VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20161208

Deklarasaun de Voto Orsamento Geral do Estado ba 2017

DEKLARASAUN DE VOTO  ORSAMENTO GERAL DO ESTADO BA 2017

“Kaer Metin Ukun Rasik An, no Hari Nasaun Hosi Baze”

Jacinta A. Pereira, Deputada do PD
Bancada Parlamentar Partido Democrático vota a favor ba OGE/2017 tamba lakohi impede desenvolvimento iha ita nia rai!

Maske nune, Bancada Partido Democrático halo asaun protestu ida ba lala’ok politika iha Parlamento Nacional, hodi halo silensiu politiku, ka la koalia buat ida, nein halo intervensaun durante debate iha espesialidade. Iha razaun 3 mak motiva PD halo silensiu politiku:

Primeiru, Bancada Partido Democrático kontra kriasaun Komisaun Eventual tamba: a). Komisaun Eventual taka dalan ba partisipasaun masimu deputado sira nian iha debate hodi ekspresa sira nia hanoin tanba buat nebe Komisaun Eventual deside, sei la debate tan iha plenaria;  b).  Komisaun Eventual mos halo deputado sira seluk, nebe laos membru Komisaun Eventual halimar deit iha uma durante periudu debate OGE nia laran; c). Komisaun Eventual muda natureza plenaria nudar fatin debate no hola desizaun, sai fali fatin aprovasaun ba desizaun hosi grupu ki’ik oan ida nebe halo tiha ona desizaun.

Segundu, durante debate iha espesialidade, Bancada Partido Democrático la halo intervensaun, tamba buat hotu Komisaun Eventual desidi ona, nune, la iha sentidu, nein kontiudu ba deputadu sira hodi kestiona ka expresa preokupasaun kona ba nesedidades básikas povu nian iha plenária, basa, plenaria ida ne’e la bele muda buat ida hodi aumenta ka hamenus orsamentu anual.

Terseiru, Bancada Partido Democrático hakarak hato’o nia lamentasaun tamba propostas besik ruanulu, hodi aumenta orsamentu ba setor Kapital Humanu no Setor Produtivu, hanesan Edukasaun, Saude, Bee mos, Agrikultura, Comercio e Industria no Turismo nebe ami hatama iha Komisaun Eventual,  laiha ida mak hetan apoiu husi Governo no Deputadu sira seluk. Maske nune, Bancada Partido Democrático submete nafatin ba desizaun maioria, nudar aktus demokratiku iha nasaun Republika Democratica de Timor-Leste.

Dili, 09 de Dezembru 2016

Jacinta A. Pereira
Deputada do PD

Sem comentários:

Enviar um comentário

Nota: só um membro deste blogue pode publicar um comentário.