KONKLUZAUN HUSI " BA NASAUN NIA DIAK AMI HAKEREK"

(Enviadu Espesialista no Polemikista RDTL ba Guné Bissau, Mari Alkatiri)

Victor Tavares*

Porto (FH, 29.5.09) - Bainhira rona katak PR nomeia ex-PM Mari Alkatiri atu dirije delegasaun RDTL ba Guiné Bissau, Forum-Haksesuk dezafia orgauns soberanos kompetentes sira ho FH nia proposta no avansa ho naran balun nebee bele akomoda konsensu nasional, figura ho reputasaun rekonhesida internasionalmente, independente, kompetente no ema lutador ba paz no Direitus Umanus nian, Dom Carlos Filipe Ximenes Belo, SDB. Maibe, proposta nee monu leet ba rai tanba iha kbiit seluk tuir legalidade no lejitimidade konstituinte nia haruka, supera outra kualker hanoin ka proposta.

Iha FH nia artigu mos bolu atensaun ba efeitus laterais nebee bele mosu husi delegasaun ba Guiné Bissau, liu-liu FH bolu atensaun ba ema nebee lidera delegasaun nee nia atitude durante hala’o missaun nudar enviadu espesial estado RDTL nian ba Guiné Bissau, atu tulun estadu no povo guinense rezolve rai no povo neba nia problema sira.

Forum-Haksesuk halo prognostiku ba ema nebee dirije delegasaun nee ho kriteriu nebee fakulta dadus no faktus presedentes antes de fihir ema ruma atu dirije delegasaun nee. Dada tuir esperiensia no faktus iha passadu resente, ex-PM Mari Alkatiri la halibur kondisoins minimas atu lidera delegasaun.

Basa, hare husi kriteriu kompetensia atu rezolve konflitu internu, esperiensia iha passadu hatudu momoos katak Mari Alkatiri la iha kompetensia nunee problema ho dimensaun ki’ik nebee ejiste iha orgaun defeza F-FDTL sai fali krize militar, politika no sosial iha 2006.

Haree husi kapasidades atu rezolve konflitu interno entre sivil ho militar mos esperiensia iha passadu resente hatudu momoos katak ex-PM la iha kapasidades atu kontrola, muito menus rezolve konflitu. Hanesan hatudu iha fulan Marsu ka Abril 2006, em vez de buka hamate konflitu, PM naton ordena fali militar atu kontra ema sivil sira nebee halo manifestasaun tuir direitu nebee konsagra iha lei no konstituisaun RDTL.

Husi kriteriu rua, kapasidade no kompetensia, iha nebee FH konsidera kriteriu essensial ba ema nebee bele lidera delegasaun ba Guné Bissau, bazeia ba dadus konkretus iha krize 2006, oinsa mak mundu ka komunidade internasional no aktivista DH sira bele konsidera delegasaun RDTL iha kredibilidade politika atu rezolve konflitu interno iha Guiné Bissau ?

Oin sa mak ema bele fiar Mari Alkatiri nia lia-fuan bainhira koalia nudar xefe delegasaun husi estado RDTL kona ba solusaun konflitu interno nee? Sa esperiensia mak Mari Alkatiri bele temi hodi nunee ema bele tau fiar no esperansa tanba faktu justifika kona ba solusaun konflitu interno no sangrentu nebee monu ba PR Guiné Bissau ho alto dirijente iha hierarkia militar iha rai neba?

Sa estratejia kredivel mak Mari Alkatiri lori estado RDTL nian naran bele oferese ba autoridades guinenses sira hodi restabelese paz no moris hakmatek iha sosiedade ?

Oinsa ema seluk bele fiar ba ex-PM kona ba rezolve problemas konflitu interno rai seluk nian enkuantu problemas nebee mosu iha krize 2006 Mari Alkatiri la hatene rezolve?

Konkluzaun husi enviadu espesial ho missaun politika no umanitariu husi estadu RDTL ba Guiné Bissau mak FH hanaran “enviadu espesialista polemikista”. Tanba misaun nebee delegasaun hala’o la’os deit inefikaz, inefisiente no inefektivu maibe sai fali polemika no polemika nebee mos la’os deit mosu antes, durante missaun maibe pós missaun mos polemika mosu la hotu.

