Krise nia hun maka nebe?

Tuir deklarasaun Alfredo Reinado (AR) nian nebe dehan katak "Krise 2006 ne´e Xanana maka autor". Iha ne´e komprende posisaun no situasaun nebe maka AR oras ne´e hasoru. Nia tenke hasae deklarasaun ruma nebe todan hasoru Xanana Gusmao (XG). Argumento seluk fali dehan Krise Politika Militar (KPM) ne´e ninia hun maka Mari Alkatiri (MA).

Se ita hare lolos,se maka iha liu responsabilidade, ida nebe maka kaer poder, poder iha ne´e poder executivo ka Governo iha periodo KPM nia laran (2002-2006). Iha facil identifika autor ba KPM tamba resulta husi politika nebe maka Governo ne´e rasik hola. Politika Governo nian konaba Forças segurança (FS) i Força defesa (FD). Governo PM Mari Alkatiri nian, iha tendencia ba politiza FD i FS. Kria problema hafoin buka kontrola.

Politika Governo nian konaba riku no soin rai nian, diak, Mari Alkatiri dehan ita la ba deve osan tamba hakarak rai ita nia osan ka riku no soin ba gerasaun aban bai rua. Ne´e los ita hotu basa liman. Maibe oinsa maka hare ba jerasaun aban bai rua nian, se haluha tiha jerasaun ida oras ne´e dadaun. Oinsa maka dehan Timor tenke sakrifika an, se sira nebe suporta ba Governo Mari Alkatiri ho Governante balun moris diak?

KPM mai husi se maka kaer ukun, iha ne´e Mari Alkatiri seidauk koalia konaba Krise iha F-FDTL laran, tuir lolos executivo liu Ministro tutela buka dalan ba resolve problema ne´e, nusa maka la resolve? Tamba iha agenda no estrategia seluk. Iha responsabilidade Governo nebe Mari Alkatiri maka nudar PM.

Kasu Xanana mos kausa ba KPM iha 2006?

Xanana ninia envolvimentu bele klasifika nudar reaksi ba saida maka Governo liu husi Mari Alkatiri ho Rogerio Tiago Lobato halo hasoru nia,ka liliu konfronto Alkatiri vs Xanana. Se Xanana maka kausa, laos kausa fundamental maibe bele kausa proxima. Xanana ninia intervensaun bele konsidere reaksaun ba aksaun nebe kontra nia. Aksaun nebe maka kontra nia Xanana.

Iha KPM nian laran,expulso F-FDTL Petisaun,aproveita Xanana la iha,Xanana mai Portugal. Autoriza FD ba toma konta seguransa la iha autorizasaun husi Presidente Republika nudar Komandante Supremo FA, no sst. Iha ne´e reaksaun Xanana nian sentido direcionada ba neba.
No fim, KPM maibe sai fali hanesan jogo ba poder Xanana vs Mari Alkatiri.

Seluk hanesan vitima deit, personagem Alfredo reinado sai centro tamba iba biban neba importa iha jogo ida ne´e. To´o ikus Xanana fila hasoru Alfredo, neduni Alfredo mos buka hetan belun seluk. Maibe atuasaun Alfredo nian sei tama nafatin iha xadres jogo ba poder, Xanana vs Mari Alkatiri!

Lisboa,10-12-207
António Ramos Naikoli