Reprezentasoins no Funsoins Reprezentantes iha Li'ur

REPREZENTASOINS HO FUNSOINS REPREZENTANTES SIRA IHA LI’UR

Husi : Victor Tavares

Atu reprezenta Estado RDTL iha rain ka Estado presiza haree husi aspektu rua :
Primeiru, haree husi Intereses nebe Estado Timor-Leste iha atu estabelese relasoins bilaterais ho Estado selu-seluk. Intereses ne’e haree husi aspektu real, saida mak Rain ka Estado RDTL nian intereses ka bele hetan ou aproveita husi estado seluk depois de estabelese relasaun bilateral. Halo relasaun bilateral ho estado seluk iha nian objektivu atu iha kurtu prazu, mediu no mos iha longo prazu. Koalia kona ba Intereses nebe bazeia ba intereses komuns ka intereses estado nian mak hanesan (kooperasaun) Politika-diplomatika, estratejia-militar, Direitos Humanus, komersiu internasional no kooperasaun iha edukasaun no kultuta.

Segundo, haree mos husi Nesesidades nebee Timor-Leste iha. Koalia kona ba Nesesidades mak la ses husi sektores hirak nebe iha ligasaun direktu (hubungan langsung) ho Povo nian moris. Sektores hirak hanesan dezenvolvimento Ekonomia Nasional (hasa’e Produtu Nasional Bruto ka GNP liu husi Investimentu iha dezemvolvimento fizika – Makroekonomika), dezenvolvimento Ekonomia Rural (hasa’e populasoins rurais nian nivel moris liu husi tulun ka insentivus ba sira hodi hadia sira nian nivel moris nian, rekualifikasaun sistema agrikultura, rekualifikasaun sistema saude, intensifikasaun iha kombate analfabetismu, kuidados populasoins nian saude no rekualifikasaun ambientais, kuidadus rezervas naturais hanesan balada ka animais fuik sira, ai-tuan laran ka florestais, bee ulun ka fonte bee midar, ikan, boek ka tuna iha bee midar, prezerva no reanimasaun no reajustamentu pratikas kulturas tradisionais etc.).

Hirak ne’e hotu ho objektivu atu hasa’e populasoins rurai nian Rendimentu Perkapita husi pratikas tradisionais nebe modernizada iha sira nian moris. Liu husi kooperasaun nebe RDTL estabelese ho rain seluk bele hetan mos tulun husi instituisoins iha Estados seluk ba Governo Timor hodi bele rezolve problemas iha sektores balun.

Bazeia ba Nesesidades nasionais nebe Timor-Leste iha, mak Estado RDTL fihir ba Rain ka Estado nebe bele korresponde ka hetan sintonia iha intereses-nesesidades entre estados rua RDTL ho estado husi Rain seluk. Fihir Rain ka Estado seluk nebe mos iha nian intereses imediatos (ekonomiku, politika-diplomatika, estratejika-militarka, direitus humanus etc.) ka iha longo prazu. Hodi nune’e Estado RDTL bele estabelese relasoins ho estados selu-seluk nebe bazeia ba Nesesidades RDTL nian ho resiprosidade iha intereses (intereses mutuos) iha Estados rua ne’e.
Reprezentasoins iha li’ur iha oin rua ho ida-idak nain funsaun.
Reprezentasaun ida naran Embaixada no ida fali naran Konsulado.

Embaixada ne’e hanesan reprezentasaun Estado ida nian iha rain ka estadu seluk (li’ur) nebee aas liu reprezentasoins selu-seluk.
Embaixada dirije husi ema mane (embaixador) ka ema feto (embaixadora) nebe hala’o nian knaar nudar reprezentante Estado no koalia lori estado nian naran iha forum internasional (diplomatika bilateral ka multilateral).
Iha realidade RDTL, depois de ukun an nebe hahu husi tinan 2001 to’o ohin loron, Estado RDTL estabelese relasoins bilaterais ho Estados no mos Instituisoins Internasionais selu-seluk hanesan ho ONU, ho Estados Unidos Amerika, ho Republika Federal Australia, ho UE, ho RI, ho Republika Portuguesa, ho Rejime monarkiku Malasia, ho Republika Popular China, ho Santa Sé Vatikanu, ho PALOP, ho Japão hsst. nebe iha nivel reprezentasaun hanesan embaixada.

Iha mos reprezentasoins iha nivel konsular, nebe hala’o nian knaar espesifiku, normalmente iha negosiu ka komersiu.
Maibe hakerek na’in ho laran kraik hateten ba le na’in sira katak iha realidade RDTL iha reprezentasoins konsulares hira no iha nebe-nebe deit hakerek na’in la iha dadus.

Funsoins Reprezentantes Sira (diplomasia)

Reprezentantes sira nian funsaun tuir tradisaun iha diplomasia iha oin tolu : negociar, informar no representar.
Negociar katak halo aproximasaun no manter nagosiasaun ba intereses nasionais ho objektivu atu hetan akordu ho estado iha reprezentasaun. Diplomata nebe reprezenta estado halo negosiasaun lori estado nian naran.
Informar, katak diplomata reprezentante informa situasoins no kondisoins hotu nebe iha relasaun ho estado ida nebe diplomata akreditadu hela ba, hato’o situasoins hirak ba estado nebe reprezenta.
Reprezentar, katak diplomata akreditadu reprezenta ninian estado iha eventus internasionais, hatudu bandeira nasional hodi nune’e Estado ne’ebe reprezenta nian prezensa marka mos iha forum multilaterais.

