PD konaba Kazu Sidadaun Emilia Pires, "Ema Hotu-hotu Hakruk Ba Lei"

PR Taur Husu Emilia Pires Rende 

Xanana "No Coment", CNRT defende Emilia Pires

Sociedade Civil, Emilia Pires Kaer Segredo Ruma

Emilia Pires

Dili, Forum Haksesuk (FH). Kasu Emilia Pires (EP) no Justiça, sai nudar preokupasaun husi komunidade, publiku em jeral, no hafahe opiniaun sociedade civil, Nain ulun sira, Presidente Republika (PR) Taur Matan Ruak (TMR), Xanana no CNRT, no Partido Democratico (PD) liu husi Deklarasaun bankada nian iha debate abertura  ba Orçamento Geral Estado (OGE) 2017.

Tuir Deklarasaun bankada PD (1), cita,:  "Bancada Partido Democrático hanoin katak ema hotu-hotu, atu bot ka ki’ik, kiak ka riku tenki moris tuir lei, no hakruk ba lei, enkuantu enfrenta problema ruma. Tuir Partido Democrático nia hanoin katak, Tribunal iha Timor-Leste ezerse ona nia knar no responsabilidade nudar konstituisaun haktuir. Maibe, dinâmika iha servisu justisa nian, hamosu preokupasaun públiku no hatur em kestaun kredibilidade ukun na’in sira nian iha Parlamento Nacional, Governu no Tribunal. Basa, públiku iha impresaun katak iha tendênsia halo diskriminasaun iha prosesu kazu iha Parlamento Nacional no Tribunal. Iha kazu balu, Parlamento levanta imunidade lais tebes, sein hamosu polémika oi-oin.  Maibe iha kazu seluk fo impresaun katak Parlamentu prosesa ho neineik no kleur tebe-tebes".

Haktuir tan PD liu husi Deklarasaun bankada PD, cita,: “Públiku preokupa, katak iha fulan hira liu ba, iha Uma Fukun Parlamento Nasional, ita halo debate maka’as atu autoriza ka la autoriza, Prezidente da Repúblika halo vizita Estadu ba Japaun. Infelizmente, deputados na’in 12 deit mak vota a favor ba Prezidente Repúblika nia vizita do Estado ba Japaun, maibe maioria deputado mak ezerse sira nia direitu hili abstensaun”.

Tenik tan PD liu husi  Deklarasaun bankada PD, cita,:  "Vizita do Estado Prezidente da Repúblika ba Japaun, sai nudar faktus polítiku nebe lori polémika bot iha nasaun ne’e, liu-liu iha Parlamento Nacional. Pelu kontráriu, sidadaun  ida nebe hetan alegasaun partisipasaun ekonómika iha tribunal, politíku sira, inkluindu deputado sira iha Parlamento Nacional, husik nia ba reprezenta povo no Estadu iha rai-li’ur, nein ida preokupa ka kestiona. Los duni, ita tenki kaer metin prinsipiu presunção de inocência katak, só tribunal de’it mak bele prununsia ema ida nia sala ka nia los. Maibe, tribunal atu prununsia, ema ida-ida tenki kolabora ho justisa, la’os atu halai sees husi justisa. Agora, ita hotu la hatene sidadaun ne’e sei fila mai hodi hatan iha tribunal ka lae? Karik buat hirak ne’e mak husik hela deit iha nasaun foun ida ne’e, maka Partido Democrático hanoin katak kredibilidade tribunal sai kestaun boot, ukun na’in sira bele lakon fiar hosi públiku, no povu sai desmoralizadu, nune, instituisaun Estadu sai fraku liu tan". 

PR Taur Husu Emilia Pires Rende

Kasu Emilia Pires mos la ses husi  Presidente Republika Taur Matan Ruak wainhira hatan ba povu ninia preokupasaun ,  hakerek Jornal Independente, Teraça-feira, "PR TMR husu Emilia Rende (Independente, 06/12/2016) pajinas 1 & 11 (2). Presidente Republika ninia apelu atu Sra. Emilia Pires, kumpri ordem Justiça Timor-Leste (idem). Waihira Jornalista kestiona asuntu Emilia Pires ba Xanana, resposta mak: «Nonok ka No coment», hakerek mos Jornal Independente.

Xanana "No Coment", CNRT defende Emilia Pires

Partido CNRT, liu Xefi CNRT defende Emilia Pires, haktuir Natalino dos Santos, "husu respeito Emilia Pires ninia Serviço (TP, 05/12/2016) pajinas 1 & 23, (3). Emilia ninia serviço ba Nasaun no Estado mak representa Timor-Leste ba g7+ no lidera Ministerio Finanças durante tinan 7, lori Estadu RDTL nia naran ba mundo.

Sociedade Civil Emilia Kaer Segredo  Ruma

Maibe Sociedade Civil, liu Diretor HAK Manuel Monteiro haktuir katak, "Emilia Pires kaer segredo balun"  (TP, 02/12/2016) pajinas 1 & 23, (4). Segredo saida no konaba saida, dala ruma tanba sa mak Maun bóot sira ba fó sasin konaba Emilia nia kasu? Iha Emilia Pires nia kasu, maun Xanana, Alkatiri no Ramos Horta ba fó sasin, hodi fo razaun ba dezisaun neébe mak Emilia Pires nian!  

Referensias:

1) Deklarasaun Bankada PD ;
http://forum-haksesuk.blogspot.com/2016/11/deklarasaun-politika-bancada-partido.html
2) "PR Taur Matan Ruak Husu Emilia Rende"
Jornal Independente, edisaun Terça-feira (06/12/2016), pajinas 1 & 11!
3) "Natalino dos Santos husu respeito ba Emilia Pires ninia serviço"
Timor Post, edisaun Segunda-feira (05/12/2016) pajinas 1 & 3!
4) "Sociedade Civil, Emilia Pires kaer segredo ruma"
Timor Post, edisaun Sexta-feira (02/12/2016)