Partidu Mais Votadu Ka Aliansa Partidu Maioria Parlamental Mak Forma Governu?

PARTIDU MAIS VOTADU KA ALIANSA PARTIDU MAIORIA PARLAMENTAL MAk FORMA GOVERNU?

Husi Estanislau S. Saldanha

Estanislau S. Saldanha

Eleisaun parlamental 2017 hotu ona no rezultadu mos anunsia ona husi Komisaun Nasional Eleitoral (CNE). Husi distribuisaun votu no konversi ba kadeira uza metodu d'honk hatudu partidu lima mak hetan votu liu 4% (parliamentary tresh hold) hodi hetan asentu iha Parlamentu Nasional (PN). Husi nee, distribuisaun kadeira mk Fretilin (23), CNRT (22), PLP (8), PD (7), no Khunto (5). Husi partidu politika nebee hetan kadeira iha PN, partidu nebee mak sei forma governu?

Tuir Artigu 106 Konstituisaun Republika Demokratika Timor-Leste (KRDTL), formasaun governu mai husi partidu mais votadu ou aliansa partidu politiku  maioria parlamental. Partidu mais votadu, Fretilin  sei hetan uluk oportunidade hodi hamosu koligasaun maioria parlamental, indigita PM no forma governu. Tanba nee, Fretilin tenki negosia ho partidu politika sira seluk hodi hetan suporta koligasaun maioria iha PN hodi indigita PM no forma governu (Artigu 106 KRDTL). Nee tanba kadeira Fretilin iha PN hamutuk 23, la too 50+1 (33) hodi forma mesak governu. Karik la konsege forma koligasaun maioria parlamental ka akordu hodi hetan suporta husi partidu politiku sira seluk iha PN, governu la estavel no monu ka demiti (Artigu 112 KRDTL), mosu eleisaun antisipada nebee karu ba TL.

Sekarik Fretilin nudar partidu mais vontadu la konsege forma koligasaun maioria parlamental ka akordu suporta husi partidu seluk mak susar atu forma governu. Tanba governu minoria la estavel no monu bainhira nian programa la pasa daruak (Artigu 112) ka simu mosaun sensura (Artigu 111) iha PN.

Atu asegura unidade, estabilidade ho funsionamentu instituisaun demokratiku tuir Artigu 74 KRDTL, PR sei bolu partidu mais votadu daruak , CNRT hodi forma governu. Karik CNRT bele halo koligasaun maioria parlamental hodi garanti nia programa pasa iha PN, nia mak forma governu. Nunee mos enkontrariu. Experiensia nee uza ona iha TL iha tinan 2007 nebee CNRT forma aliansa maioria parlamental maski Fretilin nudar partidu politika mais votadu. Karik CNRT nudar mais votadu daruak mos la konsege forma governu mak sei mosu eleisaun antisipada.

Tanba nee save mak nee, partidu nebee forma governu mak partidu nebee forma koligasaun maioria parlamental ka hetan akordu husi partidu seluk hodi asegura governu nia programa pasa no governu estavel. Koligasaun partidu politiku maioria parlamental sei hare hetan ona bainhira atu hili Prezidenti, Vise Prezidenti ho Prezidenti Komisaun PN nian. Ka bele mos antes nee.

PR nudar Sefi Estadu nia knaar mak garanti estabilidade ho funsionamentu instituisaun demokratiku tuir Artigu 74 KRDTL, maka PR sei simu koligasaun partidu politiku sira ho maioria parlamental ka akordu partidu politika maioria parlamental hodi indigita PM ho forma governu. Espera PR bele fasilita negosiasaun, no lider partidu politiku sira iha sentidu estadu hodi hetan konsensu national ba interese nasional.***