VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20070919

Hatan ba Bikeli Manukoko: Husi Presidente da Republica ba Primeiro-Ministro (= Selu Tusan)

Hatan ba BIKELI nian hakerek: "Husi Presidente da Republika tun ba Primeiro-Ministro".

Husi : Victor Tavares

Uluk nanain husu lisensa ba BIKELI atu korrije deit termos ESKRITOR nebe Bikeli utiliza hodi dezigna nia an. La’os ESKRITOR maibe bele uza AUTOR ka REDAKTOR. Tanba termos eskritor ne’e babain ema hanaran ba ema sira hakerek livrus na’in sira. Ema nebe hakerek livrus no publika ninian obras bara-barak mak bolu eskritor. Tanba hakerek na’in seidauk hetan publikasaun obras ruma husi Bikeli.

Bikeli DUN Dr. José Ramos aktual Presidente da Republika AMBISAUN ba Poder. Maibe Bikeli la haree hetan ka lojika subar an ba Bikeli katak ema hanesan Dr. José Ramos Horta buat politika ne’e halo parte nian moris ka vida.

Se politika ne’e halo parte RH nian vida entaun Bikeli presiza hatene katak RH nian moris ne’e rasik halo parte mos poder nebe sai objektivu ba ema hotu-hotu iha mundo nebe halo politika iha nasaun hotu-hotu. La iha politiku ida mak halo politika la hanoin poder. Politikus sira iha rain ka nasoins ho estado demokratiku, hotu-hotu halo kompetisaun ba kaer ukun (poder). Neduni Dr. José Ramos Horta hanesan mundo tomak konhese no rekonhese ninian reputasaun hanesan politiku profissional mos iha nian objektivu ida, mak hakarak mos kaer ukun Povo Timor.

Ema ida nebe hanoin katak RH iha ambisaun ba Poder mos ema ne’e rasik la konsegue haree hetan buat AMBISAUN ne’e sa ida no oin sa. Ema ne’e la hatene saída mak ambisaun.

Haree husi Bikeli nian hakerek nota momos katak Bikeli ema ida nebe foin aprende (hasara/imita) RH ho XG halo politika neduni ninian hanoin no hakerek hirak ne’e mos simples tebe-tebes hanesan “kaer kanuru tau ba ibun”.

Kuando ema politiku ida iha ambisaun ba poder ne’e normal tebes no naturalmente nia ema politiku ida tenke iha mos ambisaun. Tanba ho ambisaun mak ema ne’e bele iha entuziasmu halo politika hodi hetan objektivu nebe nia trasa. Karik amu-lulik ruma mak tuir vokasaun politika hodi halo servisu oin rua, ida ba espiritual no ida ba sosiedade (sosial-politik) mos iha obrigasaun atu hala’o servisu oin rua ne’e hodi neon ho laran. Ema ne’e hala’o servisu oin rua mos iha objektivu rua mak atu atinji, objektivu ne’e mak parte espiritual nian karik balun mak hanesan hakbiit sarani sira nian fiar atu adora aman maromak liu husi adora Jesus Kristu (karik ha’u hanoin la sala). Parte sosial-politika nian mos amu-lulik ne’e mos iha objektivu ida bainhira nia halo mos politika, mak kaer ukun, embora iha realidade ladun hetan padre ruma hala’o funsaun rua ne’e ho aktivu hotu, sai padre no politiku dala ida.

Maibe bainhira nia hakotu atu halo politika los deit mos nian presiza ambisaun makaas ba kaer ukun. Ema politiku ida la iha ambisaun ba poder, karik ema ne’e la iha vokasaun ba politika nune’e nia serve liu halo servisu solidariedade sosial ka halo servisu seluk nebe la’os politika. Basaa, buat ambisaun ne’e tuir ha’u nian hanoin hanesan estimulante ida hodi hamosu motivasaun halo buat ruma. Se la iha ambisaun mak ema ruma ne’e la iha motivasaun atu halo sasan ruma, kuandu la iha motivasaun mak la iha hanoin nebe kreativu hodi buka objektivu ba sa mak halo.

