Tempo ba Diálogo, Amnistia no Eleisoins Antesipadas

Tempo ba Dialogo, Amnistia no Eleisoins Antesipadas

Husi : Victor Tavares

Atentado ba PR Ramos Horta ho PM Xanana Gusmão iha loron 11 fulan Fevereiro tinan 2008 liu ba sai hanesan loron ida ba dala ikus (ultimo dia) ba dialogo kona ba kazu mediatiku nebe konhesidu ho “kazu grupo major Reinado”.

Kazu ida nebee ex-major Polisia-Militar nee dada ba nian an, kazu ida nebee nia prega metin iha nian farda nudar militar no vanguarda ba justisa ba nian povo, kazu ida nebee mos nia suku metin iha nian boina oin, atu sai hanesan fitun ida hodi leno justisa ba nian kamaradas sira nebee hetan susar no iha nakukun laran, liu-liu kazu ida nebee iha nian objektivu atu harii no defende tesi lia los ba povo Timor LoroSa’e.

Maibe, infelizmente kazu nee karik mate seit ona, no fitun iha major Reinado nian boina oin mos kala lakan la to’o kalan tomak, hodi nunee la konsegue leno justisa ba nian kamaradas sira no ba nian povo. Responsabilidade nebee major Alfredo Reinado dada ba nian an husi fulan Maio tinan 2006 to’o ultimu minutu major Alfredo Reinado, involutariamente foti nian boina Polisia Militar (PM) nian ba dala ikus, iha Metiaut hodi hakru’uk ba aman-maromak nian bolu. Nunee kazu “major Reinado” nian kapitulu remata ho major Alfredo Reinado Alves nian mate, hodi nune, buat nebee nia (AR) ho nian ema defende no buat nebee grupo Reinado buka, karik mate no hakoi hamutuk ho matebian Alfredo Reinado ho nian elemento ida Leopoldino.

Hahu husi biban nebee major Reinado dada nian is ba dala ikus, situasaun muda no mosu kazu seluk-seluk nebee loke pajina foun ba autoridades kompetentes sira, muda orgauns estado ho instituisoins estado nian ajenda ba kazus selu-seluk nebee mosu mai, hodi nunee kazu semelhantes ka kazus hirak nebee iha ligasaun ho revoltozus sira, la iha tan ona dalan ba dialogo. Basa, orgauns soberania hirak, instituisoins estado no mos autoridades kompetentes sira la bele lakon tempo demais ho problema oin ida deit, tanba problemas selu-seluk nebee mos prioridades no urjentes hein hela atu rezolve.

Iha biban nebee ulun boot sira, responsavel maximu ba estado ho nasaun nian, orgauns soberanos sira esgota mekanismus hotu-hotu atu rezolve kazus revoltozus sira tuir dalan pasifika, maibe infelizmente maun-alin sira nebee hakarak buka justisa ba sira nian kazu, atu hetan solusaun ba sira nian situasaun ho dalan dialogo nebee diak, maibe sira hakarak atu impoin sira nian ejizensia ba orgauns soberanos sira hodi halo tuir sira nian hakarak, maibe hahu husi biban nebee grupos sira buka hamosu fali instabilidade mak la iha tan ona dialogo.

Estado ho instituisoins estado nian ho lejitimo no iha lejitimidade atu obriga movimentu ka se se deit atu hakru’uk ba lei no ordem publika hodi salvaguarda estabilidade nasional, atu povo bele moris hakmatek no mos la tau perigu ba kualker sidadaun nian vida ho sira nian sasan. Basa, responsabilidade nebee estado iha la’os ba ema ida ka rua, la’os ba grupu ida ka rua, la’os ba organizasaun ida ka rua, maibe nasaun tomak no ba povo tomak nian vida, ba problemas bara-barak no ba susar oi-oin povo hasoru.

Major Alfredo nian mate sai hanesan lisaun boot ida, liu-liu ba sira nebee iha konflitu nian laran no lisaun boot hanesan referensia ida oin sa konsekuensia ba sira nebe kaer kroat no envolve iha kazus sosial ka militar no konsekuensias ba povo nee oin sa.

