Laos Tempu Ona Atu Koalia Konaba "Indpendentistas VS Otonomistas/Integrasionistas"

Hosi: Celso Oliveira

Filipe Rodrigues Pereira, hakerek artigu "EKSISTENSIA GOVERNU AMP VS ISSU OTONOMISTA NO ETNIKU", publikadu iha Timor Post i Forum Haksesuk, nune´e: (Issu otonomista sai nudar issu ida potensial hodi dada sentimentu povu rai nee nian. Tuir informasaun nebee mak namlekar iha sosiadade nia let, governu AMP hakiak grupu ka individu lubuk oan ida nebee tuir publiku nia hare, grupu oan nee uluk sai konseitor baa politika otonomista iha tempu resistensia hasoru okupasaun Indonesia, ou tuir publiku nia hare mos katak, iha grupu ka individu balun mak uluk iha tempu resistensia la investe buat ida baa politika resistensia maibe iha biban Timor-Leste ukun a’an ku’u liu fali hasil ukun a’an nian duke individu ka grupu seluk nebee mak uluk fo’o isin no klamar baa resistensia iha tinan 24 nia laran).

Iha biban ida ne, hau hakarak elabora hau nia hanoin konaba oinsa "autor independencia", i, "eis autonomistas/integrasionistas" koloka-an iha processu actual. Sirkula informasaun nebe dehan katak governu AMP nakonu ho ema nebe uluk servisu ho Indonesia. Buat ne'e los?

Iha tempu aktual, "sai ema Timor nebe nudar autor independencia", no, "sai ema Timor nebe laos autor independencia" hanesan debate/isu ida nebe sei kontinua manas. Tamba, autor independencia konsidera katak ema nebe uluk laos autor independencia/halo servisu ba Indonesia la merese tu'ur iha governu.

Tamba sa maka, to'o ohin loron, sei iha sentimentu ida hodi dehan katak uluk hau maka halo funu ne duni hau maka tenki tu'ur iha governu? Tamba sa maka, to'o ohin loron, sei iha hanoin nebe dehan katak ema nebe uluk hanesan otonomista ou integrasionista, la bele tu'ur iha governu? Será que Timor serve deit ba ema nebe uluk hanesan autor ba ukun rasik-an????

Entaun, ita hari'i Timor Leste ba ema Timor oan hotu, ou, hari'i Timor Leste ba deit ema nebe maka uluk hanesan autor independencia???? Tamba sa maka, to'o ohin loron, sai autor independencia hanesan obstakulu/rintangan bo'ot ida ba progressu nasional iha Timor Leste??? Ou, tamba sa maka, to'o ohin loron, eis otonomistas/integrasionistas hanesan obstakulu/rintangan bo'ot ida ba autor independencia iha Timor Leste?

Tuiir hau nia hanoin, iha tempu aktual, "sai ema Timor nebe nudar autor independencia", no, "sai ema Timor nebe laos autor independencia" hanesan deit. Se ita hari'i Timor Leste ba deit ema nebe uluk hanesan autor independencia, entaun, ita kria obstakulu/rintangan bo'ot ida ba dezenvolvimentu Timor Leste nian. Alias, ita kria limitasaun entre Timor oan. Alias, Timor nebe uluk ita hotu-hotu mehi atu sai espasu ida ba ema hotu-hotu, afinal serve deit ba grupo ida, alias - ba deit autor independencia sira. Iha ne'e ita hasoru exame/test bo'ot ida iha ita nia progressu nasional.

Iha sentimentu ida iha ita nia fuan laran, hodi dehan nune "uluk ita maka halo funu, maibe ohin loron ema seluk maka goza". Sentimentu ida hanesan ne'e, bele konsidera normal, tamba nudar ema ita iha sentimentu oi-oin. Maibe, ita mos tenki rekonyese katak, uluk, kuandu ita halo funu, laos ho objektivu atu ita sai bo'ot, -alias- ita hotu-hotu tenki tu'ur iha governu. Ou, uluk, kuandu sei funu, ita dehan katak Timor Leste ukun-an ba ema hotu-hotu. Ita dehan nune: "kuandu Timor Leste ukun rasik-an, imi matenek sira maka sei ukun Timor. Sei laiha liafuan hanesan "independentistas ou autonomistas ou integrasionistas"". Maibe, ohin loron, autor independencia reklama maka'as hodi dehan katak tamba sa laos sira maka kaer governu Timor?

Progresu ou dezenvolvimentu iha Timor Leste so bele akontese bainhira ita halo lakon sentimentu nebe provoka ita ho hanoin hanesan "independentistas ou autonomistas ou integrasionistas"". Kazu kontrariu, se karik ita kontinua uza slogan "independentistas ou autonomistas ou integrasionistas", entaun, mais cedo ou tarde, Timor Leste sei kontinua existe instabilidadi ou dezenvolvimentu nasional sei la lao ba oin.

Hau laos defende ema nebe uluk hanesan otonomista ou integrasionista maibe ohin loron tu'ur iha governu AMP. Maibe, realidadi ohin loron, hakarak ka lakohi ita tenki torna Timor Leste hanesan espasu ida ba ema hotu-hotu.

Ita nia etika ou moral lakon, bainhira ita kestiona konaba poder iha governu. Se karik uluk, iha tempu libertasaun nia laran, maka mosu ideia nune "se maka luta ba ukun rasik-an nia sei moris diak, i, se maka la luta ba ukun rasik-an, nia sei moris terus", entaun, iha razaun atu duni sai ema eis otonomista/integrasionista nebe ohin loron nakonu iha governu AMP. Maibe, hau hanoin, prinsipiu Timor ukun rasik-an atu lori/torna Timor Leste sai fatin ida ba ema Timor oan tomak.
Ne'e duni, isu otonomistas/integrasionistas laos relevan ona iha tempu aktual. Se karik ohin loron sei existe isu otonomista/integrasionistas, entaun ida ne kestaun ambisaun ba poder politiku.

*Hakerek nain, journalista i poeta Timor oan, hela iha Inglaterra no exklusivo ba Forum Haksesuk!