Liafuan “estado failhado” (ES) tama vokabulariu politiku, wainhira matenek nain sira hare ba Nasaun lubuk ida ne’ebé fohin mak sai husi funu (post war). ES la’os kestaun etika politika, maibe problema teoria politika ne’ebé buka atu esplika situasaun no kondisaun Nasaun foun sira ne’ebé sai husi kolonialismu ka sai husu funu. Iha nasaun barak mak hasoru problema ida ne’e.
Maibe, ita hare ba situasaun “uma laran” Timor Leste nian. Duranti iha funu laran, faksaun no grupu tomak hakarak hadau objektivu ida: “soberania rai ida, dignidade povu ida”. Ida ne’e etika politika resistensia nian. Traduz ba programa politika, nia sai hanesan luta ba independensia. Iha situasaun hanesan ne’e grupu sira la kestiona se mak heroi se mak traidor. Entaun, maski mosu divergensia iha metodologia luta nian, maibe iha orientasaun ne’ebé mais ou menos claro, iha integrasaun ne’ebé metin no organizasaun ho lideransa ne’ebé solidu. Ita nia esperiensia luta nian hatudu katak, orientasaun “mai husi leten” Xanana no Frente Armada; integrasaun ne’ebé forte tan hotu-hotu hakruk ba Xanana no CNRR/ CNRM/ CNRT; iha organizasaun no lideransa ne’ebé solidu husi Frente Armada (Xanana no FALINTIL), Frente Diplomasia (Ramos Horta), no Frente Klandestina (Xanana no kaixa ka estafet sira).
Problema hahu mosu wainhira ita hetan tiha objektivu, entaun grupu sira hahu sura kolen no haruka selu tusan. A lias, koezaun politika ne’ebé mosu duranti tempu “luta” hahu nakfera iha atmosfera “poder” nia laran. Ita tenki tau iha ulun, katak, duranti “luta” la iha ema ida mak hanoin seriu tebes atu harii “Estado” ida. Estudiozu politiku hanesan Ben Anderson hakerek kona ba “Imagining East Timor” (Monash University: 1992), nia dehan katak, liafuan “Timor Leste” no “timorense” hanesan imajinasaun ida no imajinasaun ne’e mak hanesan possibilidade atu hamoris soberania iha imajinasaun nia laran”. Atu dehan ho liafuan simples, duranti tempu “luta” nia laran ema imajina Estado maibe la hare katak nia realmente moris. Estado ne’e mehi ida.
Hau lembra, wainhira Presidente RI nian Prof. B.J. Habibie (27 Janeiru 1998) deklara katak iha posibilidade atu halo referendum, entaun ema hotu hanoin kedas independensia. Ema la hanoin “estado” foun. Wainhira Portugal no Indonesia asina akordu (5 Maiu 1998), hau hasoru Xanana Gusmão (primeira vez) iha Salemba/ Jakarta. Nia hateten ba hau, nia hanoin independensia. Nia la dehan, ita sei hetan estadu foun. Ho liafuan badak, liafuan “Estado” la mai husi ita nia luta rasik maibe praticabilidade husi mehi ida ne’ebé hanaran independensia.
Ita tenki hare katak, Timor Leste ne’e hanesan political imagination ida ne’ebé halo hela tranzisaun husi ideia “luta independensia” (resistensia) ba pratika “estadual”; husi “post war” ba “peacebuilding” too “nation building”. Naturalmente, iha “tranzisaun” ida nia laran sempre mosu fragilidade too bele mosu failansu. Balun fali dehan, ita nia estadu la’os failadu maibe “fraku”. Maibe, liafuan hirak ne’e iha teoria politika hanesan deit. La iha diferensia entre Estado “fragil”, “failhado” no “fraku”! Basá konsep hirak ne’e hakarak atu hatudu deit oinsa mak hala’o nation building liu husi “oportunidade” (kesempatan), “forsa” (kekuatan), “frakeza” (kelemahan) no “possibilidade” (kemungkinan).
Atu sukat buat ne’e, iha karakteristika 3 ne’ebé sai hanesan faktor determinante: (1) lei no ordem, (2) kapasidade governasaun, no (3) atitude representasaun popular nian (Derick W. Brinkerhoff [ed.], Governance in Post-Conflict Societies: Rebuilding fragile state, London: 2007). Wainhira ita bele halo justificação ba karakteristika hirak ne’e mak ita bele hatene Timor Leste ne’e estado fragil ka lae.
