Mensagem de S. Ex.a O Presidente da República
O PRESIDENTE DA REPÚBLICA
MENSAGEM
Dili, 22 de Junho de 2006

Povo doben no terus nain Líderes no Membros Fretilin nian

Ha'u husu lisensa ba Maluk sira, atu koalia oitoan kona ba Fretilin, tamba ha'u conhece Fretilin, liu Delegados sira balun ka sira hotu nebé iha Congresso foin liu ba né, hatene foti deit liman, tamba tauk lakon serbisu, hodi fo han fen no oan, i tamba simu osan hosi kotuk (ha'u hatene ema ida ke simu
100.000 dólares atu sosa kotu Delegados sira seluk, la hatene nia fahe lolós ka... fo lima ratus, lima ratus ba delegados sira, i nia ta'u osan né hotu iha nia bolso). Maibé, la buat ida, nia atu riku to'o iha nebé, né asuntu privadu, ne duni la os problema povo nian, tamba osan né Partido nian. Doben sira
Ha'u uluk, Membro Comité Central Fretilin nian, to'o ha'u sai iha 1986. Se la fosse crise no violência nebé mosu, tuir kedas Congresso Fretilin nian, tamba nudar Presidente da Republica, ha'u tenki tau matan ba instituições democráticas nia vida, ha'u atu hasai critica nebé maka'as kona ba Congresso, loron 17 to'o loron 19 Maio foin liu ba né. Congresso ida né viola alínea c), artigo 18º, Lei nº 3/2004, kona ba Partidos Políticos, nebé dehan: Titulares (katak ema nebé kaer ka hetan knar, iha) orgauns direksaun (partidu) nian, hotuhotu, tenki hili, liu husi voto directo no secreto ba filiados sira ka ba assembleia ida nebé representa filiados sira ne'. Artigo 46.º Constituição RDTL, iha nia n.º 3, dehan nuné: 'Lei sei regula atu forma no organiza Partidos Politicos sira'. Lei né, mak Lei n.º 3/2004.
Lei qualquer ke mosu iha ita nia Rain, labele viola Constituição. Organizasoens hotu-hotu nebé Lei ida regula, labele viola lei né. Né, principio elementar Direito nian, e Governo iha barak liu mak Doutores no Doutoras, nebé halo tiha lei, hafoin sira viola ba interesses sira nian.
Tan sira maka hatene liu, iha mundu rai klaran, ema seluk mesak 'supermi', Congresso Fretilin nian foin dadauk né, bele viola lei, nebé sira mak halo, ho maioria iha Parlamento no matenek tomak iha Governo nebé hakerek lei ne, hodi halakon tiha sistema 'voto secreto' ba fali 'voto foti liman', halo povo tomak hamnasa ho triste, ba comédia Partido boot no histórico halo hela, atu rai ba ita nia história, loron ikus nian. (Tamba sei rai ba história, ha'u mos sarani GMT - Gedung Matahari Terbit, ba GAT - Gedung Angkat Tangan, hodi nuné la iha tan Partido ida iha ita nia rain, atu halimar fali ho povo, hodi viola uluk lei nebé sira, politicos nain sira, mak hakerek no aprova).
Doben sira
Fretilin, Partido histórico ida, ita hotu hatene. Iha 20 de Maio tinan 1974, mosu ASDT (Associação Social-Democrata de Timor). Ho influencia maluk estudantes universitários Timor oan, nebé estuda iha Portugal tempo nebá, nebé inclui mos Abílio Araújo, maka, iha 11 de Setembro tinan ida nebá duni, mosu ASDT/FRETILIN, to'o ikus mai sai deit ona Fretilin.
Jovens universitários sira nebá hatama, ba ASDT/Fretilin, orientação revolucionária, nebé sira aprende iha tempo fascista no colonial Salazar no Marcelo Caetano nian.
Ita hotu bele haré: FRETILIN, katak, Frente Revolucionária. Iha Maio 1977, iha Laline, iha reunião Comité Central Fretilin nian, adopta tiha ideologia marxista-leninista. Ha'u mos participa, nudar membro Comité Central. Maluk balun sei moris, mos participa, nudar membro Comité Central, hanesan Abel Ximenes Lari Sina, Filomeno Paixão, Feliciano de Fátima no Má Huno.
Maibé, ha'u bele dehan ba imi katak, iha 1975, Timor atrasado liu. Tecnologia, iha mundu mos, so ikus né ona fo hakat boot tebes ida, halo mundu sai kiik tiha. Ha'u fiar, ho ha'u nia laran tomak, katak se Nicolau Lobato, Sahe, Carvarino, Hamis Basarewan, César Mau Laka, Hélio Pina no Inácio Fonseca no seluk tan, mak moris to'o 2006, iha era pós-guerra fria nia laran, era globalização nia laran, era teconologia nia laran, sira hotu sei haré katak, ba Timor nebé sira hadomi tebes, hodi fo sira nia an ba mate, ideologia uluk nian la serve ona.
Ohin, grupo kiik-oan ida, nebé mai husi liur, hakarak repete fali, hahalok nebé ita liu tiha ona iha 1975 to'o 1978.
Tuir ita hotu temi, iha Agosto 1975, katak UDT halo golpe atu duni sai comunista sira husi ita nia rain, hodi hahú funu entre Timor-oan. Iha 2006, Fretilin hakarak halo golpe atu oho democracia, nebé sira rasik hakerek iha Constituição. Problema fahe kilat, la os ba situasaun nebé ita liu dadauk, iha tiha ona sira nia plano, fahe duni atu hasoru eleições 2007 nian. Tamba né mak ita rona beibeik, sira dehan: Fretilin deit mak bele kria estabilidade ka instabilidade.
Bain-hira Bases de Apoio hotu rahun, iha 1978, maluk sira iha ponta leste ho atan-oan ha'u, buka organiza-an hodi mos buka maluk sira nebé sei iha sector sira seluk, hodi hetan malu ho sira housi Bazartete/Likisa nian, Same no Ainaro. La fiar karik, husu ba maluk Veteranos sira nebé iha F-FDTL, tan ba, lae, imi bele hanoin katak ha'u mai inventa, hodi loko-an deit, hanesan ema balun nebé ha'u conhece, foin tama iha Partido Fretilin, haré fali ba ita ho matan sorin, hanesan sira mesak deit mak halo funu.
Maluk doben sira tomak Membros Fretilin nian
Iha Março 1981, iha Conferência iha Laline, reorganiza fali Resistencia, i tuir ami kostuma dehan, passa ba fase de guerrilha. Hanesan iha crise nebé ita hetan daudauk né, iha Conselho de Estado fo sai katak, haré didiak ba prioridade problemas sira nian, tamba ita la iha kbit atu resolve buat hotu dala ida deit; nuné, iha 1981 mos, ami nia prioridade, reorganiza uluk.
