VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE
 

segunda-feira, 30 de julho de 2007

Fernando Lasama de Araujo eleitu Presidente Parlamento Nacional

AFP/File/Mario Jonny Dos Santos
FORUM HAKSESUK - Lider husi Partido Democratico (PD), Fernando Lasama de Araujo, hetan apoio maioria husi deputados sira hodi tur hanesan presidente iha uma fukun Parlamento Nacional Timor-Leste ba periode 2007-2012.

Iha votasaun, Fernando Lasama husi PD, hetan 41 votus kontra kandidatu Fretilin nian, Aniceto Guterres, nebe soma 24 votus, husi plenariu 65 deputadus mak agora tur iha uma fukun Parlamento Nacional.

Lasama agora tur iha fatin importante ida iha hierarquia Estado RDTL hetan saudasoens husi deputadus sira hotu, incluindo nia companheiro no adversario politico Aniceto Guterres. Tan ne’e, Fernando Lasama iha nia diskursu hato’o lia-fuan kmanek ba companheiro Aniceto Guterres dehan: “Molok hau taka hau nian diskursu nee, hau hakarak hatete buat ida. Ohin, bainhira eleisaun ba Prezidente Parlamentu nee ramata, hau ho hau nia kompañeru Aniceto Guterres, kandidatu Fretilin, hakat ba malu, fo liman ba malu no hakuak malu.”

Hanesan jerasaun foun, Fernando Lasama ho Aniceto Guterres, laiha objectivo seluk selae mak haka’as-an hodi servisu no tulun harii rai doben Timor-Leste, hanesan kbiit nebe mak sira rua hatudu servisu hamutuk iha RENETIL. “Nudar jerasaun foun, ami nain rua, hau ho deputadu Aniceto Guterres, hatudu an nudar adversariu nebe diak, laos inimigu. Ami hakarak hatoo mensazen diak katak politika, laos atu kria inimigu, maibe atu hatudu katak ita respeita malu nafatin, maske hanoin la hanesan.”, Lasama haktuir hodi taka nia diskursu inagurasaun hanesan prezidente eleitu Parlamento Nasional periodu 2007 – 2012, hatoo ba iha asembleia Parlamneto Nasional RDTL, iha Dili, 30 Julho 2007.

Iha biban ne’e, Presidente eleito PN, Fernando Lasama la haluha hateten atu halo esforsu hodi garante funsionamentu iha PN. Nudar moderador PN no porta-voz guvernu nian, Lasama prontu atu halao nia knar hodi tau interese povu nian iha prioridade ida nebe as tebes, maski reconhece katak “Knar hanesan Prezidente Parlamentu Nasional nebe distintu deputadu sira hatur mai hau nia kbas, hau simu hodi asume responsabilidade ida nee, maske naha boot no todan tebes. Hanesan povu kiik no kiak nia oan nebe moris hamutuk ho povu, hau, sei la halai hosi naha todan nee. Hau simu responsabilidade boot ida nee, hanesan honra boot ida hosi povu, hodi hatutan lian povu nee nian ba nasaun no mundu tomak.”

Ho eleisaun ne'e, Fernando Lasama truka Francisco Lo-Olo Guterres husi kadeira Uma Fukun Parlamento Nacional RDTL hodi halao kna'ar nudar Preidente Parlamento ba periodo 2007-2012. FH

1 comentário:

Nota: só um membro deste blogue pode publicar um comentário.