FULAN HAT (4) IV GOVERNO CONSTITUCIONAL (III, parte final)

III. Komentariu no aprecisaun Kritika

Rekursus Humanos

Problema bot nebe maka Governo hasoru maka ne´e lian Rekursus humanos (RH), RH Laos hare husi ninia formasaun akademika deit ka sarjana hotu, maibe iha ne´e kapasidade hodi executa programa IV GC nian;oinsa maka iha Ministério ida iha ona Lei organika hodi bele facilita servisu. Problema bot nebe maka Governo buka «aposta» iha Formasaun ba quadros nebe qualifikadu hodi tau iha fatin nebe bele koresponde ba ninia kompetencia. Governo no Ministério ida-idak buka desenvolve nafatin Kooperasaun bilaterais ho rai (Nasaun, red) no organizasaun internacionais (OI´s) sira nebe maka to´o oras ne´e fo tulun ba «capacitação» ba ita nia RH. RH La too waihira kriteriu uja maka iha diploma deit, maibe buka iha kompetencia profissional i teknika.

Waihira iha RH nebe iha qualidade hodi hamenus Birokrasia no hodi aposta iha servisu nebe maka efikas no eficiente, atu nune bele «acelera» processo ba desenvolvimento no IV GC kumpri ninia komprimisso.

Problema F-FDTL Petisaun no Major Alfredo

Iha parte lian uluk (introdusaun, red) IV GC buka resolve problemas sira nebe maka iha ninia ligasaun direkta ho KPM (Krise Politika i Militar). Iha ne´e problema rua (2) F-FDTL Peticionários no Kasu Major Alfredo Reinado. Kasu 2 ne´e ninia ligasaun, tansa maka mosu F-FDTL Peticionários no tansa maka Mosu Major Alfredo Reinado.

Kasu F-FDTL Peticionários, iha duni ka lae deskriminasaun iha Instituisaun laran? Tansa maka Governo Eis-PM Mari Alkatiri la buka dalan ba resolve problema F-FDTL nian ne´e, tansaida?Maibe Governo Mari Alkatiri fo tulun ba decisaun hierarquia F-FDTL nian hodi expulso 600 Militares (1/3 F-FDTL). Iha ne´e mosu lian litik oi-oin: Governo Mari Alkatiri tauk ba Militares sira, neduni husik liu deit hierarquia F-FDTL hola decisaun. Ka Mari Alkatiri sira buka oinsa maka politiza «Forças Armadas (FA)» nudar pilar importante ba sai sira nia aliansa, atu alkansa sira nia ambisaun: Oinsa maka bele Ukun To´o tinan 50. Maibe IV GC atu resolve problema ne´e hodi halao tuir «Relatório dos Notáveis (RN)», nebe konsidere RN nian ne´e, Tendencioso, Parcila i Inkonstitucional, hare Fórum Haksesuk (http://www.forum-haksesuk.blogspot.com/) . Oinsa maka bele halao tuir fali RN nian hodi resolve Problema F-FDTL Peticionários?

Problema Major Alfredo Reinado (MAR) ne´e buka hare husi lia ne´e nia hun, tansa maka mosu MAR? Buka halo ligasaun ho akontecimentu iha loron (28/04/2006). Eis-PM MA autoriza F-FDTL nudar FA ba atua kontra manifestantes sira iha Taci Tolu no Rai Kotu ne´e tuir Ukun Fuan Inan (UFI) ka Lae? UFI iha ninia definisaun klaru konaba «Forças da Defesa (FD)» e «Força da Segurança (FS) ». Problema iha loron 28/04/2006, ne´e problema kompetencia FS nian, tansaida maka tenke lori FD ba atua? Se FD atua ne´e hetan mos koordenasaun ho Komandante Supremo FA nian, maka Presidente Republika (PR), ka lae? Neduni mosu personagem MAR tamba nia nudar Komandante Policia Militar (PM) iha biban neba, nia maka halo seguransa ba Cefe Estado Maior F-FDTL, Lere Anan Timor i Eis-Ministro da Defesa, Roque Rodrigues ba hasoru Eis-PM MA iha Residência Oficial nian iha Farol, Dili, loron 28/04/2006. Hakarak resolve lian problema justiça MAR nian buka hahu husi neba, se lae akusasaun Ministério Publiku (MP) no Justisa ninia aktuasaun kontra MAR hare husi sorin balun deit, maibe la hare klean ba lia ne´e nia hun mai husi nebe?

