Xanana fó ordem ba AMP reagenda visita PR ba Vaticano, PR dehan voto uluk mak mai husi fuan

Foto Especial!

Dili. Hafoin fó orientasaun ba AMP hodi vota  kontra visita PR ba Vaticano no mos iha agenda audensia ho Papa Francisco, loron 05 fulan Novembru tinan 2018, ho votu favor 26  (FRETILIN, PD, PUDD no UDT) no votu kontra 35 (CNRT, PLP no KHUNTO). Reasaun ba dezisaun ne’e mos la para husi Sarani sira, hierarquia Igreja Catolica rasik liu husi Konferensia Bispo sira nian, no impaktu mos ba diplomacia internacional, tanba importansia Vaticano iha politika Internacional.

Hare ba reasaun no impaktu sira ne'e hotu, iha encontro lideransa AMP liu husi Presidente AMP fó ordem ba  Arao Noe hodi reagenda fali visita PR ba Vaticano (13.11.2018).

Reasaun husi bankada Fretilin la simu:

"FRETILIN rejeita AMP nia pedidu atu loke fila fali diskusaun kona-ba assentimentu ba Prezidente da Repúblika nia Vizita Estadu ba Santa Sé, ne’ebé inklui audiénsia ho Santu Papa, Francisco (media bankada Fretilin PN)".

Presidente Parlamento Nacional, Arão Noe hasoru PR Dr. Francisco Guterres Lu´olo hodi konsidere fali  reagenda ba assentimentu visita PR  ba Santa Sé. Hatan Presidente República liu konferensia imprensa:

(...) "1. Votu ida ne’ebe deputadu maioria fo iha 5 novembru, votu ne’e resposável, votu ne’e mak tebes, votu ne’e mak loos liu;

2. Dia 6 novembru, ha’u haruka tiha karta ba sua santidade ba Amu Papa hodi informa katak imposivel atu vizita vatikanu tanba Parlamentu Nasionál vota kontra ha’u-nia vizita;

3. Tanba Prezidente Repúblika defende dignidade povu ida ne’e nian, la aseita Parlamentu Nasionál atu reajenda fila fali atu diskute fali ida ne’e;

4. PR sei informa iha tempu seluk bainhira sua santidade ou vatikanu fo fila fali data seluk, tempu seluk ida atu PR vizita fali Vatikanu. So iha ne’e PR sei informa fila fali. Maibé, atu reajenda fila fali Prezidente Repúblika la aseita". 

Deputado Duarte Nunes, husi Partido CNRT haktuir katak, "ami prontu vota iha tinan oin, wainhira PR husu atu PN nia asentimentu, ami sei votu favor (in GMN group, 19/11/2018)".

Tanba Saida mak Xanana muda  hanoin hodi fó ordem ba AMP  hodi reagenda fali Plenariu,  tuir Francisco Viegas, "Xanana sukat konaba reasaun publiku nian, hafoin ninia ordem ba AMP  hodi vota kontra visita Presidente República ba Santa Sé ne’e, ladun produtivu ba Estadu RDTL no ba nia rasik".

Dehan tan Francisco Viegas, "Xanana hanoin diplomacia Vaticano nian ne’e mak soft power ne’ebe nia konsidere votu kontra visita hanesan mos votu kontra ba rai seluk".

"Iha diplomacia internacional, influensia politika Vaticano nian bót, Henry Kissenger, ex-Ministru Negociu Estranjeiru Amerika, mos rekonese  iha ninia livro «The Diplomacy»", tenik Francisco Viegas, observador politika husi UNPAZ, Quinta-feira, 22.11.2018, iha knar fatin Washindo, Dili, Timor-Leste.

Barter politika ne’ebe AMP uja hodi vota kontra mak membru nain sia (9) ne’ebe mak PR seidauk fó pose. Se la fó pose, la autoriza, tanba ne’e AMP vota kontra dala ha (4) visita PR ba rai liur (*).