Atentado ba PR, PM no major Alfredo Reinado ho nian elemento nian mate hamosu kestoins oi-oin : tanba sa ataka atu oho ka rapta PR ho PM ? Tanba sa ataka PR nian uma no halo emboskada hodi ataka PM ? Tanba sa major Alfredo Reinado ho nian elemento tenke mate iha Metiaut iha dader san neba ?

Hipotezes atu hatan ba kestoins hirak nee, karik nem ema ida bele hatene hatan, karik major Reinado mesak mak hatene hatan, maibe nia mos mate tiha ona. De resto, investigasaun husi komisaun nasional ka internasional atu apura responsabilidade, karik mos bele la konsegue hatan kestoins hirak nee tuir lolos.

Ema Timor tomak hatene, nunee mos karik mundo tomak mos bele hatene motivu nebe lori ex-komandante polisia-militar nee ho nian elementos sai husi sira nian kuartel iha fulan Maio tinan 2006. Iha biban nebee ex-major Alfredo Reinado (matebian) ho nian elementos sira abandona sira nian kompanhia, nia (mj.AR) afirma nian an nudar polisia-militar nebee defende justisa ba militares sira nebee hetan expulsaun sem justa kauza, no iha biban nebaa matebian Alfredo Reinado akuza PM biban nebaa hanesan kriminozu no responsavel ba soldados sira nebee governo duni sai husi fileiras militar nian.

Akuzasaun husi ex-major PM nee muda iha fulan tolu ka hat ikus nee, publikamente major Reinado hatudu liman ba Sr. Xanana Gusmão aktual Primeiro-Ministro no akuza nia nudar autor ba krize nebee, mundo tomak hatene katak hahu husi orgaun defesa F-FDTL nian leet. Akuzasaun no mudansa pozisaun husi major Alfredo Reinado nee halo ema hotu hakfodak no hamosu kestaun tanba sa ?

Desde AR muda nian akuzasaun, karik ema Timor tomak la rona lia fuan ida husi matebian ex-komandante PM nian ibun, kontra lideransa Fretilin ka temi Mari Alkatiri nebee nia (AR) konsidera ona autor ba krize bainhira hahu revolta, maske kala Sr.Mari Alkatiri nian naran kala hamos (apagado) tiha ona iha major Reinado (matebian) nian lista, hodi tau fali Sr. PM Xanana Gusmão nian naran iha nian fatin.

Grupo major Reinado hahu halo kampanha kontra Sr. PM Xanana Gusmão, no atu reforsa sira nian akuzasaun ba Sr. PM, sira produz no reproduz video hodi fahe lemo-lemo iha povo nian leet, halo divulgasaun nebee boot tebes. Akuzasaun husi grupo Alfredo Reinado nee mos hetan reasaun makaas husi partido Fretilin, liu husi Sekretario Jeral, presidente no mos representantes sira iha PN. Reasaun forte ho preokupasaun boot husi dirijentes partido Fretilin hanesan fali sira hatene ona atu mosu atentadu kontra orgauns soberano ka instituisoins estadu nian. Ao mesmo tempo Mari Alkatiri renova hikas nian desejo atu Xanana resigna an husi PM, husu atu PM Xanana Gusmão esplika iha Parlamento no hakarak atu halo eleisoins antesipadas.

Maibe partidos hirak seluk, governo no PM Xanana Gusmão rasik la fo importansia ka la halo reaksaun nebee hanesan ho partido Fretilin, karik iha motivu atu la preokupado tanba la iha razaun ruma nebee justifika atu akontese situasaun anormal ruma.

Relasiona ho kampanha kontra PM liu husi produsaun video, nem ita hatene grupo revoltozus sira hetan fasilidades husi nebee no se mak suporta ho materias lazer ho finansiamentu ? Basa, ita hotu hatene katak desde Maio 2006 (grupo Reinado) no Março 2006 (grupo petisionasirus) sira la simu tan ona sira nian vensimentu mensal to’o ohin loron.

Ho mudansa pozisaun, kazu major Reinado hanesan ponto virajem ba sira nian kazu, maibe mudansa nebee la’os aselera ba solusaun ba sira nian problema ho fasifika, ao kontrario hamosu situasaun triste no mos hanesan aselera Alfredo Reinado rasik nian vida remata iha mundo ida nee.

