Governu AMP selu Mari Alkatiri nia Viajen ba Guine-Bissau

Dr. Arsénio Bano: Alkatiri lori Povu no estadu nia osan*

(Alberto Maklear, ai-leba iha merkadu taibesse husu, se mak representa "Estado Timor", laos orgao haat: Presidencia, Parlamento, Governo ho Tribunal?)

Díli, (FH 29/5/09) - Governu no Estadu Timor-Leste hatudu ita nia solidariedade ho Povu no Estadu Guine-Bissau hodi hili Mari Alkatiri nudar enviadu Estadu Timor-Leste nian ba Guine-Bissau. Tuir PM Kay Rala Xanana Gusmão iha ninia deklarasaun ba journalista Tersa-Feira (12/05) katak "Governu suporta Mari Alkatiri sai nudar enviadu especial ba Guine-Bissau, no ikus mai muda fali ba enviadu especial husi Presidente Republika José Ramos Horta”. Kustus financeiru ba Missaun Especial Mari Alkatiri hodi ba Guine-Bissau, tuir fonte ka sumber iha Ministeriu Finanças katak “total osan ne´ebe maka Governu no Estadu selu ba Mari Alkatiri nia viagem tuir fontes husi Gabinete Presidente Republika tamba Presidente José Ramos Horta maka assina Cek. Ninia deskrisaun maka tuir mai ne'e:

- $80.660 mill USD

- Perdiam $15 mill USD

- Adiantamentu $25 mill USD

- Bilhete Aviaun $39 mill USD

Maibe Mari Alkatiri, wainhira lao ba liur hahu dehan áat Governu no Estadu ne´ebe maka hili no fihir nia ba sai nudar enviadu especial. Mari Alkatiri dehan no hananu katak «husu iha sentidu estadu», hahalok hanesan maka reflekte ba sentidu estadu? Tamba Estadu no liliu Presidente Republika ne´ebe tau fiar ba nia lori Timor-Leste nia naran, laos ba fase fali hena foer iha liur.

Tamba: Ida (1); Mari Alkatiri la hatudu sentidu estadu; Rua(2); falta respeitu ba estadu no liliu ba Presidente Republika nebe tau fiar ba Mari Alkatiri hodi lori nia naran ba Guine-Bissau; Tolu(3); Mari Alkatiri la konsistente wainhira iha Presidente José Ramos Horta nia oin dehan ida, ba liur dehan fali oin seluk no Haat (4); hahalok Mari Alkatiri nian ne´e laos edukativu ba povu, nudar líder historika no mos líder ne´ebe hola parte ba fundasaun Nasaun ida ne´e nian, minimu tenke hatudu autoridade moral. Mari Alkatiri ninia atitude fase roupa foer iha liur hodi dehan áat Estadu no Governu Timor-Leste, ne´ebe hili nia ba respresenta Estadu no enviadu Presidente Repúblika José Ramos Horta sai hanesan sinal negativu ida. Minimu iha responsabilidade ba povo no estadu Timor-Leste, tamba lori osan povu nian maka selu Mari Alkatiri ba Guine-Bissau, laos selu ba passiar ho interesse partidu nian hodi halo kampanye kontra estadu ne´ebe haruka no selu. Buka hatudu autoridade moral ne´e iha ne´ebe.

Mari Alkatiri: Laos lori Governu AMP nia Osan maibe Estadu nian

Vice Presidente Fretilin, Arsénio Paixão Bano, ba STL dehan katak “hau hakarak hateten deit katak viajen Alkatiri ba iha Guine-Bissau laos representa governu, maibe reprezenta estadu, Arsenio Bano kasu lia hirak ne´e ba STL iha uma fukun, tersa-feira (26/05), relaciona ho deklarasaun PM Kay Rala Xanana Gusmão katak Mari Alkatiri ninia viajen ba Guine-Bissau hetan finansiamentu husi governu.

Arsenio Bano defende Mari Alkatiri hodi uja Pensaun Vitalisia hanesan base legal hodi defende Mari Alkatiri, dehan Arsénio Bano “Tuir Lei eis-Titulares, Alkatiri reprezenta Estadu Timor-Leste hodi halao misaun politika estadu nian iha Guine-Bissau laos reprezenta governu hodi implementa programa governu nian iha Guine-Bissau”. Hatutan Arsénio Bano ba STL, "Osan ne´ebe Alkatiri uza hodi halao misaun TL nian iha Guine-Bissau, osan estado no povu maubere nian ne´ebe governu AMP de faktu (iha ibun) maka jere”.

Hatan ba Arsénio Paixão Bano ninia argumentus ba Fórum Haksesuk (FH) analista politika Alberto Reis Maklear hateten katak “Governu ne´e estadu kalae, governu mos hola parte ba airin haat ne´ebe maka naran instituisaun estadu nian”. Tenik tan Reis Maklear, "Arsénio dehan Governu de faktu no maubere iha ibun deit sa, Mari Alkatiri hakerek karta ba husu osan ba Ministeriu Finansas nunka uja buat ida de faktu maibe implixitamente rekonyece de Jure Governu AMP, se Mari Alkatiri koerente karik hakerek duni «Ministeriu Finansas de faktu»”. Hatutan Reis Maklear”. Mari Alkatiri hakerek karta ba Ministeriu Finansas de Jure hodi osan, karta ida iha loron 19/02/2008 no karta seluk iha 25/08/2008, iha karta 2 ne´e Mari Alkatiri husu atu Ministeriu Finansas De Jure fó osan ba nia hodi hadia ninia uman, selu seguransa privadu, sosa kareta Prado ba nia maibe bandu ba deputadus sira, kustus seluk hanesan kombustivel ba kareta, no sst.

Arsénio Bano kanta dehan Povu Maubere nia osan, nusa maka Arsénio Bano defende fali Lei Pensaun Vitalícia ba eis-titulares sira hodi defende ninia bos? Husu Reis Maklear, afinal Arsénio defende Lei imoralidade ne´ebe maka fó protesaun ba eis-Titulares sira, Arsénio Bano ho Mari Alkatiri la moe temi povu maubere nia naran, bé sira halo Lei ne´e fó benficiu ba povu Maubere ka ba sira nia benificiu rasik?”.

Mari Alkatiri liu husi konferensia imprensa iha quarte-feira (27/05) iha uma Fukun Parlamentu Nasional hateten katak “hau la hateten áat Governu iha liur ne´e ba (in JND, 28/05)”. Iha ninia deklarasaun ba agencia Lusa iha Lisboa, Portugal (Marsu, 2009) Mari Alkatiri hahu fase roupa foer hodi dehan áat ba IV Governu Konstitucional ne´ebe ninia lider maka PM Kay Rala Xanana Gusmão!

Dr. Arsénio hanoin katak sira nain rua (Mari ho Bano) mesak deit mak hatene português. Ema seluk le´e deit Jornal mos la hatene ida. Ne´e duni ba fase bebeik roupa foer iha Portugal fila mai bosok matak los povo. Karik ne´e mak ema bolu dehan "falsa inocencia" karik?

*Suara Timor Lorosae (STL, 27/05) no Jornal Nacional Diário (JND, 28/05)