Ema estudante ida mos presiza iha ambisaun atu hetan notas diak liu ninian kolegas sira seluk, ninian ambisaun ne’e halo nia entuziasmu makaas nune’e nia tenke fera ulun estuda hodi bele atinji objektivu (ambisaun) hetan notas boot liu hotu. Nune’e mos ema politiku ida iha nian objektivu, atu hetan objektivu ne’e presiza iha kreatividade iha hanoin politika, kuandu politikamente nian hanoin kreativu ona estimula hamosu motivasaun halo politika, iha motivasaun halo politika mak sem duvida ema ne’e bele hetan objektivu kaer ukun.

Ne’eduni Ramos Horta, Xanana Gusmão ho La Sama, sira hanesan “animal politiku” mos halo parte prosesu ida ne’e. Hanesan hato’o ona iha inisiu katak politika ne’e halo parte RH nian moris, neduni la’os novidade nem nia halo milagre bainhira nia kaer ukun husi nebe no iha nebee deit. Ida ne’e bolu prosesu natural nebe akontese ba ema politiku ida kuantu mais Dr. Ramos Horta, politika hanesan nian profissaun ida.

La iha ligasaun direktu nebe negativu entre estado de direito ho ema boot na'in tolu Xanana-Horta-La Sama nebe de faktu ohin loron sai pilares importantes tolu iha estado de direito iha nação RDTL aktualmente.

Buat nebe iha no akontese iha estado de direito iha RDTL mak prosedimentu tuir norma nebe internasionalmente estabelesidu, SUFRAGIO UNIVERSAL hala'o iha Timor-Leste iha biban hirak liu ba dadaun.Tuir norma nebe natural no internasionalmente prevalesidu mak partisipasaun povo Timor-Leste iha desizoins politikas, liu husi eleisoins jerais ba presidensiais no lejislativas. Ida ne'e mak mundo tomak hatene katak iha Timor kumpre buat estado de direito ne'e sorin, tanba José Ramos Horta sa'e PR, Xanana Gusmão forma IV GK no La Sama eleito, ha'u repete tan lia-fuan eleito, La Sama sai Presidente PN.

Prosedimento hirak ne'e la'os sistema sura-kolen no selu-tusan, termus nebe Bikeli uza hodi esplika mudansa politika nebe akontese iha Nasaun Timor-Leste.

Se ema ruma hakarak halo komparasaun ho tempo Fretilin kaer ukun liu ba, no mos to'o oras ne'e mos sei nota buat sistema sura-kolen, ho governo aktual karik iha biban liu ba pior liu karik. Maibe la manan buat ida halo komparasaun situasaun nebe ema hotu hatene.

Se RH ohin loron nudar PR mos liu husi prosesu ida nebe difisil, la'os hanoin simples hanesan Bikeli hanaran Xanana-RH-La Sama, sira na'in tolu deve no selu tusan ba malu. Entaun Bikeli la haree hetan kandidatus husi partidos 14 konkorre malu ba PR ?
La haree hetan eleisoins Presidensiais hala'o dala rua ?

Se justifika duni Bikeli nian argumentu katak Dr. Ramos Horta ba PR no Xanana Gusmão ba PM, karik teoria ida ne'e iha fundamento, Xanana Gusmão nian partido CNRT la lakon ho Fretilin iha eleisoins presidensiais no mos lejislativas. La ejiste negosiasoins entre partidos hirak CNRT, PSD/ASDT no PD nebe lori tempo semana ida resin, la mosu mos koligasaun pos eleitoral AMP husi partidos hat ne'e.

Neduni la iha liu lojika Bikeli nian analiza. Tanba de faktu akontese prosedimento nebe formal no konstitusional nebe tutan malu ho aktus eleitorais tuir norma estado de direito demokratiku.Karik Bikeli hakarak enkosta ema boot na'in tolu ne'e apenas ba simples ambisaun ba poder.

Maibe hakerek na'in bele fo hanoin feed beck nune'e : Sira na'in tolu aktualmente estado RDTL no mos Povo Timor-Leste mak presiza sira atu sira tur iha fatin tolu ne'e.

Importante atu ema hotu distingui/haketak mak ambisaun partikular no mos ambisaun nebee iha presupostos ba intereses komuns nian laran.