Tuir lolos problema grupo revoltozus sira la to’o ba ponto ida nebee ohin loron hetan, tanba orgauns soberanos sira, instituisoins estado nian halo esforsu nebee boot atu hetan solusaun nebee ekilibriu, solusaun nebee diak ba parte hotu-hotu, maibe grupos hirak nee la iha tan ona pasiensia. Militares sira nebee halo parte revolta kala la iha ona espiritu pasiensia hanesan iha tinan rua-nulu liu ba durante okupasaun.

Kazus petisionarius ho major Alfredo Renado nian mos la hanesan, embora iha inisiu kazu grupo major Reinado mosu tanba kazu presedente grupo petisionarius sira, maibe major Reinado nian kazu iha ligasaun direto ho prosesu penal, enkuantu kazu petisionarius iha relasaun ho prosesu aproximasaun ba solusaun nebe justa ba sira nian kazu.

Ex-major PM instrumentaliza grupo petisionarius sira hodi dada ba nian sorin kontra estado, iha nee tenente Gastão Salsinha la iha argumento atu defende nian kazu (petisionariu) liu dalan nebee proporia, la iha korajem atu lori sira nian kazu hodi ses husi grupo major Reinado, hodi nune Gastão Salsinha ho nian grupo hakru’uk ba instrusoins nebee major fo ho sem reserva i konsidera kazu grupo major Reinado ho grupo petisionarius hanesan deit, konsiderasaun nebee uniformiza ba kazu rua nebee la hanesan halo membrus petisionarius sira konfuzaun liu tan.

Ohin loron major Reinado mate tiha ona, nian ema sira atu hakarak ka la kohi tenke hakru’u ba tenente Gastão Salsinha nian komando, se sira sei hakarak kontinua duni tuir nafatin buat nebe sira buka. Maibe se sira hanoin no tetu didiak, tuir hakerek na’in nian hanoin dalan diak liu ba sira mak rende ba justisa. Basa, hakerek na’in fiar katak iha estado de direito la iha tribunal ida mak bele hatun sentensa masal ba revoltozus atus nen resin (+600), ida nune la iha, la iha mos tribunal sei la halo uniformizasaun iha desizaun kona ba kazus hirak nebee oin seluk.

Neduni, karik seidauk tarde ba ex-militares sira atu grupo petisionarius ka grupo matebian Alfredo Reinado Alves (major), atu deziste husi imi nian aksaun hodi koopera ho autoridades seguransa sira ka entrega imi nian an. Tanba se imi maioria sente an la sala tanba sa mak imi tenke ta’uk ba justisa, tanba sa imi hakarak eskolha funu, imi funu hasoru autoridades sira atu hetan sa ida no funu hasoru se ?

Uniku dalan diak liu ba grupo petisionarius mak para ho aksaun revolta hodi entrega imi nian kazu ho didiak ba justisa, tanba la iha tan buat seluk nebee imi bele hetan husi imi nian aksaun kontra ordem publika iha Timor laran, imi nian aksaun kontra ordem publika no autoridades kompetentes so halo susar imi nian moris, tanba povo la bele sai vitima dala ida tan ba aksaun violensia, populasaun mos baruk ona ho moris la hakmatek, Rain Timor mos lakon barak ona nian ema tanba oho-malu no mos ema seluk bele aproveita imi, uza imi hodi dudu imi ba tama rai kuak ba sira nian intereses. Imi nian aksaun revolta no hakat dalan violensia so aumenta deit povo nian sofrimento, pior liu tan mak imi nian an rasik mak sofre, la moris ho hakmatek ka bele mate saukati.

Se Sr. tenente Gastão Salsinha hanoin hakarak funu, lakohi rende, hanesan nia deklara tiha ona, mak diak liu sira seluk la bele tuir, husik nian mesak hakat tuir dalan violensia, imi sira seluk bele entrega imi nian kazu ba justisa. Tanba se la entrega imi nian kazu ba justisa, hahu husi loron atentado ba PR no PM, nudar orgauns rua aas liu instituisaun estado nian liu ba, karik buat dialogo nee hipoteze nebee ki’ik liu ka la iha tan ona dialogo.

Amnistia

Kuriozamente ema ka ita hotu hakfodak bainhira Mari Alkatiri mosu iha televisão, la to’o oras 24 depois de atentado kontra PR Dr. Ramos Horta ho PM Xanana Gusmão, katak major Reinado ho nian grupo sei hetan amnistia. Mari Alkatiri koalia amnestia ba grupo rebelde hanesan nia (MA) mak Presidente da Republica no koalia hanesan lolos halo anunsiu amnestia ba grupo Reinado hanesan buat formal ruma.