Lei no ordem
Nasaun ne’ebé fohin mak moris hakarak estabelese lei no ordem. Atu too iha objektivu, nasaun foun tenki hatur ninia identidade no legitimasaun liu husi Konstituisaun. Timor Leste hahu kedas eleisaun atu hili membru Assembleia Constituinte hodi hakerek Konstituisaun RDTL nian. Entaun, “nation building” sei funsiona didiak wainhira Konstituisaun bele fo “regra do jogo” (rule of game; aturan main) ba dinamika Estado ida. Estado ida bele failha wainhira Konstituisaun sai deit hanesan surat tahan ida no la fo impaktu Nasaun nia moris no povu nia destinu.
Maibe, ita hare ba situasaun “uma laran” Timor Leste nian. Duranti iha funu laran, faksaun no grupu tomak hakarak hadau objektivu ida: “soberania rai ida, dignidade povu ida”. Ida ne’e etika politika resistensia nian. Traduz ba programa politika, nia sai hanesan luta ba independensia. Iha situasaun hanesan ne’e grupu sira la kestiona se mak heroi se mak traidor. Entaun, maski mosu divergensia iha metodologia luta nian, maibe iha orientasaun ne’ebé mais ou menos claro, iha integrasaun ne’ebé metin no organizasaun ho lideransa ne’ebé solidu. Ita nia esperiensia luta nian hatudu katak, orientasaun “mai husi leten” Xanana no Frente Armada; integrasaun ne’ebé forte tan hotu-hotu hakruk ba Xanana no CNRR/ CNRM/ CNRT; iha organizasaun no lideransa ne’ebé solidu husi Frente Armada (Xanana no FALINTIL), Frente Diplomasia (Ramos Horta), no Frente Klandestina (Xanana no kaixa ka estafet sira).
Problema hahu mosu wainhira ita hetan tiha objektivu, entaun grupu sira hahu sura kolen no haruka selu tusan. A lias, koezaun politika ne’ebé mosu duranti tempu “luta” hahu nakfera iha atmosfera “poder” nia laran. Ita tenki tau iha ulun, katak, duranti “luta” la iha ema ida mak hanoin seriu tebes atu harii “Estado” ida. Estudiozu politiku hanesan Ben Anderson hakerek kona ba “Imagining East Timor” (Monash University: 1992), nia dehan katak, liafuan “Timor Leste” no “timorense” hanesan imajinasaun ida no imajinasaun ne’e mak hanesan possibilidade atu hamoris soberania iha imajinasaun nia laran”. Atu dehan ho liafuan simples, duranti tempu “luta” nia laran ema imajina Estado maibe la hare katak nia realmente moris. Estado ne’e mehi ida.
Hau lembra, wainhira Presidente RI nian Prof. B.J. Habibie (27 Janeiru 1998) deklara katak iha posibilidade atu halo referendum, entaun ema hotu hanoin kedas independensia. Ema la hanoin “estado” foun. Wainhira Portugal no Indonesia asina akordu (5 Maiu 1998), hau hasoru Xanana Gusmão (primeira vez) iha Salemba/ Jakarta. Nia hateten ba hau, nia hanoin independensia. Nia la dehan, ita sei hetan estadu foun. Ho liafuan badak, liafuan “Estado” la mai husi ita nia luta rasik maibe praticabilidade husi mehi ida ne’ebé hanaran independensia.
Ita tenki hare katak, Timor Leste ne’e hanesan political imagination ida ne’ebé halo hela tranzisaun husi ideia “luta independensia” (resistensia) ba pratika “estadual”; husi “post war” ba “peacebuilding” too “nation building”. Naturalmente, iha “tranzisaun” ida nia laran sempre mosu fragilidade too bele mosu failansu. Balun fali dehan, ita nia estadu la’os failadu maibe “fraku”. Maibe, liafuan hirak ne’e iha teoria politika hanesan deit. La iha diferensia entre Estado “fragil”, “failhado” no “fraku”! Basá konsep hirak ne’e hakarak atu hatudu deit oinsa mak hala’o nation building liu husi “oportunidade” (kesempatan), “forsa” (kekuatan), “frakeza” (kelemahan) no “possibilidade” (kemungkinan).
