Tamba sa FRETILIN la konsegue halo koligasaun?

TANBA SA FRETILIN LA KONSEGUE HALO KOLIGASAUN HODI FORMA IV GOVERNO KONSTITUSIONAL IHA ESTADO RDTL?

EIS A RAZÃO

Victor Tavares*

Eleisoins Lejislativas 2007/2012 liu tiha fulan rua ona maibe governo husi eleisaun ne’e seidauk hala’o nian knaar ukun Rain Timor-Leste. Tanba sa? Tanba razoins obvias, jogus iha mundo politiku-partidario no mos normal akontese iha rain ka estado soberano demokratiku selu-seluk . Iha diferensa tempo nebe presiza atu forma governo entre Timor-Leste ho rain ka estado selu-seluk. Iha rain ka estado balun tempo ba partido nebe manan iha eleisaun atu forma governo, normalmente presiza loron naruk liu mak semana ida. Iha Timor, ba dala ida ne’e seidauk bele hanesan ho rain seluk tanba akontese situasaun ida nebe la akontese iha estado soberano no demokratiku hirak seluk. Nune’e mos iha Timor-Leste, rezultado husi eleisoins lejislativas 2007/2012 nebe hatudu Fretilin hetan votus maioria (simples) maibe la bele forma governo mesak tanba la hetan votus maioria absoluta no mos la konsegue forma koligasaun hodi bele forma governo..

Kestaun nebe hakerek na’in tenta atu esplika ba leitores ka le na’in sira mak hanesan hatudu iha tema ba hakerek ida ne’e : Tanba sa Fretilin la konsegue halo koligasaun hodi forma IV Governo Konstitusional iha estado RDTL?

Problemas no dilematikas

Problemas nebe mosu depois eleisoins remata mak kona ba partido ida nebe mak bele forma governo. Entre forsas politikas rua Fretilin ho Aliança Maioritaria Parlamentar-AMP, ida nebe mak iha liu kondisoins atu forma IV Governo Konstitusional.

Kona ba forsas rua ne’e ida nebe mak iha lejitimidade forma governo depende ba sa mak konstituisaun RDTL haktuir iha artigus 106 no 85 ho ninian interpretasaun ida nebe mak los.

Artigus rua husi Konstituisaun RDTL haktuir hanesan nune’e :

Artº. 85: (nomear e empossar) letra d) «O Primeiro-Ministro indigitado pelo partido ou aliança dos partidos com maioria parlamentar...»
Artº.106: «1. O Primeiro-Ministro é indigitado pelo partido mais votado ou pela aliança de partidos com maioria parlamentar e nomeado pelo Presidente da República...»

- Interpretasaun tuir versaun Fretilin nian (interpretasaun parsial) : Fretilin mak hetan votos maioria iha eleisaun 30/06/07, neduni Fretilin mak iha lejitimidade atu indigita ninian ema ba Primeiro-Ministro ba PR hodi PR nomeia no forma governo GGI ho PM rasik.

Nune’e sujere ba PR José Ramos Horta : Fretilin nudar partido vensedor iha eleisoins mak forma governo ho ninian Primeiro-Ministro rasik.

- Interpretasaun tuir versaun Aliança Maioritária Parlamentar-AMP nian : Aliança de partidos maioria parlamentar nebe forma husi partidos hat (4) CNRT, PSD/ASDT no PD nebe forma depois eleisoins ho naroman konstituisaun RDTL indigita Xanana Gusmão husi CNRT, segundo partido mais votado iha eleisaun lejislativas nudar Primeiro-Ministro, hodi forma IV Governo Konstitusional ba mandato 2007/2012.

PR nian pozisaun kona ba kontradisaun iha interpretasaun artº.85 no 106 entre partido Fretilin ho AMP, mak PR Ramos Horta patrosina dialogo entre Fretilin ho partidos hirak nebe forma aliansa atu forma governo nebe bele engloba partidos hotu ho asentu parlamentar. Fretilin hato’o proposta ba PR atu forma governo ida ho formatu ida nebe Fretilin hanaran Governo de Grande Inclusão-GGI. PR Ramos Horta mos aseita hanoin atu forma governo ida grande inkluzaun ne’e maibe la hanesan ho Fretilin nian intensaun.

