buat ne’ebe ita presiza halo hodi hadi’a ita nia moris rasik ita seidauk halo, oinsa ita hanoin atu aseita harii sentru prosesamentu ba refujiadu sira rai-li’ur nian ne’ebé mós presiza lei oan ho bei-oan sira hodi regula sira nia moris iha ita rain?

Oin-sa maka ita atu tau matan ba ema seluk, enkuantu ita nia problema rasik hada malu no seidauk haloot hotu? Oin-sa rai ki’ak ida ne’ebé la konsege tulun ninia ema ki’ak rasik bele tulun ema ki’ak hosi rai seluk? Karik ita rai boot, riku no iha estabilidade politika, ekonomika ho sosial di’ak no metin, ita bele tetu Austrália nian proposta. Maibe ho kondisaun Timor nian hanesan ohin loron ne’ebé taxa dezempregu aas tebes, ladun tama ulun hodi ajuda ema ki’ak sira.

Ita nia moris ne’ebé susar ona, povu kontinua moris iha kiak nia laran, nesesidade baziku de’it ita seidauk responde ho di’ak oin-sa maka ita hakarak aumenta tan problema boot ida ne’ebé rai seluk dudu mai ita? Refujiadu sira ka ema sira halai ho roo boot ka ki’ik hosi sira nia rain, la’os atu mai iha Timor-Leste, sira hakarak ba Australia. Halo oin-sa maka ema la buka problema ba ita no ita tenki ba lori problema todan ne’e mai ita nia rain? Se ema sira ne’e hakarak halai mai ita nia rain, ita bele tetu tanba kestaun moral ho umanitaria, maibe sira hili rai seluk. Ita nia laran di’ak tenki la’o hamutuk ho ita nia kapasidade. Se ita bali de’it ita nia an rasik susar tebes ona oin-sa atu bali ema seluk?

Labele haruka kosok oan ida bali ema otas boot ho problemas boot. Ekonomikamente TL sei fraku tebes tanba ne’e ohin loron sei depende makaas ba tulun hosi rai-li’ur nian. Ita labele hakfodak de’it ba ekonomia ne’ebé Australia hakarak oferese ba ita hodi tau ita nia rain iha risku boot no naruk. Nauru ho Manus (Papua New Guinea) hetan ona sa mundansa ekonomika ba populasaun nia moris depoisde simu sentru prosesamentu ka detensaun ba refujiadus iha sira nia rain? Buat ne’ebe sira hasoru maka refujiadu sira sai stress no frustradu tanba la rezolve lalais sira nia situasaun iha ne’ebé halo sira balu oho an, balu halo manifestasaun no hamosu disturbios oioin ne’ebé lori problema rasik ba rai rua ne’e. Ita lakohi atu ida ne’e akontese iha ita nia rain.

TL ninia seguransa rasik seidauk metin. Foin ita tenta hametin liu hosi politika reforma oioin iha area seguransa nian. Ita la iha ekipamentus di’ak hodi deteta krimi oioin nune’e mós seidauk iha rekursus umanus kapasitadus hodi identifika ho deteta atividade terrorista ho kriminozu sira nian.

Haree ba buat hirak ne’e hotu hatudu katak ita seidauk preparadu hodi lida ho imigrante ilegais ka refujiadu sira ne’ebe tama ho roo no ho numeru boot.

Tuir prezidente Jose Ramos Horta ba TV Austrália nian katak: “Ha’u lakohi Timor-Leste sai illa prizaun ida ba ema hirak halai hosi violensia”. Nune’e mós prezidente Horta dehan katak “Timor-Leste hein tulun osan hodi bali refujiadu sira no fo postu serbisu ba sira, hodi sira labele tuur la halo buat ida iha sentru, hanesan dadur sira” (Asia Pacific News, 7/07/2010).

Prezidente Horta nian hanoin hanesan ho ema balu nia hanoin. Maski dehan de’it TL hein tulun osan hosi rai seluk hodi bali refujiadu sira maibe ita hatene ona katak, iha mós hanoin katak Australia bele tulun tan buat ruma ba ita.

Tulun ne’e bele mós signifika troka sentru prosesamentu ba refujiadu ho dada kadoras mai TL ka bele mós hanoin katak ho sentru ne’e sei hatama osan barak mai TL no sei fo serbisu barak ba Timoroan sira.