Buat ambisaun nebe ho karakter pessoal mos iha oin rua: 1) Ambisaun pessoal nebe motiva ema politiku ruma halo politika atu hetan poder maibe motivasaun ba interese privado ka familia (reputasaun ba karreira, naran diak, akumul riku soin liu husi poder) mak domina. 2) Ambisaun pessoal ba poder nebe motiva ema halo politika buka poder maibe alem de ema ne’e iha interese privado (reputasaun, naran diak ka nesesidade rekonhesimento etc.) maibe ema ne’e mos iha motivu seluk nebe paralelu ho ambisaun pessoal. Hanesan nian hakarak atu ninian hanoin (politika) nebe diak ba intereses ema barak (komuns) nian bele realiza, hanoin oin sa bele ajuda ka tulun ema sira nebe presiza tulun, no mos liu husi nian ambisaun ba poder hodi nasaun ka estado aproveita nian matenek nebe nia iha. Ba politiku, ne’e vale a pena nia fo nian kontribuisaun no mos ba povo, mos bem meresidu hetan kontribuisaun ida nune’e.

Uluk Ramos Horta halo parte I Governo Konstitusional nudar MNEC, tanba nesesidades estado RDTL nian. Depois de Povo hatun Mari Alkatiri husi PM, RH sai PM iha II Governo Konstitusional tanba mos iha nesessidades rua, nesesidades ida mai husi Fretilin, atu Fretilin asegura kontinuidade iha governasaun hodi evita eleisoins antesipadas. Nesesidades ida fali tanba iha Fretilin nian laran la iha ema ruma mak bele troka iha Mari Alkatiri nian fatin ba PM, neduni Fretilin rasik liu husi desizaun direksaun mak eskolha RH ba Primeiro – Ministro hodi hato’o ba PR Xanana Gusmão atu Presidente nomeia RH dirije governo Fretilin nian ho ordem husi Fretilin.

Neduni DEMAGOJIA no HIPOKRITA BOOT Bikeli dun katak Ramos Horta mak hakarak hatun Mari Alkatiri tanba nia ambisaun atu sa’e ba PM iha II Governo Konstitusional.

Se mak la hatene krize liu ba nee oin sa, mundo tomak hatene krize ne’e nia hun iha nebe no mos abut to’o nebe. Ema Timor oan maioria hatene se mak responsavel ba krize nebe to’o agora mos la iha solusaun. Ema barak iha mundo hatene, rona ho tilun no mos le iha jornais kona ba DUN lubun boot ida nebe Mari Alkatiri lori Fretilin ho Governo nian naran hato’o ba lideres partidarius sira no mos lideres Igreja iha Timor.

Maibe dun matak hirak ne’e nem ida justifika, katak la iha fundamentu nebe Mari Alkatiri kaer hodi koalia, dun ema arbiru deit, apenas atu desvia deit ema nian atensaun ba TODAN nebe iha Mari Alkatiri nian leten. Hanoin atu oin sa hatan responsabilidade boot nudar xefe de governo ba krize ne’e hanoin la hetan, ninian matenek atu enfrenta problemas nebe nian membros governo sira seluk hamosu la iha ka esgotadu halo nia lakon fiar ba nian an rasik hodi hakat tuir dalan nebe la dignifika nian an rasik to’o koalia mos la tuir rasional.

Neduni la iha liu razaun atu dirijentes Fretilin ruma agora mai buka SOE sira nian sala boot nebe sira halo ba ema seluk. La iha liu razaun atu dun Presidente da Republika Ramos Horta iha ambisaun pesoal mak uluk sa’e ba PM no mos la iha razaun nem uitoan tanba ambisaun ba poder mak RH ohin loron sai PR.

Se ohin loron nia (RH) Presidente Timor nian karik nia hetan ona objektivu ida husi objektivu selu-seluk. Hanesan ema hotu hatene katak Dr. José Ramos Horta ema ida ho profisaun iha politika, la bele hanoin katak PR estado RDTL nebe nia atinji ohin loron hanesan uniku objektivu ka objektivu final. Lae, karik nian kargu PR ohin loron ne’e hanesan kapitulo ida deit iha ninian kurrikulu profissaun nian, karik hanesan foin hahu nian karreira iha profisaun nudar politiku. Karik nune’e mos nem ema ida hatene, so nia (RH) mak bele hatene.