Tuir hakerek na’in nian haree katak to’o ohin loron Reprezentantes sira nebe hala’o knaar nudar reprezentante Estado RDTL seidauk hala’o sira nian knaar tuir Intereses ho Nesesidades Rain no Povo Timor-Leste ninian nebe lolos no seidauk halo hotu sirvisu nebe reprezentasaun nian.
Ida ne’e normal tebes tanba ita nian reprezentantes sira sei hakat tama iha faze ida adaptasaun nian, hanesan mos akontese em jeral, iha nivel kaer ukun ka kaer instituisoins soberanas nasionais iha Rain Laran.

Maibe, iha mos reprezentantes balun nebee iha ona faze seluk, hanesan ita nian reprezentantes sira nebe hala’o funsaun atu hanesan ka hanesan (semelhante) ho durante tempo resistensia nian antes 2001. Sira nebe hela kreur iha li’ur hodi hala’o sira nian funsaun hanesan reprezentante Povo Timor-Leste, maibe balun seidauk hala’o sira nian funsaun lolos tuir nesesidades nebe Estado RDTL husu. Seidauk halo ho sufisiente servisu nebe iha sira nian kompetensia nudar embaixadores, nebe reprezenta Estado no Povo Timor.

Tuir los sira balun nebe kleur ona okupa fatin hira iha reprezentasaun hala’o sira nian funsaun bele la ho 100% maibe 80 por sentu ka liu, husi sira nian knaar bele hetan ona rezultadu nebe real. La hatene se sira hatene sira nian funsaun lolos hodi bele implementa ou sira la iha duni vontade atu hala’o funsaun nudar embaixadores nune’e ita la hatene sira hala’o sira nian knaar nian rezultado,

Hakerek na’in bele sita ka temi situasaun real nebe hetan iha rain nebe hakerek na’in hela ba. Reprezentante RDTL nian iha Portugal, no mos rain balun iha Europa, bele dehan katak iha reprezentante nebe kleur tebes hala’o funsaun desde resistensia nian tempo to’o biban foin lalais liu ba no balun to’o mai aktual, maibe haree husi desempenho hanesan dok tebes atu hatudu rezultadu mesmu hala’o buat hirak nebe iha sira nian kompetensia.

Ema ida nebe dirije embaixada ka enkarregadu embaixador ida presiza hatene ninian funsaun ho mos kompetensia nebe nia iha bainhira hala’o knaar nudar reprezentante Estado RDTL.
Hanesan temi ona iha leten katak Estado RDTL nian reprezentasaun iha motivu rua : mak Intereses no mos Nesesidades Rain no Povo Timor nian rasik. Iha faktor rua (intereses ho nesesidades) ne’e nian definisaun no interpretasaun bazeia ba realidade Estado no Povo Timor-Leste nian moris loro-loron. Ne’eduni funsaun husi repezentante nebe hala’o knaar nudar embaixador/a la ses husi kompetensia nebe sira iha atu tetu, hakotu no hala’o servisu tuir interese ho nesesidade real nebe rain no povo husu.

Atu hala’o sira nian servisu presiza haketak buat prioridade prinsipal iha kurtu prazu no mos prioridade ba medio ka longo prazu ninian.
Hanesan ita hotu hatene katak misaun diplomatika (embaixador/a) ida nian servisu prinsipal mak rona instrusoins husi estado ka governo (MNEC), ezekuta instrusoins ne’e no hato’o relatoriu ba estado liu husi Ministério dos Negócios Estrangeiros e Cooperação.

Além de embaixador/a ida hein instrusoins husi Governo 24 horas sobre 24 horas, embaixador ka enkarregadu ida iha nian kompetensia atu planeia, organiza no dirije aktividades hirak nebe iha ligasaun ho Povo ka Estado Timor nian nesesidades direktu ka indirektu iha rain nebe reprezentasaun hela ba. Atu bele hala’o servisu nebe iha embaixada nian kompetensia iha rain seluk nebe sintonia ho governo nian programa tuir nesesidades sektoriais, embaixada mos bele hamosu seksoins de intereses iha reprezentasaun.

Hanesan iha seksaun komersiu nian, presiza halo aproximasaun ba emprezarius husi pekenas no medias empresas ka empresarius boot sira husi rain nebe reprezentasaun hela ba hodi fo informasaun kona ba oin sa halo investimentu ka halo akordu ruma. Hala’o promosaun ka divulgasaun produtus nasionais Timor nian iha merkadu rain nebe reprezentasaun hela ba. Hanesan produsaun agrikultura biolojika Timor nian iha merkadu liu husi publisidade iha meius komunikasaun sosial.

