KORRUPSAUN IHA MINISTERIUS HO DISKRIMINASAUN SALARIAL SAI DEZAFIUS BOOT BA PM KAY RALA XANANA GUSMÃO NIA KOMPETENSIA NO AUTORIDADE

Victor Tavares*

.

«Tema ida nee hakerek na’in hili atu foka situasoins rua nebee kuaze kalan-loron sai hanesan ai-han ida atu ema barak koko nia midar ka sin iha nia ibun».

Problema moras korrupsaun la’os buat foun, ita rona ibun barak temi no ita nia tilun sai tiha kaluk rona lia-fuan nebee assosiadu ba korrupsaun. Agora dau-daun aumenta tan lia-fuan seluk nebee parese manan fatin iha media no opinioins individuais, mak lia-fuan diskriminasaun salarial.

Problema korrupsaun nebee baibain sei hanesan isu iha sosiedade Timor nia leet, sai mos hanesan faktu ida, mesmu seidauk konfirma lolos ninia ejistensia justifika ho dadus, bainhira Eng. Mário Carrascalão to’o ba Vise Primeiro-Ministro no iha fulan ida liu ba hateten sai katak iha korrupsaun duni iha ministeriu hot-hotu, iha governo AMP nia laran. Vise PM nee mos konfirma katak korrupsaun iha ministerius ida-idak ho ninia nivel, balun nivel aas liu duke ministerius hirak seluk. Maibe iha biban ida nee ita seidauk hatene ministeriu hira nia ema mak halo korrupsaun ho nivel ida aas liu no hira mak nivel badak.

Ita hotu hein, povo Timor tomak hein atu Vise PM Mário Carrascalão hala’o lalais ninia promesa atu hamoos korrupsaun iha governo AMP nia leet no divulga sai lalais, sem konstranjimentu politiku-partidariu ema sira nebee halo korrupsaun hodi nunee PM Kay Rala Xanana Gusmão hala’o ninia kompetensia no autoridade nu’udar Xefe do Governo.

Lia-fuan seluk nebee mak manan dau-daun ona terreno sai hanesan lia-isin ba ema barak nia ibun mak diskriminasaun salarial. Kona ba diskriminasaun salarial hahu mosu iha Forum-Haksesuk liu husi Carlos da Silva Lopes ‘Saky’ nia hakerek. Iha nebee Carlos Lopes denunsia diskriminasaun iha salariu entre Timor-oan internasional ho Timor-oan nasional, nia foti kazu xefe gabinete Vise Primeiro-Ministro Mário sai hanesan materia komparasaun ho pozisaun nebee hanesan maibe iha diferensa iha identidade titular ho salariu nebee hetan la hanesan.

Ita hotu preokupadu tebes ho moras korrupsaun, no moras ida nee atu sai kroniku ona maibe ita la hatene bainhira mak bele alivia netik mesmu la kura total iha biban nebee badak. Ita mos hein katak Sr. Eng.Mário Viegas Carrascalão nebee uluk promete atu kombate korrupsaun karik nia sai membro do governo, felizmente hetan ninia dezeju nee hodi sai Vise PM, bele iha korajem atu sakrifika nia-an ho ninia interese sel-seluk, hodi nunee konsistente no fiel ba nia kompromissu no mos iha seriedade atu hamoos korrupsaun durante nia mandato laran.

Nunee mos diskriminasaun salarial no kontratus eskerda-direita ho salariu orbitante, nee tuir hakerek na’in nia haree karik governo ses ona husi rumu ba efisiensia, efikasia no efektivu.

Atu ita bele iha naroman uitoan kona ba salario nebee rain seluk ka instituisoins internasionais sira selu ba nia funsionarius, hakerek na’in temi deit situasaun rua, atu sai hanesan komparasaun simples ida.

Primeiru, deputado português ida nia salario 2.800€ fulan ida. Portugal nia dezenvolvimento fíziku ho humano iha rejime demokratiku tinan 35 ona. Iha nia ekonomia sustentavel, iha nia exportasaun produtus nasionais, iha fontes reseita ba estadu nebee barak, faktores produsaun nian oi-oin, iha nia organizasaun no kooperasaun nebee forte ho rai sel-seluk iha area ekonomia ho dezenvolvimentu, nivel de vida ema português mos diak no buat sst.