Nune’e mos Sr. PM Xanana Gusmão, ita matan tomak (ignorante) sira bele dun nia hanesan nia ema ambisaun boot ba poder. Tanba, iha politikus sira nebe halo (opozisaun ba nia) barak mak halo espekulasaun katak XG nian tempo dekliniu ona no mos ponto klimax iha politika mak nia iha PR ne’e deit ona. Depois ho razaun de faktu CNRT lakon votus ho Fretilin iha eleisoins lejislativas ne’e 30 de Junho liu ba halo ema sira opozisaun ba Xanana hanoin no fiar metin katak Povo Timor la fiar ona Xanana Gusmão.

Hakerek na’in mos hakna’ok entrevista nebe Sr. Mari Alkatiri, Sekretario Jeral Fretilin nian fo ba Kompas (imprensa indonésia), katak Governo AMP dura to’o tinan rua deit. Se konsegue kompleta tinan ida ne’e sorte nebe Xanana nian governo bele hetan.
Agora komesa espekula tuir ninian (MA) imajinasaun, katak husi ne'e ba tinan rua tan Mari Alkatiri bele sai fali PM. Ida ne’e Mari Alkatiri nian plano, ne’e mak nia fo hatene sai no mos hanesan avizu ida ba IV Governo Konstitusional nebe lidera husi Xanana Gusmão. Kualker momentu Fretilin bele hamosu Tsunami ou bele mos Mari Alkatiri hamosu milagre.

Maibe Povo Timor fiar katak PM Xanana Gusmão ho nian membrus governo selu-seluk mos la hakfodak ho Mari Alkatiri nian deklarasaun ne’e tanba Sekretariu Jeral Fretilin nian nee gosta halo espekulasaun, hanesan matan dok, sik tun sik sa’e. Alias, Mari Alkatiri nian mal aposta ne’e nanis ona.

Iha 2001 bainhira Fretilin manan eleisoins ba Asembleia Konstituinte, promete atu ukun tinan 50, maibe tinan lima deit mos la konsegue. Foin lalais hasoru eleisoins presidensiais no lejislativas, kanta maka’as dehan atu boron hotu eleisoins rua ne’e presidensiais no lejislativas, maibe realidade oin seluk.

Dr. Mari Bin Amuden Alkatiri la hanoin hetan katak nem ema ida bele boron Povo Timor nian konsiensia. Tanba Povo Timor la fa’an obralan ninian konsiensia ba ema ruma atu sosa boronan. Iha estado de direito demokratiku la ejiste sistema LEILÃO iha eleisaun. Nem matenek na’in sira nebe estuda direito ka siensias sosiais ka politik mos, hakerek na’in fiar katak sira nunka le hetan sistema lelang no boron iha eleisaun nem iha dosen ruma nebe hanorin sistema ne’e.

Agora ema sira husi partido Fretilin haree XG hanesan fali inimigo, ataka nia, insulta nia (XG) liu fali insulta jeneral indonesio responsavel ba atrosidades ruma nebe dala ruma akontese iha Timor. Agora, ema Fretilin sira kompara Sr. PM Kay Rala Xanana Gusmão ho sidadaun simples José Reis ida, katak sira na’in rua nian nivel meritu halo funu hanesan deit. Balu hakarak haree XG kuda lakeru iha to’os, dun Sr. PM Xanana Gusmão fa’an Rain Lulik Timor ba estado australianos sira tanba deit nia (XG) eskolha ex-governante rain neba sai nia conselheiro. Hatetu PM Xanana hanesan ho buat aat selu-seluk nebe nudar ema Povo Timor humilde nian oan sira la imajina atu hato’o, mos agora ema Fretilin sira hato’o hotu ba PM Xanana Gusmão.

Maibe ha’u ho neon kraik hato’o ba imi sira katak se Sr. Xanana Gusmão ne’e politiku profissional ida nia la presiza hamohu ka esgota kredit point nebe nia hetan ho meritu husi dirije funu desde 1982/83 to’o mai 1999.