Enviadu espesial inefikaz, inefisiente no inefektivu tanba, despeza nebee estado RDTL halo ba delegasaun la’os uitoan, 159.660,00 USD. No la iha rezultadu ida nebee hatudu katak estado Timor nian kontribuisaun iha efeitu nebee signifikativu ba solusaun konflitu iha Guiné Bissau no internamente delegasaun nian missaun la’os deit la kumpre ho diak tanba polemika mos makaas nebee hatudu katak missaun la iha konsensu husi ema hotu nian hakarak.

Forum-Haksesuk preve ona situasaun hirak nee, nunee FH la hakfodak bainhira ohin loron polemika aserka enviadu espesial ba Guiné sei sai notisia iha media nasional.

Maibe buat simples ida mak FH hakarak bolu atensaun ba leitores sira no mos publiku iha jeral katak, la vale buat ida haksesuk malu ka klaim kona ba enviadu espesial ba Guiné Bissau nee se los nia responsabilidade no la presiza tau ba polemika kona ba se mak haruka se ba Guiné?

Basa, nosaun implisita ka esplisita husi delegasaun ba Guiné Bissau klara tebes katak Mari Alkatiri dirije enviadu ho estatuto espesial husi Estadu RDTL. La iha duvida katak se mak iha lejitimidade atu fihir no hatudu dirijente delegasaun nian mak Presidente Ramos Horta nebee mos hetan apoio husi PM K.R. Xanana Gusmão nudar Xefe governo AMP nian.

Atu PR ka PM, motivu nebee lori Presidente Ramos Horta hatudu Mari Alkatiri no aseitasaun husi PM Xanana Gusmão mos la’os motivu privadu sira na’in rua nian, maibe lori interesses politiku no hatudu sentidu umanitariu no solidariu husi estado RDTL no povo Timor nian ba estado no povo Guiné Bissau.

Ne’e duni se mak leza motivu intereses nasionais sai mediatismu ba interesses politiku-partidariu mak ex-Primeiro Ministro. Dr. Mari Alkatiri leza no viola responsabilidade ba interesses nasionais durante hala’o missaun nudar enviadu espesial estado RDTL ba Guiné Bissau. Leza no viola responsabilidade ba interesses nasionais tanba, durante hala’o nia knaar nudar enviadu espesial estado, Mari Alkatiri hala’o fali misaun partido Fretilin nian iha li’ur, kritika governo no kritika PM Kay Rala Xanana Gusmão nia pessoa, ho argumento katak Xanana Gusmão fahe osan tan hakarak permanese iha poder, etc.

Leza no viola responsabilidade ba interesses nasionais tanba nia (MA) sai mai li’ur hala’o fali nia papel hanesan lider partido opozisaun nian. Liu-liu fase roupa foer tu-tuir dalan ba Guiné Bissau.

Atitude ida ne´e bele hetan kondenasaun husi PR, husi Governo no husi povo Timor tomak, tanba Mari Alkatiri trai Presidente da Republika nudar xefe de estado, nebee lori povo nia naran hili Mari Alkatiri hodi dirije delegasaun, trai governo lidera husi PM Kay Rala Xanana Gusmão nebee fo apoio moral no material ba delegasaun.

Missaun so possivel hala’o tanba orgaun ezekutivu nia desizaun, la’os Presidente nia determinasaun, tanba iha estado de direito demokratiku nebee respeita norma estatutaria entre orgauns soberanus, tuir separasaun poderes, se mak iha kompetensia atu deside la’os Presidente Ramos Horta maibe governo. PR apenas sujere maibe se mak deside nee poder ezekutivu Governo AMP liu husi PM Xanana Gusmão.

Dala ida tan Forum-Haksesuk ho nia editores sira ho umildade no la iha moe atu husu ba na’i ulun Presidente da Republika no na’i ulun sira kaer ukun na’in seluk, atu kaer metin esperiensia moruk hirak nee hodi sai hanesan imi nia referensia ba imi nia hola pozisoins ka desizoins ruma iha loron aban, atu imi labele repete hikas errus nebee hanesan ami temi iha loron oin.

*Editor Forum-Haksesuk, eleje Vídeo semana nian ba doben leitores FH na'in sira liu husi link :

http://videos.sapo.pt/58nzPSFsv6Ct1VAzZLMu