Partido Fretilin propoin katak GGI ne’e nian PM tenke ema husi Fretilin ho razaun katak partido ne’e mak hetan votus maioria iha eleisaun liu ba, intensaun ida nebe oin seluk ho PR nian hakarak. Prezidente Dr. Ramos Horta nian intensaun atu GGI ne’e inklui ema husi partidos hotu inklui ema balu husi Fretilin atu halo parte governo maibe Fretilin hanesan konvidado deit atu halo parte, la’os atu lidera governo. Pozisaun ida nebe kontraria lideransa Fretilin nian intensaun hodi nune’e mak mosu problemas no dezentendimentu entre PR ho partido Fretilin. Maske nune’e Presidente Ramos Horta hala’o nian dever nudar xefe de estadu atu ultrapasa diverjensias ne’e hodi bolu nafatin lideres sira husi Fretilin no AMP, maibe diverjensias ka hanoin sakat malu ne’e la hakotu no governo mos seidauk bele mosu.

Iha biban ida ne’e PR hasoru dilema boot tebes atu hola desizaun hodi konvida se los mak bele forma governo, maibe iha Presidente nian entendimento la iha duvida katak Fretilin la iha kondisoin atu lidera GGI, basaa, nia (PR) mos la iha duvida katak AMP mak iha lejitimidade atu forma governo. Maibe hanesan dilema boot nebe Presidente hasoru mak husi sorin ida PR reseio Fretilin nian apoiantes ka massa hamosu violensia karik desizaun nebe nia hola la tuir Fretilin nian hakarak, katak PR konvida Xanana nudar lider AMP hodi forma governo. Nune’e PR presiza loron tolu (3) atu tetu didiak antes de hola desizaun final nebe, ba ema barak la iha duvida ka preve tiha ona katak tuir konstituisaun RDTL, lejitimidade AMP forma governo ne’e inkontestavel.

Husi sorin seluk mos lideransa husi Fretilin nian hanoin oin sa bele tuba iha poder la esgota, tanba lideransa Fretilin hatene no iha ona presentimento katak se lakon poder agora mak bele susar atu hetan fila fali, hodi nune’e halo esforsu makaas no buka aprezenta proposta seluk ba PR. Proposta seluk hanesan PM ema independente ida no ministros sira mak husi Fretilin ho AMP hodi konstitui GGI. Maibe haree momos katak tentativas hirak husi Fretilin ne’e hanesan manobra politika deit atu kondisiona PR nian desizaun no kria presendente ida katak karik iha reaksaun negativa ruma akontese hasoru Presidente RH nian desizaun mak sira sei fo sala ba PR hodi argumenta katak lideransa Fretilin halo ona esforsu boot atu evita problemas maibe PR ho sira seluk mak hakarak duni violensia mosu. Mesmo iha risku maibe la iha eskolha seluk ba PR Ramos Horta, katak so bele konvida Xanana Gusmão nudar lider AMP hodi forma IV Governo Konstitusional. Tanba la iha razaun atu konvida Fretilin nebe de faktu mesak deit hodi forma governo, la’os deit tanba Fretilin la hetan maioria absoluta no mos la hetan partido ruma nebe sufisiente hetan fatin iha PN hodi koliga ho Fretilin, maibe mos difisil tebes Fretilin halo koligasaun hodi forma governo, tanba partidos hirak nebe iha kondisoins atu halo koligasaun ho Fretilin mak iha hotu ona aliansa nian laran. No mos imposivel AMP nebe asina tiha ona memorando de entendimento entre partidos hat (CNRT+ASDT/PSD+PD) nudar alternativa ba Fretilin bele fahe malu hodi nune’e balu hamutuk ho Fretilin. Presidente da Republika mos hasoru problema seluk bainhira hanoin atu hamosu governo ida nebe engloba Fretilin ho AMP. Problema ne’e mos difisil atu partidos balu iha AMP aseita kazu hanesan Fretilin nian hakarak atu Fretilin mak lidera governo.

Fretilin nian dilema

Mesmo Fretilin iha realidade manan eleisoin lejislativas 30 de Junho 2007 maibe la bele forma governo, tanba la bele duni forma governo.
Primeiro, Fretilin manan votos maioria maibe maioria simples deit katak la hetan maioria absoluta, hodi bele forma governo mesak hanesan iha eleisoins ba asembleia konstituinte iha 2001. Segundo, Fretilin la konsegue halo koligasaun pré ka pós eleitoral ho partido ruma nebe hetan fatin iha PN sufisiente. Karik halo parseria ho partido ki’ik balu mos la bele forma governo se haree husi porsaun husi partidos hirak nebe la kohi halo koligasaun ho Fretilin nian votos barak liu Fretilin + 1 ka 2, se karik partidos hirak ne’e la’os mak CNRT ka PD ka PSD ka ASDT nebe Fretilin konsegue forma koligasaun ho sira ida. Tuir lolos Fretilin la susar atu hetan partido ruma hodi halo koligasaun pre ka pós eleitoral. Partidos hirak hanesan ASDT, PD ka CNRT, ou mesmo PSD, tanba partidos hirak ne’e nian prinsipios ba intereses nasionais hanesan deit ho Fretilin nian, nune’e mos iha pontos komuns nebe Fretilin ho ASDT, PD no CNRT hanesan deit.