Atu sukat buat ne’e, iha karakteristika 3 ne’ebé sai hanesan faktor determinante: (1) lei no ordem, (2) kapasidade governasaun, no (3) atitude representasaun popular nian (Derick W. Brinkerhoff [ed.], Governance in Post-Conflict Societies: Rebuilding fragile state, London: 2007). Wainhira ita bele halo justificação ba karakteristika hirak ne’e mak ita bele hatene Timor Leste ne’e estado fragil ka lae.
Lei no ordem
Nasaun ne’ebé fohin mak moris hakarak estabelese lei no ordem. Atu too iha objektivu, nasaun foun tenki hatur ninia identidade no legitimasaun liu husi Konstituisaun. Timor Leste hahu kedas eleisaun atu hili membru Assembleia Constituinte hodi hakerek Konstituisaun RDTL nian. Entaun, “nation building” sei funsiona didiak wainhira Konstituisaun bele fo “regra do jogo” (rule of game; aturan main) ba dinamika Estado ida. Estado ida bele failha wainhira Konstituisaun sai deit hanesan surat tahan ida no la fo impaktu Nasaun nia moris no povu nia destinu.
Hare husi ne’e, ita bele dehan katak iha prosesu “inkonstitusional” barak ne’ebé mosu. Hahu husi harii 1º Governu. Ne’e deit hatudu ona “golpe ante-constitucional”, katak, antis ita nia Lei Inang tama iha vigora, ita kontra uluk tiha ona. La’os povu mak kontra. Maibe, ema hirak ne’ebé hakarak kaer metin “poder”.
Tuir mai ita hare took kazu asina akordu kona ba Taci-Timor nian. Ne’e mos la tuir prinsipiu Konstitusional. Membru PN balun dehan, agora ita buka uluk lai osan. Baliza maritima hein tinan 50 mai mak ko’alia mos diak. Depois, akordu ida ne’e la hetan ratifikasaun husi PN.
Depois, prosesu atu halakon Igreja Katolika ninia papel iha sosiedade Timor Leste nian. Ida ne’e mos kontra Konstituisaun ne’ebé rekuinese relijiaun tomak nia liberdade. Wainhira Igreja halo manifestasaun, Governu hakarak ataka ho violensia. Maibe, ikus mai la jadi. Liu tiha ida ne’e, politika nain balun deklara katak “tradisaun no relijiaun sai hanesan obstakulu atu harii estado de direito democrático”. Ne’e katak, violasaun ba fundamentu Timor oan sira nia moris. Tan Timor Leste iha ninia tradisaun no ninia relijiaun rasik. Deklarasaun hanesan ne’e hatudu provokasaun no ajitasaun politika. Maibe, liu-liu lider sira ne’e iha gostu atu provoka situasaun instabilidade.
Kazu petisionario no Alfredo Reinado hanesan ezemplu ikus liu ne’ebé hatudu katak Konstituisaun sai kanek todan liu tan. Fahe kilat. Diskriminasaun. Grupu armadu ka “milisia” ba partidu ida. Depois sira involve iha ataka ba F-FDTL. F-FDTL foti kontra-atake ba PNTL. Problema hirak ne’e tibak hamutuk. La rezolve too ohin loron. Sira ne’ebé tenki hola responsabilidade moral, a final “arkiva” tiha nia kazu (c.q., Alkatiri). Rai Los ne’ebé hatudu evidensia maka’as ikus mai “sumba” tiha. Agora, nia toba hakmatek iha Becora. La iha julgamentu ida ba nia. Rogerio Lobato deit mak hetan sentensa! Maibe, nia iha privilejiu boot atu ba kadeia iha Malaysia ho tratamentu VVIP.
Too ikus mai mosu atake 11 Fevereiru 2007. Atake ida ne’e halo nusa ba mos hatudu ona “traisaun” ba Nasaun Santa no Povu Martiriu. Alfredo no Leopoldino nia mate (la interese sira heroi ka lae) hatudu klimaks ida husi lei no ordem ne’ebé la metin. A lias “fragil”. Too ohin loron, ita la hatene kazu hirak ne’e sei rezolve ka lae. Maibe, liu-liu ita hare katak sistema judiciariu sei buka atu fo “justisa” too deit iha nivel Gastão Salsinha ba kraik. Ba leten, hau hanoin Procuradoria da Republica no Tribunal sei buka atu halo teatru “arkivadu” tan la iha evidensia. Dala ida tan, ida ne’e hatudu ona “estado frajil” basá, reforma sistema judiciariu mak la metin. Kazu fahe kilat fo ona presedensia!
