VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE
Bloku Unidade Popular Associação Popular Monarquia Timorense Kmanek Haburas Unidade Nasional Timor Oan Partido Esperança da Pátria Partido Socialista de Timor Partido Desenvolvimento Popular Congresso Nacional para a Reconstrução de Timor-Leste Partido Republicano União Democrática Timorense Partido Democrata Cristão Partidu Movimento Libertasaun Povu Maubere Partidu Libertasaun Popular Partido Democratico União Nacional Democrática de Resistência Timorense Partido Unidade Desenvolvimento Democrático Partido Timorense Democratico Frenti-Mudança Partido Social Democrata Centro Ação Social Democrata Timorense Partido do Desenvolvimento Nacional Frente Revolucionaria de Timor-Leste Independente
NICOLAU LOBATO
“O povo de Timor-Leste está reconstruindo com o seu próprio suor, com o seu próprio sangue uma pátria revolucionaria democrática, uma terra livre para gente livre”.

Espelho da Realidade
A Esperança Nunca Morre
TIMOR-LESTE



Interview with Fernando Lasama de Araujo: On the road to democracy, where the streets have no name
UKUN HAMUTUK?
Sorumutu "Meja Bo'ot" nakonu ho "bua-malus". Sei lo'ok ba malu hela hodi mama hamutuk.
Fretilin
Fretilin - CNRT
Fretilin - PLP
Fretilin - PD
Fretilin - KHUNTO

 
 
   

sexta-feira, 21 de maio de 2010

Senhor Martinho Sacadura nia Ad Hominem: Perspectiva no Ressentimento

Martinho G. da Silva Gusmão *)

Forum Haksesuk hatun artigu kona ba debate entre hau no Sr. Martinho Sacadura. Dala ida ne’e hau hakerek badak deit atu resolve deit argumento ad hominem ne’ebe – infelizemente – mosu barak liu iha atmosfera, hodi halakon fali asuntu substansial ne’ebe uluk sai nudar intensaun original iha hau nia pensamento.

Uluk nanian (1), hau sente neon-sala ho liafuan “beik-ten” ne’ebe hau pronuncia iha artigu liu ba! Wainhira hau le hikas Sr. Sacadura nia “anotasaun”, hau hanoin la devia-ser hau dehan liafuan ida ne’e, justamente tan halakon deit “… respeito pela dignidade da pessoa humana”. Tan ne’e, se Sr. Sacadura “hirus” no “ran nakali” ho liafuan ida ne’e, honestamente hau husu desculpa. Hau tenki dehan, katak, hau uza liafuan “beik-ten” nudar reasaun ida, tan Sr. Sacadura hakerek: “Padre Martinho hanoin ema Timor beik hotu … hatudu arrogancia intellectual iha sorin ida e ao mesmo tempo hatudu falta conhecimento klean sobre mundo”! Sinceramente, hau nunka hanoin katak “ema Timor beik hotu”, tan ne’e hau halo reasaun ba Sr. Sacadura! Maski nune’e hau hakarak konfesa nafatin mea culpa tan hau mos monu ba tentasaun hodi pronuncia tuir liafaun “beik-ten” ne’ebe la merece atu uza iha debate intelektual ida. Maibe, pronto, agora Sr. Sacadura repete liafaun “beik-ten” iha kontekstu ad hominem ida too ressentiment ne’ebe makaas tebes, entaun ho neon-mos no laran-mos hau retira liafuan ne’e. Obrigado mos ba Forum Haksesuk nia liafuan kmanek (iha post scriptum) katak “conceito ‘beikten’ nunca se uza para caracterizar a qualidade intelectual de um ser humano. Ninguem nasce inteligente mas nunca antes concebido como ‘beikten’”.

Tuir mai (2) hau hatene deit Sr. Sacadura nia artigu tan hau hetan short-messages (sms) husi belun ida, wainhira hau iha hela Suai (la iha aksesu ba internet ka jornal), no maluk seluk informa ba hau iha Maubisse. Fila mai Dili, 2 de Maio hau telefone kedas Direitor Timor Post (Sr. Jose Ximenes) no buka jornal iha maluk seluk nia uma. Depois mak hau le no fo resposta. Lalais ka neneik, la’os problema boot, sa tan intelektual. So kestaun simples tebes no tekniku deit. Maibe, hau mos la dun iha interese atu fo resposta lalais (tan iha asuntu seluk ne’ebe importante liu atu halo). Maski nune’e, hau halo esforsu ida atu hetan tempu hodi fo resposta ruma. Infelizmente, ninia rezultadu, hau hetan reasaun ad hominem husi Sr. Sacadura. Impressive teb-tebes, wainhira hau le ninia “fanatismu” atu defende ninia pozisaun (liu-liu iha asuntu divorcio). Ida uluk no ida ikus hanesan deit! Hau kumprende ho respeito tomak ba ninia direitu no liberdade atu defende ninia pozisaun.

