Konfirmadu Elpar 2017 povu fo Vitoria ba partidu Fretilin

Notisia ikus – Breaking News
Forum Haksesuk, 27 Julho 2017

Konfirmadu Elpar 2017 povu fo Vitoria ba partidu Fretilin

Fonte ajensia notisia portugal nian, Lusa, ne’ebe Forum Haksesuk (FH) hetan asesu nomos publika iha Diario de Notosias Portugal nian fo-sai  katak verifikasaun votus reklamadus remata ona ho vitoria konfimadu ba partidu historiku Frente Revolucionária de Timor-Leste Independente (Fretilin).

Rezultadu kontajen final, Fretilin hetan 168.480 votus (ho total 29,7%), ne’ebe hetan kadeira rua-nulu resin tolu (23) garantidu ba nia deputadu sira iha Uma-Fukun, Parlamentu Nasional.

Partidu Congresso Nacional da Reconstrução Timorense  (CNRT) ne’ebe ukun tinan 10 ona sei hetan nafatin fiar husi povu ho votus hamutuk 167.345 (ho total 29,5%). Ho votus ne’e, partidu Maun Bo’ot Kay Rala Xanana Gusmao, hetan kadeira rua-nulu resin rua (22) iha Uma-bo’ot povu nian, Parlamentu Nasional.

Tuir kedas iha partidu bo’ot rua nia kotuk mak Maun Taur Matan Ruak ho estreante Partidu Libertasaun Popular (PLP) ne’ebe konsege halibur votu husi povu apoiante sira hamutuk 60.098 (ho persentajen 10,6%). Ho rezultadu ne’e, PLP delega nia ema na’in walu (8) husi partidu ba tur iha Parlamentu Nasional.

Partidu jerasaun foun nian, Partido Democratico (PD),  tuba-rai metin iha nia prinsipiu no komitmentu hodi reziste hasoru laloran bo’ot husi partidu jerasaun tuan sira nian. Mariano Assanami nudar Prezidente PD konsege konsolida apoiu husi baze ho aumentu numeru votantes, sa’e significativamente ba 55.608 ho total persentajen 9,8% (Votu sa’e kompara ho numeru votu husi tinan 2001, 2007 no 2012). Tinan ida  ne’e, 2017, PD manten nia reprezentasaun iha Parlamento ho deputadus na’in hitu (7*), menus deputadu ida consequente husi bareira 4%. (*PD hetan deputadus 8 iha Elpar 2012).

Ikus-liu mak partidu ho sigla KHUNTO (Kmanek Haburas Unidade Nacional Timor Oan) ne’ebe ho forma surpreza lulun votu lubuk ida ba ninia klibur hamutuk 36.547 (total 6,4%). Ne’e hatudu katak lia-menon ne’ebe mak partidu apelu iha tempu kampanha hetan resposta consideravel husi povu no fo kadeira hat (4) ba KHUNTO hodi reprezenta emar ki’ik sira aspirasaun no interesse ba ukun-nain sira (sani Governu) tuir promesa eleitoral.

Agora, tempu rekursu nian sei iha oras hat-nulu resin walu (48 horas) hodi remete ba apuramentu nasional, e, Tribunal iha tempu to’o oras hitu-nulu resin rua (ate 72 horas)  hodi proklama rezultadu ikuz (final) ho akordaun publika iha Jornal da República (JR).  AF/FH