Konkluzaun dahuluk, katak, Konstituisaun ne’ebé estabelese dinamika estado nian sai fali “rekursu natural” ba konflitu. Atu sukat legitimasaun konstitusional ita tenki fo medidas 2: “input oriented” no “output oriented”.
“Out-put oriented”: Kapasidade governasaun Taur Matan Ruak deklara katak problema hirak ne’ebé la rezolve iha tinan 2 nia laran, agora bele rezolve lalais liu tan. Petisionariu, Alfredo no IDP’s bele rezolve iha fulan hirak nia laran. Maibe, tan sa mak kazu hirak ne’e tenki hola tinan 2 nia laran atu too iha solusaun dramatiku ida ne’e?
Direitamente ita bele dehan, “output oriented” mak la funsiona. Ne’e hatudu katak, governasaun la konsege halo dezenvolvimentu ne’ebé bele beneficia povu Timor Leste tomak. Dezenvolvimento mak Dili. Osan iha Dili. Eletrisidade no be-mos iha Dili. Sentru edukasaun iha Dili. Sentru ekonomia iha Dili. Sentru saude iha Dili. Dili tun, Timor Leste tun. Dili tesik, Timor Leste tesik. Ho liafuan badak, povu Timor Leste la hare situasaun nasaun nudar “ita nian”, maibe “Dili nian”. Governasaun hahu husi kedas “sentralismu poder” ka “egalitarismu absolut”. Katak, Governu dehan ita hotu hanesan: Timor ida deit, rai ida deit (egalitarismu), maibe iha absolutamente iha ema ida deit nia hanoin no hakarak. Ho kondisaun ida ne’e tinan 2 nia laran, ita la rezolve problema Petisionariu, Alfredo no IDP’s.
Hau hanoin AMP hetan suporta husi “dewi fortuna” ka “matebian heroi” sira. La iha ema ida hanoin katak 11 Fevereiru 2008 hanesan “point of return” (titik balik). Se Alfredo Reinado la halo atake mortal (nia rasik mak mate) no Gastão Salsinha la hetan babeur karik, ita la hatene too bainhira mak AMP resolve kazu hirak ne’ebé mai husi Governu sira antis ne’e!
Iha Governu uluk nian, kazu Petisionariu la hetan dialogo ne’ebé diak. La iha “governasaun aberta” ne’ebé governu haklaken husi ibun, maibe lakon iha pratika. Wainhira situasaun manas ona, Governu hola desizaun atu hatun F-FDTL hodi ataka fali ninia maluk sira. Nudar “instrumentu defeza” nian, F-FDTL kaer ordem. Maibe, orden ne’ebé tun ba sira, infelizmente, la tuir regra konstitusional. Governu hasai desizaun la liu husi Palacio da Cinzas (Presidente da Republica) no Uma Fukun (Parlamento Nacional) maibe mai husi Uma Kain Farol nian.
Ninia rezultadu, mosu eskalasaun violensia ne’ebé nakfera iha disintegrasaun sosial entre loromonu ho lorosae, firaku ho kaladi, heroi no traidor, independensionista no otonomista. Situasaun ida ne’e la hetan solusaun. Organizasaun Sosiedade Civil (OSC) barak mak fakar osan, fakar energia no fakar sira nia matenek, maibe solusaun la too hela deit (liu tiha mak OSC rasik haklalak “liu ona loron 100 mak governu ne’e la halo buat ida”. Afinal OSC mos banting tulang iha loron 300 resin nia laran, maibe la rezolve buat ida. Hatudu katak OSC mos frajil/ fraku???).
Governu ida agora (maski dehan “inkonstitusional, de facto), hahu ho dialogo. Maski, atitudi Alfredo, Gastão no IDP’s sira nian kaer la metin, maibe esforsu la’o nafatin. Too babeur mosu iha 11 Fevereiru, dialogo hotu taka. Governu liu husi Presidente da República interino no Parlamento Nacional husu atu deklra Estado de Sítio. Dala ida tan, governu ne’ebé dehan inkonstitusional hatene, maibe interpreta no la’o tuir dalan konstitusional nian.
