Ramos Horta fo’o “PR” ba Xanana Gusmão ho Mari Alkatiri

Hosi: Celso Oliveira*

Iha artigu ida ne’e, PR laos “Presidente da Republika”, maibe pekerjaan rumah ou trabalho de casa ou home work.

Antisipa eleisaun antesipada 2009 hanesan ejijensia hosi Mari Alkatiri, sekretariu jeral Fretilin nian, Ramos Horta, presidenti da republika, hatete katak “tinan 2008 hanesan teste ida ba governu AMP. Se karik governu AMP halo servisu diak ba rai no povo Timor, signifika eleisaun antesipada 2009 sei la existi. Maibe, se karik tinan 2008 maka governu AMP lakonsege hadia povo nia moris (ekonomikamente), ou 2008 maka mosu instabilidadi iha rai Timor, entaun Fretilin iha vantajen atu halo eleisaun antesipada 2009”.

Ne’e duni, tinan 2008 hanesan tinan ida “krusial” ba governu AMP i opozisaun Fretilin.

Governu AMP ho opozisaun Fretilin

Governu AMP, lideradu hosi primeiru ministru Xanana Gusmão, hafoin tiha atentadu iha segunda negra 11.02.08 iha Dili, konsege hadia ou muda buat barak ona. To’o oras ida ne’e, ita hare katak, (politika i ekonomikamente) buat hotu lao diak. Problemas hanesan deslokadus ho petisionariu sira nian, komesa tama ona iha faze solusaun nia laran. FFDTL iha general Taur Matan Ruak nia liman laran ho PNTL iha Afonso de Jesus nia komandu, halo kooperasaun furak tebes-tebes, hanesan sinal ida atu fo’o liu tan esperansa ba povo Timor. Igreja Katolika, hanesan instituisaun ida “tuan i forti” liu iha rai Timor, hametin relasaun diak ho governu AMP. Relasaun entre governu ho presidenti da republika iha konfiansa nia laran. To’o oras ida ne’e, ita seidauk hare katak presidenti akuza governu hodi dehan katak governu laiha kapasidadi atu liga ho problema nasaun nian. Propriu diskursu presidenti da republika, iha parlamentu nasional, kuarta feira liu ba (23.04.08), Ramos Horta, rekonyese kapasidadi primeiru ministro Xanana Gusmão atu resolve problema iha momentu krisi nia laran. Tribunal lao diak. To’o oras ida ne’e, laiha razaun ida atu halo keixa kontra funsionamentu justisa iha Timor.

Maibe, buat sira ne’e hotu, la signifika katak oras ne’e povo Timor moris diak ona. Sei kontinua existe problemas barak atu resolve ou atu hadia. Ne’e duni, presija kolaborasaun i kooperasaun ema hotu-hotu nian hodi bele hadia povo nia moris. Ne’e duni, presija atu tau iha pratika governu nia promessas ou programas.

Ne’e duni, apelu hosi presidenti da republika, José Ramos Horta, iha parlamentu nasional, kuarta feira liu ba (23.04.08), merese kontribuisaun ita hotu nian. Tamba, tuir hau nia hare, diskursu presidenti da republika, bele naruk i nakonu ho lia fuan bíblia nian, finalmente, koloka deit kestaun ida iha ita tomak nia moris, liu-liu politiku nain sira, katak: “oinsa hasai povo hosi moris kiak!”. “Oinsa povo ida hela iha nia uma rasik ho hakmatek!”. “Oinsa povo kiak bele hetan alimentasaun loron-loron”. Ida ne’e maka esensial. Ida ne’e maka objektivu lo-los hosi ita funu durante tinan 24 kontra indonésia.

Fretilin, uniku partidu opozisaun bo’ot liu iha PN, konsidera katak governu AMP “inkonstituisional”, konsidera Xanana Gusmão hanesan primeiru ministru de faktu, signifika,ba Fretilin, juridikamente Xanana Gusmão laiha power politika. Ne’e duni, tinan 2008, hanesan tinan ida “krusial” ba eis primeiru ministru Mari Alkatiri atu transforma situasaun politika, ekonomika iha Timor, atu nune bele hetan vantajen ba halo eleisaun antesipada iha 2009. Kazu ida ne’e la akontese, signifika, Xanana Gusmão iha poder politiku, juridikamente iha Timor.

Mari Alkatiri, eis primeiru ministru, tenki halo “lobby maka’as” ho deputadus hosi partidu seluk nebe tuur iha PN. Atu nune, se karik Fretilin apresenta proposta konaba eleisaun antesipada 2009, entaun vantajen sei ba Fretilin.

Akuzasaun kontra vice primeiru ministru AMP, José Luís Guterres, hosi bankada Fretilin iha PN, hanesan “arma/kilat” atu haksobu governu AMP. Aprosimasaun hosi eis primeiru ministru Mari Alkatiri ba presidenti PNT, Abílio Araújo, iha hotel Timor liu hosi jantar hamutuk (alias jantar politiku), hanesan forma ida atu oinsa Fretilin bele hetan apoio iha eleisaun antesipada 2009. Hau iha konsiderasaun bo’ot ba lideres politikus hanesan Abílio Araújo, João Carrascalão, i, sira seluk tan nebe hafoin tiha hetan experiensia barak durante funu nia laran, tinan 24 nia laran moris iha exiliu, ohin loron, lideres politkus sira ne’e, opta liu ba politiku mais pacifico, moderno i bazeia liu ba vida sosial povo nian do que radikalismu politikamente.

