Woodside la taka dalan ba lori Kadoras Greater SunRise mai Timor-Leste maibe obstakulus mai husi Governo Australia

Dili - (14/01/10) Kompania Petroleum Woodside la taka dalan atu dada kadoras Greater Sun Rise (GSR) mai Timor-Leste maibe se koloka problema ka obstakulus mai husi Governo Australia, garante informasaun ne´ebe Journal ne´e hetan iha Woodside nia fontes iha Dili.

Tenik tan fontes ne´e, problema laos Woodside tamba basta aumenta $2 Bilaun lori Kadoras GSR mai Timor-Leste, maibe obstakulus bo'ot mai husi Governo Australia no liliu Governo Northern Territory, Australia nian.

Planu desenvolvimentu Woodside nian Governu rejeita:

Liu husi Komunikadu ba imprensa, porta voz husi IV Governo Konstitucional katak “planu Woodside ba desenvolvimentu la aprova ba Greater sunrise”. Haktuir tan Agio Pereira, “Governo liu husi servisu hamutuk ho kompania hanesan Petronas husi Malaysia no seluk tan, halo estudo ba viabilidade hodi dada kadoras GSR mai Timor-Leste”.

Parceria ne´ebe maka Governo halao no halo ho kompanias sira seluk kontraria ho argumentus sira ne´ebe maka Woodside hato'o konaba riskus ba tasi nia klean, distancia no laloran bo'ot kapacidade ba dificil konstroe LNG ninia kbiit ba produzaun.

Tenik tan porta voz Governo nian,"opsaun ne´ebe maka Governu foti atu hodi explora possibilidade em termus de vantajens komerciais no ba densenvolvimentu ne´ebe sustentavel ba povo Timor-Leste jerasaun ida ne´e no ba aban bain rua”.

Dada kadoras GSR mai Timor-Leste ne´e viavel hare husi pontus de vistas, tekniku-cientifiku, Governo mos halo kooperasaun ho Petronas husi Malaysia no KOGAZ husi Korea Sul, hatudu katak iha duni viabildiade ba dada GSR mai Timor-Leste!

Fontes: Suara TimorLorosae (STL, 14/01/2010, paj.1 i 15) no Jornal Nacional Diario (JND,14/01/2010, paj.1 i 3)!