FRETILIN TENKE KAER GOVERNO HO PM RASIK?

Sr. Francisco Lu Olo Guterres foin interpreta hetan artigo 85 husi Konstituisaun RDTL atu oin sa Fretilin bele tuba metin iha poder, enkuanto ema husi partidos hirak seluk no mos ema sidadaun babain hatene ona katak mesmo aplika ka hakat tuir artigo 85 husi Konstituisaun ne’e mos Fretilin la iha kondisoins atu hatudu nian ema ba PM hodi PR José Ramos Horta nomeia.

Fretilin nian problema agora la’os atu estuda artigos hirak iha Konstituisaun hodi bele interpreta kona ba partido ida nebe mak iha liu lejitimidade atu indijita ninian ema ba PM, lae. Fretilin iha ka lae legitimidade indijita nian ema ba kargu PM ne’e la’os problema nebe agora dadaun atu analiza, maibe oin sa Fretilin bele governa, ida ne’e mak importante atu haree. La iha duvida ba ema ida katak Fretilin iha lejitimidade atu hatudu nian ema ida ba PM. Presidente da República mos la iha direito atu rejeita ema ruma husi Fretilin nebe partido Fretilin hatudu. Nune’e mos PR, la iha problema ba PR nomeia ema nebe Fretilin hatudu.

Se PR la hanoin konsekuensias nebe bele mosu husi ninian desizaun karik depois de eleisaun liu tiha loron ida ka rua PR husu ba Fretilin atu Fretilin hatudu ninian ema ba PM hodi forma governo, hodi nune’e PR kumpre artigo 85 iha konstituisaun nian haruka.

Problemas no Senarius Provaveis

Problema boot nebe ohin loron Fretilin hasoru mak OIN SA Fretilin hetan tulun husi partidos hirak iha opozisaun hodi nune’e Fretilin nebe hetan maioria simples iha eleisaun ne’e bele forma governo tuir normas demokratikas hodi bele hala’o knaar ka poder.

Ema hotu hatene ona katak se Fretilin mak kaer ukun, governo de Grande Inkluzaun ne’e lideradu husi Fretilin, fulan rua ka tolu governo monu fali deit tanba opozisaun iha Parlamento Nacional sei vota kontra kualker inisiativa governo nian. No mos bainhira governo monu ne’e la’os tanba Fretilin mak dirije ezekutivu mak monu lae, no opozisaun mak la gosta mos lae, maibe tanba regras demokratikas iha Parlamento Nacional mak naturalmente dita nune’e.

Bazeia ba rezultadus nebe partidos hirak iha opozisaun hetan no mos soma hamutuk deputados sira husi opozisaun iha parlamento, iha nebaa hatudu momos ona katak opozisaun se hamutuk hotu deputados barak liu dok tebe-tebes nebe eventualmente kontra governo lideradu husi Fretilin iha votasaun ruma. La bele hanoin dok demais, hanoin deit ba votasaun ba Programa Orsamentu de Estadu nebe, sei sai primeiru pasu governativu mos ita bele preve momos ona katak Planu ba Orsamentu de Estadu (POE) deit bele la pasa iha PN se opozisaun maioria vota kontra.

Ida ne’e hanesan Primeiru senariu se Fretilin hakarak Fretilin mak dirije governo de grande inkluzaun sem konsensu alargadu nebe ekilibradu.

Segundu senariu, se Fretilin aseita PM mai husi partido opozisaun tan opozisaun rejeita PM ema husi Fretilin, maibe Fretilin sei hatan partisipa iha governo de grande inkluzaun maibe Fretilin nian aseitasaun ne’e la ho laran tomak, nune’e iha kualker momentu Fretilin bele dada an husi governo, maibe governo sei la monu tanba opozisaun ho maioria sei aguenta hala’o knaar sem Fretilin.

Terseiru senariu, se opozisaun husi AMP aseita PM mai husi Fretilin maibe ministros sira maioria husi AMP, karik iha senariu ida nune’e mos Governo de Grande Inkluzaun la estavel ho solidu tanba ministro sira maioria bele satan kontroversia ba PM, la akata ordem husi PM ho buat sst.

Kuartu senariu, Governo Grande Inkluzaun forma husi = Fretilin + (CNRT+ASDT+PD)- (PSD) = AMP -1. Iha senariu ida ne’e Fretilin admite PM husi opozisaun, iha konsensu alargadu no konverzensia iha programas atu aplika no fahe responsabilidade ekilibrada tanba mutuo entendimentu maibe estabilidade GGI depende ba to’o nebe membrus governo GGI ida-idak nian espiritu altruismo ho neon boot ne’e to’o nebe.

Kintu senariu, GGI kompostu husi = Fretilin + (CNRT+ASDT) = AMP -2. Iha senariu ne’e PM bele husi kualker partido ida, bele iha estabilidade governativa, iha konverzensia programas entre sira, entendimentu mutuo no kooperativu, maibe exklui rezolusaun ba problemas nebe mosu iha krize.
Problemas boot nebe governo GGI atu hasoru mak governo sei lakon kredibilidade total husi Povo tan Povo sei la fiar tanba justisa nebe Povo hakarak husi governo la mosu no opozisaun iha PN sei konfronta makas governo ho problemas justisa nian. Nune’e bele provoka ajitasaun husi ema sira ka movimentu nebe sinti an vitima no preokupasaun iha sosiedade nebe bele halo mosu fila fali tensaun politika no sosial.

Sestu Senariu, inisiativa husi Fretilin atu forma GGI la funsiona tanba frakasada, nune’e mak ladan ba ELEISOINS ANTESIPADAS nakloke, iha nebe hakerek na’in hola konkluzaun : ITA lakon tempu ba sasan nebe la iha folin, na’ok povo eleitores nian tempo, enerjia, hasusar povo ho eleisaun. ITA la konsegue forma governo tan deit ita nian IGNORANSIA ba buat hotu, dezenvolvimentu la la’o ba oin tanba ita dada tempu barak liu halo eleisoins no hanoin forma governo. ITA la iha sensibilidade ba Povo nian terus, la iha interese atu fo atensaun ba Povo maibe ita bele halo buat hotu ba PODER.

Victor Tavares