Iha parte ida Governu AMP bele ultrapasa Governu FRETILIN nian ne’ebé la mampu (ka, sei fragil) atu rezolve problema hirak ne’e iha tinan 2 nian laran. Ne’e tan, wainhira hahu kaer governasaun, FRETILIN la iha rekursu ne’ebé naton atu kaer metin kuda talin rebo-rebo governu nian! Maibe, governasaun AMP nian mos hatun kedas medidas ne’ebé maka’as nian, uza forsa atu halo ema hakruk. Sira halo estadu iha emerjensia nia laran.
Ne’e katak, governasaun ida ne’e mos fragil. Katak, atu rezolve problema Alfredo no Gastão nian, AMP uza “dosis tinggi”. Maibe, “estado de sítio” no “estado de emergencia” kontempla duni situasaun katak ita iha “estado failhado” nia laran. Basá, aprende husi failansu FRETILIN nian, AMP la hakarak hatama Timor Leste iha “perpetual war” (funu ba bebeik) ka “omnia bellum conta omnes” (perang semua melawan segalanya) nia laran. Halo nusa ba mos, husi FRETILIN nia governasaun ba fali AMP nia governasaun hatudu hela “circulus vitiosus” (lingkaran kejahatan). Hanesan ema Jerman dehan “ende Gut, alles Gutte” (final mak diak, entaun buat hotu diak). Ho liafuan seluk, hahu mak kleuk ona tuir mai mos kleuk nafatin. Entaun, ita presiza karakter ida atu bele hatudu “output oriented” foun: reforma institusioanl atu halo dezenvolvimentu no damen nian. Hotu-hotu tenki iha partisipasaun politika.
“Input Oriented”: Reprezentasaun povu
Hau hatudu factum ida deit. Kona ba Estado de Sítio (ES), “representante povu” nian dehan katak situasaun ida ne’e hanesan “persigisaun politika” (Deputado Domingos Sarmento), “hamosu ditadura politika” (Deputd Mari Alkatiri) no hamaten roda ekonomia, bele hamosu violasaun direitu umanu, halakon liberdade, nst (Deputadu Manuel Tilman no Deputada Fernanda Borges, iha TVTL).
Iha loron hirak tuir mai, TVTL, RTL no media balun halo “sondagem” ba povu. Se media komunikasaun tomak mak halo sondagem nasional kona ba ES, hau brani hateten katak, too 90% resin, ita sei rona povu dehan “ami kuntenti”, “ami hakmatek”, “ami gosta”, “ami hakarak atu governu kontinua nafatin ho ES”, “kalan ema la ataka ona ...”, nst.
Fakta ne’e hatudu asimetria relasional husi Representante povu nian ho povu rasik ne’ebé hili sira. Ho liafuan simples, povu Timor (ne’ebé deputadu sira representa) fo “bofitada” (basa maka’as iha oin laran/ tamparan keras di muka) ba deputadu sira. Deputadu sira iha debate nia laran la haluha atu hatama palavra de ordem, hodi dehan bebeik “ami representante povu nian, ... ami tenki ko’alia, ... ami ko’alia povu nia lian, ... ami povu nia lian”. Maibe, iha kazu ES nian, deputadu sira failha atu kaer metin povu nia hanoin no povu nia sentimento. Sira ko’alia iha Uma Fukun husi “splendid isolaiton” (jovem sira dehan, “ko’alia hanesan tur iha fulan”) ida. Katak, sira tur hakmatek no patarata iha fatin ida ne’ebé isoladu husi povu ne’ebé hili sira. Entaun, “asimetria relasional”, katak, “fiu kotu; fiu bobar”, ita husu buat ida ema hatan buat seluk; ita hanoin buat ida ema hateten buat seluk.
