Konsekuensia hosi Marcha da paz (hosi perspektiva trabalhadores Timor oan iha Inglaterra i Irlanda)

hosi: Celso Oliveira

Será que marcha da paz "murni" marcha da paz? Será que marcha da paz bele sai konfrontus (ou violensia) foun iha Timor? Será que ohin loron, iha Timor Leste, sei iha funu ou konfrontasaun? Será que ohin loron, laiha dame, ne'e duni, presija "marcha da paz", hodi nune bele harí’í dame iha Timor? Será que, atu halo eleisaun antesipada iha 2009, tamba ne'e maka Mari Alkatiri haruka Fretilin organiza marcha da paz? Ema barak maka hakerek ona artigu konaba marcha da paz nebe Fretilin atu halo iha fulan outubru.

Iha biban ida ne, hau hakerek hosi perspektiva trabalhador nian. "Real vision" -alias- oinsa efeitu hosi konfrontasaun ou violensia foun iha Timor Leste ba trabalhadores Timor oan iha estrangeirus, liu-liu iha Inglaterra i Irlanda.

Timor oan hosi Inglaterra ho Irlanda konsidera katak aktualmente situasaun iha Timor Leste komesa diak ona –alias- normal ona. Maski nune, sira konsidera katak vida sei karu, liu-liu iha Dili, nudar kapital Timor Leste. Trabalhadores Timor oan iha Inglaterra i Irlanda husu deit atu, normalidadi nebe oras ne iha, labele lakon tan ona. Tamba, konsekuensia hosi krisi politika militar iha 2006 laos senti deit iha Timor Leste maibe senti mos iha Timor oan sira iha Inglaterra i Irlanda. Ne'e duni, se marcha da paz torna sai konfrontasaun ou violensia foun, entaun, sei kria frustasaun ou stress ou deskontenti ba trabalhadores timor oan sira.

Servisu maka'as hodi bele fo'o han aman-inan iha timor, maun-alin, feton no bin sira, fen-oan iha Timor, selu maun-alin, feton no bin sira, oan sira nia eskola iha Timor i Indonesia, halo uma foun iha Timor labele sai saugati deit. Trabalhadores Timor oan iha Inglaterra i Irlanda lori sira nia kosar ben rasik hodi fo han familia sira i hadia familia sira nia moris iha Timor Leste.

Fulan-fulan trabalhadores iha Inglaterra ho Irlanda haruka osan barak ba familia sira iha Timor atu sira konstroi sira nia moris i halo diak liu tan sira nia moris. Hahalok hanesan ne'e, la hetan respeitu hosi politiku Timor oan sira, tamba politiku Timor oan sira preokupa liu ho sira nia ambisaun politika.

Trabalhadores Timor kuandu sai hosi Timor, desde 1999 (hafoin tiha 30 de agosto, loron referendo) to'o ohin loron sei kontinua sai nafatin, tamba "situasaun ekonomika nebe kiak i situasaun seguransa nebe seidauk "stabil" iha Timor Leste". Trabalhadores Timor oan sira kuandu sai hosi Timor ho objektivu (ou planu) atu: servisu maka'as hodi hadia familia nia moris iha Timor Leste. Sai trabalhadores iha ema nia rain laos atu sai eskravu politiku ba politiku nain Timor oan sira.

Maibe, ohin loron, situasaun komesa normal ona, Mari Alkatiri iha ambisaun politika atu filafali ba poder, uza "Marcha da Paz" hodi kria violensia ou konfrontasaun foun iha Timor Leste. Akompanya kampanye politika hosi Mari Alkatiri, bele dehan katak Mari Alkatiri hakarak uza marcha da paz hodi hadau poder hosi Xanana Gusmao. Ida ne'e signifika: trabalhadores Timor oan iha Inglaterra i Irlanda hanesan eskravus ou atan hosi Mari Alkatiri.

Bele dehan katak iha 2006, tamba Mari Alkatiri nia arogansia ou foti-an, nia (le: Mari Alkatiri) estraga situasaun politika, ekonomika i militar iha Timor. Ohin loron, situasaun normal ona, trabalhadores barak maka komesa halo visita ba Timor Leste, i, haruka filafali osan hodi hadia sira nia uma nebe ahi han iha 2006, iha Timor Leste, derepenti mosu Mari Alkatiri atu halo marcha da paz.

Sai trabalhadores Timor iha rai avansadu (primeiru mundu) hanesan Inglaterra i Irlanda, obriga dedikasaun i servisu maka'as hosi trabalhadores sira. Ne'e duni, politikamente, Timor Leste mos tenki "stabil" atu nune labele kria frustrasaun ou stress ou deskontenti hosi trabalhadores Timor oan sira.

Sai trabalhadores iha Inglaterra i Irlanda mos iha sonho/mehi. Kuandu Timor Leste moris "stabil", trabalhadores sira senti kontenti i bele halo visita ba familia sira iha Timor Leste. Maibe, kuandu mosu filafali violensia ou konfrontasaun signifika planu atu visita Timor sei estraga hotu.
Iha kazu barak ona maka hatudu suksesu hosi trabalhadores sira. Por exemplu: trabalhadores sira ajuda financia/selu sira nia maun-alin, inan-feton ou oan sira nia eskola iha universidadi iha Timor Leste i Indonesia. Trabalhadores sira ajuda tratamentu ba sira nia familia nebe moras bo'ot iha hospital iha Timor Leste i Indonesia. Iha tan kazu balun nebe merese duni atensaun hosi politiku sira. Por exemplu: trabalhadores labele asisti "funerais" hosi sira nia familia rasik nebe mate iha Timor Leste tamba situasaun rungu ranga, instabilidadi, violensia i konfrontasaun kontinua mosu iha Timor Leste.

Ne'e duni, se karik hosi marcha da paz halo mosu violensia ou konfrontasaun foun iha Timor, entaun sei estraga planu i esforsu nebe maka to'o oras ne trabalhadores Timor oan sira halo tiha ona.

Ne'e duni, marcha da paz nebe Mari Alkatiri atu halo, laos, momentu diak ba povo Timor. Tamba, povo Timor presija liu-liu ai-han atu hatutan sira nia moris, laos dutrina politika maka atu fo han povo Timor. Mari Alkatiri nunka deskansa kuandu Mari Alkatiri ho nia grupu la filafali ba kaer poder politiku iha Timor Leste.

Ne’e duni, maluk TIMOR oan sira nebe maka iha oan, maun-alin, aman, inan, feton no bin, i, amigos sira, nebe servisu hanesan trabalhadores iha Inglaterra i Irlanda, husu atu: lalika lakon tempu i lalika rona apelu nebe Mari Alkatiri halo iha marcha da paz ida ne’e. Tamba imi nia oan, maun-alin, aman, inan, feton no bin, i, amigos sira, servisu maka’as (kalan ho loron, kosar ho matan ben sulin) iha Inglaterra i Irlanda, atu hadia imi hotu nia moris, i, atu nune, loron ida imi (le: ita) bele moris hakmatek iha ida-idak nia knua.