Se ita simu harii sentru prosesamentu ba refujiadu sira hodi troka ho dada kadoras mai TL hanesan de’it ita monu iha xantajem rai boot ne’e nian. La iha resan atu troka buat ida tanba Great Sunrise iha ita nia tasi laran.

Nauru illa kikuan ida (ho 21KM kuadradus de’it) hetan iha tasi klaran Oseanu Pasifiku ne’ebé deklara nia ukun-an iha tinan 1968 hosi rai tolu: Australia, Nova Zelândia ho Reinu Unidu. Ninia ekonomia sadere de’it ba esportasaun fosfatu, maibe ninia riku sira seluk kokir mós tiha ona, tanba ne’e nia presiza fonte ekonomia seluk. Tanba difikuldade oioin ne’ebé rai oan ne’e hasoru, nia husu ba Australia bele tulun sira iha área teknolojika no finanseirus hodi troka ho harii sentru prosesamentu ba refijiadu sira iha sira nia rain. Illa ida ne’ebé Australia uza ho kustu ida ki’ik tebes.

TL la’os Nauru ne’ebé ukun-an kleur ona no Timor ninia riku soin mós la’os ki’ak hanesan Nauru nian. Ita nia riku-soin sei tomak. Ita nia rain riku duni, maibe ninia povu maka sai ki’ak iha riku-soin iha tasi ho rai maran leten sira ne’e. Ita sei ki’ak tanba ita foin ukun-an no seidauk esplora riku soin ne’ebé ita iha, nune’e mós tanba sei falta rekursus umanus ho teknolojia maka halo rai balu na’uk hela ita nia riku-soin mós ita tane hasan haree de’it.

Se ita esplora no jere didi’ak ita nia riku-soin, maka ita la presiza hetan osan hosi Australia hodi troka ho sentru prosesamentu ba refujiadu ida ne’ebé lori risku boot tebes ba ita nia rain. Kustu politika, sosial ho kultural sei boot liu duke kustu ekonomiku. Sa-tan tulun finanseiru ne’ebé dehan haruka mai Timor ne’e mós dala ruma la tama ba ema Timor nia bolsa laran no la aumenta ekonomia lokal nian.

Tinan sanulu ne’e ita iha esperiensia ona. Osan ne’ebé dehan hosi li’ur haruka barabarak mai TL, barak liu la’os Timoroan sira maka simu, maibe ema internasional sira maka simu. Iha duni Timoroan ida rua maka simu, maibe ninia persentajem ki’ik tebes. Osan sira ne’e mós barak fila hotu fali de’it ba li’ur, la’os hela iha ita nia rain. Haree de’it, iha loron feriadu sira, ka iha sesta aviaun sai nakonun loos ba Bali ho Darwin no iha Segunda aviaun hosi Bali ho Darwin tun dala rua iha Díli ne’ebé nakonun ho internasional sira. Ida ne’e fim de semana de’it, seidauk konta ho loron feriadu sira. Ita hatene de’it maka sura dehan osan tama barak mai TL, maibe ita haluha tiha katak, internasional sira maka barak liu simu osan sira ne’e no osan sira ne’e sira ba gasta fali iha Bali ho Darwin. Ita seidauk haree internasional sira sa’e kareta nadodon ba Kom ka fatin seluk. Karik osan sira ne’e gasta iha ita nia rain, ita sei manan netik buat ruma.

Ita bele fiar katak sentru prosesamentu ba refujiadu sira, karik harii duni iha Timor, la’os ema Timoroan sira maka kaer, maibe internasional sira hosi Australia ho hosi UNHCR sira maka sei kaer. Nune’e maka osan ne’ebé atu hatama mai Timor ne’e mós sira maka sei simu no sei ba gasta tan iha Bali ho Darwin. Nune’e, tetu ba mai, sentru prosesamentu ba refujiadu ne’e sei la lori mudansa ruma ba Timoroan sira nia moris, maibe sei lori tan de’it risku boot mai TL.

Ne’eduni, lalika kaben boot ba osan hodi tau ita nia rain iha risku politika, sosial ho kultural. Tuir esperiensia rai sira ne’ebé harii sentru prosesamentu ba refujiadu sira iha sira nia rain, refujiadu sira mós hamosu problemas barak ba sira.

