Ema nebe oho ema, mos sei mate

hosi: Celso Oliveira*

Tuir lo-los, ema ida labele mate tamba ema seluk nia hakarak. Maibe, iha Timor, ema mate tamba ema seluk nia hakarak hanesan buat ida normal. Laiha lei atu kondena. Laiha autoridadi atu halo investigasaun.

Tuir lo-los, ita "Timor oan" tenki husik "kultura fekit hodi halo ema mate ou fo malisan hodi estraga ema nia moris". Aman fo malisan ba oan, maun fo malisan ba alin, alin fekit mate maun, oan fekit mate inan, primo fekit mate primo, seluk-seluk tan. Buat sira ne'e hotu, normal deit existi iha Timor?

Tuir lo-los, ita "Timor oan" tenki iha konsiensia katak, jerasaun aktual labele moris terus tamba malisan hosi inan-aman, abo no bei-ala sira.

Tuir lo-los, ita "Timor oan" hosi jerasaun aktual tenki respeitu inan-aman, abo no bei-ala sira nia uma fukun atu nune malisan labele kona mai ita.

Iha Timor, ohin loron, ema moris lao tuir "ritmo manobra malu" ou "ritmo halo manipulsaun ba malu". Ema laos ona moris tuir direitu hanesan ema atu bele moris, maibe se maka hakarak moris, tenki halo manipulasaun ba malu atu nune bele iha existensia (ou existe). Se maka lakohi pratika "ritmo manipulasaun nian", entaun sei lakon iha korrida ba power (power ekonomi i power politiku). Laiha lei atu muda ema nia mentalidadi ida ne'e, laiha forsa ou power hosi Igreja Katolika atu kombate mentalidadi ida ne'e.

Iha Timor, ohin loron, dutrina hosi Igreja Katolika hanesan "kortina" hodi taka foer nebe existe iha ida-idak nia uma laran. Fekit mate ema, normal? Ou, oho mate ema, normal? Ou, fo malisan hodi destrui ema seluk nia moris, normal? Igreja Katolika hanorin mai ita dutrina kona ba respeitu no haraik-an, maibe ita moris iha ritmo manipulasaun nia laran nebe obriga ita ida-ida atu "simu interese mundu nian hodi husik dok tiha hakarak klamar nian".

Ita "Timor oan", diak liu halo investimentu (investe ho edukasaun no inan-aman nia exemplu rasik) ba ita nia oan sira. Em vez ita mete iha politika nia laran nebe la adianta buat ida maibe kria odio i vingansa entre "Timor oan", diak liu halo investimentu iha ita nia uma laran rasik.

Tuir lo-los, ita "Timor oan" hare ita nia oan sira hanesan ita nia futuro. Laos kompromissos hosi politiku sira maka ita nia futuro. Laos promessas hosi politiku sira maka ita nia oan sira nia futuro.

Agora hau koloka realidadi seluk. Tuir lo-los, ita hotu tenki hare problema REFUJIADU hanesan problema NASIONAL. Tinan rua ona maka refujiadu sira moris iha tenda nia okos. Se maka hakarak hare nia oan sira moris ou passa Natal ho Tinan Foun iha tenda nia okos? Se maka hakarak hare oan sira pinta, estuda ou haksoit tapa iha tenda nia okos? Se maka hakarak simu lian tatoli kona ba oan ida ou inan-aman ida mate hosi tenda nia okos? Laiha ema ida maka hakarak kontinua moris iha tenda nia okos.

Governo iha obrigasaun "moral i politiku" atu resolve problema refujiadu nian.
Igreja Katolika iha obrigasaun moral atu resolve problema refujiadu nian.
Ita hotu-hotu iha obrigasaun moral atu resolve problema refujiadu nian.

BOAS FESTA DE SANTO NATAL 2007 E UM FELIZ ANO NOVO 2008.

* Poeta i hakerek nain (escritor) Timor oan, hela iha England