Tuir los buat aministia nebe iha realidade seidauk iha nian formula ho termos ba aplikasaun nebe mos seudauk defini lolos la bele fo sai hanesan buat tasak ida. Pior liu tan mak hato’o ba publiku amnestia nebee karik atu aplika ba major Reinado ho nian grupo iha biban nebee major Alfredo Reinado rasik ho nian elemento ida mate tiha ona.

Halo anunsio kona ba perdaun ba ema ruma nebe envolvido iha prosesu penal, divulga intensaun atu fo amnestia ba ema nebee nian kazu iha prosesu justisa, no kazu nee rasik seidauk tama iha tribunal hodi prosesa, hanesan kria presedente nebe la diak ba futuro atu harii justisa tuir dalan lolos. Tanba, ikus mai sidadaun ida-idak ka grupo ruma nebee iha nian kazu semelhantes hakarak hotu tratamentu nebe hanesan, nunee, enkuantu estado la hatun amnistia ba ema ka grupo nee mak sira sei buka prolonga sira nian kazu, hamsou problemas oi-oin, kria desestabilizasaun hodi bolu atensaun ba autoridades ka estado atu atende sira hodi fo amnistia.

Sekretario Jeral Fretilin nian la iha autoridade, la iha lejitimidade no la iha direito atu koalia amnestia ba kazus hirak hanesan major Reinado nian. Tamba Mari Alkatiri la’os autoridade judisial, la’os Presidente da Republica no la’os PGR, la’os mos presidente Tribunal Rekursus nian.

Halo anunsio ba publiku kona ba amnistia ba kazu grupo major Alfredo Reinado depois de ex-major PM nia mate hanesan xoke boot ba nian familia, amigos ka simpatizantes sira, liu-liu ba nian seguidores sira. Halo ema revolta, tanba sa la hateten sai antes intensaun diak nee hodi grupo revoltozus sira bele hakbesik an ba esforsu dialogo no evita la’o tuir dalan violensia.

Sa ida mak ema sira nebee halo parte major Reinado nian vida nudar militar ka vida sosial no mos sira nebe prinsipio hanesan hanoin kona ba orgauns soberanos sira, instituisoins estado nian no mos ba autoridades kompetentes sira ?

Ema sira bele hanoin katak boot sira goza ka halimar ho ema nian mate, ema boot sira koalia atu fo amnistia bainhira ema mate tiha, enkuantu ema sira (mj. AR) ho nian ema sei moris boot sira la temi amnistia. Direta ka indiretamente orgauns soberanus sira, instituisoins no autoridades kompetentes sira lakon konfiansa husi sidadaun no mos sidadauns sira bele kestiona kredibilidade altos responsaveis sira estado nian.

Eleisoins Antesipadas iha 2009

Seidauk to’o oras 24, depois de atentado ba PR nian uma no tiru atu mate Presidente Dr. Ramos Horta, no mos atake ba PM Xanana Gusmão, Sr.Mari Alkatiri, aproveita iha momento nebee ema hotu triste, populasoins hakfodak no tauk tanba atentados hirak nee, Sekretario Jeral Fretilin nian renova hikas ninian hakarak atu halo eleisoins antesipadas iha 2009. Ho razaun katak iha loron tolu liu antes de atentado, boot sira hakotu ona iha reuniaun nebe hala’o iha PR nian uma iha Metiaut, atu halo eleisoins antesipadas iha tinan oin.

Sidadaun ida-ida bele husu ka hato’o sira nian kestaun oi-oin :

Eleisoins antesipadas iha 2009?

Tanba sa ?

- Sr. PM Xanana Gusmão, hetan defisiente fizika ka mental nebee impede nia hala’o nian funsaun ka mate ona iha atentado dia 11/02/2008 nee ?

- Orsamento de Estado nebee aprezenta iha Parlamento Nasional sumba dala rua tui-tuir malu ona ?

- Iha ona mosaun de sensura ba governo AMP nebee hetan aprovasaun husi maioria iha Parlamento Nasional ?

Seidauk !!!

