Diskursu PM iha serimonia abertura Workshop konaba Pensaun Funsaun Publika

REPÚBLIKA DEMOKRÁTIKA TIMÓR-LESTE

GABINETE PRIMEIRU MINISTRU

ALOKUSAUN SUA EXELÊNSIA
SR. PRIMEIRU MINISTRU IHA SERIMÓNIA ABERTURA

WORKSHOP
SISTEMAS PENSAUN BA FUNSAUN PÚBLIKA

Dili, 4 Desembro 2008

Sua Exelênsia Senhór...
Suas Exelênsias Senhores...

Senhoras no Senhores

Uluk nana’in, ha’u hakarak hato’o ha’u nia boas vindas ba konvidadus no partisipantes workshop hotu, no agradese tebes tanba Ita Boot sira ho laran kamán soe hela idaidak nia knaar, hodi mai toó iha ne’e atu asiste no partisipa iha serimónia abertura Workshop kona-ba Sistemas Pensaun ba Funsaun Públika.

Senhoras ho Senhores,

Funsaun Públika maka aliserse ka airín Estadu nian. Governu ida ne’e nia kompromisu maka atu garante katak tenke atua ho efisiênsia no iha kbiit hodi hatán ba ezijênsias oioin tanba kreximentu kapasidade operasionál Estadu nian. Tanba ne’e maka ami deklara tinan 2008 hanesan tinan reforma no ami kria hela mekanizmus ne’ebé bele garante efisiênsia ida ne’e, hanesan Komisaun Funsaun Públika, Komisaun Anti-Korrupsaun no Tribunál Kontas.

Karik husi parte ida ita ezije barak liu ba funsionárius públikus sira, husi parte seluk ita halo karreira Funsaun Públika sai justa no atrativa ka kmanek liután. Ita implementa rejime karreiras, avaliasaun dezempenhu, rejime rekrutamentu no promosaun i lisensas. Prevê ona eskalas salariais foun ba tinan 2009.

Oras to’o ona atu ita avansa ho projetu boot seluk ida tán, maka rejime pensoens Funsaun Públika nian. Iha razoens tolu maka lori ita hala’o projetu ne’e: primeiru maka atu regulamenta direitu ida ke prevê ona iha Konstituisaun no iha Estatutu Funsaun Públika. Konstituisaun determina katak sidadauns hotu-hotu iha direitu ba seguransa no asistênsia sosiál. Enkuantu Estatutu Funsaun Públika dehan katak funsionáriu no ajente Administrasaun Públika nia direitu maka atu apozenta ka reforma no hetan pensoens legais, tuir nia regulamentu rasik.

Segundu, maka obrigasaun Estadu nian atu promove protesaun sosiál ba sidadauns hotu-hotu, hodi garante sira nia bein-estár wainhira to’o idade ferik no katuas no ema sira ne’ebé dependentes ba sira, nia moris. Sistema pensoens no apozentasoens Funsaun Públika nian, aleinde kumpri funsaun ida ne’e relasiona ho funsionárius públikus sira, serve mós hanesan baze atu aban-bainrua ita bele habelar sistema ne’e ba setór privadu, hodi nuneé bele kona mós trabalhadores timór-oan tomak.

Ba dala ikus, estabelesimentu sistema pensoens nian ida bele funsiona hanesan fatór ne’ebé atrai ka dada funsionárius kualifikadus sira. Ita hatene katak setór públiku, jeralmente, oferese ba funsionárius sira ne’ebé kualifikadus liu, konsidoens servisu ne’ebe´ einjerál la diák kompara ho setór privadu. Ida ne’e maka sai hanesan difikuldade boot ida iha rekrutamentu no liu-liu atu bele kaer metin nafatin kuadrus funsaun públika ho funsionárius ne’ebé espesializadus.

Harí sistema pensoens no apozentasoens ida ne’ebé fó benefísius ho karáter permanente, maka bele iha kapasidade atu kontribui maka’as hodi atrai no kaer metin iha Funsaun Públika trabalhadores ne’ebé kualifikadus liuhotu.

Ha’u hein katak diskusoens durante loron 2 molok atu remata no ohin loron nian, ne’ebé Sekretariadu ba Estabelesimentu Funsaun Públika maka koordena i ho kolaborasaun husi UNDP no ILO, sei rezulta sistema pensoens ida ke sustentável no justu ba Funsaun Públika i iha futuru bele habelar mós ba setór privadu, ne’ebe´tau hamutuk ho programas hirak ne’ebé fó benefísius sosiais husi Governu, sei garante dignidade ba ita nia povu tomak to’o idade ferik no katuas.

Dili, 4 Dezembru 2008.

Kay Rala Xanana Gusmão
Primeiru Ministru