PARTIDOS POLÍTICOS SIRA NIA PAPEL: SE? SAIDA? OIN SA? HALO NUSA? HO SE? BA SE? ATU HALO SAIDA?

Por Bispo Basílio do Nascimento, pr

Intervensaun iha Conferência Partido CNRT, 24 de Abril 2009, Hotel Arbiru, Comoro, Dili – Timor-Leste

Partidos políticos -“associação ema nian nebé hamoris sira nia an tan compromisso ida (formal) livre, entre membros sira, maibé sira nia objectivo buka atu chefe (lideres) sira ukun grupo humano ida e ba militante activos sira, possibilidades –ideal ou material atu halao interesses objectivos, no mos atu hetan vantagens pessoais, ou buat rua nee dala ida” (Max Weber, Économie et Société, ed.Plon, p.292).

Iha minuto 20 nia laran hau labele dehan buat barak kona ba conceito,essência e acção partido sira nian hanesan fenómeno social no mos actores e intervenientes iha sociedade nia vida, maibé koko took fahe hanoin balu no tenta hatan ba assunto nebé Comissão Organizadora encontro ida nee nian husu ba hau atu hanoin biar ida nee laos hau nia ocupação lor-loron nian.

Comenta deit Max Weber nia definição nee, hau hanoin ita bele hetan elementos balu nebe bele halo ita compreende papel partido político sira nian iha sociedade ida.

Primeiro, partido político ida moris tanba motivação ida nebé anima grupo ida ida nia hanoin no nia hakarak iha comunidade humana ida nia leet. Motivação nee bele real ou imaginário,maibé motivação nee mosu tanba grupo ka associação ida nee iha compreensão ida kona ba mundo e sira hanoin atu fo resposta ba sira nia compreensão ida nee tuir dalan ida, ka tuir critério ida ka tuir perspectiva ida, grupo ida nee nian. Tanba sira compreende ou representa mundo tuir sira nia perspectiva, sira hamosu compromisso ida entre sira.

Segundo, motivação nee mosu tanba iha público ida nebé simu associação nee nia hanoin; partidos políticos mosu tanba iha grupos humanos, comunidade humana, nebé moris sira nia vida no sira nia problemas, buka solução e tan nee se tilun ba proposta nebé partidos políticos, hanesan grupo, hatoo mai. Tan nee Associação nee buka atu lori ema barak hanoin no haré mundo tuir sira nia matan ,hanoin tuir sira nia néon no matenek, no simu sira nia hakarak.

Comprrende tiha mundo nia situação e hetan ona resposta hanesan grupo, grupo nee tenki dinamiza an. Oin sa partido bele lori ema seluk, se barak liu diak liu, atu tuir sira nia ideias no sira nia visão? Segundo elemento ita bele dehan maka dinâmica de conquista nebe obriga organiza atu halo difusão de ideias, halekar ideias, no lori ema atu hakbesik mai, dinâmica de adesão. Dinâmica nee obriga halo estruturação interna,atu haree se maka se los, se maka halo saída no halo oin sa, quadros, militantes, aderentes, simpatizantes, penduras, clube de protestantes, insatisfeitos, conspiradores internos, etc…

Kona ba ida nee, estudiosos sira depois classifica partidos sira em partidos de quadros e partidos de massas conforme sira nia filosofia, sira nia comportamentos no sira nia estratégia quando iha eleições. Dinâmica ida nee mos obriga associação nee halo programa hodi lori ema hakbesik no
simu sira nia mensagem.

Terceiro- kona ba objectivo, Weber nia definição halo observação ida curioso, engraçado, maibé importante. Kona ba líder sira, Weber dehan katak sira buka atu ukun, exerce poder iha grupo humano ida nia leet; nee duni partido ida moris atu nia líder sira manda, fo regra, orientação no decisões tanba sira iha compreensão ida sira nian kona ba mundo, ou sira representa ba sira mundo ida tuir sira nia compreensão e sira buka halao sasan tuir sira nia capacidade atu responde ba situação; kona ba militante sira, Weber dehan katak sira mos participa iha buat ida ukun nee hanesan objectivo geral partido nian, portanto sira nian objectivo mos, maibé militante haré liu vantagens pessoais. Portanto se partido permanece iha ukun diak liu tanba hanesan ne’e militante sira iha liu possibilidade atu hetan vantagens pessoais; sira satisfaz interesse rua dala ida: partido nian no mos pessoal. Tinan besik 200 ona e buat barak sei nafatin. Halimar, ita bele dehan katak ba militante sira, tuir Max Weber nia definição, exercício ukun nee sai tempo diak ida atu ema nebe laos líder mos bele considera nia an hanesan ema boot maibé liliu oportunidade haboot sira nia an ho atenção liu ba sira nia calça bolso.