Se Sr. Xanana Gusmão hakarak tau nian interese pesoal ninian, ninian intereses privadu hanesan naran boot iha mundo, naran ho reputasaun diak iha mundo rai klaran, nia nem hakarak sai PR iha biban liu ba. Ba nia basta halo buat ruma nebe konserva nian naran boot iha mundo ne’e. La presiza tan halo politika, la presiza tan hanoin sai PM hanesan agora dadaun. La presiza, tanba ba nia basta konserva deit rekonhesimentu nebe nia hetan husi lideres sira iha mundo, rekonhesimentu nebe hetan husi komunidade internasional tanba ninian korajem fo an ba sakrifisiu. Ho nune’e deit mos nian kredibilidade la tohik. Mas, akontese pelo kontrariu, Sr. PM Xanana Gusmão iha liu fuan (domin) du ke politiku profisional nebe hanoin deit karreira. XG nian domin ba Povo Timor boot liu do ke hanoin ba nian an rasik, Xanana Gusmão nian oferese an atu servi Povo Timor-Leste tetu todan liu no demais du ke kualker lider Fretilin ida aktualmente.

Se Sr. Xanana Gusmão mak hanoin nian an ka hanoin deit nian familia, durante nia nudar PR, palasiu da sinzas ka kargus estado nian balu nakonu ho familia Gusmão nebe la’os ema leet/asing tanba ema Timor sira barak mak konhese Xanana Gusmão nian familia. La hanesan ho Mari Alkatiri, bainhira sa’e ba PM koloka uluk ninian familia iha fatin hirak nebe nem prense kriteriu atu okupa.

Karik Sr. PM Xanana la konkorda ho hakerek na’in nia hanoin ka observasaun ida ne’e maibe nia atu naho’uk ka lae mos ba hakerek na’in la halo ba kazu, tanba ida nune’e mak hakerek na’in haree hetan.

Agora, ita Timor oan tomak loke ita nian matan halo lua-luan, Xanana Gusmão nian familia rasik ka familia besik ruma nebe ita hotu konhese nebe la prense kriteriu ruma okupa kargus estadu nian ruma??? Se haree la hetan entaun aprende ho realidade hirak ne’e, diferensa atitude iha buat hirak nune’e mos iha nian impaktu boot tebes. Haree tur ho ulun malirin kompara hodi aprende buat diak ho aat, atitudes aat mak ida nebe no diak mak ida nebee, tetu ba!!!

Lider diak mak ida nebe, ladun diak ka aat mak ida nebe haree husi kaer ukun, haree lolos hodi la bele lohi ita nian an rasik. Buka lohi ita nian an rasik hodi buka mos lohi ema seluk ne’e ema dehan ita bulak.

Maibe, imi lohi Povo Timor la hetan, kuantu mais uza imi nian metudus ida hanesan dadaun ne’e, metudus nebe la’os deit halo lakon kredibilidade politika partido nian maibe mos la dignifica dirijentes partido rasik. Halo politika de baixo nivel ne’e karik imi haree la hetan maibe ninian konsekuensia ne’e boot no todan tebes.

Se hatene konseito politiku ne’e oin sa entaun hatene katak halo politika hanesan mos han maek. Ohin han maek ohin mos sinti kedan ibun katar, pior liu mak koi mos la kura, se la hatene ai-moruk ruma tau ka hemu ba hodi halakon katar entaun oin hotu bubu sai hanesan fali maek nian isin lolon.

Nune’e mos halo politika, halo sala politika mak hatene hadia lalais bele hetan konsekuensia ki’ik ka la hetan konsekuensia, maibe se kontrariu ho metudo nebe politikamente natural aplikavel, alias arbiru deit mak ninian konsekuensia mos akontese iha kualker momento, por bem, karik apenas responsavel ida deit mak hetan/lori todan (demisaun/resignasaun) maibe ignora ka la fo importansia ba impaktu mak konsekuensia la’os deit monu ba ema ida maibe hakoi grupo ida tomak, nune’e partido mos nian ain-klor mos la tomak.