Prosesu ba refujiadu sira la’os dura fulan ka tinan ida rua. Balu hela iha sentru refujiadu lori tinan 5 to’o tinan 15 foin hetan solusaun. Balu hola malu, kaben to’o oan boot iha sentru prosesamentu nia laran. Balu nia kazu la rezolvidu no hein prosesu to’o tinan 20 ba leten. Buat hirak ne’e hotu halo sira sai frustradu ho stress, ne’eduni halo sira balu oho-an ou hamosu problema oioin tanba sira moris iha inserteza nia laran.

Perigozu liu tan ba Timor se ita tuir Prezidente José Ramos Horta nia hanoin ne’ebé hosik refujiadu sira livre desloka ba ne’ebé de’it iha Timor-Leste laran no fo tan serbisu ba sira. Perigozu tanba:

1. Prezensa refujiadus rai-li’ur bele sai fonte konflitu sosial ba populasaun lokal rasik. Moris ne’ebé susar ona sei sai susar liu tan ho simu refujiadu sira iha TL.

2. Kria insatisfasaun sosial ba ema ki’ak sira wainhira refujiadu sira hetan tratamentu di’ak liu fali Timoroan sira. Oinsa maka ita hakarak fo serbisu ba refujiadu sira enkuantu Timoroan rihun ba rihun buka serbisu to’o kosar metan suli no sai stress no frustadu tanba la hetan nafatin serbisu?

3. Refujiadu sira ne’ebé livre movimenta ba mai, la taka dalan bele kaben ho Timoroan sira. Ida ne’e akontese ona iha Indonezia. Indonezia ho UNHCR fo kartaun ba refujiadu sira. Refujiadu sira desloka ba ne’ebé de’it, to’o balu kaben ho feto Indonezia sira no iha oan. Wainhira kaben ona maka la ba ona rai seluk ou bele ba rai seluk, maibe bele soe hela fen ne’e tanba la iha dokumentu ruma bele komprova sira nu’udar fen ho la’en. Wainhira soe hela fen hamosu tan problema sosial foun. Problema seluk tan hanesan mós iha Indonezia nian, refujiadu balu la’o livre to’o Merauke, buka konvense ka sosa peskador sira Indonezia nian hodi lori sira ba Australia, ida ne’e mós bele hamosu problema foun tanba envolve hotu peskador sira.

4. Refujiadu sira barak ne’ebé mai ho background kultural ho relijiaun la hanesan Timor nian bele hamosu problema sosial, kultural ho relijioza. Ita lakohi atu hanoin sira radikalizmu ho estremizmu mosu iha ita nia rain.

5. Ita aseita simu sentru prosesamentu ba refujiadus iha TL signifika ita loke oda matan luan atu ema hotu bele mai iha TL rame-rame ho roo ilegais sira. Ne’e signifika ita mós bele loke dalan ba Alqaeda ho Taliban sira, tanba sira mós bele disfarsa-an ka nakfilak-an ba refujiadu sira, depois maka buka influensia musulmanu moderadu sira iha TL hodi sai fundamentalista ho radikal hanesan sira.

6. Keta hanoin sei iha solusaun di’ak ba refujiadus ka imigrantes ilegais sira hotu. La fasil atu hetan rai sira simu refujiadu sira ne’ebé prosesa hotu ona. Bele lori tinan 5 to’o 10 ou liu foin hetan rai ida rua aseita simu refujiadu sira. Sira simu mós ho kondisaun barak nune’e mós lakohi simu numeru boot. Sira sei simu de’it sira ne’ebé di’ak, sira ne’ebé aat sei hela ba ita nune’e mós sira ne’ebé prosesa hotu ona no rai seluk la simu, ita maka tenki tau matan ba sira.

Ita la iha akordu ruma ho rai sira ne’ebé nia ema halai hodi haruka sira fila ba nia rain. Ita mós la hatene rai sira ne’e hakarak simu fila sira nia ema ka lae. Ita mós la hatene sira iha osan hodi selu billete hodi sira nia ema sira bele fila ka lae. Ka TL maka tenki selu? Keta haluha sidadaun TL ne’ebé hetan iha li’ur tanba sees hosi persegisaun politika no barak kontribui ba TL nia ukun-an sei barak. Sira ne’e barak seidauk fila tanba osan la iha. To’o agora Governu TL seidauk hanoin tulun sira hodi bele fila. Portugal rasik mós la iha osan ba ida ne’e. Se ita nia sidadaun rasik ita susar ona tulun sira ho osan hodi fila, oin-sa ita hasai fali osan hodi haruka fila refujiadu sira hosi rai seluk ba nia rain?