Fretilin, para além de Mari Alkatiri, sei iha lideres seluk tan nebe kompetenti, kapaz i laiha arogansia politika. Por exemplu: Hafoin tiha krisis politika militar 2006, mosu Estanislau da Silva, nebe duranti assumi kargu hanesan primeiru ministru iha III gov. konstituisional Fretilin nian, konsege kontrola situasaun politika-militar to’o realiza eleisaun lejislativa foun iha 2007.
Iha diskursu presidenti da republika iha parlamentu nasional, kuarta feira liu ba (23.04.08), nebe bazeia maka’as ba liafuan hosi bíblia, José Ramos Horta husu atu governu AMP konta ho partisipasaun Mari Alkatiri, Ana Pessoa i José Teixeira hodi halao negosiasaun konaba mina rai Timor. Sinal ida diak ba unidadi nasional. Pena, tamba Fretilin la rekonhese governu AMP konstituisionalmente, maibe Fretilin prontu atu servisu hamutuk ba kestaun nasional. Por exemplu: kestaun mina rai. Ne’e hanesan kondisaun ida nebe Ramos Horta, presidente da republika, koloka ba governu AMP. Ita hare deit se governu AMP aceita ka lae.

Violensia hanesan meius hodi alkansa objectivu

Iha Timor Leste, ohin loron, violensia mosu hanesan meius ida hodi bele alkansa objektivu politiku. Violensia nebe mosu laos mosu derepenti deit, maibe tenki ema ou grupu nebe kompetenti maka orkestra atu nune sira nia objektivu politiku bele alkansa. Iha relatoriu hosi departamentu defesa i seguransa nasional EUA, hateten katak violensia tinan 2006 iha Timor Leste tamba iha motivasaun politika.

Atentadu 11.02.08 mosu ho objektivu atu haksobu governu AMP, i, realiza eleisaun antisipada 2009.

IDP’s hanesan kilat ida ba opozisaun

Opozisaun Fretilin bele uza deslokadus sira nia situasaun hanesan kilat ida hodi alkansa sira nia interesse politika. Protestu hosi deslokadus sira tamba apoio nebe governu AMP fo’o ba sira la sufisienti, bele sai “boomerang” ba governu rasik. I, Fretilin bele uza situasaun ida ne’e hodi husu atu deslokadus kontinua iha sira nia fatin to’o realiza eleisaun antesipada 2009.

Problema nebe ita koloka maka ne’e: será que hafoin tiha eleisaun antisipada 2009 (se karik halo), Fretilin bele resolve problema deslokadus sira nian ka lae? Riak Reman, deputadu PSD iha PN hateten “partidus barak hamutuk iha AMP nia laran mós senti todan atu hadia rai no povo Timor nia moris, enkuantu mais partidu ida deit maka ukun. Se partidu ida deit maka ukun, sei susar liu tan”.

Konkluzaun

Tinan 2008 “krusial” ba Xanana Gusmão, hanesan líder hosi governu AMP, i, ba Mari Alkatiri, hanesan sekretariu jeral Fretilin, líder hosi partidu opozisaun iha PN. Momentu ida importanti atu ita akompanya aktivamente kapasidade sira nain rua nian iha vida politika Timor nian. Ida hanesan líder máximo luta ba independensia nasional, Xanana Gusmão. Ida seluk, hanesan líder bo’ot Fretilin nian, Mari Alkatiri.

Iha dalan barak atu ba to’o Roma. Ne’e duni, Fretilin, iha dalan barak atu liu, hodi bele realiza eleisaun antisipada 2009. Ida, sei liu hosi dalan pasífico –alias- sei lobby maka’as ho partidus seluk-seluk nebe tu’ur iha PN, i, presidenti da republika, José Ramos Horta. Dalan ida seluk, sei uza dalan violensia ho objektivu kria instabilidadi nasional: Governu la lao, Parlamentu la lao, demostrasaun iha fatin hotu-hotu, violensia entre grupu marsiais mosu filafali iba bairru ou distritu nia laran (liu-liu mosu iha bairru ou distritu nebe domina hosi Fretilin tamba fasil atu manipula) seluk-seluk tan. Hosi dalan ida ne’e, ita konsidera katak violensia nebe mosu agora iha Timor Leste justifika objektivu Mari Alkatiri, eis primeiru ministru, atu halo eleisaun antisipada iha 2009.

Iha karik kampu football nia laran, ida hanesan defesa, maka Xanana Gusmão, ida seluk, hanesan avansadu, maka Mari Alkatiri. AMP la presija tan golo tamba pontus barak tiha ona iha tabela nasional, ne’e duni, AMP uza sistema defesa –alias- “bertahan untuk menang”. Enkuantu Fretilin, presija marka golo barak atu nune bele hetan pontus maka’as. Iha 90 minutus nia laran, Fretilin sei uja sistema “menyerang untuk menang”. Ita husu deit atu jogo ne’e sai jogo ida mos i furak tamba ita selu bilhete karu.

Boa sorte….

*Poeta i hakerek nain (escritor) Timor oan, hela iha england