3. Justisa

Revogasaun Lei Inkonstitucionais, hanesan Lei konaba Pensaun Vitalícia; Lei konaba autorizasaun ba sira nebe servisu ba estado ba halao tratamentu saúde iha liur; Uma Estado nian nebe sai hanesan hela fatin ba sira nebe maka nudar Membro Governo ka kaer kargo estado nian; Lei konaba Korupsaun; Lei Klemensia; modelo traditional Law , no sst.
Buka harii Sistema Judicial (SJ) nebe independente, atu nune la bele hetan manipulasaun husi poder ekonomika no poder politiku. Justisa atu defende lia los.

4. Agentes diplomatika

Kriterius kompetencia Teknika i Profissional. To´o ona biban atu tau representasaun Diplomatika Laos ona sira nebe la iha kondisaun atu sai representasaun diplomatika maibe tamba kriterius ba amigos no pratika politika «Gratidão ka balas budi», hakotu ona ho Representantes sira nebe maka uluk hakilar Viva Xanana ho CNRT hodi hetan representante CNRT, ikus hakilar Viva Fretilin ho Mari Alkatiri hodi hetan kargo nudar Embaixador no iha IVGC nia tempo buka hakilar fila fali Viva AMP no Xanana atu nune bele hetan representasaun diplomatika nafatin. Ema sira hanesan la iha ona kondisaun atu lori rai Timor Loro Sae nian naran, tamba bele prejudika politika no estratégia nasional Estado TL nian. Oras to´o ona tau emar sira nebe ka agentes diplomatika sira nebe maka iha duni kompetencia profissional no teknika iha área ida ne´e, tamba interesse nasional Laos tamba interesse privado no grupos.

Loke representasaun diplomatika bara-barak ba halo saída? Ne´e implika liu kustus ba OE. Hare husi ninia kustus no eficasia iha servisu, tuir lolos Europa ne´e rua (2) deit to´o ona, ida iha Portugal no seluk iha Brusel ba Uni-Europa. Kontinente Amerikano, mos rua deit to´o ona, ida iha New York no seluk iha Washington Dc, depois maka halao servisu konsoludas ba Amerika do Noter no Sul. Estado la bele gastas demais Osan ba loke Embaixadas, maibe osan ne´e gasta ba formasaun ba agentes diplomatika sira, loke áreas ba servisu hanesan adida kultural, adida seguransa, adida ida ba komunidade, no sst.

Problema seluk iha Diplomacia nian maka ne´e tan, buka iha fiskalisasaun ba sira nebe maka hili iha tinan rua ka tolu liu ba nudar: Embaixador Itenerante ba Europa ka Dubes Keliling ba Europa maibe Europa iha tiha Representasaun ka Embaixador iha Portugal ho Bruxelas, Embaixador (a) de Boa vontade ba Austrália maibe Austrália iha ona Embaixada. Embaixadores Itenerante ho Boa Vontade ne´e: Sira nia servisu saída? Se maka fiskaliza? Sira nia misaun Estado maka financia ho OE ka lae? Se lae,hetan osan husi nebe?

5. Politika Monetária -----» Dolaraizasaun Ekonomia

Porblema seluk nebe maka Estado hasoru maka ne´e, oinsa maka rai nebe ninia ekonomia Fraku maibe ninia Osan bot (Dollar US), iha aspektus positivo no mos negativo ba ekonomia. Positivo waihira ita nia Osan ne´e iha referencia iha Komercio Internacionais, tamba waihira iha Merkado nebe ita hola parte transaksaun ho osan Dollar US.

Maibe iha mos ninia ponto negativu, kuando Rai ida ninia ekonomia fraku maibe osan ninia folin bot, ninia efeitu saída: (1) Dependência ba Dollar US, USD sai ita mos sae, se USD monu ita monu liu Rabat rai, tamba poder de compra iha Dili ho Washington la hanesan tamba faktores. (2) Diak ba fan ka export ita ninia sasan ba liur, tamba sei la sofre iha gambios tamba ita nia osan maka sai hanesan referencia iha Merkado internacional, maibe mos karo ba importasaun, neduni iha ne´e «Balansu ne´e la hanesan», diak waihira ita rai ida nebe maka produs no exporta barak, maibe iha ne´e kontrariu tamba ita importa maka barak liu doke exporta, iha ne´e balansu ba komercio ne´e beneficio ne´e witoan. (3) Tamba ita nia osan ne´e folin bot, neduni prejudika sektor nebe maka importante ba ekonomia Rai Timor nian maka «Turismo», ba Turista sira, diakl iu ba gosa ferias no gasta osan iha Bali ka Thailandia, do ke ba Timor LoroSae, tamba deit ita nia Osan folin aas liu. Turista ida gasta 100 USD semana ida iha Bali, doke nia ba gasta loron ida ka rua iha Dili.