Ne’e factum ida deit. Ita bele halo lista naruk ida kona ba intervensaun deputadu sira ne’ebé dala ruma la ko’alia povu nia lian. Maibe, faktum ida ne’e deit hatudu ona katak ita iha estadu fragil nia laran. Maski deputadu sira dehan “... la’os estadu fragil, maibe normal ... tuir prosesu demokratiku ho indikasaun TL iha presidente republika, iha primeiru ministru, iha parlamentu nasional funsiona normal, iha tribunal lao hela, saida mak frajil tan hela...” (STL 03/04/08). Hau hanoin, frajil iha kapasidade atu artikula povu nia lian. La iha leitura kritika ba kondisaun sosial, artikulasaun analitika kona ba situasaun moris loro-loron nian. Uma Fukun lian, tan tenki lian. Deputadu sira ne’ebé estuda ona iha Indonesia hatene liafuan “asal bunyi” (bahasa Jawa dehan “as-muni”). Entaun, wainhira deputadu sira iha PN la biban atu hatudu “input oriented”, sira mos inklui iha fragilidade ka failansu estadu nian.
Konkluzaun
Estado fragil la’os “moe boot” ba ita. Nia hanesan dezafiu ne’ebé ita tenki hasoru. Kompara ho nasaun seluk ne’ebé independente kleur ona, too ohin loron deit sira hamrik la metin. Ezemplu: Indonesia, Cambodia, Bangladesh, Vietnam, Korea, China, Pakistan, India, Afganistan, liu-liu ita nia maluk sira hanesan Moçambique, Angola, Guine Bissau, São Tome e Principe, nst.! Husi rai ida ba rai seluk ita hasoru nafatin: Asia, Afrika, Amerika Latina, Europa, Pasifika, Australia no USA. Ezemplu boot liu hanesan Republika Italia ne’ebé hahu harii iha 1946. Too ona tinan 62 nia laran nudar republika ida, Italia ninia governu monu bebeik too ikus ne’e hamutuk 63. Premier Italia nian ne’ebé kleur liu mak Silvio Berlusconi ne’ebé ukun too tinan 4. Sira seluk, balun too fulan 1 deit, monu ona. Ida ne’e mos bele tama iha kategoria “estado failhado” ka lae? Ezemplu seluk: atake ba “twin tower” New York, 11 Setembru 2001, mos hatudu katak USA “failha” atu asegura ninia nasaun. Ita lalika “moe” ba realidade ida ne’e.
Ema ne’ebé la rekuinese katak Timor Leste iha tendensia atu tama iha estadu failadu, ne’e hatudu katak “gaba sola an”! Hau konkorda ho Xanana ne’ebé dehan katak Timor Leste atu monu; Timor Leste tuir dalan ne’ebé bele too iha estado failhado. Lider ne’ebé iha vizaun nasionalista no misaun protetora mak brani hare problema nia hun no kledik. Lider manduku mak buka deit halo “kung-fu ninja” ne’ebé tangkis tun tangkis sae hela deit! Uma Fukun, media komunikasaun sosial no OSC rejeita liafuan “estado failhado”. Sira iha direitu atu dehan ida ne’e. Maibe, sira nia artikulasaun mai liu husi “kampaña politika” no failha nudar kritika akademika. A lias, falta de conhecimento teorética mos bele hatudu katak ita fraku atu halo social control.
Hau hanoin estado fragil ne’e konsekuensia husi situasaun tranzisaun nia laran. FRETILIN aten brani teb-tebes atu asumi estado ida ne’e duranti tinan 4 nian laran. Moralmente, FRETILIN forte nafatin, “besi-asu” nafatin. Maibe, politicamente lideransa FRETILIN la hatudu “good will” atu hola medidas hodi rezolve situasaun. Kompara iha hospital karik, lideransa sira hanesan doutor ne’ebé la hatene detekta/ konsulta no halo diagnosis ba ema nia moras. Wainhira diagnosis sala ona, entaun intervensaun mediku nian mos sala, fo aimoruk sala no sona sala. Entaun, ema moras la’os atu sai diak maibe hetok “fragil” liu tan. Nune’e mos, wainhira AMP la hatene halo diagnosis ba nasaun ninia moras no halo intervensaun “emergencia” nian, entaun sira mos sei halo Timor Leste sai “fragil” nafatin.
Dala ida tan, estado failhado ne’e teoria ida atu esplika fenomena nasional ne’ebé hasoru “circulus vitiosus” (lingkaran kejahatan) ida. Hanesan “pecado original” (original sin), katak, sala ida mai husi ita nia hun (instituisaun ida nia hun) no kona daet ba ema hotu (instituisaun hotu). Nia kona ba orgaun soberania tomak: sistema judisiariu, governu (no presidensia republika), parlamentu nasional. Inklui iha laran, media komunikasaun no OSC rasik ne’ebé avansadu liu iha aktividade ba direitu umanu, maibe fraku iha konseitu filosofia politika no teoria politika. Estadu failhado ne’e tenki hare iha relasaun entre teoria politika no praxis politika. Nia la’os problema aktivista politika deit.
