Dilema Ba Ramos Horta

Liu ona Fulan ida maka Timor LoroSae (Leste) halao eleisaun legislativa hodi hili ninia Lian Nain sira ka deputados ba tur iha uma Fukun ka Parlamento Nasional. Maibe liu ona fulan ida (30/06/2007) maka ita hatene ona resultadu eleisaun legislativa, Fretilin maka manan (29%) no CNRT (24%), partido rua (2) ne´e, Fretilin ho CNRT labele harii IV Governo Konstitucional tamba sira nia votus la to'o atu harii Governo tamba la bele garante ba maioria iha Parlamento Nasional. Tuir Ukun Fuan Inan (UFI) iha ninia artigo 106 ne´e loke dalan ba Partido nebe maka manan harii Governo no hili PM foun hodi hatou ba Prezidente Republika (PR). Dalan seluk, koligasaun maioria parlamentar maka harii Governo no hili PM hodi hatou ba PR.

Dalan rua (2) ne´e nakloke hotu, Fretilin oinsa maka atu Governa, Fretilin buka hakbesik ba Partido Demokratiko (PD) nebe hetan pertcentagem (11%) nebe hetan kadeiara (8) iha Parlamento Nasional. Buka tau tan koligasaun ASDT/PPT+UNDERTIM atu bele garante ba maioria Parlamentar. Dalan ida ne´e odamatan la nakloke tamba PD lakohi halo koligasaun ho Fretilin. Tamba Fretilin la konsegue ona forma koligasaun, neduni Fretilin hatou fali proposta atu harii «Governo Inklusaun Nasional (GIN)» hodi hatou ba PR. Husi sorin CNRT mos halibur malu ho partido seluk hanesan: ASDT, PSD ho PD, harii AMP (Aliança Maioria Parlamentar). AMP mosu hanesan alternativa ba Fretilin nebe minoria iha parlamento.

Hare ba realidade ida ne´e PR buka halibur Partido Politikus sira hotu hodi diskuti ka haksesuk malu ho sira konaba solusaun nebe ideal maka bele hatan hodi buka dalan nebe diak ba Timor, buka harii Governo ho Fretilin+AMP. Maibe surumutuk nebe maka halao iha Dare la hetan «sucesso» tamba interviniente sira, liliu Fretilin ho AMP ida-ida defende ninia posisaun.

Tamba PR la konsegue halibur hamutuk hanoin Fretilin ho AMP nian, neduni nia hatou hanesan «ameaça» ida ba Partido sira hotu (Fretilin+AMP), se la konsegue hetan dalan, PR José Ramos Horta (JRH) sei ba harii Governo mesak. Tuir PR JRH ninia entrevista iha Jornal Público dehan katak “«Tomarei uma decisão entre as duas previstas na Constituição (Convidar o partido mais votado ou a coligação com maioria parlamentar) no dia 1 de Agosto (in Publico,26/07,p.14 e 15)»”. Dilema nebe maka JRH hetan maka ne´e ninia komprimisso politika no interpretasaun ba UFI hodi hola decisaun.

JRH iha komprimisso politika ho Partido sira nebe maka harii AMP, se la iha partido iha AMP ninia tulun JRH la manan iha eleisaun Prezidencial nebe halo iha 2ª volta (09/05) entre Lu´olo (Fretilin) vs José Ramos Horta (Koligasaun kontra Fretilin). Hare husi eleisaun 1ª volta (09/04) Lu´olo maka iha liu «vantagem» ho 28% kontra 22% JRH. JRH manan iha 2ª volta tamba hetan tulun husi partido sira nebe maka oras ne´e iha AMP ho partido sira seluk nebe maka la hetan representasaun iha Parlamento Nasional. Partido politika sira nebe fo suporta ba JRH tamba sira iha kumprimisso politika ho JRH, sira iha objektivu komun no interesse komun nebe maka halibur sira hamutuk ho kandidatura JRH ba tur iha Palacio Ahu Kedesan. Partido sira nebe maka suporta ba JRH tamba sira lakohi kandidatu Fretilin nian maka ba tur iha Palacio Ahu Kedesan no mos sira lakohi atu Fretilin maka kaer nafatin ukun, neduni sira fila fali tau kadeira hamutuk hodi harii AMP. Tamba ne´e maka Partido sira Oposisaun mobiliza sira nia eleitorado hodi ba vota ba kandidatu JRH. To´o ikus JRH manan ho perncentagem nebe ás tebes (69-70%). Ida ne´e maka dilema ba JRH nudar PR. Tuir Director Jornal Público, José Manuel Fernandes ninia hakerek iha nota editorial mos rekonyece katak: ”«Essa coligação pode ser frágil e heterogénea, mas ela reflecte a mesma vontade maioritaria do povo timorense que permitiu a Ramos Horta ser eleito: a vontade de experimentar politicas diferentes das prosseguidas pela Fretilin. Essa opção correndo bem, permitiria que Timor experimentasse a sua primeira alternância democrática, sinal de que começava a ser uma democracia madura e não uma democracia formal onde, mesmo havendo direito de voto, os mesmos ficam sempre no poder (in Público,26/07,p.42)»”.

Dilema seluk ba JRH maka ne´e, interpretasaun ba UFI ka Konstituisaun RDTL. Tuir PR ninia haktuir ba Jornal Publico ne´e klaro los, odamatan la nakloke ba «Eleisaun anticipadas» tamba deit Fretilin ho AMP la tau hanoin hamutuk. Neduni PR sei ba halo tuir Konstituisaun ka UFI ninia hakerek atu bolu Partido Fretilin ka AMP harii Governo. Tuir Director Jornal Público, José Manuel Fernandes ninia hakerek iha nota Editorial (26/07) katak situasaun nebe hanesan Timor Lorosae (leste) nian so akontece iha rai sira europa demokratiku, rai sira nebe demokrasia lao makas ba oin, hodi haknauk ba situasaun akontece iha Austria, rai nebe desenvolvido ekonomika, kultural no politikamente, mos hola parte ba Uniao Europeia. Haknauk ba JMF ninia hakerek iha nota editorail Público nune: ”«Mas há muitos exemplo na europa democratico de governos deste típo, valendo a pena recordar o exemplo austriaco, quando foi nomeado PM o lider do terceiro partido, de centro-direita, então coligado com segundo partido, de extrema –direita, isolando o partido mais votado, uma formaçao de centro-esquerda (in Público,26/07,p.42)»”.

Dilema ba PR JRH hodi konvida Fretilin ka AMP hodi harii Governo iha loron (01/08). Dalan luan hela no odamatan nakloke hela ba PR hodi hola decisaun nebe bele tradus ba vontade povo nian no halo tuir UFI ka Konstituisaun RDTL nian. Hanesan haktuir iha Forum Haksesuk katak “PR sei bolu AMP ba harii IV Governo Konstituicional (Forum Haksesuk)”. No hare iha dada lian ka entrevista PR ho Jornal Pública, dalan ba ida ne´e mos nakloke hela. Tamba PR JRH lakohi «eleisaun anticipada». Se bolu Fretilin maka harii Governo no hili PM, loke dalan ba «eleisaun anticipada», se cenariu ida ne´e ninia odamatan taka ba PR. Neduni interpreta UFI ka Konstituisaun RDTL maka PR bolu AMP mka harii Governo no hili PM foun!

António Ramos Naikoli
Timor oan hela iha Lisboa, Portugal