Objectivo líder sira nian manan ukun, militante sira nian satisfação de interesses. Buat sai sabraut no rungranga wainhira líder sira ho militante sira hanoin deit ona satisfação de interesses( pormenor Guterres).

Em resumo, definição Max Weber nian hanorin katak partidos políticos sira organização nebé atu hetan poder, atu mantém iha poder, atu exerce poder. Partido político nebé existe atu halo caridade nee vocação sala e político sira nebé dehan katak la iha tentação de poder mesak bosok tem ou hili dalan sala.

Saída maka halo sira book an? Sira nia compreensão kona ba mundo ou representação mundo nian iha sira nia ulun que afinal sai razão ba sira nia interesse nebe fo motivação ba sira atu forma sira nia an no dinamiza sira nia an tanba objectivo fundamental maka satisfação de interesses hanesan ukun nain ou satisfação de interesses pessoais, hanesan militante, ou buat rua nee dala ida.

Ho elemento hirak nee iha liman, ita bele forma karik critério balu hodi analisa partidos políticos ou bele sira rasik mos usa critério sira nee hodi halo auto-análise: atu CNRT ka

ANZT (associação nacional dos zelosos timorenses), atu FOTA ka (Força Oan Timur Assuain) (imi haré ona partido ida ho naran ida nee, iha campanha nia dehan imi vota iha Fota), atu hirak nee ka naran partido ida.

a)- Realidade Timor ida nebé maka partido político Timor oan ida-ida tau iha nia ulun. Se bele representa karik realidade nação Timor nian liu husi quadro ida, partido político Timor oan sira pinta sira nia quadro de entendimento do mundo timorense oin sa?

Hau considera elemento ida nee importante teb-tebes tanba solução nebe atu hatan ba problema lubuk ida iha rai laran tenki mai husi rai laran e nunee evita importação de soluções nebe mai husi rai seluk.

b)- dinâmica de resposta neé implica elaboração de programas e formação de quadros. Hau considera critério ida nee fundamental iha partido hot-hotu nia vida. Líder sira bele sai ema mesak carismático maibé se la iha quadros ho competência, ideia diak sira hotu mate deit iha fatin. Aquisição de competência, fornecimento de competência e imagem de competência. Competência de facto, laos deit naran (“l’important ce n’est pás d’être compétent; l’important ce d’être réputé de compétent”).

c)- satisfação de interesses- político sira nunca bolu satisfação de interesses, sira dehan bebeik satisfação de ideais, tanba ba sira, o ideal é sempre a satisfação dos interesses do povo. Sira halo buat hot-hotu tanba interesse povo nian. Sira nian la iha. Povo maka sai bebeik objectivo ba existência no serviços partidos sira nian, maibé geralmente sai beneficiário a posteriori.

Critério ida nee sai bebeik desafio ida ba liderança partido sira nian que tenki halo bebeik controlo, fiscalização, discernimento entre pureza de intenções políticas e sacanice de acções práticas. Iha história ukun nian, partido hela kleur iha cadeira ukun wainhira halao critério ida nee ho rigor, transparência e persistência.

Partido politico sira nia papel

La hatene se organizadores quando hanoin atu koalia ba tema ida nee keta sira hanoin katak hau atu mai fo conselho moral balu ba partido político sira karik! Fácil atu fo conselho maibé hau hanoin mos katak nee laos honesto husi hau nia parte, tanba hau laos especialista sociologia política nian. Hau koko deit fo hau nia opinião ho base iha hau nia reflexão pessoal no mos ho naroman balu nebé Max Weber nia doutrina hanorin mai.

Iha democracia iha bebeik sira nebe ukun, sira nebe halo oposição. Sistema ida nee precisa iha ba actividade política nia diak. Hau hanoin no dehan dala barak ona katak oposição nebe forte bele halo diak barak ba comunidade humana nia moris hanesan mos sira nebé ukun. Maibé hau hanoin mos katak iha realidade balu nebe sei la muda; partido ida ba, ida mai, ita tun, ida sae, partido ida tama, ida sai, comunidade humana hela nafatin.

Tan nee hau hanoin katak desafio ida ba partido político Timor oan sira, maka hanoin kona ba modelo de sociedade ba Timor, projecto de sociedade de Timor Leste. Iha ponto ida nee, partido sira tenki iha convergência. Modelo existente e sujeito a mudanças. Modelo sociedade Timor Leste ohin loron maka ida nebe? Modelo sociedade Timor Leste nian nebe ita mehi no hakarak maka ida nebe? Partido hot-hotu koalia deit kona ba acções e modelos de desenvolvimento, maibé ita hotu seidauk hanoin kona ba idiocincracia timorense, maneira de ser e de pensar do timorense e a timorense. Ita hotu fo privilégio boot ba economia e la liga ba ita nia identidade.