Tan ne, ami mos, iha 1981, sei kaer 'orientação ideológica' nebé ami simu husi matenek sira no ulun sira. Iha 1983, durante período 'cessar-fogo' ho TNI, husi Março to'o Agosto, ami komesa koalia daudaun kona ba demokrasia. Tan né, iha 1984, atu corrige falhas housi EMG-Falintil nian, iha Região Central, mosu 'CC Hudi Laran' nebé lakohi simu mudança política nebé, ami haré katak sei diak liu ba ita nia processo Resistência. Kona ba ida ne, maluk barak sei moris bele konta diak liu tan, ho 'rendarenda, biku-biku', lae, sira bele hanoin katak, ha'u mesak deit mak hatudu-an hanesan fali ha'u mesak mak hakerek ita nia história.
Ha'u hahú haruka surat ba liur, ba DFSE (Delegação da Fretilin em Serviço no Exterior) - bele husu ba Sr. Abílio Araújo, nebé ami hili, iha Março 1981, nudar Presidente FRETILIN no, tuir Estatuto Partido nian, sai mos nudar Presidente RDTL.
Ha'u mos dehan ba liur katak, iha ita nia rai laran, Unidade Nacional metin tiha ona, husi Tutuala to'o Fronteira, liu husi Oe-kusi no Jako, katak Igreja mos hamutuk ona, katak ema partidos seluk mos participa daudaun iha resistencia. Tan né, ha'u hakerek ba maluk sira iha liur atu tur hamutuk ho UDT, bele hakoak malu fali.
Iha liur nebá, iha Portugal, iha Moçambique no iha Austrália, kala 'intel' mos hafuhu namanas timor oan sira iha nebá, hodi bok-an ladiak, kala 'mau-hú' tuituir hela sira nia lalatak iha liur nebá, kala tamba né, kleur tebes duni mak sira hasoru malu, hodi hamosu 'Convergência Nacionalista', nebé mos hetan problema barak - bele husu Fretilin nia ema sira iha liur, no Sr. João Carrascalão no Sr. Vicente Guterres.
Ha'u temi sira nia naran, só para dehan katak, se hanoin ha'u bosok karik, husu ba sira.
Maibé, kala lia anin to'o maluk sira iha liur nebá katak Gadapaksi iha ita nia rain laran, hurlele jovens sira tasak diadiak. Nuné mak, iha Moçambique, Rogério tenta atu 'hetan pengalaman' hodi halo sira rasik mak tá malu e Ramos Horta mos sai tiha sira nia dadur. Presidente Chissano, tempo nebá sei
Ministro Negocios Estrangeiros, mak ba liberta Ramos Horta. Ha'u bosok karik, husu ba sira, tamba sira mak hela hakmatek, estuda sai doutor, iha tinan ruanulu resin hat nia laran, iha Moçambique.
Harí tiha Convergencia Nacionalista, iha Lisboa, iha ai-laran, ha'u kontenti tebe-tebes, hodi fo tan hakat ida ba oin. Iha Dezembro 1986, ha'u hamosu CNRM, ha'u husik Fretilin, tamba nudar Comandante Falintil Aswain ha'u tenki lori FALINTIL sai husi Partido ida nia okos.
FALINTIL sai, hodi nuné, nudar Forças Libertação Povo tomak nian, partidos tomak nian, ema hotu nian, loro-monu, lososa'e, tasifeto, tasimane, hodi hatutan Ramelau ba Matebian.
Ha'u dehan ba sira iha liur, katak, nudar Comandante FALINTIL, ha'u mak kaer funu. Katak mos, ha'u respeita nafatin FRETILIN, i membros CC nian hamutuk ho ha'u iha ai-laran, tama iha CNRM nia laran.
Lu Olo, dehan katak, iha tinan 24 nia laran, nia lori bandeira Fretilin iha nia kohe laran; kala tebes duni, maibé ha'u nunka haré. Bain-hira ha'u la'o, nudar membro Comité Central Fretilin, mai to'o raiklaran, hodi organiza fali Resistência, ha'u lembra katak nia, Lu Olo, subar hela iha Builó. Karik, suku hela kohe, hodi tau bandeira Fretilin nian.
Lu Olo dehan mos katak, sé mak sai husi FRETILIN, traidor no la iha história. Liafuan mamuk no beikten, tamba sé traidor, ha'u traidor uluk, ha'u traidor boot liu ba Povo ida né, no Rai ida né. Ha'u husik Fretilin, atu liberta ita nia Rain no Povo tomak. Tamba ha'u la oho Fretilin e respeita nafatin Fretilin, mak Lu Olo bele sai Presidente, hodi sai matenek foti uluk kartaun iha Parlamento Nacional, hodi maioria tuir, vota contra ka vota a favor.
Ha'u mak sinti-an hanesan traidor ka la iha história, hodi fila fali ba Fretilin, dala ruma Lú Olo la sai Presidente Fretilin.
Maluk sira tomak Membros Fretilin nian
Hanesan ha'u dehan iha kotuk, iha protesto maka'as tebe-tebes husi liur, dehan katak ha'u oho Fretilin. Abílio Araújo hakerek mai maluk sira Fretilin, atu reorganiza-an fila fali. Ami reune. Ma Huno, Mau Hodu, Konis Santana, nudar membro Comite Central Fretilin ho ha'u, ami decide atu hatún Abílio Araújo, tamba iha funu laran, ami labele simu ordem husi liur, tamba, husi liur, sira mak tenki tuir orientações husi laran.
Tamba, iha ai-laran mos, ami simu jornais husi Portugal, informações oioin, no rona mos radio, ami hatene katak, sira iha liur, iha rasik Fretilin nia laran, haré malu la diak, la hamutuk. Husu ba José Luis Guterres, Ramos Horta no Abílio Araújo, se buat sira nebé ha'u dehan, los ka lae.
Ami haré katak, keta em vez de tau sira nia hanoin ba Povo nia terus, sira bele han malu hodi hadau kadeira Presidente Fretilin nian e depois tenta comanda fali funu husi liur. Tamba, iha ai-laran, la iha ida buka kadeira, buka deit atu servi, hodi lori funu ba oin, sira nain tolu hateten mai ha'u katak, la iha ida husi sira hakarak sai Presidente Fretilin.
Nuné, ami decide atu cria CDF (katak, Comissão Directiva da Fretilin), hodi evita katak matenek sira, iha liur nebá, han malu buka sai Presidente Fretilin. Se maluk sira la fiar, husu ba Lu Olo, momento ne, nia iha nebé? Se nia iha Reunião ida nebá, nia sei bele dehan katak ha'u bosok karik, katak buat sira né ha'u inventa, tamba la lós.