*) Direitor JPC Diocese Baucau, hanorin etika fundamental, etika sosial- politika no “ateismo contemporanea” iha Seminario Maior Fatumeta no filosofia iha UNTL Dili.
*) Martinho G. da Silva Gusmão, *) Direitor JPC Diocese Baucau, hanorin etika fundamental, etika sosial- politika no “ateismo contemporanea” iha Seminario Maior Fatumeta no filosofia iha UNTL Dili.
“Input Oriented”: Reprezentasaun povu
Hau hatudu factum ida deit. Kona ba Estado de Sítio (ES), “representante povu” nian dehan katak situasaun ida ne’e hanesan “persigisaun politika” (Deputado Domingos Sarmento), “hamosu ditadura politika” (Deputd Mari Alkatiri) no hamaten roda ekonomia, bele hamosu violasaun direitu umanu, halakon liberdade, nst (Deputadu Manuel Tilman no Deputada Fernanda Borges, iha TVTL).
Iha loron hirak tuir mai, TVTL, RTL no media balun halo “sondagem” ba povu. Se media komunikasaun tomak mak halo sondagem nasional kona ba ES, hau brani hateten katak, too 90% resin, ita sei rona povu dehan “ami kuntenti”, “ami hakmatek”, “ami gosta”, “ami hakarak atu governu kontinua nafatin ho ES”, “kalan ema la ataka ona ...”, nst.
Fakta ne’e hatudu asimetria relasional husi Representante povu nian ho povu rasik ne’ebé hili sira. Ho liafuan simples, povu Timor (ne’ebé deputadu sira representa) fo “bofitada” (basa maka’as iha oin laran/ tamparan keras di muka) ba deputadu sira. Deputadu sira iha debate nia laran la haluha atu hatama palavra de ordem, hodi dehan bebeik “ami representante povu nian, ... ami tenki ko’alia, ... ami ko’alia povu nia lian, ... ami povu nia lian”. Maibe, iha kazu ES nian, deputadu sira failha atu kaer metin povu nia hanoin no povu nia sentimento. Sira ko’alia iha Uma Fukun husi “splendid isolaiton” (jovem sira dehan, “ko’alia hanesan tur iha fulan”) ida. Katak, sira tur hakmatek no patarata iha fatin ida ne’ebé isoladu husi povu ne’ebé hili sira. Entaun, “asimetria relasional”, katak, “fiu kotu; fiu bobar”, ita husu buat ida ema hatan buat seluk; ita hanoin buat ida ema hateten buat seluk.
Ne’e factum ida deit. Ita bele halo lista naruk ida kona ba intervensaun deputadu sira ne’ebé dala ruma la ko’alia povu nia lian. Maibe, faktum ida ne’e deit hatudu ona katak ita iha estadu fragil nia laran. Maski deputadu sira dehan “... la’os estadu fragil, maibe normal ... tuir prosesu demokratiku ho indikasaun TL iha presidente republika, iha primeiru ministru, iha parlamentu nasional funsiona normal, iha tribunal lao hela, saida mak frajil tan hela...” (STL 03/04/08). Hau hanoin, frajil iha kapasidade atu artikula povu nia lian. La iha leitura kritika ba kondisaun sosial, artikulasaun analitika kona ba situasaun moris loro-loron nian. Uma Fukun lian, tan tenki lian. Deputadu sira ne’ebé estuda ona iha Indonesia hatene liafuan “asal bunyi” (bahasa Jawa dehan “as-muni”). Entaun, wainhira deputadu sira iha PN la biban atu hatudu “input oriented”, sira mos inklui iha fragilidade ka failansu estadu nian.