Maibe infelizmente lideransa Fretilin rasik mak latan – satan (obstakulu) ba nian an rasik
Latan-satan balun hirak ne’e mak hakerek na’in haree hanesan Fretilin nian problema boot nebe partido hasoru iha eleisoins lejislativas ba periodu 2007/2012, hala’o iha loron 30 fulan Junho liu ba. Partido Fretilin hasoru susar iha biban eleisaun lejislativas remata mak hanesan tuir mai ne’e : Primeiro obstakulu, bainhira Fretilin hetan poder liu husi eleisoins ba asembleia konstituinte, lideransa sira iha Fretilin la kria kondisoins ba relasoins nebe diak ho ema sira iha partidos hirak iha opozisaun. Fretilin nian Sekretario Geral to’o PM sai fali hanesan kantor musika popular nebee ho nada ka lian populismo ho arrogansia mak aas liu do ke sai hanesan maestro ida nebe diak ba musika instrumentalia klasika nebe harmonioza. Segundo obstakulu, partido Fretilin mos la halo investimento estratejiku kona ba politika durante partido ne’e kaer poder. La estabelese entendimento no kooperasaun nebe diak ho partidos hirak iha opozisaun no sempre konsidera partidos hirak iha opozisaun la vale buat ida, pior liu tan mak lideransa Fretilin nunka konsidera ema sira iha opozisaun hanesan adversariu politiku maibe konsidera sira hanesan inimigo.

Ho satan ka obstakulu rua temi liu ba sai hanesan mota boot nebee dolen iha Fretilin ho partidos selu-seluk nian leet. Hases dok Fretilin husi dalan nebe diak no los ba kaer ukun durante tinan lima nulu (50) nian laran. Ho obstakulu rua ne’eduni mak hadok partidos hirak hanesan PSD, PD, ASDT no CNRT husi Fretilin iha eleisoins rua ikus tui-tuir malu, presidensiais no lejislativas. Hanesan justifikasaun ba obstakulu rua iha leten, tuir mos hakerek na’in sita faktus husi akontesimentus balu nebe lideransa Fretilin sira halo mak hanesan tuir mai ne’e :

1) Hasoru PSD – Bainhira Sekretario Geral Fretilin foti an ba PM Governo Konstitusional I, hala’o saneamento no perseguisaun politika hasoru lider PSD - Sr. Eng. Mario Viegas Carrascalão, hahalok hirak hanesan duni sai ex-governador Rain Timor-Leste nian iha administrasaun RI nian tempo, husi uma nebe governo Fretilin konsidera patrimonio estado nian. Nudar ita ema Sr. Mário V. Carrascalão mos iha dignidade hanesan Sr. Dr. Mari Alkatiri - Sekretario Geral Fretilin nian, no mos hanesan Timor oan ida, lider PSD ne’e mos sei hanoin dala sanulu bainhira hanoin atu halo koligasaun ho Fretilin, embora ba povo nian intereses maibe haree husi kondisoins psikolojikas atu servisu hamutuk ho Fretilin ladun iha ka la iha liu. Neduni Eng. Mário V. Carrascalão prefere la halo kompromisu ba povo atu kaer ukun hamutuk ho Fretilin do ke trai ninian konsiensia rasik tanba poder depois servisu hamutuk ho Fretilin maibe la ho laran tomak.

2) Hassoru PD – Lideransa Fretilin, liu-liu Sekretario Geral Mari Alkatiri durante nia iha PM buka dekapita politikamente Presidente PD Fernando La Sama, inkrimina no prosesa presidente PD nian Fernando La Sama Araújo iha tribunal no dun matak ka konsidera Presidente PD hanesan kriminozu. Iha mos dun selu-seluk nebe Mari Alkatiri halo ba Partido Democratico ho nian estrutura durante iha krize nian laran. Neduni se ikus mai PD la kohi halo koligasaun ho Fretilin, ne’e la’os tanba PD la kohi servi povo maibe la iha duni kondisoins atu servisu hamutuk ho Fretilin nebe iha Mari Alkatiri nian okos. Mesmo karik iha kondisoins materiais atu bele servisu hamutuk, hanesan boa vontade husi membros sira PD nian atu servi hodi tulun povo hasai sira husi susar no terus, hodi nune’e karik aseita halo koligasaun entre Fretilin ho PD maibe psikolojikamente la iha kondisoins atu servisu hamutuk hodi bele hala’o servisu diak hodi hetan susesu.