Husu mos ba Lu Olo, tan sa mak ikus tiha, nia mesak mak kaer Comissão Directiva Fretilin nian, iha ai laran. La os, tamba Ma Hunu no Mau Hodu captura tiha no Konis mate tiha? Iha mundu né, ema balun haluha lalais tiha ema seluk nia ruin no ran nebé fakar ba 'Ukun Rasik An' i, at liu, bele tafui fali ba sira nia rate.
Iha ailaran, ami mos lê acusações husi Amnestia Internacional no Organizações Direitos Humanos, katak Fretilin mos comete crimes. Ha'u haruka mensagem ida ba liur, hodi reconhece duni katak Fretilin oho duni ema, tamba problema ideologia, hodi arrepende ba ida né. Iha liur, sira hotu hirus ha'u tebe-tebes, Abílio Araújo sai kedas deklara katak lae, buat nebé ha'u dehan, ne bosok.
Hahú iha né, ha'u mos taka dalan ba sira, tamba hodi relatorios no informasoens nebé ha'u haruka, mak sira mos koalia ba mundo. To'o 1989, ha'u haruka fali informações no relatorios sira ba CDPM (Comissão para os Direitos do Povo Maubere) nebé belun portugueses sira mak kaer.
Maluk sira hotu Maluk membros Fretilin nian
Iha 1989, ha'u iha Ainaro, ha'u simu surat ida husi Rogério Lobato, acusa sira hotu iha liur, katak sira la halo buat ida, dehan mos katak funu hotu tiha, hotuhotu tenki simu justiça popular. Rogério mak fo hatene mai ha'u, iha surat né, katak Mari Alkatiri hakiak hela coelho no manu iha Maputo.
Ha'u simu, iha 1990, surat ida husi Ramos-Horta oferese-an atu sai nudar ha'u nia representante espesial no representante CNRM nian iha liur. Ha'u subar hela iha Becora, ha'u hakerek ba nia, katak ha'u hatán, maibé tenki tuir prinsipius no orientasoens politicas nebé CNRM nian, no haktuir ha'u nia liafuan. Nia mos hatán fila fali, hodi dehan katak nia mos 'sai husi Fretilin' atu serbi ba funu. Se maluk sira la fiar karik, husu ba Ramos-Horta.
Iha 1991, iha Novembro iha Santa Cruz, maluk balun conta lori liu ba Fretilin. Ha'u respeita imi nia terus, maibé labele soe tiha ema seluk nia hanoin no hahalok, ba fali tahu laran. Hanesan né, ita la iha honestidade política. Labele temi Fretilin nia bandeira deit, tamba ha'u mak fo orientações atu lori mos UDT nia bandeira no bandeira Portugal, tamba tuir Resolução ONU nian, Portugal sei sai hela hanesan 'potência administrante'.
Manifestação atu husu 'solução pacífica', iha ONU nia mahon, ho participação mos husi Portugal no Partidos Politicos sira. Husu boot, labele dehan iniciativa Fretilin nian, tamba la os, tamba iha Comando da Luta ida, husi CNRM.
Iha fins 1998, ha'u fo kbit ba Manuel Tilman, Pe. Francisco Fernandes, Pe. Domingos Maubere no Pe. Filomeno Jacob, ba to'o Portugal hodi ajuda Ramos-Horta no Fretilin no UDT, hala'o Conferência hodi muda CNRM ba CNRT, nuné halibur Timor oan tomak iha laran. Tamba UDT la simu liafuan Maubere i hakarak 'T' ba Timorense. La fiar, husu ba Sr. João Carrascalão no sira seluk nebé, uluk iha liur.
Doben sira Maluk Fretilin nia membros sira
Iha 1998, se ha'u la sala, iha ona Reformasi nia laran, iha Indonesia, ha'u mak haruka Mau Hodu ba to'o Sydney e ha'u hakerek ba Fretilin atu organiza-an nudar Partido, hodi hatudu mos sira nia orientação político-ideológica.
Iha CNRM no CNRT nia mahon, mak Povo manán iha Agosto 1999. Ne mak história, história resistencia nian, história terus nian, história ran nian. Ohin loron, ita rona, Fretilin mesak mak halo funu. La buat ida, imi deit mak Funu nain, né ami simu, naran keta mai soe fali rai henek iha Povo nia matan, tamba povo tomak mak ba vota, la os Fretilin deit.
Iha Maio 2000, Fretilin convida ha'u ba koalia iha sira nia Conferência, iha GMT, agora sarani ona ba GAT. Ha'u husu buat tolu ba Fretilin:
- ida, revê, katak haré fila fali, kazu Xavier do Amaral nian, tamba nia la os traidor ba ita nia rain, maibé la simu ideologia nebé, iha Laline, Maio 1977, Comité Central hasai. - rua, ba ema hotu nebé Fretilin oho, tamba considera nudar traidor, maibé sira la os traidor, sira la simu deit mak ideologia marxista-leninista, ba sira né, hamós tiha sira nia naran, hodi família sira tur hakmatek. - tolu, Fretilin tenki husu deskulpa ba Povo, liuliu ba familiares vítimas sira nian. Iha Conferência ida nebá, ha'u hatete nuné: 'Nudar, membro Comité Central Fretilin nian, iha tempo hahú funu to'o funu nia klaran, buat diak hotu nebé Fretilin halo, ha'u mos halo parte, buat at nebé Fretilin halo karik, ha'u mos simu responsabilidade. La os katak ha'u sai ona husi Fretilin, mak ha'u hakarak atu fase liman.
Ha'u husu mos katak, naran Fretilin hasai tiha desizaun politica ida kona ba ne, ha'u rasik sei tun ba povo hodi husu deskulpa, hodi explica tan sa, hodi husu família sira compreende sala nebé halo tiha ona.
Liu tiha loron hirak, iha Fretilin nia festa, iha 20 de Maio 2000, iha Estádio, sira convida ha'u ba e, depois de Lu Olo, fo sai nia discurso, ha'u husu ba nia no Mari, kona ba ha'u nia pedidos nebé ha'u fo hela iha Conferência. Sira hatán katak sira harí tiha ona Comissão atu haré ba ida né.
Iha Agosto 2000, iha Congresso CNRT, Fretilin dada-an ketak tiha, hodi sai husi CNRT. Ami hakmatek nafatin, serbisu nafatin tuir processo polìtico nebé UNTAET mos kaer hela, to'o Junho 2001, CNRT dissolve tiha, tamba nia missão hotu tiha ona.
Iha Janeiro 2001, Ramos Horta fo hatene ba diak liu ha'u koalia ho Mari. Ha'u hatán katak, Fretilin mak loke CNRT nia odamatan atu sai, ema ida seidauk taka, hakarak mai, mai deit. Mari ba koalia ho ha'u, iha CNRT/Balide.