6. Kombate inflasaun

Oinsa maka Estado ka Governo ninia politika hodi kombate ba inflasaun, tamba iha nia rain sasan nia folin aas maibe ita nia Poder kompra la makas, tamba deit Rendimentu ne witoan, salários mínimo husi 85 USD ba 100 USD fulan ida.

Balanço Komercio; Balança Komercio ne´e negativu ka la iha iquilibrio tamba rai nebe importa maka barak do ke exporta, neduni ninia balansu ladun diak ba desenvolvimento ekonomika. Atu halao iquilibrio, buka mos iha exportasaun produto interna atu nune bele hasae riku no soin rai laran nian.

7. Problema Taxa desemprego ne´e aas tebes, oinsa maka hatun?

Se estado iha ninia objektivo ba kombate ema kiak ka pobreza, neduni tenke buka oinsa maka bele hatun taxa desemprego iha Timor. Se populasaun barak liu maka servisu la iha, ne´e kontribuio ba hasae makas emar kiak barak iha ita rain. Tamba buka defini saída maka kiak ne´e, tamba taxa desemprego ka emar servisu la iha ne´e aas tebes, ida ne´e mos bele tama iha kategoria kiak ka pobreza ka lae? Iha Governo ninia aposta ba hamenus ka hatun taxa servisu la iha ne´e mos hanesan kontribuio ba funu hasoru ema kiak. Lian nebe hase no litik maka ne´e: Oinsa maka iha Programa IV GC ba politika social, mos sei iha Programa Prezidente Republika ba kombate ba Pobreza? Ida tan, Governo mos hakerek iha OE 2008 fo mos osan ba Programa PR nian. Hare fila fali Fórum Haksesuk (FH), ….

8. Oinsa maka harii kompetitiva iha Merkado Nasional

Hanesan iha área Telekomunikasaun, iha agrukultura, sektor transporte, no sst. Telekomunikasaun, iha monopólio ba kompanya ida deit maka Timor Telekom (TT). Waihira iha Merkado kompanyia ida maka monopólio, nia hakarak halo tuir nia hakarak, hasae no hatun folin tarifia depende ba ninia hakarak tamba nia maka domina ona merkado. Iha sektor agrikula, liliu kafe maka sai hanesan produto nebe maka marka nasional, oinsa maka estado kria mekanismo ba kontrola ba empresas rai liur nian nebe opera iha merkado nasional, hanesan NCBA, nebe monopólio iha hola kafe ba produtor sira ho folin kiik maibe fan ba merkado internasional ho folin nebe sira maka estabelece iha merkado internasional. Oinsa maka Estado kria mekanismo atu kontrolo monopólio empresa multinasionais sira nebe opera iha sektor, husi sorin ida. Husi sorin seluk, Estado buka harii dadaun Marka nasional hodi naran kafe Timor atu nune ba lansa kampanye ita nia produtos iha merkado internasional.

9. Presaun demografika

Iha Tinan lima (5) ka Nem (6) nia laran, krescimentu populasaun Timor LoroSae (Leste) nian ne´e aas tebes, bele dehan iha tinan 5 ka 6 nia laran Timor oan moris barak liu,tuir dados katak krescimentu populasaun ne´e iha 6%-9%. Maibe krescimentu populasaun ne´e ladun equilíbrio waihira krescimentu ekonomika ne´e kiik liu.

Ho koalia komik witoan maka ne´e: Timor oan servisu loron witoan maibe servisu kalan maka barak liu. Servisu loron maka ladun neduni krescimentu ekonomika ladun iha, servisu estado nian ladun lao diak, maibe servisu barak liu iha kalan neduni krescimentu populasaun barak liu, populasaun nebe la aktiva ka produtiva maka aumenta tan maibe kontra partida populasaun nebe aktiva ladun produs tamba faktor krescimentu ekonomika la akompanya ho krescimentu populasaun.

Estado no liliu IV GC la bele ignora faktor ida ne´e, saída maka Governo hatan, quando populasaun la aktiva maka barak liu fali populasaun aktiva. Ida tan populasaun aktiva barak maka servisu la iha,oinsa maka bele sustenta populasaun nebe la aktiva? Estado maka suporta, liu husi subsidio ka pensaun ba natalidade? Saída maka politika social estado ka Governo nian ba sektor ida ne´e.

Referencia ba hakerek ne´e:

1) Programa do IV Governo Constitucional de Timor-Leste (http://www.forum-haksesuk.blogspot.com/)

2) Programa Partido Democrático nian (htt://www.partidodemocratico.org)

Lisboa, 16 de Dezembro de 2007
António Ramos Naikoli
Timor Oan, Hela iha Lisboa, Portugal