Comunidade humana ida nia abut maka nia identidade. Economia ajuda nia moris diak liu nia identidade. Povo nia drama hanesan povo laos economia fraco, maibé quando nia lakon nia equilíbrio e nia harmonia de vida. Economia nia sei bele recupera, maibe se nia lakon nia referência nia vida nakfera. Referência ida nee la iha osan atu hadia.

Loron sira nee hau le plano de desenvolvimento nebe halo iha 2002 ho projecção ba 2020 e hau haré katak modelo sociedade nebe mosu iha neba maka modelo ocidental (europeu-americano) e husi sorin ida nee mai, modelo japonês. Los duni katak programa nee diak, programa de desenvolvimento, tan nee monu ba ema hotu nia laran, maibé programa de generalidades, la iha buat especifico kona ba Timor nia moris. Ita hasai Timor Leste nia naran e tau rai seluk nia naran mos programa nee serve hela deit. Tanba nee programa nacional standard nebe ONU hahoris ba rai hot-hotu em desenvolviemnto.

Los duni programa nee iha visão humanista tanba baseia ba valores universais hanesan (saúde, educação, valorização de respeitos humanos); baseia ba princípios de boa governação nebe halao iha mundo tomak (separação de poderes, boa execução de leis, luta anti-corrupção), baseia ba princípios de grande investimento de Estado hanesan (governo responsável e reactivo, rede de segurança, redução da pobreza) ho mos recomendação katak Estado labele intervém demais iha economia maibe halo liberalização boot ba economia. Ita haré katak programa nee fo folin liu ba cresciemento económico standardizado (halo hanesan nee iha fatin hot-hotu) e la fo fatin ba desenvolvimento económico ho base iha projectos sociais e culturais locais.

Dimensão ida nee husik ba Organizações não governamentais. Infelizmente projecto hirak nee dura deit quando la iha urgência iha fatin seluk. Quando urgência foun ida mosu iha rai seluk ida sira halai ho devoção tomak ba participa iha desenvolvimento local.

Iha tempo nebé sociedade desenvolvido sira fo conta katak wainhira halao desenvolvimento selvajem deit sira lakon sira nia referências humanas e culturais, nee duni ohin loron sira buka fali atu hetan fali sira nia abut (balu halo operação ida nee ho folclore barak que em vez de hetan abut sira desestrutura an liu tan), hau hanoin katak ema hirak nee nia experiência bele sai mestre ba ita nebe foin hahú dadaun ita nia vida nudar nação. Nee duni maka hau sugere katak partido político Timor oan sira nia obrigação, função e acção ida maka buka haré hamutuk modelo de sociedade ba Timor Leste. Em vez de copia ema seluk nia moris ita buka inventa took solução ida conforme, nebe hasoru malu, ho ita nia características próprias. Modelo ida de sociedade nebé bele sai hanesan consciência da nação ou base de identidade nacional. Hau hanoin buat nebe halo falta liu ba ita nia Timor Leste maka nee duni: falta de consciência nacional tanba ita la iha modelo ida de sociedade.

Hau considera abusivo uitoan ou abusivo teb-tebes wainhira analista sira rai liur nian considera ita “Estado falhado” tanba ita la consegue reproduz modelo ocidental. Hau prefere katak ema considera ita Estado falhado quando ita la consegue halo conciliação ou harmonização entre ita nia tradição ho imperativos político-económicos mundo moderno nian. Buat nebé História hanorin maka quando ita estuda evolução mundo ohin loron nian depois da revolução industrial ita haré katak rai hirak nebé sai hanesan modelo de realização maka rai sira nebé brani hatene rai no defende sira nia valores culturais e sociais wainhira sira hasoru mudança institucional ho técnica nebé primeira mundialização (ohin loron dehan globalização) lori mai liu husi revolução industrial (casos de Japão e Coreia do Sul).

Iha Europa, hau hanoin katak Espanha mos bele sai exemplo diak ida. Iha tempo Franco nian sira la iha contacto fácil ho mundo tanba ditadura. Maibé hau hanoin período ida nee halo Espanha hola consciência kona ba nia an rasik, nia hateke ba nia an hodi fo valor ba nia an. Ohin loron sai boot iha comunidade Europeia nia leet tanba nia hetan tempo hodi haboot nia an biar mesak. Pelo contrário, rai sira nebe tenki inventa fali identidade artificial ida baseia ba conciliação entre sira nia tradição nebé la hanoin ona ho modernidade, sociedade sira nee ou halao sira nia identidade ho folclore cultural ou moris iha cristalização cultural. (exemplo 1º caso, rai sira independente menos de tinan 200 liu ba, biar rico, forte no desenvolvido, maibé abut la iha; ba sira naran buat ida serve; ba 2º caso- Irão Xá nia tempo ho Irão Ayatolah sira nian).