Nia dehan sira sai, tamba hirus ha'u, tamba ha'u husik fali ema balun ba koalia iha Congresso nia laran, hodi hamonu Fretilin nia naran. Ema sira né, mak familiares vítimas violência política FRETILIN nian iha ai-laran.
Ha'u hatán ba nia, ho hirus oitoan: 'Ita boot haluha tiha ona, imi nia Conferência iha Maio, nebé ha'u husu buat tolu ba imi. Hamós vítimas sira nia naran, ka husu deskulpa ba Povo, la os hatún Fretilin, maibé hadia ka hamós Fretilin nia naran'.
Ha'u dehan mos ba nia: 'Ita boot la iha liu razaun atu tauk, tamba ita boot bele dehan ba povo nuné: Ha'u, Mari, ha'u la iha buat ida ho hahalok sala nebé mosu iha ita nia rai laran. Ha'u, Mari, iha Maputu, terus tinan sanulu resin hat, maibé ha'u fase ha'u nia liman, loroloron, ho sabaun. Ha'u, Mari, nia liman mos. Se imi hakarak husu, imi husu ba Xanana, nia liman mak foer, nia liman mak ran'.
Ha'u dehan nafatin ba nia: 'Se ita boot koalia hanesan ne mos, ha'u simu, i ha'u sei ba husu desculpa ba Povo, bain-hira Fretilin halo decisão política ida kona ba ida né'.
'Lapangan Pramuka' muda ba 'Campo da Democracia', tamba Partidos hotu-hotu assina katak, sei harí Governo Unidade Nacional. Fretilin manán tiha, sira sés-an ba 'compromisso político' ida nebé sira simu. Se lakohi simu, lalika ba, do que ba tiha, assina tiha, no fim sé kotuk ba lia fuan nebé temi. Hanesan los Constituição nebé sira halo, Leis nebé sira halo. Sira halo tiha, fila kotuk, la kumpre tuir.
Povo nebé ha'u respeita tebes
Membros Fretilin nian
Hotu-hotu hatene no aceita, Fretilin manán iha Agosto 2001. Ita koalia lolós karik, ho respeito tomak ba Partidos oposição sira, maioria Fretilin nian mak halo Constituição RDTL, hodi define Estado de Direito Democrático.
Iha Estado de Direito Democrático, tuir Constituição, Forças Armadas no Polícia tenki apartidárias, labele defende partido ida.
Maibé, sa ida mak ita haré, Polícia iha Governo nia ókos, atu moris fo han fen ho oan, ladun brani atu dehan 'lae', ba ordem nebé mai husi Ministro Interior e, dala ruma, husi Primeiro Ministro rasik.
Iha dia 2 de Junho foin daudauk né, antes de reunião Conselho Superior de defesa e segurança, Brigadeiro Taur mai koalia ho ha'u e nia dehan: Presidente, ha'u dehan ba Dr. Roque Rodrigues, 'Imi nia sala boot, mak imi tenta atu lori fali F-FDTL ba Fretilin nia ókos'. Iha momento ida né, ha'u haksolok tebes, tamba ha'u hasoru fila fali ha'u nia Alin, nebé ha'u lakon tiha.
Serviços Informação ka Inteligência, sai fali inteligência partido nian, hodi rona tuir Presidente nia koalia iha Lospalos, 'sms' kedas ba Primeiro Ministro, hodi acompanha Partidos oposição sira nia actividades, mos 'sms' ba Primeiro Ministro. Jovens balun, iha Farol, haré buat ruma mós, 'sms' ba Primeiro Ministro. Ohin loron, tamba servisu la iha, ita hotu buka moris. Se mak iha osan, ita hakbesikan ba sira.
Ema hotu haré katak buat ida né akontese iha ita nia rain.
Foin daudauk né, reunião iha Baukau, balun dehan nunè: 'Xanana, nuné duni, iha funu, fahe ita, funu hotu tiha mos fahe nafatin ita'.
Ha'u compreende liafuan 'fahe' nia sentido. Nia sentido katak, ba sira politico no matenek boot sira né, lolós, povo ne tenki tama tomak ba Fretilin, Polícia, FDTL, funcionários, bisnis, suco, aldeia, karau, nehek, ai, du'ut, buat hotuhotu tenki tama iha Fretilin. Timor-Leste mak Fretilin, Fretilin mak Timor-Leste. Labele iha tan buat seluk, labele iha tan ema seluk. Né mak explika katak 'Xanana fahe Timor', tamba né, 'Xanana mak tenki tun'. Temi hanesan fali, ha'u hakarak ukun to'o tinan 50 nia laran.
Balun, uluk, iha 1991, ha'u hasoru sira iha Dili, fo parabéns mai ha'u, tamba hasai estratégia política nebé los, iha 1986, hodi hamoris CNRM. Ohin, hetan ona cadeira iha Governo, hodi hein, aban bain rua, sai Ministro, dehan fali ona katak, ha'u fahe Povo.
Povo doben no terus nain
Tamba né, mak liu tiha Congresso Fretilin nian, iha Maio kotuk, delegados barak ka balun simu kilat. Administrador Distrito no Subdistrito sira mos, rona dehan balun simu kilat. Tamba né mak, ita haré iha televisão, rona iha rádio, lê iha jornais sira, politico nain, matenek sira nebé kaer kuda talin nia tutun, dehan beibeik: 'Mari tun, ran sei nakfakar!', 'Mari tun, Timor rahun!', 'Mari tun, funu mosu!'
Comandante kala mak Rogério. Membros Comité Central sira kala sai hanesan Conselheiro Político, ba ideologia 'Ran Nakfakar', no ideologia 'Timor Rahun'! Vice-Presidente Parlamento mos gosta ona temi funu. Eh, osan barak ona, temi lerek funu.
História la'o daudauk, la'o nafatin, ita hotu nia hahalok mak hakerek história. Eurico Guterres, mundu tomak conhece, temi nudar assassino ho buat seluk tan i nia hetan prisão, i ita hotu temi nia
naran, tamba, iha Timor-Leste, ita hotu mesak santo deit, ita mesak heróis da Libertação, ita mesak político ukun nain nian. Maibé, interessante tebe-tebes!!!
Enquanto Eurico Guterres, iha 26 de Maio, haruka 'sms' ida mai, hodi husu ba ukun-nain sira atu labele halo povo sofre hanesan né, ita nia ukun-nain sira temi, ho kontenti, ´ran sei nakfakar', ´Timor sei rahun' no 'ita sei funu'.
História la'o daudauk, la'o nonok, la'o nafatin, hodi hakarek hela ita nia hahalok, diak ka at, mos ka foer.
La iha ema ida sei inventa história, ita mak halo daudauk ita nia história nebé triste no halo ita moe, no povo sofre.
