Kumpromisu politiku RAMOS HORTA ho FRETILIN

IN=VP+IF

Presidente Promulga ka lae Lei OR:

Poder ka knar nebe maka Konstituisaun RDTL defini konaba poder no kompetensia PR ba promulga ka veta diploma sira nebe maka haruka Parlamento Nasional (PN), banati ba Ukun Fuan Inan (UFI) iha ninia artigos 85º (Competência propria) e 88º (Promulgação e veto). Tuir artigo 85º hakerek nune´e: "Promulga diplomas legislativas no haruka publika ka hatun resolusaoes Parlamento Nasional (PN) nebe aprova akordus, ratifika tratadus no konvensoes internacionais”. No iha artigo 88º hakerek nuneé: "liu tiha loron 30 konta hahu simu diploma nebe deit husi PN hodi promulga ba sai nudar Lei, Presidente Republika promulga ka hodi direitu ba veto, husu fila fali ba atu iha hare klean liu tan konaba diploma ida ne´e”.

Hare ba hakerek artigos rua (2) 85º no 88º, hatudu katak: Ida (1); Presidente Republika maka fo autorizasaun ba ninia gabinete hodi haruka ba Parlamento Nasional (PN), hodi publika iha «Jornal Republika (JR), Boletim Ofisial RDTL nian, sem autirizasaun husi Presidente Republika (PR) Gabinete Presidente Republika labele haruka ba Parlamento Nasional. Rua (2); Se Presidente Republika, hare katak detekta «inkonstitusionalidade» iha Diploma ne´e, buka haruka kedan ba Tribunal Rekursus (TR), laos biling balang hela iha klaran, haruka ba Parlamento Nasional ne´e hatudu katak konkorda ho Diploma ne´e. Tolu (3); Poder ka knar Presidente Republika nian hodi veta ba Diploma ka kualker dokumentus husi Parlamento Nasional haruka ba, iha ninia limites. Se maka halo limite poder ka knar Presidente Republika nian, maka Fretilin, sira maka hakerek no kopi Konstituisaun RDTL no sira maka maioria iha Assembleia Konstituinte (AK). Fretilin ninia intensaun oinsa maka labele fo knar ka poder makas ba Presidente Republika (PR), tamba iha biban neba sira hakarak halo klot ba poder ka knar Presidente Republika, liliu tamba deit Fretilin iha tinan 2000 hahu husi Kongreso CNRT (Fulan Agosto) to´o 2001 (eleisaun ba AK) konflitu entre Fretilin vs Xanana. Hakerek artigo ida ne´e ho «pensamento vingativo», oinsa maka lalika fo poder demais ba Xanana. Neduni Fretilin iha ona oposisaun, Parlamento Nasioanal sei tuir no banati nafatin Ukun Fuan Inan ka Konstituisaun RDTL, Presidente Republika bele haruka fila fali ba Parlamento Nasional, maibe Parlamento Nasional sei la altera no sei vota a favor nafatin ba diploma ida ne´e. Hat (4); Perfil psikologiku Presidente nian influensia ba ninia decisaun biling balang. Waihira Presidente Republika hili ema ruma ba servisu ho nia no hit nia nudar cefe gabinete, katak nia hili ema nebe nia konfia, ema nebe nia fiar no ema nebe iha kompetensia. Ikus-ikus ne´e perfil psikologiku Presidente Republika nian afektadu ho atentado 11/02, ema sira nebe maka besik liu nia maka elementus sira nebe besik ka hamutuk ho Fretilin. Sira ne´e ninia opiniaun maka Presidente Republika rona liu, ohin dehan ida aban koalia fali seluk. Presidente Republika kala konsulta ba ninia assesor juridiku sira, neduni fo autorizasaun ba cefe gabinte hodi haruka ba publika iha Jornal Republika, diploma konaba «Orçamento Ratificativo». Liu fali loron ida, Presidente Republika rona fali ninia penasehat ka conselheiros sira nebe maioria iha ligasaun ho Fretilin, nia muda kedan opiniaun. Presidente ninia aksaun hodi haruka diploma ne´e ba publika iha JR hatudu katak Presidente halo tuir UFI.

Kontra vontade Presidente (VP):

Iha komunikadu Fretilin (KF) nian, Presidente Fretilin Francisco Guterres Lu´olo haktuir katak :“Nia hatudu mos nia intensaun bainhira nia koalia ba Povo tomak iha Televisaun. Ami la fiar nia bele koalia buat ida loron ida, no halo buat seluk fali (hare Komunikadu Fretilin, 10/08)”.

