PDHJ Persegue Membru Governu AMP

Dili (STL, 08/09/2009). Provedor dos Direitos Humanos e Justiça (PDHJ) arquivo tiha kasu korupsaun ne´ebe maka envolve eis-PM Mari Alkatiri. Tuir sumber ka fontes Jornal ne´e iha PDHJ haktuir katak ”kasu korupsaun ne´ebe envolve Mari Alkatiri tama ba PDHJ iha tinan 2006 hodi investiga. Maibe PDHJ liliu ninia Presidente Sebastiao Ximenes la fó atensaun no arquivu tiha”. Tamba kazu ne´e iha indisius bot ba korupsaun no favorecimentu ba Mari Alkatiri no ninia familia. Tuir dokumentus ne´ebe maka Jornal ne´e hetan hatudu trafiku ba influencia iha embo'ot sira hodi favorece ba malu. Iha loron 6 fulan Novembro tinan 2006, Sekretariu Estado Konseilu Ministru, Gregório de Sousa, haruka karta ba Primeiro-Ministro, Dr. José Ramos Horta, ho nº. oficio SECM/2006, asuntu maka: ”Pagamento de viagens para o Dr. Mari Alkatiri e familia”.

Tuir isi karta ne´ebe maka SKM haruka PM, hatudu iha pratika korupsaun, tamba karta ne´e ninia isi hakerek tuir instrusaoens no autorizazaun husi Dr. José Ramos Horta.

Osan ne´ebe hasae husi fundus Gabinete Primeiro-Ministro, liu husi uso fundu reserva contingencia husi Primeiro-Ministro ba tratamento Saude Mari Alkatiri no familia. Hodi selu viajens husi Dili-Lisboa-Mozambique-Dili. Tuir iteneraiu eis-PM Mari Alkatiri ho familia sai husi Dili, loron 08 Fulan Novembro tinan 2006, enquanto Purchase order husi Prokurament foin sai iha loron 10 fulan novembro tinan 2006 no pagamentu total USD 31,065.00 foi sairkan iha loron 13 novembro tinan 2006.

PDHJ arquivo pratika korupsaun ne´ebe envolve Mari Alkatiri no la rekomenda ba Ministeriu Publiku

Tuir sumber jornal ne´e PDHJ, Sr. Sebastiao Dias Ximenes maka tau tiha ba gaveta ka arquivo tiha kazu korupsaun ne´ebe maka envolve eis-PM Mari Alkatiri, tamba wainhira dokumentus sira ne´e tama ona iha PDHJ buka atu investiga tamba iha indisius bot ba korupsaun no trafiku influencia. Envolve direktamente SKM, Gregorio de Sousa, ne´ebe oras ne´e dadaun kaer knar nudar Xefe Gabinete iha Presidente Republika no Primeiro-Ministro José Ramos Horta, ne´ebe oras ne´e dadaun kaer knar nudar Presidente Republika. Tuir sumber iha PDHJ, se loke investigasaun klean ba kaszu ida ne´e, tamba saida maka sira fó kargu ba malu, José Ramos Horta fó kargo ba Gregorio de Sousa nudar ninia xefe Gabinete iha Palacio Presidencial?

PDHJ iha orientasaun politika ba investiga kasu sira ne´ebe envolve membru Governo AMP

Fretilin liu husi orientasaun Mari Alkatiri nian maka defende makas PDHJ no kontra kriasaun KAK (Komisaun Anti-Korupsaun). Tamba Mari Alkatiri fiar katak ho PDHJ ninia servisu no Prokurador Jeral Republika (PJR) iha Dra. Ana Pessoa Pinto maka kaer, facil ba atu manipula no influencia. Tuir sumber iha PDHJ dehan katak “kasu Mari Alkatiri nian no Jose Luis Guterres nian tama iha PDHJ hanesan, provedores sira hotu konkorda katak kasu rua ne´e tenke investiga, maibe Sr. Provedores PDHJ arquivo ka tau ba kaveta kasu Mari Alkatiri nian no investiga maka kasu José Luis Guterres nian”.

Tuir sumber Jornal ne´e iha PJR, iha loron 17 fulan Agosto, Dra. Ana Pessoa haruka ona ba Tribunal kasu José Luis Guterres.

Ilegal tamba seidauk aprova no Lei Pensaun Vitalisia

Aktos eis-Primeiro-Ministro José Ramos Horta no eis-SEKM Gregorio de Sousa ne´e ilegal. La iha kobertura legal tamba Lei Pensaun Vitalicio foin aprova iha…Agosto tinan 2007.

Enquanto eis-PM no eis-SEKM, viola Lei hodi fó osan ba eis-titulares Mari Alkatiri hodi selu ninia viajens ba halo tratamentu iha Hospital Lisboa. Tamba Lei ba eis-titulares foin aprova iha Parlamento Nasional (PN) no promulga Lei Nº.7/2007, Loron 18 Juliu tinan 2007.

Hare ba kasu ne' e, deputadu Parlamento Nasional, Aderito Hugo da Costa hateten PDHJ atu halao servisu laos halo politika. Neduni, bainhira halo tratamentu ba kazu ruma tenki hanesan la bele halo perseguisaun.

"Provedoria atu halo servisu ho profisional, neutru no imparcial", nia hateten.

Kazu ne' e envolve em nivel altu hotu, maibe tamba saida maka kazu ida halo investigasaun no kazu seluk husik rai deit iha gaveta laran. Maibe, sei hare didiak kazu ne'e ida indikasaun korupsaun.

PDHJ Rejeita

PDHJ Sebastiao Dias Ximenes rezeita makaas katak iha keisa hasoru eis-PM Mari Alkatiri no Jose Ramos Horta ne' ebe tama iha PDHJ.

"La iha!, ami nunka simu keisa ruma hasoru eis-PM Mari Alkatiri, Ramos Horta no Xanana Gusmao", dehan Provedor Sebastiao.

Tuir iha kazu 18 husi governu anterior nian, maibe konaba eleisaun jeral no sel-seluk, maibe konaba nai ulun sira nian la iha ida mak tama.

Keisa hasoru familia Alkatiri nian kona deit ba kazu sosa kilat musan husi Bader Alkatiri no koanpanyia Cavalo Bravo (dd)!.

Fontes ka Sumber: STL, edisuan (08/09/2009) pajs.1 i 15!