Sira kala konta hela nafatin ho F-FDTL. Hodi sira nia hahalok, F-FDTL naran foer tiha ona. I ha'u fiar, F-FDTL, ohin loron, hein ha'u, atu ami koalia. F-FDTL, sala duni, maibé tamba ba rona fali ema-at, ba rona fali ema ke la hadomi povo, ba rona fali ema ke hakarak sosa povo nia klamar. Uluk, iha funu laran, ita dehan beibeik: Kilat musan la oho karik, fos ho super-mi bele oho. Katak, kilat musan bele oho deit mak isin, rupia, fos ho supermi oho klamar hotu dala ida.
Ha'u sei hatais fali farda, hodi foti fali F-FDTL nia naran. Ha'u sei la'o fali ho Falintil sira, nebé Povo Timor nia Aswain, nebé ohin loron tanis, tamba sira arrepende, lakohi rona sira nia Maun, ba se tilun fali ba ema hamrok-ran. Iha 2000, ha'u husik tiha FALINTIL, tamba ha'u hatene, sira kumpre tiha ona sira missão lulik atu liberta Pátria, sira boot hotu ona, ha'u bele husik sira la'o mesak. Hanesan CNRT, iha 20001, ami taka tiha, hodi ida-idak buka fatin iha processo foun, ukun-an nian.
Mas, ha'u pronto atu la'o fali ho sira, ba husu desculpa ba Povo. Ikus tiha, F-FDTL tomak, husi Brigadeiro-General to'o soldado foin tama, sei halo Juramento ba Povo, katak, nudar militar, sei hakru'uk ba Constituição, no respeita Leis sira, sei la depende ba Partido ida, no sei fo garantia ba liberdade no fo segurança ba população, no sei respeita ordem constitucional.
Ba PNTL, nebé, ema hamrok-ran buka fahe no soran, sei mos halo juramento ba Povo, katak, sei haku'uk deit ba Constituição, sei defende legalidade democrática no fo garantia ba segurança interna povo tomak nian e sei la tuir partido ida.
Iha loron 11 fulan Maio, Mari dehan ba ha'u katak nia desconfia Rogério, mak iha kotuk, iha 28 de Abril, tamba la cumpre nia ordem atu haruka kedas UIR ba hodi tahan manifestantes sira.
Semana rua liu tiha, Rogério ba mos Kaikoli e ba koalia ho ha'u. Ha'u dehan ba nia: 'Rogério, atu temi Nicolau Lobato, ha'u bele dehan ba o, katak ha'u hamutuk ho Nicolau iha momentos balun mais dificeis iha funu. Ema acusa o katak o fahe kilat. Fiar netik ha'u ba. Hanoin didiak ba, tamba iha funu, ha'u la lakon ema ruma husi ha'u nia familia, o lakon o nia família tomak. Nicolau ho o nia alin sira, haré hela ita, tanis hela, tamba buat sira nebé acontece daudauk. Ha'u hatene, sira lakohi ida né'.
Maluk sira
História boot ema hamrok-ran ne sei boot, sei naruk. Tamba, iha fatin-fatin, mosu comandantes kiik-kiik, namkari iha Timor tomak, hodi halo tarutu, hodi hatauk ema. Ema balun, kala husi Departamento Comunicação Comité Central nian, haruka beibeik 'sms' ba delegados sira, administrador sira.
Mas ho ansia, buti sala número, ema hotu hetan, e 'sms' husu atu lori 'povo rihun 10 husi distrito ida ne, rihun lima husi distrito ida nebá, atu apoia camarada Lu Olo no camarada Mari'.
Ohin, se mak atu sai funcionário, ka sai ministro, tenki prepara-an oho nia klamar rasik, tamba dolar kolu molik tiha ona princípios nebé sira iha karik, ita la hatene.
Ita haré momós, ema sira ne, halimar ho povo nia terus, usa povo atu defende sira nia kadeira, sira nia naran no sira nia bolso.
CAVR nia Relatório husu atu PÁRA HO VIOLÊNCIA POLÍTICA, hodi Povo labele terus tan dala ida. Foin, iha Janeiro kotuk nebá, mak ha'u lori Relatório né ba entrega ba Secretário-Geral ONU nian. La to'o fulan nén deit, kilat tarutu, ahi suar, ema mate fali iha Dili laran.
Jovem ida iha Lospalos, dehan ha'u traidor, tamba la defende Tribunal Internacional. Ohin loron, nia tur la hakmatek, loko-an los, iha Lospalos nebá, fiar katak Fretilin iha kilat atu halo funu.
Ha'u ba Lospalo, iha tinan kotuk, ha'u koalia ho sira, e ha'u dehan Fretilin tenki husu desculpa. Sira 'sms' kedas ba Mari. Iha reunião ida nia laran, Mari hatudu 'sms' né ba ha'u, hanesan kontenti tamba nia rede informações Partido nian, namkari iha Timor tomak, atu informa Presidente nia koalia ka oposição sira nia actividades.
Ha'u bele dehan ba jovem ida né, katak ha'u, agora, lakohi sai tan traidor ba Povo. Tamba sa? Bain-hira, Tribunal começa tesi kona ba crimes sira nebé akontese daudauk, ha'u sei husu ba Tribunais sira atu considera se bele hamamuk tiha Prisão Becora, Baukau no Ermera hodi simu bainaka foun. Sira hotu, nebé oras ne dadur, sira nia sala kiik, se ita compara ho ida nebé acontece daudauk. Crime contra Estado de direito democrático, crime contra povo ida ke terus tiha ona iha funu, durante tinan 24 nia laran. Becora, Baucau no Ermera sei simu bainaka oi-oin deit, corruptos lubuk ida mos, sei ba iha nebá e tenki ba iha nebá.
Comisaun Investigasaun Internasional sei mai, atu ajuda ita tomak, atu haré ba violência polìtica nebé mosu iha ita nia rain.
Buat hotu nebé CAVR halo no hato'o, hodi rona povo nia halerik, povo nia husu, povo nia exigência, ba políticos sira atu labele tan halo povo sofre, atu evita violência politica, buat sira né hotu, liderança Fretilin lakohi rona, la halo kazu.
Liderança Fretilin hatudu katak, halerik né, la os sira nia problema, tanis né, la os sira nia problema, povo terus mos la os sira nia problema, povo mate mos la os sira nia problema. Sira nia problema boot mak, halo oinsá deit, bele ukun nafatin. Liderança Fretilin nian, hatene deit acusa ema seluk, tamba sira nia arrogância, sira lakohi simu katak sira halo sala. Ba sira, sala la iha, buat nebé sira halo iha ona objectivo ida: kaer ukun.