3) Hasoru ASDT- Lideransa Fretilin, liu-liu Mari Alkatiri-Sekretario Geral nega momos Sr. Xavier do Amaral nian honra nudar proklamador independensia RDTL nian. Iha nebe lideransa Fretilin nega la’os deit honra ho naran diak aktual presidente ASDT maibe mos manipula historia funu Timor nian rasik. Nune’e, bainhira Fretilin foti Sr. Xavier do Amaral ba Vise Presidente PN desde Mari Alkatiri transforma governo provisorio ba governo konstitusional, maibe la kleur nia (XA) husik fatin ne’e tanba Xavier haree katak Fretilin nian ukun la diak la tuir povo nian hakarak. Neduni ohin loron mos ASDT prefere halo koligasaun ho partido nebe lideransa Fretilin sira konsidera inimigo do ke halo koligasaun ho Fretilin iha Mari Alkatiri nian okos. La iha kondisoins atu ema husi Fretilin ho ASDT servisu hamutuk.

4) Hasoru CNRT - Bainhira CNRT mosu nudar partido foun iha Timor, lideransa Fretilin, liu-liu nian Presidente ho SG halo kampanha makaas tebes kontra hasoru CNRT ho nian lider Xanana Gusmão. Senhores sira hanesan Mari Alkatiri ho Francisco Lu Olo ho mos membros destakadus sira seluk husi Fretilin sira halo akuzasaun oi-oin hasoru CNRT no konsidera CNRT ilegal. Bainhira krize mosu tanba governo Fretilin nian inkapasidade no inkompetensia, Mari Alkatiri mos radikaliza konfrontasaun kontra Xanana makaas tebes. Hatudu dun oi-oin ba Xanana Gusmão, dun hirak nebe la presiza temi tuir iha biban ida ne’e tanba mundo tomak hatene, soe governo Fretilin nian responsabilidade no sala hirak nebe halo ba hotu Xanana Gusmão nebe iha biban nebaa hanesan xefe de estado. Akuza Xanana desde ho liafuan moruk to’o lia-fuan kroat mos lideransa Fretilin hato’o hotu ba aktual lider CNRT.

Mari Alkatiri mos halo esforsu oi-oin desde ke nia foti an ba PM atu marjinaliza Sr Xanana Gusmão. No mos buka dudu ses Xanana Gusmão husi prosesu iha ukun an nian laran, situasaun ida nebe entre sira na’in rua, karik haree tuir prinsipios nian, sai tiha antagoniku ida nebe susar tebes atu servisu hamutuk, maske Xanana rasik konsiente katak fo liman ba malu atu foti Rain Doben Timor no tulun Povo terus na’in sira sai husi susar no terus. Maibe nudar ita ema nebe iha mos sensibilidade nebe bele oin seluk ho ema sira seluk mos halo sai la iha kondisoins atu servisu hamutuk ho Fretilin iha Mari Alkatiri nian ukun.

Tanba satan hirak nebe Sekretario Geral Fretilin nian latan ka koloka mak bainhira Fretilin manan iha eleisaun liu ba ho maioria simples maibe buka partido ruma atu halo koligasaun hodi Fretilin forma governo mos buka la hetan. Situasaun presedente hirak ne’e mak halo partidos hat (4) CNRT, PD, PSD no ASDT nem ida hakarak halo koligasaun ho Fretilin. Tanba satan boot latan fahe Fretilin ho partidos hat ne’e. Neduni ba hakerek na’in, la’os novidade mosu entendimento alargadu entre partido hat hodi hamosu AMP, nebe mos iha lejitimidade tuir konstituisaun RDTL atu forma governo lori naran aliansa pós eleitoral iha artigo 85 ho 106 konstituisaun RDTL nian mahon. La’os novidade mos bainhira Fretilin nebe hetan maioria simples iha votasaun la forma governo tuir lideransa Fretilin nian hakarak.