Iha seksaun Kultura, hala’o divulgasaun no promosaun kona ba Povo Timor nian kulturas no pratikas tradisionais liu husi aprezentasaun ka liu meius informasaun selu-seluk, hodi nune’e povo husi rain seluk mos hatene tuir povo Timor nian kultura orijinal lolos.

Rain hirak hanesan Australia, Portugal no rain hirak Europa, Amerika no mos estadu soberano-demokratiku selu-seluk nian povo toman ho sistema multikultural no multirasial. Povo iha rain hirak ne’e konhese kultura husi povo (rasa) ka nasaun oi-oin, maibe sira la konhese bainhira povo rain ida rasik la hatudu ninian pratikas kona ba kultura nebe sira nian rasik ba povo rain seluk.

Iha Portugal, iha grupo kultural lubun ida nebee buka atu hamoris hikas kultura nebe bei-ala Timor nian husik hela mai ita, maibe grupo hirak ne’e la evolui tanba la iha insentivus ruma husi ema boot reprezentantes sira desde iha tempo okupasaun. To’o ohin loron reprezentaes sira la fo importansia ba buat hirak ne’e maibe sira haluha tiha katak sira mos iha dever no responsabilidade atu hala’o servisu ida ne’e. Tanba, reprezentantes sira mos responsavel ba dezenvolvimentu la’os deit politika-diplomatika, ekonomika ka edukasaun nune’e mos iha kultura Timor nian hodi hatudu ba mundo katak Povo Timor indigena mos iha nian kultura rasik.

Iha seksaun edukasaun, presiza estabelese akordo kooperasaun entre eskolas ka institutus iha Timor ho instituisoins de ensinus iha rain nebe embaixada hela ba. Iha ne’e mos embaixada presiza hola inisiativa liu husi nian sesksoins de intereses, iha area edukasaun buka halo aproximasaun no kria mekanismus ba kooperasaun. Por ezemplo iha rekuperasaun Timor oan sira nebe la hasai 10º ka 12º hodi nune’e la bele kontinua iha ensinu superior, sira bele tuir formasaun profisional espesializado nebe prontu atu servi (siap pakai) maibe tuir nesesidades rain no Povo nian.

Iha seksaun diplomatika mos nune’e, embaixada ka reprezentasaun iha dever atu halo resenseamentu ba ninian sidadauns sira iha rain ne’e hodi nune’e bele hatene tuir numeros sidadauns nasionais iha rain ne’e. Nune’e mos estado RDTL liu husi nian reprezentasaun iha dever atu fo proteksaun ba nian sidadauns nasionais iha estranjeiru, tuir Konstituisaun RDTL haruka iha artigo 22º kona ba timorenses iha estranjeiru.

Artigo ne’e haruka : “ Os timorenses que se encontram ou residem no estrangeiro gozam da protecção do Estado para o exercício dos direitos e estão sujeitos aos deveres que não sejam incompatíveis com a ausência do país”.

Ne’eduni reprezentasaun iha dever atu defende sidadauns nasionais sira no mos sira nian intereses bainhira sidadauns nasionais sira hetan ofensas fizika ka moral. Infelizmente, iha biban liu ba reprezentante estado RDTL nian iha Portugal la halo nian dever nebe konsagra iha konstituisaun hodi nune’e sidadauns nasionais balun nebe hetan ofensas fizikas iha Irlanda mos la goza proteksaun ka la hetan defeza husi reprezentante.

Aat liu tan mak reprezentante uza argumentu falsu iha kazu ema atake ba sidadauns nasionais ne’e, tanba reprezentante nega estatutu (de faktu no juridikamente) sidadauns nasionais nebe hetan susar, embora sira ema Timor oan, mai husi Timor, ho sidadania timorense maibe tanba nesesidades utiliza dokumentus husi Portugal hodi fasilita ba servisu iha Irlanda ka iha Inglaterra.
Reprezentasaun la korrobora sira nudar sidadauns Timor hodi nune’e la responsabiliza ba situasaun ne’e ho razaun katak ema timor oan sira nebe hetan susar ne’e sidadauns português la’os timorenses. Realidade ida ne’e la iha razaun atu akontese tanba iha realidade konstituisaun RDTL preve ona katak sidadauns sira bele opta nian sidadania mais ke uma, iha kazu ida ne’e sira nebe hetan susar iha dupla nasionalidade, timorense no mos portuguesa.

Ida nune’e hatudu katak reprezentasaun la hatene hala’o nian knaar nudar reprezentante estado Timor oin sa no ida nebe sira la hatene. Responsabilidade ba sidadausn nasionais sira ne’e iha primeira instansia mak reprezentante Timor nian iha Portugal, depois Portugal mos koresponsavel juridikamente tanba sidadauns sira ne’e mos iha jurisdisaun Portugal nian. Sorte sidadauns nasionais sira ne’e hetan ofensas fizikas husi ema rasistas sira la hetan susar nebe todan liu.
Reprezentasaun mos iha obrigasaun atu defende empreza nasional nebe hala’o aktividade komersiu ka investimentu iha nasaun seluk nebe reprezentasaun hela ba inklui fo proteksaun ba patrimonio empreza nasional ne’e nebe opera iha territoriu nebe reprezentasaun hela.

ºººvtººº