Fretilin Lansa Terror iha Same

Same, Forum-Haksesuk (FH). Militante Fretilin lansa terror iha Holarua, Same. Haktuir ne´e husi testamunya nebe maka FH kontaktu liu husi telefone iha aldeia Fatuku, suku Holarua, sub-distrito Same, distritu Manufahi. Tenik tan testamunya nebe lakohi identifika ninia identidade tamba tauk bele sofre «intimidasaun», alvo ba terror husi militante Fretilin hasoru militante no apoiante ba partido seluk, atake no terror liu husi tuda uma militante no apoiantes partido sira seluk nia uma, hanesa tuda uma iha Fatuku iha segunda kalan (25/06) hasoru uma militante no simpatizantes ba partido seluk nian. Mos terror hasoru sira nebe maka fornece sira nia kareta ba tula militantes no simpatizantes partido seluk nian ba tuir kampanye. Suku Holarua ne´e base ba suporta Fretilin Radikal Maputo (FRM) iha distritu Manufahi, neduni sira ladun fo «Tolerância» ba militante no simpatizantes husi partido seluk.

Atitude Fretilin iha Same kontrari ho kampanye nebe maka Partido Fretilin nian nebe favor ba estabilidade no justiça. Tuir Lu´olo iha ninia deklarasaun iha loron 10.06.2007 katak: ”Opozisaun lakon reputasaun kona ba nia pozisaun ba paz, lei no ordem”.

Ba Aniceto Guterres, mos defende bandeira justisa maka sai hanesan lema importante ba Fretilin ninia komitment, hodi cita ba servisu no ninia misaun nudar cefe CAVR no ninia komitment hodi defende ba justisa nudar bandeira ba Fretilin iha kampanye ne´e.

Tuir analistas sira,waihira husu sira nia komentariu konaba relasaun entre diskursu politika oficial diresaun Politika Fretilin nian ho ninia ligasaun ho atitude militante base nian, hatudu katak “Fretilin uja diskursu konaba estabilidade, paz no justisa hanesan retorika deit. Tamba diresaun iha leten dehan buat ida, maibe faktu desmente no hatudu katak Fretilin maka fonte ba violência no instabilidade”. (FH)