Karik ema Fretilin sira sei seidauk sinti konsekuensia boot hanesan Tsunami nebe lulun partido Fretilin agora dadaun ne’e. Sira la sinti tanba sira nian boot sira sempre halo esforsu boot atu diverte sira nian an (diversaun/menghibur diri) iha partido nian susar boot nian laran. La fo importansia ba konsekuensias nebe partido Fretilin hakur dadaun, sira la fo importansia tanba sira rasik la kohi lori todan nebe partido hetan. Ba boot sira iha Fretilin fo liu importansia ba sira nian kargu iha partido Fretilin nian laran du ke hakarak oferese an ba vitima em vez de partido Fretilin mak sai hetan susar. Sira la interese Fretilin nian vida nudar partido politiku, sira preokupa liu ho pozisaun iha partido hodi bele sai instrumento ba hetan poder, la importa partido Fretilin nian futuro atu sai oin sa.

Iha situasaun normal, lideransa Fretilin aktual la iha tiha kleur ona kondisoins atu dirije partido depois de dezaire eleitorais dala tolu tui-tuir malu nebe Fretilin hetan. Iha presidensiais Presidente Fretilin Francisco Lu Olo Guterres lakon ho Ramos Horta, iha lejislativas Fretilin lakon votus maioria absoluta ba partidos hirak iha opozisaun, ba presidensia PN Fretilin nian kandidato Aniceto Guterres lakon ba kandidato husi AMP Fernando La Sama Araújo.

Konskluzaun: Partido Fretilin hetan lakon ho absolutu.

Konsekuensias: Partido Fretilin nakdasak an hanesan manu ain-klor kotu. Uluk hahu 2001 kuandu komesa ukun Timor, Mari Alkatiri sa’e manu-aman Fretilin no partido Fretilin lori nia (MA) semo aas tebe-tebes. Maibe iha 2007 Fretilin la seluk ho partido ki’ik oan ida, halai nakdasak an tui-tuir lideres sira husi partido ki’ik hirak mos ema ses hotu husi Fretilin.

Tanba sa nune’e???

Pergunta ida ne’e hakerek na’in hatan no esplika em detalhe ona iha biban seluk liu husi hakerek ho tema “ Tanba sa mak Fretilin la konsegue forma koligasaun...? ”.

Ida nune’e mak hakerek na’in haree hetan ba situasaun aktual iha partido Fretilin. Partido Fretilin nian problema la’os iha partido maibe Fretilin nian problema boot iha lideransa. Enkuantu la rezolve problemas iha lideransa Fretilin hanesan partido susar sei la ses husi Fretilin.

…vt...

2 comentários:

  1. PARABEINZ SR TAVARES!
    ITA BO'OT NIA KOMENTATIO NE'E "MANU AMAN" TEBES.

    HAU FIAR KATAK TIMOR OAN TOMAK NEBE HETAN MATENEK HO "DALAN LOSS" NO HADOMI TEBES RAI DOBEN TL SEI ASEITA HO ITA BO'OT NIA KOMENTARIO NE'E.

    EMA TIMOR SIRA NEBE KRITIK SR XANANA HO "LIAN LA RESPEITA", EMA SIRA NE'E ITA BELE DEHAN "FRUSTADO, MALKRIADO I KAKUTAK BOEK"!!!

    ResponderEliminar
  2. VIVA SR XANANA HO NIA STADU IV GOBERNU AGORA. FO SUPORTA MAKSIMU BA GOBERNO NEE SE BUAT RUMA KLEUK KARIK LORI BA TRIBUNAL ATU NUNEE BELE HETAN JUSTISA, SIRA NEBE MAK HADOMI TIMOR HIRAK NEBE HAKARAK KRIA KONDUSAUN DAME NO PASS.AMO JUVITO PARABENS TAMBA BELE FO IDEIA HIRAK NEE, TEMPO TOO ONA ATU IGREIJA HOLA PARTE HADIA MENTALIDADE JOVENTUDE TIMOR SIRA NEBE MAK NAKONU HO MENTALIDADE STRAGA.

    DAME HO PASS IHA KBIIT AMAN MAROMAK
    ABRASU E SERVICO DIAK ATU NUNE NASAUN IDA NEE BELE LAO BA OIN

    ResponderEliminar

Nota: só um membro deste blogue pode publicar um comentário.