Seidauk akontese situasaun nebee justifika, tuir lei inan konstituisaun RDTL atu bele konvoka eleisoins antesipadas antes de 2012.

Nune’e mos lei iha konstituisaun RDTL nebe vogora to’o ohin loron seidauk iha mudansa no seidauk mos halo revizaun kona ba aplikasaun lei iha artigo 112º alinea c), artº. 112º alinea d), no artº.112º alinea f) iha konstituisaun RDTL.

Basa, se halo eleisoins antesipadas la’os tanba faktor tolu iha leten, maka la iha orgaun soberano iha estado RDTL nian ida mak iha lejitimidade atu deside hala’o eleisoins antesipadas iha 2009.
Se ema ruma iha intensaun atu halo eleisoins antesipadas maibe la’os tanba faktor tolu iha leten nee bele konsiderado esforsu tentativa atu derruba governo AMP liu husi dalan ilegal no inkonstitusional. Tanba nem Presidente, nem lideransa partidaria ruma, nem se se iha lejitimidade atu deside halo eleisoins antesipadas iha situasaun nebee la justifika ba aktu ida nee.

Mari Alkatiri koalia eleisoins antesipadas iha 2009, tanba dehan katak Presidente Ramos Horta mak hakarak atu antesipa eleisoins ba parlamento ho presidensiais. Maibe, intensaun PR nian nee so Dr. Ramos Horta rasik mak bele konfirma bainhira nia rekupera husi nian kanek. Karik ba Mari Alkatiri sorumutu informal nebee iha entre PR ho lideres partidarios balun iha Presidente nian uma nebee mos konfirma husi presidente PSD Sr. Mario Carrascalão, sai hanesan razaun ida atu koalia hikas buat nebee Mari Alkatiri hakarak no buka durante nee.

Se Presidente Ramos Horta mak iha intensaun atu renunsia husi kargu iha 2009, nee la afekta funsionamento orgaun ezekutivo i eleisoins antesipadas mos apenas presidensiais, la’os lejislativas. Nune, karik PR renunsia husi nian kargu hodi halo eleisoins 2009, mak tuir lei artº.81º numero 3, Dr. José Ramos Horta la bele rekandidata ba kargu Presidente da Republica iha 2009 nem 2014.

Maibe haree husi forma de sorumutu (klandestinu), haree mos husi partisipantes sira iha sorumutu klandestinu nee la iha representatividade husi partidos hotu nebe iha asentu parlamentar. Ne’eduni karik intensaun atu halo eleisoins antesipadas nee husi PR mos la iha baze legal tanba além de situasaun ba aktu eleitoral nee la justifika, mos sorumutu la’os formal, nem representativa nem konsensual.

La’os novidade ba ema ruma Mari Alkatiri koalia eleisoins antesipadas, la’os novidade ba ema ruma Sr. Mari Alkatiri hakarak hatun Sr. Xanana Gusmão husi PM, la’os novidade ba ema ruma Mari Alkatiri hakarak hatun governo AMP liu husi dalan oi-oin. Tan Mari Alkatiri ho direksaun Fretilin nunka rekonhese governo AMP no nunka simu desizaun PR hodi konvida Xanana Gusmão forma governo depois de eleisoins lejislativas 2007 liu ba. Ne’eduni se durante nee iha buat ruma nebee la diak akontese iha Timor, karik kualker sidadaun iha direito atu kestiona será ke la’os Mari Alkatiri nian hahalok ?

Tanba desde krize 2006, la’os ema Timor deit mak hatene katak iha Mari Alkatiri nian ukun, ninian membro governo forma para-militares (milisias) no fahe kilat ba ema sivil atu elimina lideres opositores sira, situasaun ida nebee mos koinside ho situsaun atentado ba PR Dr. José Ramos Horta ho PM Xanana Gusmão iha loron 11 liu ba, iha nebee sira na’in rua nee hanesan opozisaun potensial ba partido Fretilin iha Mari Alkatiri nian lideransa.

Ema Timor oan sira mos kuriozu atu hatene tanba sa mak Mari Alkatiri iha duvida boot kona ba Sr. PM Xanana Gusmão bele eskapa husi emboskada no atakes ho kilat bara-barak ?

