Qualidade IV Governo Konstitucional

Governo ida waihira atu halao diak servisu ka kumpri ninia mandatu ho diak, laos deit programa no plano nebe diak hakerek iha surat tahan nia leten, maibe buka oinsa maka halao. Atu programa halao diak ho hatan ba necessidade povo nian, buka mos iha equipa ida nebe diak, servisu hamutuk no iha kompetencia teknika no profissional. Konaba kompetencia equipa IV Governo Konstitucional maka hakarak halo analise iha hakerek ne´e. Hare konaba Equipa Governo Xanana hatudu iha ninia kualidade iha komposisaun Ministros no Secretario de estado sira, kualidade iha ne´e hare husi sira nia backround politik, akademika, kultural, profesesionalismo no jerasional.

Politik: Tamba AMP maka harii Governo neduni membros Governos ne´e barak liu maka mai husi Patido sira nebe maka halibur hamutuk iha AMP (CNRT,PD,PSD i ASDT). Iha ne´e fahe pasta ne´e koresponde ba partido ida-idak. Partido sira nebe fo sira nia quadros ba tur iha IV Governo Konstitucional tamba sira tuir duni kriterius sira iha leten: iha kompetencia profissional no teknika. Tamba kargo ministro no sekretariu estado ne´e kargo politik, neduni normal se Minsitro, Vece-ministro no Secretario de estado mai husi partido politik, tamba sira maka defini estrategia politik hodi harii AMP.

Akademika: Kualiadade no kompetencia iha IV Governo Konstitucional, maka inkluindo membros sira barak maka iha backround formasaun akademika. Barak maka iha esperiencia iha mundo Universitario, barak maka halao estudos nebe karakter akademika. Neduni sira ninia kontributo ba desenvolvimentu Rai Timor LoroSae (RTL) ne´e importante tebes iha tinan lima (5) mai ne´e. Governo sei ukun diak no halao diak servisu waihira iha equipa ne´e iha membros sira barak maka mai husi mundo akademika.

Kultural: Iha parte kultural, iha backround kultural mai husi sira nia formasaun no experiencia profissional bele halo riku equipa IV Governo Konstitucional, tamba sira nebe hola parte ba equipa Governo Xanana mai husi parte hotu, balun koalia lian Ingles diak tamba sira eskola ka servisu iha rai sira koalia Ingles, sira be hetan experiencia kultural husi rai sira koalia Portugues tamba hetan sira nia influencia kultural husi rai sira koalia Português, sira be hetan formasaun akademika husi formasaun Indonesia nian mos lori kulturalmente iha influencia diak, sira nebe hetan experiencia iha funu iha ailaran, iha klandestina, balun servisu iha administrasaun Indonesia nian. Experiencia sira ne hotu tau hautuk hodi halo riku liu tan IV Governo Konstitucional. Ne kapital (K) importante ida maka bele kontribuio ba desenvolvimento RTL.

Profissionalismo: Tamba sira hola parte ba IV Governo Konstitucional laos sira hafoin servisu maibe sira iha duni ona experiencia iha servisu iha sira nia profisaun hodi moris. Neduni sira hatene duni oinsa maka «Vida profissional», kontrariu ba Governo Mari Alkatiri nian barak liu maka tur iha Governo, posto ka kargo Ministro no vice-Ministro ne´e hanesan «1º Emprego» ida ba sira. Iha equipa IV Governo Konstitucional, barak maka hetan experiencia servisu: Servisu iha NGO´s, servisu iha institutuo privado no social, balun iha experiencia iha mundo Universitario, balun servisu iha profissaun liberais, no sst. Experiencia sira ne´e hotu bele halo riku liu tan Governo no sei ba halao ho diak Programa no plano IV Governo Konstitucional.

Jerasaun Tuan ho Foun: Iha equipa IV Governo Konstitucional ne´e, iha barak liu maka husi jerasaun foun. Iha ne´e hatudu katak Jerasaun Xanana, liliu PM IV Governo Konstitucional hadia ona dalan hodi fo ba jerasaun foun atu kaer ukun iha RTL. Ne´e indikador diak ida ba desenvolvimentu aban bai rua nian, jerasaun tuan buka fo ona knar no Ukun ba jerasaun foun. Ho PM Xanana hadia dalan ba ida neba.