Hau hanoin hikas deit buat ne’ebe Cardeal Joseph Ratzinger (agora sai ona Papa Bento XVI) wainhira halo omilia iha missa “Pro elegende pontifice” (ba eleisaun Amo Papa nian), ko’alia kona ba “a dictatorship of relativism” iha mundo ohin loron nian. Tuir Papa, ba ema sira ne’e, la iha lisan no valor moris (value of life) ne’ebe ita tenki fiar metin no defende ho forsa tomak, maibe sira obriga ema atu fiar fali moda moris (style of life) ne’ebe mosu-lako tuir gostu, ka la mate no la moris hela deit. Relativismo ne’e katak – buat hotu la folin, maibe buat hotu iha folin, depende ba gostu iha momentu ida. Maski nune’e, wainhira sai ona Papa Bento XVI, nia hakerek tan katak, misaun Igreja Katolika nian la’os ona atu sai conquistador no kontra ema seluk nia “fiar” hodi “rebate” relativista sira, maibe atu fo sasin nafatin kona ba humanismo ne’ebe nakloken ba Maromak nia misericordia. “O humanismo que exclui Deus é um humanismo desumano. Só um humanismo aberto ao Absoluto pode guiar-nos na promoção e realização de formas de vida social e civil - … - preservando-nos do risco de cairmos prisioneiros das modas do momento” (Bento XVI, Caridade na verdade: 96).

Ikus liu (3), tan hau nia artigu provoka deit “ressentimento” (rancor) husi Sr. Sacadura, entaun, hau prefere hakotu deit debate. Ninia razaun mos simples deit – ita la hetan buat foun, sa tan desenvolve “bem intellectual comum” hodi aferra problema substansial no krusial hanesan edukasaun (didaktika no pedagogica, liu-liu iha aspektu sexualidade). Hau prefere fera-ulun hamutuk ho ema seluk no kona ba asuntu ne’ebe fundamental liu. Ne’e duni, hau hatoo deit obrigado ba Sr. Sacadura ba momentu debate ida ne’e, no desculpa ba liafuan kroat ne’ebe hau hatoo ona iha artigu liu ba. Ba buat seluk, hau hanoin publiku merese hetan leitura ne’ebe elegante no profundo liu. Sa tan kona ba asuntu eksistensial sira.

Hau hakarak taka ho liafuan ne’ebe Papa Bento XVI hatoo wainhira nia eleitu (19 Abril 2005), liafuan ne’ebe hau nunka haluha iha hau nia moris tomak, “…mi consola il fatto che il Signore sa lavorare ed agire anche con l’istrumento insufficiente e sopra tutto mi affido alle vostre preghiere …” (hau haksolok ba faktu katak Nai Maromak hatene halo servisu no agir/ bertindak maski ho instrumentu ne’ebe la suficiente no liu-liu hau tau laran metin ba imi hotu nia orasaun …)! Tebes, ema barak ne’ebe halao moris iha vida religiosa ka vida familia nian hatene katak sira fraku (instrumento insuficiente), maibe sira fiar metin nafatin katak Nai Maromak hatene no bele halo buat hotu-hotu liu husi sira nia fragilidade. Husi biban seluk, hau mos aprende katak iha enkontru ka debate ho ema seluk, la’os atu hatudu hau mak matenek liu maibe atu defende deit buat ne’ebe hau fiar iha hau nia Igreja Santa Katolika no Apostolika, inklui hau nia tradisaun nudar Timor oan. Nudar padre ida, hau hare hau nia moris hanesan “instrumento rasional” ida (no insuficiente). Maibe, hau haksolok tan hau bele serbi nafatin hau nia Igreja no hau nia rain!

*) Direitor CJP Diocese Baucau

Sem comentários:

Enviar um comentário

Nota: só um membro deste blogue pode publicar um comentário.