Renetil nia militante Rua halo rame demokrasia

Mari Alkatiri koalia ba radio SBS, nia la fiar sira, nebe halo parte AMP sei vota tomak (em bloco) ba Fernando La Sama sai presidente PN. Maibe resultado sai mai, la'os AMP deit mak vota, maibe PUN inklui deputado Undertim nian ida, fo hotu nian votos ba Lasama.

Alkatiri uluk mos dehan nia conhece povo Timor e nia fiar katak povo Timor sei hili Lu Olo, maibe resultado ikus liu hatudu Alkatiri afinal la conhece povo Timor.

Agora mos nia sik sala tan, e atu forma Governo ne mos nia sei fiar sala tan, tanba agora nia sei fiar hela deit Fretilin mak sei bele forma Governo.

Tak lakon ho Xanana, nia lakohi kandidata an ba PM. Foun hare hanesan iha possibilidade Fretilin hetan tan koligasaun ruma atu forma Governo, Alkatiri la dehan nia la sei sai candidato ba PM, maibe dehan sei depende CCF ka CPN mak hili. Agora esperansa atu forma Governo la iha ona, nia mosu mai dehan katak nia lakohi sai PM. Lu Olo mos hatene katak nia la sei eleito nudar presidente PN hasoru La Sama, tan ne halai tiha ona antes tama batalha, maski durante ne dehan prontu hela deit ba buat hothotu.

Fo Aniceto mak ba iska, maibe Aniceto mos hakarak to'o lalais poder, neduni foin iha dezembro liu ba ba tau naran tama Fretilin, iha congresso hili kedas ba Comissao Jurisdicao no ikus mai dudu ba candidato presidente PN, Aniceto simu ho liman rua, maibe nia hatene hela nia la sei manan.

Aniceto hanesan tama tiha gaiola laran, atu la simu lideransa Fretilin nian husu mos la, neduni hodi biit ba deit. Tanba tauk agora la simu, aban bainrua Fretilin la sei fo konfiansa tan, tanba ne, haruka ba mate mos ba deit. Uluk ema barak dudu nian ba atu hasoru Sebastiao Dias, nia lakohi tanba nia seidauk tama Fretilin no hatene Fretilin sei hili Sebastiao, neduni nia la brani avansa. Nia hakarak avansa quando la iha kandidato seluk. Maibe dala ida ne, sai los tiha deit "ayam potong". Maibe la buat ida, husik ba Renetil rua halo rame netik demokrasia. Ida ne deit mos hanesan vitoria ida ona. Afinal Renetil hotu manan, tanba sira rua hotu husi Renetil, neduni sira rua hotu manan. Parabens ba sira rua hotu no parabens mos ba Renetil hotu tanba Renetil hatene prepara ema sai politik nain nebe diak, hanesan La Sama hakoak Aniceto hodi dehan, ideias mak ita la hanesan, maibe keta haluha, tein batar da'an oan ruma iha uma keta haluha bolu hau no karik hau tunu sardina oan ruma, hau sms ba O mai de'it. Ita sei hanesan uluk nafatin.

Uluk ita iha Renetil mos ita iha diferensa de opinuan ita hamutuk nafatin, ita la fahe malu, agora ita partido ho hanoin la hanesan mos ita sei hakoak malu nafatin, tanba ita luta ba ukun an laos atu fahe malu hanesan katuas sira.Ita hotu hamutuk kontribui ba paz ho desenvolvimento Timor nian liu husi dalan nebe la hanesan, maibe ho hanoin la hanesan sira ne ita bele halo ita nia hanoin sai riku liu tan hodi lori rai ne ba oin.

Viva Renetil!

Hau hanoin maluk Mateus Goncalves mos mai ita hamutuk halo Viva oan ida hanesan uluk. Tanba ita boot la fiar partido, ne direito ida, maibe ita boot mos tenki hatene katak, la iha rai ida mak la iha partido. Karik partido labarak, pelo menos ida netik hanesan rai Komunista sira nian ou fascista sira nian nebe defende partido unico. Partido la iha, demokrasia mos la iha, no Governo mos la iha, tanba partido sira mak halo politika, maski bosok mos barak, maibe ne realidade ida. Importante mak matan moris hodi fihir ida nebe diak oituan hodi hili sira.
Hakoak boot

Teodoro Freitas

Fonte: renetil@yahoogroups.com