Sira tenki hanoin deit mak funu, atu kaer ukun, tamba ukun fo buat hotu-hotu, osan, uma diak iha rai seluk, bisnis nebé hatama osan ba sira no ba partido, maibé partido né mak sira lubuk oan nebé kaer ukun.. Povo terus hela iha Dili laram, sira seidauk be haré Povo, seidauk ba koalia netik ho Povo. Sira hanoin deit mak atu mobiliza ema husi interior, atu hatudu katak Fretilin tomak hakru'uk ba sira, hodi re'i sira nia futar liman ho ain. Povo nebé mobiliza atu apoia sira, koitadu, kala sa'e kareta de graça, mai Dili, hakilar oitoan 'Viva ida n'e, Viva ida nebá', han tiha, fila ba uma, ke'e rai nafatin, oan atu ba escola mos, osan la iha, iha uma hamalaha hela deit.
Iha mensagem fim-do-ano, 2005, ha'u fo apelo ba jovens no povo tomak, atu labele fiar políticos sira nebé temi 'violência', dudu sira ba violência. Ita lakohi rona malu, ita hotu fiar katak, matenek boot liu iha mundu rai klaran, mak sira nebé, ho sira nia hahalok, bele fo osan ba sira, hodi hafoer Fretilin nia imagem, hodi hamate Fretilin nia naran no Fretilin nia história.
Ha'u hatene, Nicolau Lobato triste. Nicolau Lobato sei la husu, atu tau nia naran iha kintukantu. Nia la precisa. Buat nebé nia husu, mak ida deit: Respeita nia luta, atu liberta Rai né ho Povo né, respeita netik nia ran!
Lulik no Matebian sira, hadér ba, hodi haré povo ida né! Ruin nebé namkari lemorai, hamrik fali ba, Ran nebé nakfakar lemorai, hamutuk fila ba, hodi haré sira nebé hakarak estraga povo, hakarak halo povo terus beibeik, hakarak halo povo mate beibeik. Hatudu imi nia-an ba, hatudu imi nia kbit ba! Imi nia oan ha'u, mak né, sadik daudauk imi, hodi tau matan ba Povo né, hodi liberta tiha Povo né husi ema hamrok-ran nia okos.
Povo terus nain Membros Fretilin nian
Iha política, bain-hira ita halo sala, bele kiikoan ida, maibé ita la reconhese katak sala, ita sei halo sala barak no boot liu tan. Tamba la reconhece katak, iha 1975 to'o 1978, Fretilin oho membros Fretilin rasik no seluk nebé la aceita ideologia sira nian, ohin loron, buat oho ne, ba lideransa Fretilin la os problema. Oho, ba sira, katak, ema ida ka rua, ka sanulu, ka atus, ka rihun, mak mate. Buat nebé importante ba sira, Partido tenki maka'as, tamba sira tenki ukun nafatin.
Partido hanesan né, Partido ida ke lakohi democracia, partido ida ke hakarak impõe nia hakarak mai ita tomak.
Ha'u respeita Fretilin, tamba Fretilin mak hanorin ha'u hadomi Rai no servi ba Povo.
Povo tomak respeita Fretilin, tamba Fretilin iha História Timor-Leste nia laran. Maibé, Povo tenki hakribi ema balun nebé hakarak hamate Partido ida né, hodi halo mos Povo tomak terus.
Ema sira hanesan né, la merece iha Fretilin nia laran. Ha'u fiar, Partido sira seluk mos, sei la simu sira, tamba ema sira ne, hakarak susu fali povo nia ran, hakarak haré povo nia terus, atu sira ukun ba beibeik, hodi hetan diak. Partido ida nebé simu sira, Povo tenki cuidado, tamba Partido né, keta ikus mai sai hamrok fali karik, hodi husu hemu povo nia ran.
Rogerio sai husi Ministro, Mari foti nia ba Vice-Presidente Fretilin. Halo ita hotu mak moe ba politica foer né. Rogério ba Quartel Polícia nian, husu combustível ba kareta nebé sei iha nia. Encarregado Logística PNTL dehan: Ita boot la os Ministro Interior, labele hetan ona combustível husi PNTL. Rogério hatán, hodi tolok tan: Likrauk, ha'u agora boot liu Ministro, o hatene ka lae?
Iha 28 Novembro 2002, ha'u husu atu hasai tiha nia, tamba informações husi fatin hotu-hotu dehan katak, em vez de hala'o nia serbisu, ba organiza povo, atu tá ai, nia mak sei fa'an, kuda aifarina, nia mak sei fa'an, halo tua, nia mak sei fa'an, kaer ikan, nia mak sei fa'an. Ha'u koalia ho Mari, nudar Primeiro Ministro ho Ministro Horta, iha ha'u nia uman, antes de 28 de Novembro, 2002 né, kona ba Rogério. Ikus mai, tamba ha'u husu atu hasai nia, ha'u mak sala i 4 de Dezembro akontese, dun fali mai ha'u.
Ema hotu hatene kuak sira nebé ke'e hela iha Tibar, no fatin seluseluk, tamba Rogério buka osan mean, nebé nia rona katak Japoneses sira hakoi hela. Ita lalika admira ba hahalok nebé Rogério halo. Bain-hira, ita funu no terus daudauk, iha ita nia Rai-laran, Rogério, nudar Ministro de Defesa, hela iha Angola i aproveita halo tráfico diamantes, sai ema kaer tiha nia, hodi ba dadur. E Fretilin, tamba nia naran Lobato, ou tamba ema balun mos kanek, foti nia hanesan Vice-Presidente Fretilin nian.
Iha posse ba Ministro do Interior, ha'u kaer liman ho nia i ha'u dehan: 'Rogério, labele hanoin ha'u atu respeita ó, tamba o nia naran Lobato. Nicolau mos Lobato, mas nia Nicolau, ó, naran Rogério. Ha'u sei respeita ó, se ó nia hahalok hatudu mai ha'u atu bele respeita, mas la os tamba ó Lobato.' Investidores balun mai i buka hasoru ha'u i sira dehan: 'Presidente, imi nia sistema né oin seluk liu, atu investe iha imi nia rain, iha dalan rua: ida, tenki liga ba Agencia Investimento nebé Ministro Rogério mak kaer, ida seluk ba langsung ba ema boboot sira.
Empresários Timor oan balun ba dehan ba ha'u ho triste: Presidente, ha'u hetan tiha ona licença ba ha'u nia Companhia, maibé ami hetan pressão, osan balun tenki tama ba Fretilin. Ha'u husu ba sira,
'hakarak ha'u koalia sai?', i sira hatán ' Maun, ami hein tinan hirak kedas, osan mos lakon barak ona, husik ami recupera fali ami nia osan lai'.
