Aniceto Guterres dehan AMP Loby nia maibe husi AMP dehan koalia ho nia deit…

Dili - (12/01/10) Hahu sesaun Parlamento Nasional (PN) ba dala uluk iha tinan 2010, iha segunda-feira (11/01). Liu loron ida, iha Terça-feira (12/01) Jornais hanesan Suara Timor LoroSae (STL) no Jornal Nacional Diário (JND) foka publikasaun konaba Komisaun Anti Korupsaun (KAK), ne´ebe envolve personajens hanesan xefi bankada OMP/Fretilin, Aniceto Guterres no membrus husi bloku AMP hanesan deputadus no membru governu.

Aniceto Guterres ba Jornal STL dehan katak “AMP loby Aniceto Guterres kaer KAK”. Hatan husi AMP, liu husi deputadu Pedro da Costa katak,”Ami koalia ho Aniceto laos signifika loby ba nia atu kaer KAK”.

Tuir JND, mos foka nafatin ba personajen Aniceto Guterres hodi hakerek ho titul nune´e:”Aniceto rejeita Loby iha PN-hodi hili nia kaben ba kaer KAK”. Bolu leitores sira ba le'e ka Sani noticias ne´ebe hatun iha Jornais rua, STL no JND iha edisaun ohin (12/01)! Tenik Editor Forum Haksesuk iha Dili

AMP loby Aniceto Guterres Kaer KAK

Pedro Costa: Ami koalia ho Aniceto laos signifika loby ba nia atu kaer KAK

Dili. Bloku Aliança Maioria Parlamentar (AMP) maka loby uluk hau atu tau hau ba kaer Komisaun Anti-Korupsaun( KAK), haktuir Aniceto Guterres. Aniceto Guterres kasu lia hirak ne´e konaba issu ne´ebe lao dadaun katak Aniceto maka loby iha Parlamentu Nacional (PN) atu hili Juiza Natercia ba kaer KAK.

Haktuir tan Aniceto, ne´e la los, hau nunka halao Loby atu tau hau nia ferik oan ba kaer KAK, pelo kontrariu sira husi AMP maka loby hau atu kaer KAK, hau maka lakohi. Tenik tan Aniceto Guterres, cefe Bankada FRETILIN, neduni noticias ne´ebe lao dadauk iha meius komunikasaun no internet katak hau loby atu tau hau nai fen ba kaer KAK la los. Haktuir tan Aniceto Guterres, deputada Carmelita Monis, deputado Pedro da Costa no Vice-Primeiro-Ministro José Luis Guterres, loby hau kleur ona atu ba kaer KAK”, Aniceto kasu lia hirak ba STL liu husi telefone segunda-feira (11/01).

AMP: Ami koalia ho Aniceto Guterres laos loby atu Kaer KAK

Iha parte seluk, Deputadu PN bankada CNRT, “Pedro da Costa rekonese katak, nia parte ba loby ho deputadu Fretilin sira atu hetan konsensus para Fretilin mos aprezenta sira nia kandidatu ba KAK”. Tenik tan,”Ami ba halo loby duni hodi hetan konsensus atu Fretilin bele aprezenta sira nia kandidatu ba KAK ne´e se”, dehan Pedro ba STL segunda-feira (11/01) liu husi telefone.

Haktuir tan Pedro, “ partidus AMP konsidere KAK nudar asuntu interesse nasional, ne´e duni tenki konfirma tuir Lei obriga koalia ho bankada Oposisaun Maioria Parlamentar (OMP), atu bele asegura ¾ deputadus (49) hola parte iha plenariu hodi bele hahu deskuti”.

“Koalia ho Aniceto Guterres,laos signifika atu kandidata nia ba Presidente Komisaun KAK, tamba Lei klaru los, se maka fihir Kandidatu ba Presidente Komisarius KAK ne´e knar Governu nian hodi hatou mai Parlamento Nacional (PN) diskuti no aprova deit” dehan tan Pedro Costa.

Tuir Lei KAK, Governu maka fihir kandidatu ba Presidente Komisaun KAK hodi hatou ba Parlamento Nacional. Governo fihir Aderito de Jesus ba Parlamento Nacional. Iha loron 4 fulan dezembru tinan 2009, Parlamento Nacional ajenda ba haksesuk malu konaba hili Presidente KAK, maibe hetan boycot husi bankada OMP/FRETILIN tamba tama deit Deputadu nain 3, Aniceto Guterres, cefe bankada, Arsenio Bano no Deputada Cipriana Pereira. Tamba atu preence kriterius ne´ebe estabelece iha Lei KAK nian meja Parlamento Nacional adia fali ba loraik (4/12/2009) to´o loraik mos la konsegue no adai fali ba loron 9.12.2009, istoria repete tama deit deputadu nain 3 husi bloku OMP/Fretilin.

Argumentu husi cefe bankada OMP/FRETILIN, Aniceto Guterres katak “La iha konsensus entre AMP ho OMP/FRETILIN”. Husi sorin AMP katak “Lei klaru los, Governu maka fihir kandidatu Presidente Komisaun KAK”.(arz)

Fontes: Suara Timor LoroSae (STL, 12.01.2010,paj.1 i 15)!


Kaer Komisariu KAK

Aniceto Rejeita Lobi iha PN

Dili. Xefi bankada Fretilin iha Parlamento Nasional, Aniceto Guterres rejeita ba deklarasaun balun ne´ebe hasai katak, nia oras ne´e lobi membru Parlamento Nasional, atu fó apoiu ba nia kaben, Juiza Natercia hodi kaer KAK, ida ne´e la los. Aniceto koalia lia hirak ne´e ba Journalista Diário, Segunda (11/01) liu husi via telefone.

Tuir Aniceto katak, “informasaun ne´ebe hakerek iha blogues Celso de Oliveira hodi hateten, nia oras ne´e lobi iha Parlamento, para nia kaben, juiza Natercia kaer KAK, ne´e informasaun falsu.

“Hau hakarak koalia lolos mak, husi klubu AMP (Aliança Maioria Parlamentar),hanesan deputada Carmelita Monis, Vice Primeiro-Ministro José Luis Guterres, Francisco Burlako no deputado Pedro da Costa mak lobi hau ho hau nia kaben bele kaer KAK, nune´e bele taka tiha hau nia ibun iha Parlamento Nasional”, koalia Aniceto Guterres.

Haktuir tan deputadu Aniceto Guterres katak,” iha uluk kuandu Governo AMP kaer ukun, sira bolu nia kaben, juiza Natercia atu ba sai nudar asesor ba PM ho salariu $7 mil, maibe nia kaben lakohi, agora sira dehan atu kaer fali KAK ho salariu $4 mil, dehan ida ne´e, nia mak lobi, ida ne´e informasaun ida ke la los”.

Ho ida ne´e, Aniceto hateten tan katak, klubu AMP lalika koalia buat oi-oin, se la bele dehan labele, laos halo deklarasaun husi internet no buat seluk tan, atu estraga ema nia naran. (J2)

Fontes: Jornal Nacional Diário (JND,12.01.2010,paj.1 i 14)!