Ideal liu sentru prosesamentu ba refujiadu sira harii besik iha rai sira funu nian, nune’e hodi labele tau risku boot ba ema refujiadu sira ne’ebé halai dok. Barak maka mout ou mate tuir tasi laran tanba la’o dok, tanba hasoru laloran ho anin boot. Tau besik iha sira nia rain hodi minimiza riskus ba vida no karik haruka fila ba nia rain mós kustus ekonomikus ho finanseirus ki’ik. TL dok tebes hosi Srilangka, Afganistaun ho Pakistaun.

Timoroan sira ne’ebé halai hosi funu ka husu azilu politika sai ba Portugal, barak fila ona mai TL no barak mós seidauk fila. Sira tenki ba buka serbisu mesak iha Portugal ka iha Europa seluk ka iha Australia, hodi selu nia billete fila mai TL. Refujiadu hosi rai-li’ur sira ne’ebé atu mai TL, ba buka serbisu iha ne’ebé hodi sosa billete hodi fila ba nia rain? Iha TL? Iha Indonezia ka iha Australia? Lalika mehi atu ba buka serbisu iha Indonezia ho Australia. Governu Timor-Leste rasik negosia ona ho Governu Australia atu haruka Timoroan sira dezempregadu ba serbisu iha ne’eba, maibe Australia la simu, sa tan simu refujiadu sira ne’ebé sira ta’uk liu. Indonezia mós sei la simu tanba sira nia ema mós tokon maka ohin loron la iha serbisu. Iha TL susar liu tan, basaa, ema sira uluk funu ba rai ida ne’e nia ukun-an, tama sai kadeia no militar Indonezia sira hurlele to’o kle’uk mós rihun ba rihun seidauk hetan serbisu. Se fo uluk serbisu ba refujiadu sira sei hamosu de’it problemas sosiais ne’ebé bele afekta mós ba estabilidade nasional.

Ita labele taka odan matan ba ema sira persegidu ne’ebé buka azilu politika iha ita nia rain. Ema sira ne’ebé hetan persegisaun tanba kestaun politika no husu azilu politika iha ita nia embaixada, konsuladu ka iha ita nia rain, ita bele tetu simu, maibe ida halai hosi ki’ak ka hakarak buka muda nia moris ita labele simu, tanba ita nia rain mós sei iha ema kiak barak, maski ita nia rai ho tasi isin rua makaas ba riku-soin.

TL iha dever moral atu tulun ema sira susar no terus tanba funu. Buat ne’ebé ita bele halo maka intensifika ita nia diplomasia no tuir buka solusaun hodi hapara funu iha rai sira ne’ebé agora moris hela iha funu laran. Ida ne’e maka importante no urjente atu TL halo hamutuk ho Australia ho rai seluk.

La iha dalan seluk hodi hapara refijidus ka imigrantes ilegais sira. Iha dalan ida de’it, halo para funu no buka fo apoio diretu ba rai sira ne’ebé ninia povu koko halai ba rai seluk. Ajuda liu husi politika no ekonomika, tulun kria estabilidade iha rai sira ne’e no hadi’a rai sira ne’e nia ekonomia hodi sira nia povu bele moris di’ak no hakmatek hodi la hanoin halai ba rai seluk. Karik la halo buat hirak ne’e, problema refujiadu sira nian la sei rezolve no sei kria problemas barak ba rai seluk. Nune’e mós rai boot sira ho politiku sira labele buka provoka funu tun sa’en iha rai seluk ka iha nia rai laran hodi hamosu deslokadus ka refujiadu sira.

Ohin loron mosu refujiadu sira barak tanba rai boot sira mós tuir sala. Sira maka ba esplora rai ki’ik sira hodi rai ki’ik sira sai ki’ak liu tan, sira maka ba provoka funu tun sa’e hodi sira nia sasan bele folin no bele garante sira nia interese politika, ideolojika, militar no ekonomika. Tanba ne’e rai ki’ik sira labele ba responsabiliza ba sala rai boot sira nian, sa-tan hola netik ba an problema rai boot sira nian.

*Membru RENETIL