Maluk Fretilin nia membros sira
Povo doben, terus nain
Tamba né, mak, nudar Presidente da República, nebé la aceita resultado Congresso loron 17 to'o 19, Maio kotuk ba, ha'u exige ba Comissão Política Nacional Partido Fretilin nian atu hala'o, lalais kedas, Congresso Extraordinário ida, atu hili, tuir Lei nº 3/2004, kona ba Partidos Políticos, Direcção Foun Partido nian. Ha'u dehan, tuir Lei, né katak, muda 'eleição foti liman' husi Estatuto Fretilin nian, hodi nuné eleição Direcção foun, tuir voto directo no secreto. Ha'u fo prazo to'o semana ida né, atu hala'o Congresso Extraordinário né, tamba actual Direcção Fretilin nian, Direcção ida que ilegítima.
Presidente Fretilin, Lu Olo, Vice-Presidente Fretilin, Rogério Lobato no Secretário-Geral Fretilin, Dr. Mari Alkatiri, sira né, tuir Lei Partidos Políticos nian, ilegítimo hotu.
Labele dehan Fretilin la iha osan, tamba Fretilin iha osan barak.
Até osan resto husi Congresso nian, Rogério sosa kareta rua ba grupo Rai Lós nian.
Iha tiha Direcção Foun, mak ha'u bele discute Crise agora né husu sa ida ba Estado atu decide. Tamba la os Fretilin mak sala, maibé ema matan-luan ba osan no ambisaun boot atu sa'e povo nia kotuk sira nia hahalok.
Sa ida mak Estado de direito democràtico? Artigo 1 ita nia Constituição dehan: 'Repúblika Demokratika Timor-Leste katak Estado ida nebé demokrátriku.... no iha respeito ba dignidade ema moris idaidak nian'. Ohin loron, ita temi 'funu', temi 'ran nakfakar', katak ita haluha tiha tolerância política. Uku nain sira hatudu katak, la iha respeito ba dignidade ema idaidak nian, hodi konsente ba violência, no destruição nebé halo ema lakon vida no sasán.
Iha artigo 6, Constituição dehan: Objectivo fundamental (katak 'dasar') Estado nian mak: alínea b) garante no promove sidadaun sira nia direitu no liberdade fundamental, no respeito ba Estado nia prinsipiu kona ba direito demokrátiku; alínea c) defende no garante demokrasia política. Iha crise né nia laran, ita rona mak ameasas oi-oin. Ukun nain sira ajuda viola daudauk objectivo sira nebé Estado nian rasik.
Iha artigo 29º, Constituição dehan: N.º 1 - labele viola ema ida nia vida; n.º 2 - Estado reconhece no garante direito ba vida.
Sa ida mak ita haré? Husik ema tiru malu, ema mate, povo sofre. Ukun nain sira ajuda viola Estado nia obrigação, la kumpre nia dever atu garante ba sidadaun idaidak, direito ba vida.
Buat sira né hotu mak halibur malu, fo sentido ba liafuan 'Estado de direito democrático'.
Povo, agora, enfrenta problema boot tebetebes ida: kilat iha ema civil nia liman, kilat taruto iha fatin barak. No mos, ha'u hakarak informa, Forças Intervenção, kaer kilat barak nebé la os PNTL nian ka F-FDTL nian.
Estado labele konsente buat ida né, terus ida né ba Povo. Ema balun temi katak 'ita lakon daudauk ita nia soberania'. La os tamba Forças Internacionais mai ita nia rain, mak ita sei lakon soberania, tamba ita mak husu i, liuliu, tamba ita mak hatudu, ita la iha kbit atu resolve problemas sira nebé mosu, hodi hamosu fali problemas boot liu.
Estado de direito democrático la os deit òrgãos soberania tur hamutuk, hamnasa ba malu, sai iha TV, koalia ba jornais sira, katak ami hamutuk. Unidade Nacional la os, ita rabat ba malu, hodi hatudu ita nia nehan ba povo. Unidade Nacional atu metin, metin husi ita nia hanoin no ita nia hahalok, metin husi rona ba povo nia lian, rona ba povo nia halerik. Ami ukun nain sira sempre haluha katak: povo bele terus, ami diak nafatin, iha careta Estado, iha uma Estado, povo terus, ami simu osan nafatin, povo hamalaha, ami bolu malu han diak deit, hemu tan tua, povo tauk tiru, ami la'o ho segurança maka'as.
Tamba ida né, ami costuma mos la rona povo nia halerik, tamba ami dok husi imi. Povo terus daudauk, balun sei brani dehan 'Funu!' Em vez de ami, Ukun nain sira moe, ami hatudu katak, povo nia sofrimento né la kona liu ba ami nia kulit.
Estado labele konsente ida né. Estado mós labele konsente katak iha kilat ilegal iha ita nia rai laran. Ha'u fiar, Fretilin mós labele konsente buat ne hotu. Se Fretilin konsente, Fretilin hakarak halo história foun iha ita Rai doben né.
Responsabilidade sé nian lós? Justiça sei haré, sé nia responsabilidade! E buat sira né hotu, grave tebetebes! I, ohin loron, ida né mak Povo preokupa! E Fretilin rasik tenki preocupa ho ida né.
Tamba né, ha'u fo APELO ida ba hotu-hotu nebé ohin loron kaer hela kilat, atu ba entrega ba Forças Internacionais sira, hodi hateten se mak fahe. Imi la iha culpa, tamba ema seluk mak lohi imi atu tama iha rai kuak. Se la entrega kilat sira ne, mak Forças Internacionais mak ba hetan, ne significa katak imi hakarak rai hela kilat atu oho ema. Diak liu, hotu-hotu nebé simu kilat, ba kedas ona entrega ba Forças Internacionais sira. Labele haluha, tenki dehan se mak fo ba imi no atu halo sa ida.
Inquérito komesa la'o daudauk ona kona ba fahe kilat ba civis sira no mos atu hatene kilat ilegal sira né, mai husi nebé no ba sé, sé mak husu, sé mak simu, sé mak iha alfândega husik sai. Imi hotu nia naran, ema sei temi.
Ema sira nebé kaer Fretilin, ikus ne, costuma hakilar nuné: vigilância máxima.
Agora, tempo ha'u mak husu fali ba povo atu halo vigilância maka'as iha Distritos no Subdistritos, ba sira nebé kaer no fahe kilat ba delegados sira, ka ba ema seluk. Se imi hatene ka haré ema balun iha hela kilat, maibé rai subar tiha ona, fo hatene ba Forças Internacionais ba hasai, se nia lakohi entrega. Se entrega agora kedas, sira fila kedas ba uma. Se ulun fatuk tós, subar hela ka hakoi hela kilat, sira sei responde iha Tribunal, kona ba, ho misaun sa-ida mak sira simu kilat né, i rai subar hela né, atu halo sa ida, atu oho sé.