Tentativa de identificação de alguns valores culturais e sociais de Timor Leste

Ita nia sociedade Timor, sociedade nebe primitivismo ho modernidade convive hamutuk; sociedade nebé balu bele lao haleu ona mundo tomak, balu seidauk sai husi sira knua; sociedade nebe balu usa tractor mesak moderno no potente hodi fila rai no halai natar, balu sei usa koiabas hun no kakeu sanak hodi fila rai; balu hatene regras ukun democracia iha mundo tomak balu fali ema nebe boot liu iha mundo maka sira nia chefe de povoação ou chefe suco.

Primitivo sira nia características balu bele fo naroman atu ita compreende ita Timor oan rasik nia sociedade:

1-Primitivos sira, grupo humano nebe moris hamutuk;
2-Koalia deit lian ida;
3-Sira hatene sira nia território; la hatene nação;
4-Sira sente katak sira iha obrigação atu halo sira nia comunidade sai hanesan família ida;
5-Sira sente obrigação atu tulun malu;
6-Sira hatene no hanoin katak grupo deit maka bele halo indivíduo moris, katak ema ida atu moris nia tenki moris ho grupo ida ou iha grupo nee nia leet;
7-Obedece ba poder Rua: funu nain (guerreiro) e poder religioso. Iha funu nia depende ba nia chefe; iha nia moris nia depende ba Maromak;
8-Atu entende malu ho grupo seluk primitivos sira halo aliança pontual conforme circunstâncias no mos inventa código de comportamento e linguagem atu entende malu ou atu funu malu wainhira código nee lakon nia valor.

Nee características balu nebé comum ba sociedade primitiva sira. Povo Timor nia características balu nebé bele hetan husi ita nia mitos ho ritos e rituais nebé Antropologia hatoo mai ita maka:

1- sentido boot kona ba justiça (sentido agudo de justiça);
2- hatene simu ema; iha uma iha fatin ba ema hotu (capacidade de acolhimneto sem egoísmos);
3- Povo ida indolente (baruk ten) e diletante (halo deit buat nebé nia gosta no nia hakarak;
4- Fo fatin boot ba chefes tradicionais sira nebé iha knaar atu fo garantia ba estabilidade no atu halo comunidade moris naruk, moris sem problemas sociais;
5- Fuan belit ba nia rai no ba nia knua nia rai, husi tasi too foho;
6- Laran metin teb-tebes ba buat nebé klamar nian, Maromak nian, valores espirituais e religiosos;
7- Buka bebeik dalan klaran ba decisão hot-hotu (lógica do bom senso);
8- Vontade forte teb-tebes atu moris independente, la fo conta ba ema ida, iha situação política como económica;
9- La dun iha perseverança ba nia projecto sira;
10- Povo ida que gosta convive no halo festa – hakarak emprego maibe lakohi trabalho.

Partido político sira nia papel ida maka nee:

Primeiro, hanoin no harii modelo de sociedade;

Segundo, hetan capacidade de resposta que obriga formação de quadros. Quanto mais quadro sira iha competência, iha liu facilidade atu fo resposta quer a nível de idealização, quer a nível administrativo quer a nível de possibilidades;

Terceiro, qualidade de serviço. Povo ida deit no nafatin maibé partidos políticos sira nia serviço maka bele la hanesan. “Rivalizai-vos no amor a Cristo-S. Paulo aos Efésios; hau dehan rivalizai-vos na missão de servir o povo timorense, acrescenta advèrbio ida: bem

Quarto-Moralização da acção política, e dos políticos; halo política hanesan actividade ida que nobre, foti político sira nia naran. Tempo liu ba, ema sira nebé serbi ba Estado ema considera sira hanesan ema nebe hadomi sira nia nação hodi fo an ba serbiso ida nee; ohin loron ema considera político sira hanesan deit classe bosok ten, bobar lia dor, incompetente, ineficaz, falso, naokten, corrupto, etc…

Conclusão-

Hanesan conclusão hau cita deit liafuan ida autor francês ida nian nebe conhece uitoan Timor Leste: “atu define nia modelo de sociedade no modelo de futuro, diak liu Timor Leste buka iha nia abut no iha nia bei ala sira nia hahalok hodi adapta-an ba mundo moderno do que halo importação modelos seluk nian mai husi liur pronto hotu ona, maibé bele la serve ba Timor Leste”; C’est sans doute plus en recherchant ses racines et les logiques anciennes pour les adapter au monde contemporain qu’en important dês modeles toutes-faites de l’exterieur que Timor Leste parviendra `a definir son modele de societé et d’avenir” (Fréderique Durand- Timor Leste En quête dês Repères, Ed. Arkuiris,Toulouse, France, p.167) .

Dili, 24 de Abril de 2009 (Conf. CNRT)

Dom Basilio do Nascimento, Bispo da Diocese de Baucau

Texto enviado em exclusivo para Forum Haksesuk