Sa mak Mari Alkatiri hanoin hodi hateten sai ba agensia Lusa:

“Sobre o ataque a Xanana Gusmão, Mari Alkatiri sublinha parecer estar-se perante um "filme de ficção" porque, garante, numa "emboscada com espingardas- metralhadoras naquela curva, ninguém sairia vivo".

"Montagem! Quem o teria feito? Parece que estamos um pouco num filme de ficção", disse Mari Alkatiri ao recordar que nenhum dos veículos da comitiva do chefe do Governo tem alguma protecção especial de blindagem”.

Nia (MA) atu dehan katak atakantes sira halo emboskada no tiru kontra karavana PM nian naton, ba Mari Alkatiri hanesan deskonfia karik Xanana ka ema ruma mak halo montajem deit. Nunee mak PM bele eskapa husi razadas kilat metralhadoras bara-barak.

Sa mak investigadores husi NID ho NID husi UNMIT fo sai:

“A resposta da escolta internacional de Xanana Gusmão permitiu que o primeiro-ministro timorense "escapasse" do sítio em que foi emboscado, segundo um relatório confidencial obtido pela Lusa”.

“O primeiro relatório do Departamento de Investigações Nacionais (NID) da Missão Integrada da Organização das Nações Unidas (UNMIT) sobre a emboscada a Xanana Gusmão, a 11 de Fevereiro, concluiu que a resposta da escolta internacional "permitiu ao primeiro-ministro escapar do local do ataque".

“O documento refere também que a escolta internacional que respondeu ao ataque usou uma espingarda que não lhe pertencia.Xanana foi emboscado pelas 7h35 a cerca de 500 metros da sua residência, em Balibar, na estrada sinuosa que desce das montanhas a sul de Díli para a capital”.

“Segundo o relatório do NID dedicado a esta emboscada, um dos documentos confidenciais da UNMIT a que a Lusa teve acesso, a caravana do primeiro-ministro foi atacada quando o carro da frente, com a escolta timorense, tinha passado uma curva para a direita e o segundo carro, onde seguia Xanana Gusmão, fazia ainda a mesma curva”.

“Atrás das duas viaturas seguia a viatura da Polícia da Organização das Nações Unidas (UNPol), com uma escolta de reserva ao primeiro-ministro."Quando o carro de Xanana Gusmão fazia a curva, um (elemento da CPU-Unidade de Protecção Pessoal da) UNPol viu um homem de pé com uma metralhadora disparando contra o carro" do primeiro-ministro”.

“Os seguranças da UNPol pararam e um deles saiu do carro e respondeu ao fogo do atacante, disparando na sua direcção."Nesse momento, o atacante virou-se e disparou contra a posição dos UNPol, permitindo ao primeiro-ministro escapar do local", apurou o NID na sua investigação ao incidente”.

Relatorio husi NID nee hateten katak PM eskapa husi atake iha emboskada nee tanba PM nian eskolta husi polisia internasional tiru hasoru atakantes sira no iha biabn nebee atakantes sira tiru malu ho eskolta mak PM konsegue halai. Tanba, tuir relatorio haktuir katak viatura nebe PM Xanana Gusmão sa’e naton iha klaran, kareta eskolta iha oin no mos kareta UNPol nian ikus.

Nee’duni se Mari Alkatiri hanoin katak Xanana Gusmão ka ema ruma mak trasa eskenario halo montajem afavor ba XG, atu taka falta kona ba atentado ba PR Ramos Horta nee hanesan obra Xanana nian mos Mari Alkatiri tenke kaer razaun ho lojika nebee tama ulun.

Tanba PM sai husi nian uma iha Balibar atu ba nian servisu fatin iha Dili mos la’os hanesan ho Sr. Xanana Gusmão ka Mari Alkatiri ba haris fatin nebee la presiza eskolta.

Tuir lolos, se Mari Alkatiri ema ida iha moral, iha nian lisan no mos iha sentimentu nudar humanu karik, nia (MA) mesmo la hateten sai koitado ba imprensa kona ba atakes atu oho PR ho PM maibe uza linguajem ka termos nebee korresponde iha situasaun nebaa. Se mak hatene, karik Mari Alkatiri la satisfeitu ( la puas) ho Sr. PM Xanana nebee la sofre kanek ruma ka mate iha atakes iha dia 11 liu ba.

ºººvtººº