Konkluzaun
Estado fragil la’os “moe boot” ba ita. Nia hanesan dezafiu ne’ebé ita tenki hasoru. Kompara ho nasaun seluk ne’ebé independente kleur ona, too ohin loron deit sira hamrik la metin. Ezemplu: Indonesia, Cambodia, Bangladesh, Vietnam, Korea, China, Pakistan, India, Afganistan, liu-liu ita nia maluk sira hanesan Moçambique, Angola, Guine Bissau, São Tome e Principe, nst.! Husi rai ida ba rai seluk ita hasoru nafatin: Asia, Afrika, Amerika Latina, Europa, Pasifika, Australia no USA. Ezemplu boot liu hanesan Republika Italia ne’ebé hahu harii iha 1946. Too ona tinan 62 nia laran nudar republika ida, Italia ninia governu monu bebeik too ikus ne’e hamutuk 63. Premier Italia nian ne’ebé kleur liu mak Silvio Berlusconi ne’ebé ukun too tinan 4. Sira seluk, balun too fulan 1 deit, monu ona. Ida ne’e mos bele tama iha kategoria “estado failhado” ka lae? Ezemplu seluk: atake ba “twin tower” New York, 11 Setembru 2001, mos hatudu katak USA “failha” atu asegura ninia nasaun. Ita lalika “moe” ba realidade ida ne’e.
Ema ne’ebé la rekuinese katak Timor Leste iha tendensia atu tama iha estadu failadu, ne’e hatudu katak “gaba sola an”! Hau konkorda ho Xanana ne’ebé dehan katak Timor Leste atu monu; Timor Leste tuir dalan ne’ebé bele too iha estado failhado. Lider ne’ebé iha vizaun nasionalista no misaun protetora mak brani hare problema nia hun no kledik. Lider manduku mak buka deit halo “kung-fu ninja” ne’ebé tangkis tun tangkis sae hela deit! Uma Fukun, media komunikasaun sosial no OSC rejeita liafuan “estado failhado”. Sira iha direitu atu dehan ida ne’e. Maibe, sira nia artikulasaun mai liu husi “kampaña politika” no failha nudar kritika akademika. A lias, falta de conhecimento teorética mos bele hatudu katak ita fraku atu halo social control.
Hau hanoin estado fragil ne’e konsekuensia husi situasaun tranzisaun nia laran. FRETILIN aten brani teb-tebes atu asumi estado ida ne’e duranti tinan 4 nian laran. Moralmente, FRETILIN forte nafatin, “besi-asu” nafatin. Maibe, politicamente lideransa FRETILIN la hatudu “good will” atu hola medidas hodi rezolve situasaun. Kompara iha hospital karik, lideransa sira hanesan doutor ne’ebé la hatene detekta/ konsulta no halo diagnosis ba ema nia moras. Wainhira diagnosis sala ona, entaun intervensaun mediku nian mos sala, fo aimoruk sala no sona sala. Entaun, ema moras la’os atu sai diak maibe hetok “fragil” liu tan. Nune’e mos, wainhira AMP la hatene halo diagnosis ba nasaun ninia moras no halo intervensaun “emergencia” nian, entaun sira mos sei halo Timor Leste sai “fragil” nafatin.
Dala ida tan, estado failhado ne’e teoria ida atu esplika fenomena nasional ne’ebé hasoru “circulus vitiosus” (lingkaran kejahatan) ida. Hanesan “pecado original” (original sin), katak, sala ida mai husi ita nia hun (instituisaun ida nia hun) no kona daet ba ema hotu (instituisaun hotu). Nia kona ba orgaun soberania tomak: sistema judisiariu, governu (no presidensia republika), parlamentu nasional. Inklui iha laran, media komunikasaun no OSC rasik ne’ebé avansadu liu iha aktividade ba direitu umanu, maibe fraku iha konseitu filosofia politika no teoria politika. Estadu failhado ne’e tenki hare iha relasaun entre teoria politika no praxis politika. Nia la’os problema aktivista politika deit.
*) Direitor JPC Diocese Baucau, hanorin etika fundamental, etika sosial- politika no “ateismo contemporanea” iha Seminario Maior Fatumeta no filosofia iha UNTL Dili.
*) Martinho G. da Silva Gusmão, *) Direitor JPC Diocese Baucau, hanorin etika fundamental, etika sosial- politika no “ateismo contemporanea” iha Seminario Maior Fatumeta no filosofia iha UNTL Dili.
STL - Edition: 28 April 2008
© Copyright 2005-2007 Suara Timor Lorosae
Sem comentários:
Enviar um comentário
Nota: só um membro deste blogue pode publicar um comentário.