Hare husi backround sira nebe maka membros Governo nian, hatudu hanesan K nebe importante, tamba analise husi funcionamentu equipa Governo ida nian buka tau hamutuk experiencia sira hotu: Politik, Akademika, kultural, profissionalismo no jerasional. Equipa ida diak, mos buka iha ulun diak ida, ka PM diak ida hodi dirige. PM hanesan Maestro ka Treinador Futebol nebe treina ka direige orquestra ida. Orquestra ida toka musika diak waihira iha Maestro mos diak ida hodi dirige, waihira Maestro ladiak, orquestro bele halibur musiku sira nebe toka instrumento hotu-hotu diak maibe orquestra toka la diak no rona musika la furak. Hanesan Treinador Futebol ida waihira treina team nebe mesak estrela ka bintang deit buka iha estrategia diak ida no defini funsaun diak ida ba ninia jogadores sira hodi joga no bele manan. Se treiandor maka la iha estrategia, la koloka jogadores sira joga diak, la kria ambiente harmonia iha equipa team, to´o ikus joga ladiak team lakon maske ho jogadores estrelas deit. Banati husi Mastro iha orquestra ida no Treinador Futebol, PM Xanana Gusmao buka oinsa maka dirige ka treina diak team ka equipa Governo nian, atu nune bele halao servisu diak tuir programas no plano sira nebe Governo nian. Mos buka dialog permanente ho parceiro sira nebe maka harii AMP. AMP buka fiel ba ninia momerandum nebe assina ona nebe dura ba tinan lima (5). Atu dura no kumpri AMP ninia misaun ne´e implika: solidariedade no respeitu. Partidos sira hotu nebe maka hola parte ba AMP buka iha solidariedade laos iha nivel nasional deit maibe buka socializa to´o aldeia no suku sira hodi hatou tatoli programa no plano Governo ba Tinan lima nia laran.

CNRT nudar partido 2º iha eleisaun legislativa buka respeitu ho solidariedade ho partido sira seluk nebe hola parte ba AMP, ne´e koligasaun partidos politikus nebe ho ideologia no programas eleitoral ketak-ketak, CNRT oras ne´e nudar Partidos Politikus, neduni Prezidente CNRT ninia fatin hanesan Prezidente Partido sira seluk, problema maka ne´e CNRT laos Governa mesak, waihira partido ida maka la satisfeito ho PM ka CNRT bele kria problema ba Governo. Lian kiik sira hanesan hili pastas ho membro partido sira buka konsulta ho diresaun partido ida-idak, hatama sira nebe la hola parte ba AMP buka konsulta mos partido sira hola parte AMP ninia paracer, fahe pasta mos buka equilibrio ba partido sira hotu, se lae Partido A ka B maka iha liu previlegio tamba kaer pasta mesak estrategika, partido balun lae. Laos fahe pasta maka importante maibe foti soe hela hodi haksesuk malu tamba IV Governo Konstitucional la hanesan Governo Mari ALkatiri/Fretilin, Fretilin Governa mesak, IV Governo Konstitucional ne´e koligasaun, Governo AMP tradus husi vontade maioria povo nian ba mudansa neduni halo buat nebe diak hodi hatan ba povo nia susar no terus, neduni faktores sira nebe temi ona ne´e importante oinsa maka bele dura IV Governo Konstitucional. Tamba hare ba IV Governo Konstitucional ninia pontus fortes maka hare husi equipa nebe representa qualidade iha ninia representasaun, mos iha pontus frakus waihira Governo ida harii husi Koligasaun husi partidos politikus, nebe representa interesse sektoriais la hanesan, ideologia la hanesan, programa no massa eleitoral la hanesan!

António Ramos Naikoli,
Timor Oan Hela iha Lisboa, Portugal