Interpreta artigos 85 no 106 iha konstituisaun nebe Fretilin halo ne’e hatudu lideransa Fretilin nian hakat tuir fasilitismo hodi buka abrigu ba Lei Inan Konstituisaun nebe, partido Fretilin rasik mak hakerek. Lideransa Fretilin rasik mos buka boleia mesak artigo rua konstituisaun nian 85 ho 106 ne’e maibe infelizmente Fretilin boleia mesak la hetan, tanba artigo rua ne’e mos reserva tiha ona fatin ba Aliança Maioritária Parlamentar-AMP. Halai ba fasilitismu ne’e ba ema sira nebe la iha razaun nebe forte, la iha argumento nebe bele suporta nia ba kaer ukun. Fasilitismo mos la seluk ho ema sira nebe hala’o oportunismo politiku tanba dezesperado ho realidade. Tanba sira hanoin katak povo eleitores sira sei fo maioria absoluta ba partido historiku Fretilin tan nian valores historikus, maibe sira haluha tiha sira nian hahalok aat nebe sira halo hasoru ema Timor oan sira seluk. Sira sei sinti an katak Rain no Povo Timor ne’e Fretilin nian mesak ne’eduni povo sei la husik Fretilin monu ba desgrasa. Sira sei kaer metin sira nian imajinasaun ida katak FRETILIN NE’E MAK POVO NO POVO NE’E MAK FRETILIN NEDUNI BELE UKUN TIMOR DURANTE MEIO SEKULU?

Pura imaginação à auto divertir-se !

Basaa, atu interpreta artigos rua ne’e la presiza espesialistas ruma mak bele interpreta, la presiza hasai kursu direito ka hukum, maibe kualker sidadaun ida nebe hatene le, ba sidadaun ne’e la iha tan duvida katak mesmo Fretilin manan eleisaun maibe la bele forma governo tanba la hetan partido ruma atu halo koligasaun ho nia. Razaun seluk nebe hatudu Fretilin nian manobra hodi sadere ba artigos 85 no 106 mak atu dirijentes sira iha Fretilin hakarak mantem iha poder. Uluk durante Fretilin kaer ukun nunka halo tuir konstituisaun, dala barak Fretilin uza konstituisaun atu defende nian intereses deit. Viola konstituisaun hanesan hatudu iha Mari Alkatiri nudar PM nebe ordena directo F-FDTL aktua hasoru manifestantes sivis sira. Neduni la iha sentidu no ridikulu kuandu Fretilin hasoru difikuldade mak halai ba konstituisaun hodi interpreta la hun-la dikin no mos interpreta mos sala.

Politika Boikota to’o bain-hira?

Fretilin mos hakat tuir dalan ida nebe sala, dalan nebe la’os dignifika partido maibe halakon kreditos nebe konkista husi povo tanba valores historikus. To’o ohin loron povo eleitores sira balun sei fo votus ba Fretilin la’os tanba Sekretario Geral ho Presidente Fretilin ho lideransa seluk-seluk nian merito, maibe ema sinti afektu ba historia deit. Haree deit mak rezultado eleisoins hirak ikus ne’e. Iha 2001 Fretilin hetan maioria absoluta iha eleisoins ba asembleia konstituinte. Iha 2007, Fretilin lakon eleisoins presidensiais, lakon mos lejislativas tanba la konsegue forma governo, ikus liu Fretilin lakon mos presidensia PN ba Partido Democrático-PD, partido ida nebe nian lideransa Mari Alkatiri konsidera sei labarik hodi haruka lideransa PD nian ba aprende tan . Se karik dirijentes Fretilin sira mak iha meritu, Fretilin nian grafiku kona ba eleisoins ne’e aumenta no sa’e gradualmente. Iha realidade grafiku nebe Fretilin hetan iha eleisoins tun drastika. Agora Fretilin mos eskolha dalan atu tuir mak boikota. Bainhira iha PN Fretilin nian kandidatu ba presidente PN lakon ba AMP nian kandidatu, Fretilin boikota hodi la tama Parlamento. Kuandu PR la konvida Fretilin forma governo, tanba la iha kondisoins minimas atu Fretilin forma governo hodi PR konvida AMP forma governo. Fretilin mos kontra desizaun xefi de estado RDTL no la rekonhese governo nebe Xanana Gusmão lidera. Iha nebe Fretilin mos boikota ba tomada de pose ba IV Governo Konstitusional forma husi Aliança Maioritária Parlamentar.

Fretilin nian politika boikota ida ne’e atu to’o nebe ?

Povo Timor tomak haree hodi akompanha no tetu, Fretilin nian politika boikota ne’e diak ka lae, lori benefisio ba partido ka lae no boikota ne’e dalan diak ba servi povo ka lae?

Povo Timor-Leste terus na’in sira mak hatene...

Imi mak haree rasik ho imi nian matan kroat neon matenek wa’in !

Victor Tavares (sidadaun)
Hela iha Porto-Portugal