Maluk sira tomak Povo doben, terus nain
Ha'u fiar tebetebes katak, ita hotu haré ona, ita tenki hanoin uluk liu mak povo nia terus. Nudar Presidente da República, bain-hira ha'u sai ba liur, ha'u sempre koa'lia hanesan né: Timor, caso sucesso duni, maibé sucesso né to'o deit, 20 de Maio 2002.
Processo ukun-an iha ita nia rai laran mak sei hatudu katak ita sucesso nafatin ka seidauk.
Ha'u fiar, ho crise boot tebes ida né, nebé la fo garantia ba Estado de direito democrático atu moris, ita sei hakat liu mota merak né, hodi harí duni buat foun iha ita nia rai, hodi haburas direitos humanos, haburas democracia, haburas domi no dame.
Membros Fretilin nian Povo doben, terus nain
Ha'u husu ba Primeiro-Ministro se nia hatene kona ba ema fahe kilat ba delegados Fretilin nian balun, nia dehan nia la hatene. Maibé, ikus ona, nia hatene tiha, nia haruka beibeik Rogério atu desarma. I Rogério haruka 'sms' ba Rai Los, atu para tiha iha dalan, manifestantes nebé contra Governo, hodi sunu tiha kareta sira no mos 'sms' atu halo 'operações comando' kalan i subar loron.
Iha reuniões nebé ha'u iha ho nia, Primeiro Ministro koalia kona ba grupos armados, dehan tenki desarma, i nunka dehan mai ha'u katak, pelo menos, grupo Rai Los nian, nia hatene Rogério mak arma.
Primeiro Ministro informa mai ha'u katak, depois de tiru malu iha Tasi Tolo, iha 24 de Maio, nebé FDTL captura polícia nia kilat hat, Rogério fo hatene ba nia katak kilat ho ema nebé mate ne, grupo Rai Los nian, nebé Rogério rasik mak koloka iha nebá.
Lolós, Primeiro Ministro informa ba Brigadeiro Taur Matan Ruak kona ba ida né, katak kilat polícia nian né, la Comando polícia mak fahe kilat, tamba Rogério mak fahe. Ha'u hanoin, karik Primeiro Ministro informa ba Brigadeiro Taur, Brigadeiro kala la bolu civis atu fo kilat hodi mai Dili, ho FDTL, buka tuir policia sira atu oho.
Ha'u husu ba nia, Primeiro Ministro, se nia hatene kona ba kilat ilegal nebé tama iha ita nia rain, nia dehan nia la hatene.
Problema hotu-hotu nebé mosu, la os tamba nia. Sira nia koalia, mak dun deit ema seluk. Antes de ha'u ba Portugal, ha'u husu atu resolve problema peticionário sira nian, iha uma laran, katak iha quartel laran, hodi evita 'lorosae loromonu' nakfera ba liur, atu estraga estabilidade no Unidade Nacional.
Nia dehan los duni, problema né problema político, i promete katak nia sei halo buat hotuhotu atu resolve. Ha'u to'o tiha Portugal, iha Internet, sai katak Primeiro Ministro dehan nia 'labele resolve, tamba petição l aba nia', hodi fo apoio ba decisão atu hasai peticionários sira.
Maibé, loron hahú manifestação peticionários sira, Antoninho Bianco lê comunicado ida, katak, 'agora, Primeiro Ministro bele ona resolve, tamba primeira vez, mak oficialmente, simu petição'.
Problema hotu-hotu nebé mosu, ema seluk mak halo, ema selu mak hakarak, hodi estraga nia imagem, hodi hatún Fretilin iha eleições 2007.
Como ukun na'in sira, iha Órgãos soberania sinti no hatudu katak, problema sira nebé mosu la os sira nia responsabilidade, ha'u dehan ba Povo tomak no ba Fretilin.
1. Ema hotu tauk se Mari tun, funu fila fali no ran nakfakar fali. 2. Ema barak preocupa, se Mari tun, Governo sei la funciona, ema la simu osan i buat oi-oin. No mos, se Mari tun,bancada maioria sei resigna hotu e Parlamento mos la funsiona. 3. Balun dehan mai ha'u katak, ita tenki hatudu ba Comunidade Internacional, katak iha normalidade institucional ka constitucional, lae ita moe boot, se interrompe tiha instituições sira né nia servisu. Ha'u, Povo mak hili. Tamba hili, ha'u tenki presta contas ba Povo. Ha'u, antes de atu buka satisfaz comunidade internacional, ha'u tenki hakruuk ba povo, terus na'in, nebé hili ha'u. Povo husu daudauk mai ha'u, nudar Presidente da República, ha'u nia responsabilidade iha nebé, kona ba 'garante
Unidade Nacional' nebé nakfera tiha, 'garante estabilidade' nebé rahun tiha, 'garante normal funcionamento instituições democráticas', nebé paralisado tiha.
Nudar Presidente da República, nebé Povo hili, la os foti liman, maibé ho voto directo no secreto, ha'u moe tebes, tamba ha'u la kaer didiak ha'u nia responsabilidade. Né duni, ha'u pronto atu assume responsabilidade ida né.
Presidente da República mak órgão soberania. Ema ida deit, ha'u mesak deit, mak Órgão Soberania né.
Tuir Constituição, se Presidente República resigna-an, Presidente Parlamento, Lú Olo, mai tur fali hanesan Presidente da República, hodi promulga lei, atu sira bele viola diak liu tan.
Buat hotu bele funciona nafatin. Governo ukun nafatin, hodi taka tiha estrada kuak barak iha cidade Dili e Parlamento mós bele foti liman nafatin, hodi fo han fen ho oan. Iha Parlamento, la iha problema: Jacob Fernandes sei la hanoin funu, tamba sa'e ba Presidente Parlamento.
Buat importante boot ida, mak ne: atan oan ha'u, nunka dehan katak, ha'u tun karik, povo sei terus ka Timur sei belar tiha. Né duni, estabilidade sei maka'as nafatin e, ha'u fiar, ho òrgãos Soberania unidos nafatin, Timor sei la'o ba oin.
Nuné, Fretilin mak hili. La os Direcção Fretilin nian, nebé ilegítima, tamba viola Lei no Constituição.
Ou husu responsabilidade ba imi nia camarada Mari Alkatiri kona ba Crise boot ida né, kona ba sobrevivência Estado de direito democrático nian ou, aban, ha'u mak haruka surat ida ba Parlamento Nacional, hodi informa katak ha'u sai husi Presidente da República, tamba ha'u moe ba hahalok at nebé Estado halo ba Povo e ha'u la brani atu haré ba povo nia oin.
Ikus liu, hau husu ba hot-hotu atu tur hakmatek, tanba momentu susar ida ne'e, ita hotu tenki halo refleksaun didiak hodi labele mosu tan violensia no destruisaun iha ita nia rain laran !



----------------------------------~->