Hare ba KF nian hatudu katak iha kontradisaun iha Presidente Ramos Horta rasik. Akto ida uluk, fo autorizasaun ba cefe gabinete haruka ba publika diploma ne´e iha JR tuir norma ne´e konstitusional. Ikus mai ninia decisaun tuir fali ninia Vontade rasik no decisaun nebe nia hola dala barak maka influencia husi kondisaun no perfil Psikologiku nebe nia hasoru.

Nia iha komprimisu ho Fretilin, ne´e hatudu momos hela deit. Hare ba faktus: Ida (1); Fo indulto ba Rogerio Tiago Lobato (RTL). Indulto termo ne´e ninia difinisaun no interpretasaun maka ne´e: Reduz ka hatun ninia pena, hatun ba fulan, tinan ka loron. Presidente Ramos Horta fo indulto tamba hetan presaun husi Fretilin no Mari Alkatiri. Indultu Presidente Republika emar hotu kontra, só Mari Alkatiri deit maka fo suporta ba decisaun Presidente Ramos Horta nian ne´e. Ba Mari Alkatiri nudar «jurista» nebe dehan «Brilhante», decisaun Presidente Ramos Horta fo «Indulto» ne´e maka «Konstitucional». Rua (2); Komprimissu Ramos Horta ho Fretilin, hatudu husi ninia visita foin dadaun mai tuir surumutuk CPLP nian iha lisboa. Ramos Horta lori iha ninia team Sekretariu Geral Fretilin, Mari Alkatiri ho ninia oan mane, aproveita mai passear no akompanya Marina Ribeiro Alkatiri halo tratatmentu matan iha hospital Lisboa no fila ba passa ferias iha Maputo, Mozambique. Iha visita ikus, Mari Alkatiri la dehan buat ida ka halo deklarasaun ruma, hanesan nia halo visita dala uluk iha fulan Junho. Maibe Ramos Horta maka sai fali nudar «Porta Voz» Mari Alkatiri nian. Iha sira ninia visita, Ramos Horta rona nasehat ka conselho barak husi Mari Alkatiri. Neduni “biling balang” Ramos Horta nian konaba promulga no publika diploma konaba OR, no ikus ne´e Laos ninia vontade tamba deit hetan influencia barak husi Mari Alkatiri.

Kontra interesse Fretilin(IF):

Promulgasaun Diploma konaba «Orçamento Ratificativo (OR)», ne´e kontra interesse Fretilin nian, Fretilin vota kontra. Iha ne´e mos iha razaun ba ida ne´e, tamba deit, se husik liu OR promulga no publika iha Boletim Ofissial, fo tan liman ba AMP no IV Governo Constitusional bele halao diak liu tan no tau iha pratika programa Governo nian. Neduni, Fretilin tenta buka utiliza «força de bloqueio» nebe iha hodi bloqueio, iha ne´e joga ho Ramos Horta, hanesan aliadus importante ida, maske iha eleisaun Presidensial 2007 Fretilin la fo suporta ba Ramos Horta, maibe sira suporta rasik Presidente Fretilin, Francisco Guterres Lu´olo. Ramos Horta manan tamba koligasaun husi Partidos no kandidatus sira seluk nebe hola parte ba AMP. Iha ne´e Ramos Horta hatudu momos ninia komprimissu politiku ho Fretilin hodi bloqueia ba planos no projektus IV Governo Constitusional.

Interesse Nasional (IN) =Vontade Presidente (VP) + Intereses Fretilin (IF)

Iha Interesse Nasional (IN) ne´e tuir Ramos Horta ho Fretilin la hanesan, definisaun interesse nasional ba povo Timor tomak. Interesse Nasional tuir formula Ramos Horta ho Fretilin maka ne´e: IN=VP+IF!

FH Lisboa!
Email:fhaksesuk@gmail.com

Nota:
AK=Assembleia Konstituinte
AMP=Aliança para Maioria Parlamentar
IN=Interesse Nasional
JR/BO=Jornal Republika/Boletim Ofissial
TR= Tribunal Rekursus
VP=Vontade Presidente
IF=Interesse Fretilin
UFI=Ukun Fuan Inan ka Konstituisaun
OR=Orçamento Ratificativo

PR= Presidente Republika
RDTL= Republika Demokratiku de Timor-Leste