Segundu, eurodeputado ida nia salario 7.500 € fulan ida. Eurodeputados sira servisu iha Bruxelas, ida-idak reprezenta no defende intereses ida-idak nia rain nian no mos defende intereses komuns organizasaun União Europeia nian. Hanesan ita hotu hatene katak União Europeia nee organizasaun boot ida nebee ninia fonte finansiamentu la’os uitoan, maibe funsionarius sira simu deit osan hanesan hatudu iha leten.

Ho referensia hirak nee, hakerek na’in hakarak konvida leitores sira, liu-liu kaer knaar na’in sira atu reflete ita nia-an kona ba kondisaun povo Timor nia moris no nivel de vida oin sa ? No mos afinal Estado RDTL nee hela iha planeta ida nebee? Timor-Leste nia ekonomia no fonte rendimentu ba ita nia estado hira no oin sa ?
Tanba sa mak asesor ida iha ministerio A ka B tenke simu sentenas de milhares de dolares ?
Tanba sa ministerio ida tenke kontrata asesor bar-barak ho nia salario milhares de dolares?

Karik PM Kay Rala Xanana Gusmão koloka ema iha ministerio la tuir “the right man on the right place” nunee ministro ida presiza kontrata asesor bar-barak atu ajuda nia ?

Kestoins barak mosu hanesan reflesaun ida husi informasaun nebee partido opozisaun ho sosiedade sivil divulga kona ba korrupsaun, diskriminasaun salarial no kontratu ho salario ba asesores orbitantes iha ministerios balun, maibe la iha governante ruma mak desmente ka esklarese kona ba situasaun preokupante hirak nee.

Remodelasaun bele ajuda Governo

Situasaun korrupsaun nebee Vise Primeiro-Ministro denunsia bele sai hanesan pretextu no fundamentu atu PM Kay Rala Xanana Gusmão pondera hodi halo remodelasaun iha estutura governamental. Tanba tuir hakerek na’in nia haree, atu kombate korrupsaun, la iha dalan seluk, ka bele mos ho afastamentu husi poder ema sira nebee iha ministerios, sekretarios de estado no direktores sira nebee iha indisiadus halo korupsaun hodi bele alivia situasaun iha governo nia leet. Se uluk hateten «se mak desvia estado nia osan lima dolar sai» entaun to’o ona tempo atu aplika teoria nee hodi konseitu nee bele iha nia klamar. Ita precisa habadak povo nia terus liu husi hamenus korrupsaun, revisao Lei-Pensaun vitalisia nebe hetan proteksaun quase - legal no muda ema nebe hanoin no uza deit nasaun ninia riku-soin ba ninia bem-estar pessoal, grupo ka partidário. Preokupasaun ne´e mosu tan nivel de vida povo Timor nian do´ok teb-tebes husi rai seluk nebe temi iha leten.

Remodelasaun tanba korrupsaun nee la’os direitu autoritariu husi Xefe do governo atu hasai ema ruma husi kargus maibe dever no obrigasaun Primeiro-Ministro Xanana Gusmão lori povo ho nasaun nia naran atu salva Nasaun RDTL husi korrupsaun no halakon deskonfiansas ba nia governo ka akuzasõins ou alegasaun oi-oin nebee ema hato'o ba governo. Ne’eduni tuir hakerek na’in nia hanoin, PM presiza duni halo remodelasaun, maibee tuir fazes por kada ministerio, konforme situasaun korrupsaun nia grau iha ministerios ka departamentus. Basaa, denunsias no informasoins nebee ema barak habelar ba publiku bele iha ninia impaktu negativu ba kredibilidade governo nian em jeral.

Nunee mos sistema nebee konduz hodi halo kontratu diskriminasaun salarial entre internasional ho nasional, karik presiza mos estabelese mekanismu ida hodi modera situasaun ida nee. Tanba alem de diskriminatoria, viola norma etika no moral povo Timor nian nudar povo kiak, humilde maibe digno no moris tuir povo sivilizadu.

*Editor FH